I TE kamatamataga o te tausaga 1930 tupu, ne gasolo malielie eiloa ki mua a te galuega talai o te Malo i te fenua ko Pasili. Kae i te 1935, ne tusi atu a paenia ko Nathaniel mo Maud Yuille ki a Joseph F. Rutherford, telā ne fai ne ia te takitakiga o te galuega talai i te taimi tenā. Ne ofo atu laua ke volenitia mō te galuega kae ne tusi atu me e “loto fia‵fia eiloa laua o olo atu ki so se koga.”

A Nathaniel telā se initinia i mea fakatu‵tu kae ko litaea, ko 62 ana tausaga i te taimi tenā. Ne fai a ia pelā me ko te ovasia o te galuega talai o te fakapotopotoga a Molimau a Ieova i San Francisco, California i Amelika. Ne fakatoka ne ia te galuega talai i konā kae ne fakaaoga ne ia a mea faka‵lasi leo ke fakasalalau atu ei te tala ‵lei. Ko tena atamai mo te uiga loto fiafia ne fai pelā me se fakamanuiaga ki tena tauliaga fou e pelā me se tavini o te ofisa lagolago i Pasili telā e tausi atu ki kogā koga kolā e tokouke a tino e fai‵pati ki ‵gana kese‵kese.

I te 1936, ne oko atu a Nathaniel mo Maud ki Pasili, fakatasi mo Antonio P. Andrade, se paenia kae se tino foki e iloa ne ia te ‵gana Pasili. Ne avatu ne latou se mea faigaluega tāua—ne laleo e 35 mo te motoka mo mea faka‵lasi leo i ei. A Pasili ko te lima o fenua ‵lasi i te lalolagi kātoa, kae e toko 60 fua a tino talai o te Malo i ei! E ui i ei, ne mafai o fesoasoani atu a mea faigaluega konei ke fakaoko atu te fekau o te Malo ki te fia miliona o tino i loto fua i se fia o tausaga.

I se masina mai tua o te okoatuga a Nathaniel Yullie mo tena avaga, ne fakatoka ne te ofisa lagolago i Pasili te fono o te atufenua muamua telā ne fai i te fa‵kai o São Paulo. Ne olo fakatasi māua mo Maud telā e fakatele ne ia te motoka mo mea faka‵lasi leo i ei o fakasalalau atu se lāuga mō tino kātoa, telā ne otia i ei a loto o tino e toko 110 kolā ne fakalogo‵logo ki ei! Ne fakamalosi aka ne te polokalame o te fono a te loto tali‵tonu o tino talai,  kae fai ei ke momea aka te uke o olotou mea e fai i te galuega talai. Ne tauloto latou ki te auala ke talai atu mai te fakaaogaga o tusi mo testimony cards, e pelā foki mo laleo kolā e faka‵tagi atu i te ‵gana palagi, Siamani, Hungarian, Polani, Sepania, kae fakamuli ifo, ko te ‵gana Potukale.

A fono konei e tolu, kolā ne fai i São Paulo, Rio de Janeiro, mo Curitiba i te 1937, ne maua mai i ei a fakamalosiga e uiga ki te faiga o te galuega talai. Ne teletele atu te motoka mo mea faka‵lasi leo i ei mai tua o tino kolā ne ‵kau mai ki te fono kae kolā ne olo atu o talai mai fale ki fale. Ne tusi mai a José Maglovsky, se tamaliki tagata i te taimi tenā, penei: “Ne fakatoka ne matou a tusi faka-te-Tusi Tapu i luga i se taipola, kae kafai e fakatagi atu te fekau mai te motoka, ko olo i ei matou o fai‵pati ki tino kolā e au‵mai ki tua i olotou fale ke lavea ne latou a mea konā.”

