1, 2. (a) Fakamatala mai te pogai e fai ei a te papatisoga e pelā me se lasaga tāua ‵ki. (e) Ne a mea kolā e ‵tau o fakamautinoa aka ne se tino a koi tuai a ia o papatiso, kae kaia?

E MATA, a koe se tamaliki telā e mafaufau o papatiso? Kafai e tonu, ko tena uiga a te mea tenā se tauliaga tāua ko maua ne koe. E pelā mo te mea ne fakasae mai i te mataupu muamua, a te papatisoga se lasaga tāua ‵ki. Se fakailoga o tau tukuatuga—se tautoga tāua e fai ne koe ki a Ieova me ka tavini atu koe ki a ia ki te se-gata-mai mai te fakamuamua tena loto i lō so se isi mea aka i tou olaga. E malamalama koe me e ‵tau eiloa o papatiso koe māfai fua ko fetaui ‵lei koe mo te fakaikuga tenā, ko maua ne koe se manakoga tonu ke papatiso, kae ko malamalama foki koe i te uiga o tau tukuatuga.

² E a māfai e fakalotolotolua koe o papatiso? Io me e manako koe o papatiso, kae mafau‵fau ou mātua me e ‵tau mo koe o faka‵tali ke tai momea aka tou malamalama e uiga ki te ola e pelā me se Kelisiano tukugina atu? I te feitu tenā, ke mo a koe e loto vāivāi. I lō te fai penā, ke fakaaoga ne koe te avanoaga tenei ke gasolo ki mua a koi tuai koe o papatiso. Ke mafaufau faka‵lei koe ki te auala e mafai ei o fakatoka ne koe ou fakamoemoega e uiga ki (1) mea kolā e talitonu koe ki ei, (2) ki au faifaiga mo te (3) auala e fakaasi atu ei ne koe te loto fakafetai.

3, 4. Se a te akoakoga e tauloto ne tama‵liki mai i te fakaakoakoga a Timoteo?

³ Mafaufau la ki te auala e tali ei ne koe a fesili konei: Kaia e talitonu ei au me isi se Atua? Se a te mea e fakatalitonu mai me i te Tusi Tapu ko te Muna fakaosofia a te Atua? Kaia e talitonu ei au i te ola e ‵tusa mo te amioatua e ‵lei atu fakafia i lō te olaga telā e ofo mai ne te lalolagi? Ne seki fakatoka eiloa a fesili konei ke fai ei ke fakalotolotolua koe, kae ke fesoasoani atu ke tautali koe ki pati fakamalosi a te apositolo ko Paulo, penei: “Ko te mea ke fakatalitonu aka ne koutou me se a te loto o te Atua telā e gali, e logomalie, kae e ‵lei katoatoa.” (Loma 12:2) Kae kaia ne ‵tau ei mo Kelisiano i Loma o fakatalitonu atu ne latou se mea telā ko oti ne talia ne latou?

⁴ Mafaufau la ki se fakaakoakoga mai te Tusi Tapu. Ne masani ‵lei a Timoteo ki te Tusi Tapu. Ne akoako a ia ne tena mātua mo tena tupuna fafine talu mai tena “folikiga.” Kae e ui i ei, ne fakamalosi atu eiloa a Paulo ki a Timoteo, penei: “Ke tumau i mea kolā ne tauloto ne koe kae talitonu foki ki ei.” (2 Timo. 3:14, 15) Tela la, ne fakatalitonu aka ne Timoteo me ko oti ne maua ne ia a te munatonu. Ne talia ne ia ona ko te mea ne fakaaoga ne ia te malosi o tena mafaufau kae talitonu e uiga ki ei, kae sē ona ko te mea se fakatonuga mai tena mātua mo tena tupuna fafine.—Faitau te Epelu 5:14.

5, 6. Kaia e tāua ei ke iloa ne koe o fakaaoga te “malosi o tou mafaufau” a koi tamaliki koe?

