MAI mua malie o fanaka a ia ki te lagi, ne fai atu a Iesu ki ana soko, penei: “Ka fai koutou mo molimau ki a au . . . ke oko eiloa ki toe koga ‵mao o te lalolagi.” (Galu. 1:8) Ne mafai pefea o fakafesagai atu a Kelisiano i te senitenali muamua ki te galuega tenā?

Ne fai mai a Martin Goodman, se polofesa o te iunivesiti ko Oxford, penei: “A te faiga o te galuega talai ne fai ei ke tu ‵kese a Kelisiano mai nisi fakapotopotoga fakalotu, e aofia i ei a lotu Iutaia i te taimi o te pulega a te kau Loma.” Ne faimalaga atu a Iesu ki koga ‵mao o fai tena galuega talai. Mai te tau‵tali atu ki tena fakaakoakoga, e malamalama eiloa a Kelisiano ‵tonu me i te fakasalalauatuga o te “tala ‵lei o te Malo o te Atua” e aofia i ei a te ‵sala atu ki tino kolā e ma‵nako ke iloa ne latou a muna‵tonu mai te Tusi Tapu. (Luka 4:43) Tenā te pogai ne taku ei latou i te fakapotopotoga Kelisiano i te senitenali muamua ki “apositolo,” me ne fai latou pelā me ne sui kolā e uga atu ke olo o talai. (Male. 3:14) Ne fakatonu atu a Iesu ki ana soko, penei: “Tela la, olo atu koutou ki fenua katoa o fai a tino i ei mo fai a soko.”—Mata. 28:18-20.

Ko se ‵nofo fakatasi nei tatou mo apositolo e toko 12 a Iesu i aso nei, kae e tokouke a tavini a Ieova e fakaasi mai ne latou se manakoga ke fai pelā me se misionale. Mai te ‵kamiga ke fakalauefa atu te galuega talai, e tali mai latou, penei: “Ko au! Uga [atu] au.” (Isa. 6:8) A te fia afe o nisi tino kolā ko oti mai i Te Akoga i Kiliata, ne olo atu ki nisi fenua ‵mao. Ko oti foki ne olo atu a nisi tino ki nisi fa‵kai i olotou fenua eiloa. E tokouke a tino ko oti ne tauloto ki se ‵gana fou ko te mea ke aofia latou i tino kolā e tausi atu ki manakoga o fakapotopotoga io me ko potukau kolā e fai‵pati ki te ‵gana tenā. E se faigofie kae kese‵kese foki a fakanofonofoga o taina mo tuagane kolā e olo atu ki koga kolā e lasi te manakoga i ei io me ko latou kolā e tauloto ki se ‵gana fou. Ne talia ne latou a mea faiga‵ta konei ke fakaasi atu ei te lotou a‵lofa ki a Ieova mo olotou tuakoi. Mai te faiga o fakatokaga ‵lei, ne mafai ei o ofo atu a latou mo te fia‵fia ke fesoasoani atu  ki nisi tino. (Luka 14:28-30) E fai eiloa ne taina mo tuagane konei se tiute tāua ‵ki.

Kae e kese‵kese eiloa a fakanofonofoga. E se ko Molimau katoa e mafai o olo atu o ga‵lue i koga kolā e lasi te manakoga i ei io me ke tauloto ki se ‵gana fou. Tela la, e mata, e mafai o fakaasi atu ne tatou se manakoga ke fai pelā me se misionale i ‵tou fakapotopotoga eiloa?

Ne maua eiloa ne Kelisiano i te senitenali muamua se manakoga ke fai pelā me ne misionale, kae ne foliga mai me i te tokoukega ne ‵nofo atu eiloa i olotou fa‵kai. Kae ko te fakamalosiga telā ne tuku atu ki a Timoteo ne aoga eiloa ki a latou e pelā foki mo tavini katoa a te Atua: “Fai te galuega a te tino talai, kae fakataunu katoatoa tau galuega.” (2 Timo. 4:5) E ‵tau eiloa mo Kelisiano katoa o faka‵logo ki te fakatonuga ke talai atu te fekau o te Malo kae fai a soko, faitalia te koga e ‵nofo i ei latou. E se gata i ei, e mafai o fakagalue ne tatou a vaega e uke o te galuega fakamisionale i ‵tou fakapotopotoga eiloa.

E pelā me se fakaakoakoga, e ‵tau mo se misionale o fakamasani ki se fakanofonofoga fou i se fenua fakaa‵tea. E mafai o uke a mea ‵fou kae kese‵kese i te fenua tenā. Kae e a māfai e se mafai o olo atu tatou ki nisi koga kolā e lasi te manakoga i ei? E mata, e ‵tau o fakaiku aka ne tatou me e iloa ‵lei ne tatou a mea katoa e uiga ki koga talai a ‵tou fakapotopotoga? Io me taumafai tatou o ‵sala aka a auala ‵fou ke oko atu ki tino? E pelā me se fakaakoakoga, i te 1940, ne fakamalosi atu ki taina ke fakatoka se aso i vaiaso takitasi ke talai atu i auala. E mata, e mafai o aofia koe i te vaega tenā o te galuega talai? Kae e a te fakaaogaga o kā fakatekateka kolā e faka‵pa i ei a ‵tou tusi? Tenei eiloa te manatu tāua: E mata, kai mafaufau aka eiloa koe ki vaegā auala ‵fou kolā e mafai o fakasalalau atu ei ne koe a te tala ‵lei?