I te taimi ne fai ei te papatisoga i te vaitafe, kae ko nisi tino e kou‵kou foki kae fakavelavela i te la. Se tauliaga gali eiloa ke talai atu te tala ‵lei fakatasi mo te fesoasoani o te motoka mo mea faka‵lasi leo i ei! Ne fakamaluga aka ne te ‵tagi o mea faka‵lasi leo a te lāuga a te taina ko Rutherford. Ne fakatamilo te motoka ne tino kolā ne fia fakalogo‵logo ki te lāuga telā ne ‵fuli ki te ‵gana Potukale. Fakamuli ifo, ne fakalogo‵logo eiloa a tino kolā ne papatiso ki pese o te Malo kolā ne faka‵tagi i te ‵gana Polani. Ne usu eiloa a taina mo tuagane i konā i ‵gana kese‵kese. “Ne fakamasaua mai ei a te auala ne fai‵pati kae malamalama i ei a tino taki tokotasi i olotou ‵gana eiloa i te taimi o te Penitekoso,” ko te lipoti mai te 1938 Yearbook.

Mai tua o te fono, i Aso Sa katoa, i lalo o te ua io me ko te la, ne faka‵tagi eiloa a lāuga mai te motoka mo mea faka‵lasi leo i ei ki tino i malae ta‵fao, fale, mo fale fai pisinisi ‵lasi i São Paulo mo nisi fa‵kai fo‵liki kae ‵pili mai. Ne fakaoko atu ne te motoka mo mea faka‵lasi leo i ei a polokalame i masina takitasi ki fale e 3,000 i fa‵kai o tino lepela telā e nofo ki se 60 maila (97 km) te ‵mao i te feitu ki matū o São Paulo. Fakamuli ifo, ne fakatu aka ei se fakapotopotoga. Faitalia te fakamataku o te masaki tenā, ne taumafai eiloa a tino talai o te Malo o ‵sala atu ki se taliaga ke asi atu ki te suā fa‵kai o tino lepela ke fakaoko atu ne latou te fekau fakamafanafana mai te Tusi Tapu.

I te fakaotiotiga o te tausaga e 1938, ne oko atu ei a laleo kolā e aofia i ei a lāuga i te ‵gana Potukale. I te Aso ‵Talo mō Tino ‵Mate, ne tele atu loa te motoka tenei i tanuga katoa kae faka‵tagi atu a lāuga konei, “Where Are The Dead?,” “Jehovah,” mo “Riches,” ki tino fanoa‵noa kolā e silia atu mo te toko 40,000!

Ne kaitaua a faifeau ki faka‵pulaga kolā ne fai e uiga ki muna‵tonu mai te Tusi Tapu, kae ne fakamalosi atu faeloa ki tino pule‵pule ke taofi aka te motoka mo mea faka‵lasi leo i ei. Ne masaua ne te tuagane ko Yullie se taimi e tasi ne fakamalosi aka ei ne se faifeau se vaitino tokouke ke olo atu o fakatamilo a te motoka. E se leva, kae oko atu te tino pule o te fa‵kai fakatasi mo ofisa pulisimani kae ne fakalogo‵logo foki ki te polokalame kātoa. Ne puke ne te pule o te fa‵kai se tusi faka-te-Tusi Tapu. Ne seki ai loa se fakalavelave ne tupu i te aso tenā. Faitalia a ‵tekemaiga konā, ne lipoti mai te 1940 Yearbook me ne taku ne tino Pasili a te tausaga e 1939 e pelā me ko te “‵toe taimi gali eiloa mō tino katoa ke tavini atu ki te Pule Sili kae folafola atu tena igoa.”

Ne fai te “motoka mo mea faka‵lasi leo o te Watch Tower” e pelā me se ‵fuliga lasi kae tāua i te faiga o te galuega talai i Pasili. Ne fai pelā me se kī tāua i te fakaokoatuga o te fekau o te Malo ki te fia miliona o tino. E tiga eiloa ne ‵togi atu ki tua a te motoka tenei i te 1941, ne tumau eiloa te vaitino o Molimau a Ieova i te folafolaatuga o te tala ‵lei ki tino loto ‵lei i kogā koga katoa o Pasili.​—Mai ‵Tou Faletusi i Pasili.