1. Se a te ‵tou manakoga mō ‵tou kāiga?

“MAI te taimi ne tauloto ne au te munatonu, ne manako au ko tino katoa i toku kāiga ke ‵nofo fakatasi mo au i te Palataiso,” ne fai mai se tuagane e igoa ki a Pauline. * “Ne manako eiloa au ko taku avaga ko Wayne, mo te mā tamaliki tagata foliki ke ‵kau mai ki a au i te taviniga ki a Ieova.” E mata, e isi ne ou kāiga kolā e seki iloa ne latou a Ieova kae a‵lofa ki a ia? Ka ‵pau eiloa ou lagonaga mo Pauline telā ne mafaufau foki e uiga ki tena kāiga.

2. Ne a fesili ka sau‵tala tatou ki ei i te mataupu tenei?

² E se faimalo ne tatou a ‵tou kāiga ke talia te tala ‵lei, kae e mafai o fakamalosi ne tatou a latou ke ‵tala olotou mafaufau mo loto ki te fekau i te Tusi Tapu. (2 Timo. 3:14, 15) Kaia e ‵tau ei mo tatou o talai atu ki ‵tou kāiga? Kaia e ‵tau ei mo tatou o fakaasi atu te loto malamalama? Ne a mea e mafai ne tatou o fai ke fesoasoani atu ki ‵tou kāiga ke a‵lofa ki a Ieova e pelā mo tatou? Kae e mafai pefea ne tino katoa i te ‵tou fakapotopotoga o fesoasoani mai ki a tatou?

3. E ‵tusa mo te 2 Petelu 3:9, kaia e ‵tau ei mo tatou o talai atu ki ‵tou kāiga?

³ E se leva nei kae ka fakaseai atu ne Ieova a te olaga tenei. Ko “tino loto ‵lei katoa kolā e ‵tau o maua ne latou a te ola se-gata-mai” ka ‵sao atu. (Galu. 13:48) Kafai e mafai o fakamāumāu ne tatou a ‵tou taimi mo malosi ke talai atu ki tino fakaa‵tea i ‵tou fakai, ko ‵tau foki o faigofie atu ki a tatou ke talai ki ‵tou kāiga ke tavini fakatasi tatou ki a Ieova. A te ‵tou Tamana  alofa ko Ieova e “se manako ke fakaseai se tino e tokotasi kae e manako ke sala‵mo a tino katoa.”—Faitau te 2 Petelu 3:9.

4. Se a te mea ‵se e mafai ne tatou o fai māfai ko talai atu ki ‵tou kāiga?

⁴ E ‵tau o masaua ne tatou me e isi se auala tonu mo se auala sē tonu ke fakaoko atu te fekau o te fakaolataga. E tiga eiloa e mafai o talai atu tatou mo te atafai ki se tino fakaa‵tea, kae kāti e mafai eiloa o pati ‵toko ne tatou a ‵tou kāiga māfai e talai ki a latou.

5. Se a te mea e ‵tau o masaua ne tatou a koi tuai o fakailoa atu ne tatou te munatonu ki ‵tou kāiga?

⁵ A te tokoukega o tatou e mafai eiloa o sala‵mo ona ko te auala ne talai atu ei tatou i te taimi muamua ki ‵tou kāiga kae mafau‵fau tatou moi ne fai e fai ne tatou i se isi auala aka. Ne polopoloki atu te apositolo ko Paulo ki Kelisiano: “Ke fai faeloa otou pati ke ‵tagi ‵lei, ke faka‵kona ki te masima ko te mea ke iloa ne koutou te auala e ‵tau ei o tali atu ki tino taki tokotasi.” (Kolose 4:5, 6) Se mea ‵lei ke masaua ne tatou te manatu fesoasoani tenei māfai ko talai atu ki ‵tou kāiga. Kafai e se fai penā, e mafai eiloa o fai ne tatou ke ‵kalo latou i lō te fakamalosi atu o latou.

6-7. Taku mai se fakaakoakoga telā e fakamatala mai ei te tāua ke fakaasi atu te loto malamalama ki se avaga sē talitonu.

⁶ Fakaasi atu te loto malamalama. Ne fai mai a Pauline telā ne taku atu muamua, penei: “Ne manako fua au o faipati ki taku avaga e uiga ki mea faka-te-agaga. E se fai‵pati sāle māua ki mea e fai ne māua i aso takitasi.” Kae ko te avaga a Pauline ko Wayne, e se uke ana mea e iloa i te Tusi Tapu kae ne seki malamalama i mea kolā ne faipati ki ei a Pauline. Ne mafaufau tou tagata i a Pauline ne saga atu faeloa ki tena talitonuga. Ne manavase a ia me ko kau atu tou fafine ki se fakapotopotoga fakamataku kae ko oti ne fakaloiloigina.

