1. Talu mai te kamataga, se a te uiga ne lavea atu i te faiga o galuega a te Atua?

A IEOVA mo Iesu ko leva eiloa ne ga‵lue fakatasi talu mai te kamataga o te faitega o mea katoa. Ne fai mai a Iesu, te mea muamua a te Atua ne faite, penei: “Au ne nofo i ana tafa e pelā me se tagata poto i te fakatu‵tu, au ko te pogai o tena fiafia i aso takitasi.” (Faata. 8:30) Ne ga‵lue fakatasi a te Tamana mo tena Tama, kae ne faite ne laua a vaegā mea ola katoa kolā e lavea atu ne tatou i aso nei. Ne lavea atu a te ga‵lue fakatasi o laua i te faiga o galuega a te Atua. E lavea ne tatou a te uiga tenei i te faitega o te vaka i aso o Noa; i te taimi ne faite, te ofaga mo te fakamasikiga o te faleie tapu i te taimi ne faima‵laga atu ei a tino o te Atua i te koga lavaki; mo te faka‵tagiga mo te usuga fakatasi o pese kolā e avatu i ei a vikiga ki a Ieova i tena faletapu. Ne faka‵na eiloa a taumafaiga katoa konā ki te ga‵lue fakatasi.—Kene. 6:14-16, 22; Nume. 4:4-32; 1 Nofo. 25:1-8.

2. (a) Se a te mea ne tu ‵kese i ei a te fakapotopotoga Kelisiano i te senitenali muamua? (e) Ne a fesili ka sau‵tala tatou ki ei?

² A te uiga tenei ko te ga‵lue fakatasi ne lavea atu foki i tino o te fakapotopotoga Kelisiano i te senitenali muamua mai lalo i te takitakiga a Iesu Keliso, te ulu o te fakapotopotoga. Ne fakamatala mai  ne te apositolo ko Paulo me e tiga eiloa e maua ne Kelisiano fakaekegina taki tokotasi a “meaalofa kese‵kese,” “taviniga kese‵kese,” mo “taviniga kese‵kese e fai,” kae e “tasi fua te foitino” e aofia i ei a vaega katoa konā. (Faitau te 1 Kolinito 12:4-6, 12.) Kae e pefea la tatou i aso nei? E mafai pefea o tumau tatou i te ‵kau fakatasi i te talaiatuga o te tala ‵lei? Kae e mafai pefea o ga‵lue fakatasi tatou i te fakapotopotoga e pelā foki i loto i te kāiga?

3. Se a te fakaasiga ne maua ne te apositolo ko Ioane?

³ I te fakaotiotiga o te senitenali muamua T.A., ne maua ne te apositolo ko Ioane se fakaasiga e uiga ki agelu e tokofitu e ili mai ne latou taki tokotasi a pu. I te taimi ne ili mai ei ne te tokolima o agelu a tena pu, ne lavea atu ei ne Ioane “te fetū” telā ne to ifo mai te lagi ki te lalolagi. Ne puke ne te fetū tenā a te kī i ana lima ke ‵tala ki ei a te auala ki te lua ‵poko. Ne fanaka se au matolu mai te lua ‵poko, kae ne ‵sae mai i ei a sē akelise. I lō te fakamasei ne sē akelise a lakau kaina, ne fakamasei ne sē akelise fakatusa konā a “tāgata fua kolā e se maua ne latou te fakamailoga a te Atua i olotou lae.” (Faka. 9:1-4) Ne mautinoa eiloa i a Ioane a te lasi o te fakamaseiga ka fai ne sē akelise. E mata, e se ko sē akelise kolā ne aofia i mala kolā ne oko atu ki Aikupito i aso o Mose? (Eso. 10:12-15) A sē akelise fakatusa kolā ne lavea ne Ioane e sui ne latou a Kelisiano fakaekegina kolā e folafola atu ne latou a fekau ma‵losi e uiga ki te fakamasinoga a Ieova. E ‵kau fakatasi eiloa latou i te taimi nei mo te fia miliona o olotou taugasoa kolā e fakamoe‵moe ke ola i te lalolagi nei. E mautinoa eiloa me i te ‵kau fakatasi i te faiga o te galuega talai ne fesoasoani atu ki tino e tokouke ke tiakina ne latou a lotu ‵se kae ke saoloto mai te pulega a Satani!