⁵ Kae pefea la koe? Kāti ko leva ne iloa ne koe a muna‵tonu mai i te Tusi Tapu. Kafai e penā loa, kaia e se fai ei e pelā me se fakamoemoega ke sukesuke aka faka‵lei ki pogai e talitonu koe ki ei? Ka fakamalosi aka ne te mea tenā a tou loto talitonu kae ka fesoasoani atu ke mo a ma takitaki ‵se koe ne fakamalosiga ma‵sei mai taugasoa, mafaufauga o te lalolagi, io me ko ou lagonaga totino eiloa.

⁶ A te taumafai o fakaaoga a te “malosi o tou mafaufau” a koi tamaliki koe, ka fai ei ke toka koe o tuku atu a tali ma‵goi ki ou taugasoa māfai e ‵sae aka a vaegā fesili penei: ‘E iloa pefea ne koe me e isi eiloa se Atua? Kaia ne talia ei ne se Atua alofa a amioga ma‵sei? E mafai pefea o iloa ne tatou me e ola tonu eiloa te Atua?’ Kafai koe e fakatoka faka‵lei, ka sē mafai o fakavāivāi ei tou fakatuanaki, kae ka fakamalosi atu ki a koe ke momea aka faeloa a te faiga o au sukesukega totino.

7-9. Fakamatala mai a te auala e mafai ei ne mataupu fesoasoani kolā e maua i te vaega tenei “What Does The Bible Really Teach?,” o fakamalosi aka ‵tou loto tali‵ltonu.

⁷ A te faiga o sukesukega totino e fesoasoani atu ke mafai o tali aka ne koe a fesili, faka‵tonu aka a mea kolā e fakalotolotolua koe ki ei kae fakamalosi aka ei tou loto talitonu. (Galu. 17:11) Ko oti ne maua ne tatou a mea faigaluega kese‵kese kolā e mafai o fesoasoani mai. Ko oti ne lavea ne tino e tokouke a te aoga ke sukesuke ki te polosiua ko te Origin of Life—Five Questions Worth Asking mo te tusi ko te Is There a Creator Who Cares About You? E se gata i ei, ko oko eiloa i te gali kae aoga ki talavou e tokouke a te vaega e tasi i loto i te ‵tou website ko te “What Does the Bible Really Teach?” A mataupu fesoasoani konei e mafai o maua ne koe i te jw.org. Onoono ki te vaega BIBLE TEACHINGS. A mataupu fesoasoani konei ne fakatoka eiloa ke fakamalosi aka ei ‵tou loto tali‵tonu e uiga ki se mataupu faka-te Tusi Tapu.

⁸ Ona ko te mea e masani ‵lei koe mo te Tusi Tapu, kāti e mafai eiloa o tali fakavave aka ne koe a nisi fesili kolā e ‵sae aka i mataupu konā. Kae e fakatalitonu aka pefea ne koe me e ‵tonu au tali? Ne fakatoka eiloa a mataupu fesoasoani konā ke mafai o mafaufau faka‵lei koe ki te ukega o tusi fai‵tau kae tusi ki lalo ou manatu e uiga ki ei. E mafai o fesoasoani atu ke fakatoka koe ki te auala e fakamatala atu ei ne koe ki nisi tino a ou talitonuga kolā e fakavae ki te Tusi Tapu. A te vaega tenei i te ‵tou website ko te “What Does The Bible Really  Teach?” e fesoasoani atu ki tama‵liki e tokouke ke mafai o fakamalosi aka olotou loto tali‵tonu. Kafai e masani ‵lei koe ki te website, kaia e se taumafai ei koe o fano ki te vaega tenei kae fakaaoga ne koe i au sukesukega totino?

⁹ Kafai e fakamalosi aka ne koe tou loto talitonu, ka toka eiloa koe mo te lasaga tāua tenei ko te papatisoga. Ne fai mai se tuagane talavou, penei: “A koi tuai au o papatiso, ne sukesuke au ki te Tusi Tapu kae lavea aka ei ne au me tenei eiloa te lotu tonu. I aso takitasi o toku olaga, e gasolo aka faeloa o malosi a toku loto talitonu.”