 ⁷ Ne fai ‵tonu mai a Pauline me ne fakamāumāu ne ia te lasiga o ana taimi i afiafi mo fakaotiga o vaiaso mo ana taina mo tuagane faka-te-agaga—i fakatasiga, i te galuega talai, mo nisi maopoopoga. “E mafai o oko atu a Wayne ki te fale e aunoa mo se tino i ei kae ne mafaufau i a ia ko tuku tiaki,” ko pati a Pauline. A te ‵tonuga loa, ne misi ne Wayne a tena avaga mo tena tama. Ne seki iloa ne ia a tino kolā ne ‵nofo mo lāua, kae ne foliga mai me ko tāua atu ki a Pauline a ana taugasoa ‵fou i lō tou tagata. Ne gasuesue a ia o fakamatakutaku a Pauline ke ‵tala te lā avaga. E mata, e mafai o lavea ne koe a auala kolā ne mafai o fakaasi atu ne Pauline a te loto malamalama?

8. E ‵tusa mo te 1 Petelu 3:1, 2, i te auala fea e fakaasi atu ei ne tatou se ata ‵lei ki ‵tou kāiga?

⁸ Fai pelā me se fakaakoakoga ‵lei i ‵tou faifaiga. E pelā mo te masani, a mea e fai ne tatou e avatu i ei ne tatou se ata ‵lei ki ‵tou kāiga i lō ‵tou pati e fai. (Faitau te 1 Petelu 3:1, 2.) Ne fatoa lavea fakamuli ne Pauline a te mea tenā. “Ne iloa ne au me ne alofa mai a Wayne ki a māua kae ne seki manako tonu a ia ke ‵tala te avaga,” ne fai mai tou fafine. “Kae ne fai ne te fakamatakutakuga tenā ke iloa ne au o fai a mea i auala o Ieova. I lō te faipati faeloa, ne manako au o fakaasi atu se fakaakoakoga ‵lei e auala i aku faifaiga.” Ne fakagata ne Pauline a te fakamalosi atu ki a Wayne ke sau‵tala e uiga ki te Tusi Tapu, kae ne kamata o sau‵tala fakatasi lāua ki mea masani e fai ne lāua i aso takitasi. Ne kamata o lavea ne Wayne me ko gasolo o uiga filemu tou fafine, kae ko gasolo o ‵lei a tena tama tagata. (Faata. 31:18, 27, 28) I te taimi ne lavea ne Wayne a te aoga o te fekau mai te Tusi Tapu ki tena kāiga, ne kamata o talia ne tena mafaufau mo tena loto a te fekau mai te Muna a te Atua.—1 Koli. 7:12-14, 16.

9. Kaia e ‵tau i ei o tumau tatou i te fesoasoani atu ki ‵tou kāiga?

 ⁹ Tumau i te taumafai ke fesoasoani atu ki ou kāiga. E tuku mai loa ne Ieova se fakaakoakoga mō tatou. E tuku mai “faeloa” ne ia ki tino te avanoaga ke ‵saga atu ki te tala ‵lei kae ke maua te ola. (Iele. 44:4) Kae ne fai atu te apositolo ko Paulo ki a Timoteo ke tumau i te fesoasoani atu ki nisi tino. Kaia? Me mai te faiga penā, ka fakasao ne ia a ia eiloa fakatasi mo latou kolā e faka‵logo ki a ia. (1 Timo. 4:16) E a‵lofa tatou ki ‵tou kāiga, tela la e ma‵nako tatou ke iloa ne latou a muna‵tonu mai te Muna a te Atua. Ne maua eiloa ne te kāiga o Pauline a ikuga ‵gali fakamuli ifo ona ko ana pati mo ana faifaiga ‵lei. Nei la ko fiafia tou fafine ke tavini fakatasi atu mo tena avaga ki a Ieova. A lāua e paenia, kae ko Wayne e tavini atu e pelā me se toeaina.