4. Se a te galuega e ‵tau o fai ne tino o te Atua, kae se a te auala fua e tasi e mafai ei ne latou o fai a te galuega tenā?

⁴ E maua eiloa ne tino o Ieova se tiute lasi ke talai atu a te “tala ‵lei” ki te lalolagi kātoa a koi tuai o oko mai te gataga o te olaga tenei. (Mata. 24:14; 28:19, 20) E aofia i te mea tenei a te ‵kami mai o “so se tino telā e fiainu” ke inu ki te “vai o te ola e aunoa mo se ‵togi.” (Faka. 22:17) E pelā me ne tino kolā e aofia i te fakapotopotoga Kelisiano, e mafai pefea o manuia tatou i te faiga o te mea tenei? E fai ne tatou te mea tenei e auala i te ‘ga‵lue fakatasi kae e fealofani.’—Efe. 4:16.

5, 6. E ‵kau fakatasi pefea tatou i te talaiatuga o te tala ‵lei?

⁵ Ko te mea ke folafola atu ne tatou a te fekau o te tala ‵lei o te Malo ki te tokoukega o tino, e ‵tau o fai ne tatou a te galuega talai i se auala telā e fakatoka faka‵lei. Tela la, e ‵tau o maua ne tatou a fakatonuga ki te faiga o te galuega talai. A fakatonuga konei ne tuku mai e auala i fakapotopotoga i te lalolagi kātoa, kae e manakogina i ei a te ‵kau fakatasi. Kafai ko oti ne maopoopo tatou i te galuega talai, ko olo atu ei tatou o folafola a te fekau o te Malo ki tino katoa. E folafola atu eiloa ne tatou a te fekau e auala i te fai‵pati atu ki tino mo te tufatufaatuga ne tatou a te fia miliona o ‵kopi o tusi faka-te-Tusi Tapu. E mata, e taumafai koe o tautali ki te fakatonuga ke aofia i te galuega fakapito tenei? Mai te faiga tenā, ko aofia eiloa koe i te fia miliona o nisi tino kolā e ‵kau fakatasi o folafola atu a te fekau telā ne folafola atu ne te “agelu e eva loa i te vanimonimo,” telā e fakamatala mai i te Fakaasiga 14:6.

⁶ Se mea fakafiafia ke fai‵tau ki te Yearbook e uiga ki ikuga ‵gali o ‵tou galuega talai! Mafaufau foki la ki te auala e ‵kau fakatasi ei tatou i te taimi e tufatufa atu ei a pepa ‵kami o te fono fakapito, fono o te atufenua mo fono i atufenua. I maopoopoga penei, e fakalogo‵logo eiloa tatou ki lāuga fakamalosi loto mai te Tusi Tapu kae ‵saga tonu atu ki koniseti mo fakaasiga. E fakamalosi mai faeloa i vaega konei ke tuku atu ‵tou toe mea ‵lei ke tavini atu ki te Atua. E ‵kau fakatasi foki tatou mo ‵tou taina o fakamanatu a te mate o Iesu. Ona ko te te ‵tou  loto fakafetai mō te alofa faivasaga o te Atua kae faka‵logo foki ki te fakatonuga a Iesu, e maopoopo eiloa tatou fakatasi i te tausaga o fakamanatu a te mate o Iesu, māfai ko tō a te mata o te la i a Nisani po 14. (1 Koli. 11:23-26) E se ko Molimau papatiso fua e ‵tau o ‵kau atu ki ei. I vaiaso mai mua o te Fakamanatuga, e ga‵lue fakatasi eiloa tatou e pelā me se fakapotopotoga o ‵kami mai a tino ke ‵kau fakatasi mo tatou i te maopoopoga tāua tenei.

7. I te taimi e ga‵lue fakatasi ei tatou, ne a mea e mafai ne tatou o fai?

⁷ E se mafai ne se sē akelise fua e tasi o fai se fakamaseiga lasi. I se auala foki tai ‵pau, e se mafai foki ne tatou taki tokotasi o talai atu a te tala ‵lei ki tino katoa. Kae mai te ga‵lue fakatasi, ko mafai ei ne tatou o takitaki atu a te fia miliona o tino ki te tino telā e ‵tau o avatu ki ei a vikiga mo tavaega, ko Ieova! Kae e se tenei fua te auala e tasi e fakaopoopo mai ki te ‵kau fakatasi o tino o te Atua.