10. Kaia e tāua ei ke fetaui ‵lei a faifaiga a se Kelisiano papatiso mo tena fakatuanaki?

¹⁰ E fai mai te Tusi Tapu, penei: “E penā foki te fakatuanaki e aunoa mo galuega, e mate fua.” (Iako. 2:17) Ka lavea atu eiloa a te malosi o tou loto talitonu e auala i au faifaiga. E ‵tau o pefea ‵tou faifaiga? E fai mai te Tusi Tapu me e ‵tau o fai a ‵tou “amioga ke ‵ma kae fakamaoni ki te Atua.”—Faitau te 2 Petelu 3:11.

11. E mafai pefea o fai a ‵tou “amioga ke ‵ma”?

¹¹ E mafai la pefea o fai a ‵tou “amioga ke ‵ma”? Māfai e ‵ma ‵tou faifaiga mo ‵tou amioga. Mafaufau aka la ki te mea tenei; I se ono masina ko ‵teka, i te auala fea ne fakaasi atu ne koe a te ‘malosi o tou mafaufau’ telā ko oti ne akoakogina faka‵lei, ke mafai o fakavasega aka ne koe a te mea tonu mai te mea ‵se? (Epe. 5:14) E mata, e mafai o mafaufau koe ki taimi kolā ne ‵teke atu ne koe se tofotofoga io me ko fakamalosiga ma‵sei mai taugasoa? I te akoga, e mata, e fakaasi atu ne koe se fakaakoakoga ‵lei ki nisi tama‵liki e auala i au amioga? E mata, e toka koe o ‵pulu tau talitonuga i lō te kau atu fua ki ou taugasoa i te akoga ko te mea ke mo a e fakatauemu ne latou a koe? (1 Pe. 4:3, 4) E tonu, e seai se tino e ‵lei katoatoa. Ke oko foki eiloa ki tavini a Ieova kolā ko leva ne tavini atu ki a ia, e mafai eiloa o ‵ma latou i nisi taimi ke fai‵pati atu ki tino e uiga ki te lotou fakatuanaki. Kae e ui i ei, a te tino telā ko oti ne tuku atu ki a Ieova, ka fakamatamata a ia ke tauave ne ia te igoa o te Atua kae fakaasi atu eiloa ne ia e auala i ana faifaiga.

12. Ne a nisi mea e aofia i te “fakamaoni ki te Atua,” kae e ‵tau o pefea ‵tou kilokiloga e uiga ki ei?

¹² Kae e a te “fakamaoni ki te Atua”? E aofia i te mea tenei a ‵tou mea e fai i te fakapotopotoga, e pelā mo te ‵kau atu ki fakatasiga kae aofia foki i te galuega talai. E aofia foki i ei a galuega faka-te-agaga kolā e se lavea ne nisi tino, e pelā eiloa mo ‵tou ‵talo mo sukesukega totino. E se kilo atu loa te tino telā ne tuku atu tena ola ki a Ieova ki faifaiga konei e pelā me se amoga ‵mafa. I lō te fai penā, ka fakaasi mai eiloa ne ia te kilokiloga a te tupu ko Tavita, telā ne fai mai penei: “Toku Atua, e fiafia au o fai tou loto! E tausi ne au au akoakoga i toku loto.”—Sala. 40:8.

13, 14. Ne a fakatokaga e mafai o fesoasoani atu ke fakaasi atu ne koe te “fakamaoni ki te Atua,” kae ne a aoga pefea te fakatokaga tenei ki nisi tama‵liki?