10. Kaia e ‵tau o maua ne tatou te kufaki?

¹⁰ Ke kufaki. Kafai ko fakafetaui aka ‵tou olaga e ‵tusa mo tulaga o te Atua, kāti ka faigata eiloa ki ‵tou kāiga ke ‵fuli mai ki ‵tou talitonuga fou mo te auala e ola ei tatou. E pelā mo te masani, a te mea muamua e lavea ne latou me ko sē ‵kau tasi tatou i te fakamanatuga o aso fakamanatu fakalotu io me aofia i mea fakapolitiki. Nisi kāiga e mafai o kaitāua mai ki a tatou i te taimi muamua. (Mata. 10:35, 36) Kae e se ‵tau o ‵fiu vave tatou i a latou. Kafai ko se taumafai tatou o fesoasoani atu ke malamalama latou i ‵tou talitonuga, ko tena uiga ko fakamasino ne tatou me e se ‵tau o maua ne latou te ola se-gata-mai. Ne seki tuku mai ne Ieova ki a tatou a te ‵tofi famasino—ne tuku atu ne ia ki a Iesu. (Ioa. 5:22) Kafai e kufaki tatou, e mafai eiloa o loto fia‵fia ‵tou kāiga o fakalogo‵logo mai ki te ‵tou fekau.—Ke onoono ki te pokisi “ Fakaaoga ‵Tou Fakatuatusi i te Itaneti ke Akoako Atu.”

11-13. Se a te mea e tauloto ne koe mai te auala ne fakafesagai atu ei a Alice ki ana mātua?

¹¹ Ke ‵mautakitaki kae ke poto. (Faata. 15:2) Mafaufau ki te tala o Alice. Ne tauloto tou fafine e uiga ki a Ieova i te taimi ne nofo atu a ia i se koga e ‵mao mai i ana mātua, kolā e se tali‵tonu ki te Atua kae aofia i mea fakapolitiki. Ne iloa aka ne ia me e ‵tau o fakailoa fakavave atu ne ia ki a lāua a mea ‵lei ne tauloto ne ia. “Kafai e fakatalave koe ke fai atu ki tou kāiga a ou talitonuga ‵fou,” ne fai mai a Alice, “ka ‵poi malosi latou kae kaitāua foki.” Ne tusi atu ana tusi ki ana mātua, kae fai atu me ne a lā mafaufauga e uiga ki akoakoga i te Tusi Tapu ki mataupu kolā ne fakamoemoe a ia me ka fia‵fia lāua ki ei, e pelā mo te alofa. (1 Koli. 13:1-13) Ne fakafetai atu a ia ki ana mātua mo te putiakaga kae tausi atu ki a ia, kae ne lafo atu faeloa ne ia a meaalofa ki a lāua. I taimi e asi atu a ia ki ana mātua, ne fai ne ia te ‵toe mea e mafai ke fesoasoani atu ki tena mātua i galuega i te fale. I te taimi muamua, ne seki fia‵fia ana mātua i tena faiatuga e uiga ki ana talitonuga ‵fou.

¹² I te taimi ne ‵nofo ei a Alice mo ana mātua, ne ‵piki ‵mau a ia ki tena polokalame ki te faitauga ki te Tusi Tapu. “Ne fesoasoani atu te mea tenei ke iloa ne toku mātua a te tāua o te Tusi Tapu ki a au,” ne fai mai a Alice. E se leva, kae ne fakaiku aka ne te tamana o Alice ke tauloto a ia ki se mea e uiga ki te Tusi Tapu ko te mea ke malamalama a ia i te pogai ne ‵fuli ei tena tama, kae fia faka‵se foki ne ia te Tusi Tapu. Ne fai mai a Alice: “Ne tuku ne au ki ei se Tusi Tapu, fakatasi mo se tamā fakamatalaga i se pepa ki tou tagata.” Se a te ikuga? Ne seki maua ne ia se mea ‵se i te Tusi Tapu, kae ne otia malosi tou tagata i mea ne faitau ne ia i te Muna a te Atua.

¹³ E ‵tau mo tatou o ‵mautakitaki kae ke ‵poto, maise loa māfai e ‵tau o kufaki tatou i mea faiga‵ta. (1 Koli. 4:12e) E pelā mo Alice, ne ‵tau mo ia o kufaki i ‵tekemaiga mai tena mātua. “I te taimi ne papatiso ei au, ne taku au ne mami e pelā me se ‘tamaliki masei.’” Ne saga atu pefea a Alice ki ei? “I lō te kalo kea‵tea mai te faipati e uiga ki oku talitonuga, ne fakamatala atu ne au mo te āva me ko oti ne fakaiku aka i toku mafaufau ke fai pelā  me se Molimau a Ieova kae ka ‵piki ‵mau eiloa au ki te fakaikuga tenā. Ne taumafai au o fakatalitonu atu ki toku mātua me e alofa malosi au ki a ia. Ne ‵tagi māua, kae ne kuka ne au se mea‵kai gali. Mai te taimi tenā, ne kamata ei o malamalama toku mātua me i te Tusi Tapu ne ‵fuli ne ia au ke fai pelā me se tino ‵lei.”