8, 9. (a) Se a te fakatusaga ne fakaaoga ne Paulo ke akoako ei a Kelisiano ke ‵kau fakatasi? (e) E mafai pefea o ga‵lue fakatasi tatou i te fakapotopotoga?

⁸ I tena tusi ki te kau Efeso, ne faka‵mafa atu ne Paulo a te fakateletelega o te fakapotopotoga mo te manakoga ke “na ‵tupu aka tatou i mea katoa.” (Faitau te Efeso 4:15, 16.) Se a te mea ka fesoasoani mai ke kausaki atu tatou ki te fakamoemoega tenā? Mai te fakaaogaga o te fakaakoakoga e uiga ki te foitino o se tino, ne fakasino tonu atu a Paulo ki te ‵kau fakatasi mai lalo i te takitakiga a te ulu o te fakapotopotoga, ko Iesu Keliso. Ne faipati eiloa a te apositolo e uiga ki ga‵lue fakatasi o “sokogā ivi katoa kae tuku mai i ei a mea kolā e manakogina.” Tela la, faitalia me i a tatou taki tokotasi koi fo‵liki io me ko ma‵tua, koi ma‵losi io me ko vāi‵vai, e mafai la pefea o fesoasoani atu tatou ki te ‵kau fakatasi mo te gasolo ki mua o te fakapotopotoga i te feitu faka-te-agaga?

⁹ A te kī tāua ki ei ko te faka‵logo kae āva ki a latou kolā ne ‵tofi aka ne Iesu ke fai ne latou a te takitakiga i te fakapotopotoga, ko toeaina. (Epe. 13:7, 17) E se faigofie faeloa a te mea tenei ki a tatou. Kae e ui i ei, e mafai o loto tali‵tonu tatou o akai atu ki te takitakiga a te Atua. E mafai o fesoasoani mai tena malosi galue ke ‵lago atu tatou ki fakatokaga a te fakapotopotoga mo te loto kātoa. Tela la, kafai e mafau‵fau tatou i nisi taimi me e se ma‵nako tatou o tau‵tali i fakatakitakiga konā, e ‵tau o fakaatata ne tatou a te auala ka fesoasoani atu ei a ‵tou uiga loto maulalo ki te ‵kau fakatasi o te fakapotopotoga. E se gata i ei, a te ga‵lue fakatasi i feitu konei ka fesoasoani mai ki a tatou katoa ke momea aka te lasi o ‵tou a‵lofa.

10. E fesoasoani atu pefea a tavini fesoasoani ki te ‵kau fakatasi o te fakapotopotoga? (Ke onoono ki te ata i te kamataga.)

¹⁰ E lasi ‵ki eiloa te tusaga e fai ne tavini fesoasoani ki te ‵kau fakatasi o te fakapotopotoga. Faitalia te kese‵kese o olotou ma‵tua, kae e ofo atu eiloa ne taina konei ke fai ne latou a galuega kolā e aoga ki tino katoa. E pelā me se fakaakoakoga, e fesoasoani atu latou ki toeaina mai te fakamautinoa aka me e maua katoa ne tatou a tusi mō te galuega talai. E se gata i ei, e tausi atu faeloa latou ki te ‵fuluga mo te faka‵fouga o mea ma‵sei o te Fale Tapuaki, kae talimalō faka‵lei ne latou a tino kolā e ‵kau mai ki ‵tou fakatasiga. Kafai e ga‵lue fakatasi tatou mo taina konei, e fesoasoani atu eiloa tatou i te fakateletelega faka‵lei o te fakapotopotoga.—Fakatusa ki te Galuega 6:3-6.