¹³ Ke fesoasoani atu ki a koe ke fakatoka ou fakamoemoega, e isi se pokisi o fesili i te itulau e 308 mo te 309 o te tusi ko te Questions Young People Ask—Answers That Work, Volume 2. I te pokisi tenā, e mafai ne koe o tusi au tali e uiga ki vaegā fesili penei, “Ne a mea e aofia ne koe i au ‵talo, kae se a te mea e fakaasi mai i ei e uiga ki tou alofa ki a Ieova?” “Ne a mea e aofia ne koe i au sukesukega totino?” “E mata, e kau atu faeloa koe ki te galuega talai faitalia me e se ‵kau atu ki ei ou mātua?” E isi foki se avanoaga i te pokisi tenā ke mafai ei o tusi ne koe ki lalo so se fakamoemoega e manako o fakatoka ne koe e uiga ki au ‵talo, sukesukega totino, mo te galuega talai.

¹⁴ Ne iloa aka ne te tokoukega o tama‵liki a te aoga o te mea faigaluega tāua tenei ke fakatoka ei latou mō te papatisoga. Ne fai mai se tuagane talavou ko Tilda, penei: “A tali kolā  ne fakatoka ne au ki fesili kolā ne ‵sae mai i te pokisi, ne fesoasoani mai ke toka ‵lei au o fakataunu a fakamoemoega takitasi konei. Tela la, mai te kausaki atu ki fakamoemoega konā, ne toka ‵lei ei au mō te papatisoga i te tausaga mai tua ifo.” Ne fakaasi mai foki ne Patrick, se taina talavou a te aoga o te mea tenei ki a ia: “Ko oti ne iloa ne au a oku fakamoemoega, kae ne tusi ne au ki lalo ko te mea ke galue malosi kae kausaki atu ki ei.”

15. Fakamatala mai a te pogai e ‵tau ei o fai a te tukuatuga e pelā me se fakaikuga totino.

¹⁵ E tasi o fesili telā e fakagalue ei tou mafaufau e maua i loto i te vaega tenei: “E mata, ka tavini atu koe ki a Ieova faitalia a taumafaiga a ou mātua io me ko ou taugasoa ke taofi aka koe?” Masaua, e pelā me se Kelisiano tukugina atu kae papatiso, ka tu atu eiloa koe i mua o Ieova o avatu se tala e uiga mō koe. A tau taviniga ki a ia e se ‵tau o faka‵na ki nisi tino e aofia foki i ei mo ou mātua. A au amioga ‵ma mo tou fakamaoni ki te Atua se fakamaoniga me e puke ‵mau koe ki te munatonu telā e takitaki atu ei koe ki te papatisoga.

16, 17. (a) Se a te mea e ‵tau o fakamalosi aka ei se tino ke fai pelā me se Kelisiano? (e) E mafai pefea o fakaasi ‵tou loto fakafetai mō te togiola? Taku mai se fakatusaga.

¹⁶ Ne fesili atu eiloa se tagata telā ne iloa ‵lei ne ia te Tulafono a Mose ki a Iesu, penei: “Te Faiakoga, se a te ‵toe fakatonuga sili i te Tulafono?” Ne tali atu a Iesu: “E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.” (Mata. 22:35-37) Ne fakamatala atu ne Iesu te pogai e ‵tau ei o papatiso se tino kae fai pelā me se Kelisiano—ona ko tena alofa ki a Ieova mo te loto kātoa. A te ‵toe auala ‵lei e mafai o ati aka ei ne koe a te alofa ki a Ieova, ko te mafaufau ‵loto ki te meaalofa sili telā ne tuku mai ne ia—ko te taulaga togiola a tena Tama. (Faitau te 2 Kolinito 5:14, 15; 1 Ioa. 4:9, 19.) Tela la, a te mafaufau ‵loto ki te togiola mo tena aoga ki a koe, ka fakamalosi aka ei koe ke fakaasi atu tou loto fakafetai mō te meaalofa tenā.