14. Kaia e se ‵tau ei mo tatou o ‵fiu vave kae talia a fakamalosiga ke gutugutulua?

¹⁴ Kāti e tai leva loa te taimi e manakogina ke malamalama katoatoa a ‵tou kāiga i te tāua ke tavini atu tatou ki a Ieova. E pelā mo te mea tenei, i te taimi ne fakaiku aka ne Alice ke paenia a ia i lō te kausaki atu ki te galuega ‵togi telā ne filifili aka ne ana mātua mō ia, ne toe tagi foki a tena mātua. Kae ne ‵mautakitaki eiloa a Alice. “Kafai e talia ne koe a fakamalosiga konā,” ne fai mai a Alice, “ka mautinoa eiloa me ka fakamalosi ne ou kāiga a koe ki nisi mea aka foki. Kae kafai koe e atafai kae ‵mautakitaki foki, e mafai eiloa o faka‵logo mai a nisi o latou.” Tenā te mea ne tupu ki a Alice. Ana mātua ko paenia nei, kae ko tena tamana se toeaina.

15. E ‵tusa mo te Mataio 5:14-16 mo te 1 Petelu 2:12, e mafai pefea o fesoasoani mai a “galuega ‵lei” a nisi tino ki ‵tou kāiga?

¹⁵ E ‵taki mai ne Ieova a tino ki a ia e auala i “galuega ‵lei” a te fakapotopotoga Kelisiano. (Faitau te Mataio 5:14-16; 1 Petelu 2:12.) Kafai tau avaga e sē se Molimau a Ieova, e mata ko oti ne fetaui a ia mo tino o tau fakapotopotoga? A Pauline, telā ne taku atu muamua, ne ‵kami ne ia a taina mo tuagane ki tena fale ko te mea ke iloa ‵lei ne tena avaga ko Wayne a latou. Ne masaua ne Wayne te auala ne fesoasoani atu se taina e tokotasi ke malamalama a ia me ko Molimau ne vaegā  tino pefea: “Ne puke tena aso malōlō mai te galuega ko te mea fua ke vau o onoono fakatasi mo au i se tafaoga i te TV. Kae ne mafaufau au penei, ‘A ia e ‵lei loa!’”

16. Kaia e ‵tau ei o ‵kami ne tatou a ‵tou kāiga ke ‵kau ki fakatasiga?

¹⁶ E tasi o auala sili i te ‵lei ke fesoasoani atu ki ‵tou kāiga ko te ‵kami mai o latou ki fakatasiga a te fakapotopotoga. (1 Koli. 14:24, 25) Ne kau atu a Wayne ki tena fakatasiga muamua eiloa—te Fakamanatuga—me ne fai mai tua o te taimi ga‵lue kae e toetoe fua a te polokalame. “Ne seki malamalama faka‵lei au i te lāuga,” ne fai mai a ia, “kae ne masaua fua ne au a tino. Ne ‵mai latou ki a au kae fakatalofa matou. Ne lavea ne au a te atafai ‵tonu o latou.” Ne fakaasi atu loa ne se tauavaga te atafai ki a Pauline mai te fesoasoani atu ki tena tama i fakatasiga mo te galuega talai. Tela la, i te taimi ne fakaiku aka ei ne Wayne me e manakogina ke tauloto a ia ki mea e uke atu e uiga ki te talitonuga a Pauline, ne fakamolemole atu a ia ki te tagata ke suke‵suke fakatasi mo ia ki te Tusi Tapu.

17. Se a te mea e se ‵tau o ‵losi ne tatou ki a tatou eiloa, kae kaia e se ‵tau eiloa mo tatou o ‵fiu vave i ‵tou kāiga?

¹⁷ E fakamoe‵moe tatou katoa me ka ‵kau mai ‵tou kāiga ki a tatou i te taviniga ki a Ieova. Kae faitalia a ‵tou taumafaiga katoa ke fesoasoani atu ki ‵tou kāiga ke fai mo tavini a te Atua, e mafai eiloa o se ‵kau mai latou ki te munatonu. Kafai tenā te mea e tupu, e se ‵tau o ‵losi ne tatou ki a tatou eiloa a te fakaikuga ne fai ne latou. E tonu, e se faimalo ne tatou so se tino ke talia ne ia ‵tou talitonuga. Kae kafai e lavea ne ou kāiga a te lasi o tou fiafia ona ko koe e tavini atu ki a Ieova, e mafai eiloa o fakamalosi atu ki a latou ke fai foki penā. ‵Talo mō latou. Faipati atu i se auala poto ki a latou. Sa fakatalave! (Galu. 20:20) Ke loto talitonu me ka fakamanuia eiloa ne Ieova au taumafaiga. Kae kafai e filifili aka ne ou kāiga ke faka‵logo ki a koe, ka faka‵saogina eiloa latou!