11. Ne a mea e mafai o fai ne taina talavou ke fesoasoani atu ki olotou fakapotopotoga ke ‵kau fakatasi?

¹¹ Ko oti ne panaki mo te tokoukega o toeaina a te faiga o tiute i te fakapotopotoga mō se fia tausaga. Kae ona ko te tulaga ma‵tua mo te sē mafai o fai ne latou a galuega e uke, ko manakogina i ei ke fai ne fakamafuli‵fuliga. E mafai eiloa o fesoasoani atu a taina talavou. E tiga eiloa e seki apo malosi latou, e mafai eiloa o fesoasoani atu a akoakoga fakamasani ke mafai o tausi atu latou ki nisi tiute. Se mea gali ke  kausaki atu a tavini fesoasoani ke fai pelā me ne toeaina! (1 Timo. 3:1, 10) Ko oti ne ga‵solo atu ki mua a nisi toeaina talavou ke fai pelā me ne ovasia o te fenua kae tavini atu ki nisi taina mo tuagane i fakapotopotoga e uke. E mata, e se loto fakafetai tatou ki te fesoasoani telā e tuku atu ne taina talavou konei mo te loto fia‵fia?—Faitau te Salamo 110:3; Failauga 12:1.

12, 13. Se a te mea ka fesoasoani atu ki tino katoa i te kāiga ke ‵kau fakatasi?

¹² I tafa o te fakapotopotoga, ke onoono aka nei tatou ki te auala e mafai o fakamalosi aka ne tatou a te ‵kau fakatasi i loto i te kāiga. Ne lavea ne te tokoukega me i te faiga o Tapuakiga a Kāiga i vaiaso takitasi e fesoasoani atu eiloa ki te fakamalosiga o te fesokotakiga o tino i loto i te kāiga. Ne fakapitoa eiloa a vaegā taimi fakafiafia penei ki mea faka-te-agaga, kae e fesoasoani a vaegā taimi penei ki te ‵kau fakatasi o tino i loto i te kāiga. A te faiga foki o fakatokaga mō te galuega talai, e mafai o fesoasoani atu ki te kāiga ke mafai o talai atu i se auala magoi. Kae ko te sau‵tala fakatasi o te kāiga ki te Muna a te Atua se auala e tasi e fai ei ke ‵pili te lotou fesokotakiga—ka a‵lofa latou ki te Atua e tokotasi kae fia‵fia foki o fai tena loto.

¹³ Ne a mea e mafai ne taki tauavaga o fai ke ga‵lue fakatasi i te avatuga o vikiga ki a Ieova? Kafai a te tauavaga ne tavini fakamaoni a Ieova, e mafai eiloa o maua ne laua te fiafia mo te fealofani i te lā olaga avaga. A Apelaamo mo Sala, Isaako mo Lepeka, mo Elekana mo Hana ne fakatau fakaasi atu ne latou a te a‵lofa ki olotou avaga. E ‵tau foki o fai tatou penā. (Kene. 26:8; 1 Samu. 1:5, 8; 1 Pe. 3:5, 6) Ka fai ne te mea tenā ke ‵kau fakatasi tatou mo ‵tou avaga kae fakapili‵pili atu ei ki te ‵tou Tamana faka-te-lagi!—Faitau te Failauga 4:12.

14. Kafai tau avaga e se tavini atu ki a Ieova, se a te mea e mafai o fai ne koe ke fakamalosi aka ei tou olaga avaga?

¹⁴ E fai mai te Tusi Tapu me sē ‵tau mo Kelisiano o ‵kau fakatasi mo tino sē tali‵tonu. (2 Koli. 6:14) Kae e pefea la a ‵tou taina mo tuagane kolā e ‵nofo fakatasi mo kāiga kolā e kese‵kese olotou talitonuga? A nisi tino kolā ko tavini atu nei ki te Atua ko oti ne a‵vaga i te taimi ne tauloto ei latou ki te munatonu, kae ko olotou avaga e se ne Molimau. Kae e ui i ei, a te fakagalue aka o fakatakitakiga i te Tusi Tapu e mafai o fesoasoani atu ki te ‵kau fakatasi o te kāiga. E aofia i ei a te ga‵lue fakatasi ki se tulaga telā e se mafai i ei o gutugutulua. E mafai o faigata a te mea tenei, kae mafaufau la ki ikuga. A te fakagalue aka o fakatakitakiga i te Tusi Tapu e mafai foki o fai pelā me se tofotofoga faigata māfai ko tapeapea keatea se tagata io me se fafine avaga mai te fakapotopotoga. Ne tupu eiloa a te mea tenei ki se tuagane Kelisiano e igoa ki a Mary. Ne tavini fakatasi atu eiloa laua mo tena avaga ko David ki a Ieova, kae i se 25 tausaga ko ‵teka, ne taofi aka ne David a tena kau atu ki fakatasiga a te fakapotopotoga. Kae e ui i ei, ne fakamaoni eiloa a Mary o kau atu ki fakatasiga mo fono kae ne taumafai o fakagalue aka a fakatakitakiga mai te Tusi Tapu i loto i tena kāiga, e aofia i ei a te akoakoga o ana tama‵liki e toko ono. I te taimi ko ma‵tua ei ana tama‵liki kae a‵vaga, ne tumau eiloa a Mary i te tavini fakamaoni atu ki a Ieova faitalia te faigata. Kae ne kamata o faitau ne David a mekesini kolā ne tuku atu ne tou fafine ki a ia. Fakamuli ifo, ne toe kau atu a David ki fakatasiga a te fakapotopotoga, kae ne masani o tausi sale ne tena mokopuna tagata telā ko ono ana tausaga se nofoaga mō ia. Kafai e se kau atu a David, e mafai o fai atu tena mokopuna ki a ia penei, “E misi ne au koe i te fakatasiga i te aso nei, e tupuna.” Kae nei la, ko tavini atu a David ki a Ieova mo te fiafia, kae ko fiafia foki a Mary me ko mafai o toe ‵kau fakatasi laua o tavini atu ki a Ieova.