A te mauaga o se kilokiloga ‵lei ka fesoasoani mai ke loto finafinau kae fia‵fia tatou ki te galuega talai. A latou kolā ne loto fia‵fia o olo atu ki koga kolā e lasi te manakoga i ei io me tavini atu i se koga telā e ‵kese te ‵gana i ei ne ne tino talai kolā ko apo i te faiga o te galuega. Tela la, e fai eiloa latou e pelā me se fakamanuiaga ki tino e tokouke, i te taimi e fai ei ne latou te takitakiga i te galuega talai. E se gata i ei, e fai faeloa ne misionale a te takitakiga i te fakapotopotoga ke oko eiloa ki te taimi ko isi ei ne taina kolā e fetaui ‵lei ke fai ne latou te takitakiga. Kafai koe se taina papatiso, e mata, e ‘fia maua’ io me kausaki atu koe ke tavini atu mo te loto fiafia ki ou taina tali‵tonu i te fakapotopotoga?—1 Timo. 3:1.

E se gata fua i te kau atu mo te loto finafinau ki te galuega talai kae fai foki a nisi tiute i te fakapotopotoga, e isi aka foki ne nisi feitu e mafai o fesoasoani atu koe ki te fakapotopotoga. E mafai eiloa so se tino, e aofia i ei a tama‵liki io me ko tino ma‵tua, tagata mo fafine, o fai pelā me se fakamalosiga mo se “fakamafanafanaga lasi” ki taina tali‵tonu kolā e ma‵nako ki se fesoasoani.—Ko. 4:11.

Ke fesoasoani atu ki ‵tou taina tali‵tonu, e ‵tau o iloa faka‵lei ne tatou a latou. E fakamalosi mai te Tusi Tapu ke “na ‵saga atu tatou te suā tino ki te suā tino” māfai e fakatasitasi tatou. (Epe. 10:24) E fakaasi mai i pati konei me faitalia e seai se ‵tou fekau i mea e fai ne nisi tino, kae e ‵tau o iloa kae malamalama foki tatou i manakoga o ‵tou taina mo tuagane. Kāti e aofia i ei a manakoga aoga e pelā mo mea tau lagonaga, io me ko mea faka-te-agaga. E se fua i o toeaina mo tavini fesoasoani a te tiute ke fesoasoani atu ki taina tali‵tonu. E tonu, e isi eiloa ne taimi e manakogina i ei se fesoasoani mai taina konā. (Kala. 6:1) Kae, e mafai ne tatou katoa o fesoasoani atu ki taina mo tuagane ma‵tua, io me ko kāiga kolā e fe‵paki mo fakalavelave.

E pelā me se fakaakoakoga, i te taimi ne fakafesagai atu ei a Salvatore mo se fakalavelave i mea tau tupe telā ne fai i ei ke ‵togi atu ki tua tena pisinisi, tena fale, mo ana kope e uke, ne mafaufau eiloa a ia ki te auala e mafai ei o fakafesagai atu ki ei tena kāiga. Ne lavea ne se kāiga e tasi a te fakalavelave o te taina tenei. Ne fesoasoani atu latou i mea tau tupe, ‵sala ne latou a galuega a Salvatore mo tena avaga, kae fakamāumāu fakatasi a taimi e uke i afiafi ke fakalogologo kae fakamalosi atu a te kāiga kātoa. Ne tumau eiloa te va fakataugasoa o kāiga konei mō se fia o tausaga. Faitalia a te fakalavelave telā ne pokotia muamua i ei a te kāiga o Salvatore, ne ‵kilo atu latou ki taimi kolā ne masani o fakatasitasi ei latou e pelā me ne taimi fakafia‵fia ki olotou olaga.

E se fai eiloa ne Kelisiano ‵tonu a te lotu e pelā me se mea ‵funa. E pelā mo te mea ne fakaasi mai ne Iesu, e ‵tau o fakailoa atu ne tatou ki tino katoa a folafolaga ‵gali mai loto i te Tusi Tapu. Faitalia me e mafau‵fau tatou o olo atu o ga‵lue i nisi koga io me ikai, e mafai eiloa o ga‵lue tatou o fai a mea ‵lei mō tino katoa. Kae e mafai foki o fai tatou pena i te fakapotopotoga telā e tavini atu i ei tatou. (Kala. 6:10) Mai te faiga o te mea tenei, ka maua eiloa ne tatou te loto fiafia mai te tuku atu o ‵tou mea kae ka fesoasoani mai foki lavea atu a ‘fua o ‵tou galuega ‵lei katoa kolā e fai.’—Ko. 1:10; Galu. 20:35.