¹⁷ A tou loto fakafetai ki te togiola e mafai eiloa o fakatusa penei: Mafaufau māfai koe ne malemu, kae poi aka ko tu atu se tino o fakasao koe. E mata, ka fanatu fua koe ki te fale, koukou kae fakapuli atu a te mea ne fai ne te tino tenā ki a koe? Ikai! E mautinoa eiloa me ka fakaasi atu ne koe a tou loto fakafetai ki te tino telā ne fakasao ne ia tou ola. I se auala tai ‵pau, e ‵tau o sili atu te ‵tou loto fafetai ki Ieova te Atua mo Iesu Keliso. Me e aunoa mo te togiola, penei koi agasala eiloa tatou kae ‵mate. Kae ona ko te alofa sili o Ieova, ko mafai ei o maua ne tatou te fakamoemoega ke ola ki te se-gata-mai i te lalolagi palataiso!

18, 19. (a) Kaia e se ‵tau mo koe o mataku ke tuku atu tou ola ki a Ieova? (e) E maua pefea ne koe se olaga ‵lei mai te tavini atu ki a Ieova?

 ¹⁸ E mata, e loto fakafetai koe ki te mea ne fai ne Ieova mō koe? Kafai e penā loa, ko fetaui ‵lei ei koe ke tuku atu tou ola ki a Ieova kae papatiso. Masaua, a te tukuatuga e aofia i ei se tautoga tāua ki a Ieova me ko toka koe o fai tena loto ki te se-gata-mai, faitalia me ne a mea e mafai o ‵tupu. E mata, e ‵tau mo koe o mataku ke fai se tautoga penā? Ikai! Ke masaua me e eiloa ne Ieova a te ‵toe mea ‵lei mō koe, kae e “avatu ne ia te taui ki tino kolā e ‵sala malosi atu ki a ia.” (Epe. 11:6) A te tuku atu o koe ki a Ieova kae papatiso ka sē fai ne ia tou olaga ke masei, kae e mautinoa eiloa me ka fai ne ia ke ‵lei atu fakafia tou olaga. Ne fai mai se taina telā ko 24 ana tausaga kae ne papatiso i te taimi koi tamaliki ei a ia: “Ne mafai o tai ‵loto atu toku malamalama moi ne fai au ko matua, kae ko taku fakaikuga ke tuku atu toku ola ki a Ieova kae papatiso ne puipui ei au mai te kausaki atu ki fakamoemoega faka-te-lalolagi.”

¹⁹ Ko oko eiloa i te ‵kese o Ieova mai i a Satani telā e uiga kaimanako kae sē fia saga atu ki a koe! E seai se taui ‵lei e tuku mai ne Satani ki tino kolā e ‵lago atu ki a ia. Tela la, e mafai pefea o tuku mai ne ia se mea ‵lei telā e se maua ne ia? E seai se fakamoemoega ‵lei mō Satani. E seai se mea ‵lei e mafai o ofo atu ne Satani ki a koe, kae nā ko te olaga fakafanoanoa fua i aso mai mua telā ko pili o maua ne ia!—Faka. 20:10.

20. Ne a mea e mafai o fai ne se tamaliki ko te mea ke gasolo atu ki mua kae tuku atu tena ola ki a Ieova kae papatiso? (Ke onoono foki ki te pokisi “ Ke Fesoasoani Atu ki a a Koe ke Gasolo ki Mua i te Feitu Faka-te-Agaga.”)

²⁰ E manino ‵lei, me i te tuku atu o tou ola ki a Ieova ko te ‵toe mea ‵lei ke fai ne koe. E mata, ko toka koe o papatiso? Kafai e penā loa, ke mo a ma fakatalave ne koe. I te suā feitu, kafai koe e mafaufau i a koe seki toka, ke fakaaoga a manatu fesoasoani i te mataupu tenei ke tumau ei tou gasolo ki mua. Ne tusi atu te apositolo ko Paulo ki te kau Filipi, penei: “Ke na sa‵sale faka‵lei tatou e ‵tusa mo te ‵tou ga‵solo ki mua i te auala eiloa tenei.” (Fili. 3:16) Kafai e tautali koe i te manatu fesoasoani tenā, ka manako eiloa koe o tuku atu tou ola ki a Ieova kae papatiso.