15. E mafai pefea o fesoasoani atu a tauavaga ma‵tua ki tauavaga talavou?

¹⁵ Ona ko te uke o osoatuga a Satani ki kāiga i aso nei, se mea tāua eiloa mō tatou tavini a te Atua ke tumau i te ga‵lue fakatasi i ‵tou olaga  avaga. Faitalia te leva o te taimi ne avaga ei koe, ke mafaufau faka‵lei ki te auala e mafai o faipati io me fakamalosi aka ne koe tau fakaipoipoga. E mafai o fesoasoani atu a tino ma‵tua ki tauavaga talavou o te fakapotopotoga i te feitu tenei. I nisi taimi, e mafai o ‵kami ne tauavaga ma‵tua se tauavaga talavou ke aofia i te lā tapuakiga a kāiga. I te taimi e ‵nofo fakatasi ei latou, e mafai o lavea ne tauavaga talavou a te tāua o te fakatau atafai mo te ga‵lue fakatasi faitalia te leva o te taimi ne avaga ei.—Tito 2:3-7.

16, 17. Se a te mea e olioli ki ei a tavini a te Atua kolā e ‵kau fakatasi?

¹⁶ Ke fakaatata aka la ne koe a te kau Isalaelu i taimi o te Tusi Tapu e ‵viki atu ki a Ieova i se ‵kaiga fakamanatu e tasi i tena faletapu i Ielusalema. Ne mafai eiloa o fakatoka latou mō te malaga, tausi atu ki olotou manakoga, kae ‵kau fakatasi o tapuaki atu i te faletapu. E fakaasi mai i ei me ne ga‵lue fakatasi eiloa latou. (Luka 2:41-44) I aso nei, a koi fakatoka tatou mō te malaga ki loto i te lalolagi fou, e ‵tau foki mo tatou o ga‵lue kae ‵kau fakatasi. E uke ‵ki a taumafaiga e manakogina ke fai ne tatou. E mata, e ‵tau o saga faka‵lei atu koe ki te mea tenei?

¹⁷ Mafaufau la ki fakamanuiaga e faka‵tali mai mō tatou! Ko oti ne tiakina ne tatou a te olaga ‵nofo mavae‵vae mo kinauga kolā e fakamailoga ki ei a te tulaga o te olaga tenei ko ola nei i ei tatou. Kae ko fakatali‵tali nei tatou ki te fakataunuga o mea kolā ne ‵valo mai ne Isaia mo Mika—ko te taimi telā ka ‵kau fakatasi ei a tino o te Atua kae “olo ake ki te mauga o te Aliki [Ieova].” (Isa. 2:2-4, NW; faitau te Mika 4:2-4.) E tonu, ko oko eiloa i te tāua o te tapuakiga telā e fai nei ne tatou i te “fakaotiotiga o aso fakaoti” konei. Kae ka sili atu a te ‵tou fia‵fia māfai ko ola tatou i te taimi telā ka ‵kau fakatasi kae fealofani i ei a tino katoa o tapuaki atu ki a Ieova!