1, 2. I te taimi e ga‵solo ei tatou ki mua i te feitu faka-te-agaga, ne a mea e tauloto ne tatou? Fakamatala mai.

E MAUA ne se tamaliki foliki se meaalofa. E fai atu ana mātua, “Fai atu te pati fakafetai.” E fai atu ne ia te pati tenā, me ne fakatonu atu ana mātua ke fai ne ia. I te taimi ko gasolo ei a ia o matua, ko kamata o malamalama a ia i te pogai e mafau‵fau ei ana mātua me e tāua ke loto fakafetai māfai e atafai atu a nisi tino ki a ia. Kae nei, ko fakaasi atu faeloa ne ia te loto fakafetai mai tena loto. Kaia? Ona ko te mea ko fai a te loto fakafetai e pelā me se vaega o tena mafaufau.

² I se auala tai ‵pau, i te taimi ne tauloto ei tatou ki te iloaga e uiga ki te munatonu, ne iloa ne tatou te tāua o te fakalogo ki fakatonuga a Ieova. Kae i te taimi e ga‵solo ei tatou ki mua i te feitu faka-te-agaga, e tauloto tatou ki mea e uke atu e uiga ki mafaufauga o Ieova—mea e fiafia a ia ki ei, mea e se fiafia a ia ki ei, mo tena kilokiloga e uiga ki nisi mea. Mai te tauloto ke fakasako‵sako kae ke talia ke fulifuli ne vaegā mafaufauga konā a ‵tou faifaiga mo fakaikuga totino, e fakaasi mai ei me e fai ne tatou a mafaufauga o Ieova e pelā me i o tatou.

3. Kaia e mafai ei o faigata ke fai a mafaufauga o Ieova e pelā me i o tatou?

³ E tiga eiloa se mea fakafiafia ke tauloto tatou ke mafau‵fau pelā mo Ieova, e mafai foki o fai pelā me se mea faigata. I nisi taimi, a  ‵tou tulaga sē ‵lei katoatoa e mafai o fakalavelave mai. E pelā me se fakaakoakoga, e mafai o faigata ke malamalama i te kilokiloga a Ieova e uiga ki te ‵ma i mea tau amioga, fia maumea, te galuega talai, fakaaoga ‵se o te toto, io me ko nisi mea aka. Se a te mea e mafai ne tatou o fai? I te auala fea e mafai o tumau tatou i te ga‵solo ki mua mai te fai ne tatou a mafaufauga o Ieova e pelā me i o tatou? Kae e mafai pefea o aoga a te mea tenā ki ‵tou faifaiga i aso nei mo aso mai mua?

4. Se a te mea e aofia i te fakamalosiga tenei a Paulo: ‘Ke ‵fuli ‵tou mafaufau’?

⁴ Faitau te Loma 12:2. E fakamatala mai ne te apositolo ko Paulo i konei a mea e aofia i te tauloto ke mafau‵fau pelā mo Ieova. I te mataupu mai mua, e fesoasoani mai ki a tatou me kafai e ma‵nako tatou ke “fakagata te fakaakoako ki te olaga masani tenei,” e ‵tau mo tatou o ‵kalo kea‵tea mai mafaufauga mo kilokiloga a te lalolagi. Kae ne fakamatala mai ne Paulo a te manakoga mō tatou ke ‘‵fuli ‵tou mafaufau.’ E aofia i te mea tenei a te sukesuke ki te Muna a te Atua mo te kilokiloga ke iloa ana mafaufauga, ke mafaufau ‵loto e uiga ki ei, kae ke ‵fuli ‵tou mafaufau ke ‵pau mo te mafaufau o te Atua.

5. Fakamatala mai te ‵kese o te faitau fakavave mo te sukesuke.

⁵ E uke atu a mea e aofia i te sukesuke i lō te faitau fakavave kae māka fua ne tatou a tali i ‵tou tusi a‵koga. I te taimi e suke‵suke i ei, e ‵tau o mafau‵fau tatou ki mea e akoako mai e uiga ki a Ieova, ana auala, mo ana mafaufauga. E ‵tau o iloa ne tatou a te pogai e fakatonu mai ne te Atua a mea e ‵tau o fai ne tatou mo mea e ‵tau o takalia‵lia tatou ki ei. E ‵tau foki o mafau‵fau tatou ki ‵fuliga kolā e manakogina ke fai ne tatou i ‵tou olaga mo ‵tou mafaufauga. E tiga eiloa e se mafai o mafaufau ‵loto tatou ki mea konei i taimi katoa e fai ei ‵tou sukesukega, kae e maua eiloa ne tatou a mea aoga mai te fakamāumāu ‵tou taimi—kāti ko te āfa o te taimi e fai i ei ‵tou sukesukega—ke mafaufau ‵loto ki mea kolā e fai‵tau ne tatou.—Sala. 119:97; 1 Timo. 4:15.

6. Ne a mea e ‵tupu māfai e mafau‵fau loto tatou ki mafaufauga o Ieova?

⁶ I te taimi e mafaufau ‵loto faeloa tatou ki te Muna a te Atua, e isi eiloa se mea fakaofoofogia e mafai o tupu. E ‘fakatalitonu ne tatou ki a tatou eiloa,’ me e ‵tonu kae ‵lei katoatoa a mafaufauga o Ieova. Ko kamata ei o iloa ne tatou ana kilokiloga kae talia foki ne tatou. Ko ‘‵fuli ei ‵tou mafaufau’ kae kamata o ati aka ne tatou a mafaufauga ‵fou. Fakamuli loa, ko fai ei ne tatou a mafaufauga o Ieova e pelā me i o tatou.

7, 8. (a) Se a te kilokiloga a Ieova ki te maumea i te feitu faka-te-foitino? (Ke onoono ki ata i te kamataga.) (e) Kafai e maua ne tatou tena kilokiloga, se a te mea ka fakamuamua faeloa ne tatou?

⁷ A ‵tou mafaufauga e se pokotia fua i ei a ‵tou lagonaga e uiga ki mea kae e pokotia foki i mea e fai ne tatou. (Male. 7:21-23; Iako. 2:17) E mafai o maina faka‵lei māfai e onoono tatou ki nāi fakaakoakoga. E pelā me se fakaakoakoga, e tuku mai i tusi Evagelia a fakaasiga manino ki mafaufauga o Ieova e uiga ki kope faka-te-foitino. Ne filifili ne te Atua ne mātua faka-te-foitino kolā e mafai o puti aka ne lāua tena Tama—se tauavaga e se uke lā tupe. (Levi. 12:8; Luka 2:24) I te taimi ne fanau i ei a Iesu, ne fakamoe ne Malia a ia “i se tali fagai manu, me ko seai se avanoaga mō latou i te fale talimalo.” (Luka 2:7) Ne mafai eiloa ne Ieova o fakatoka ne fale ‵lei i so se auala ke mafai o fanau i ei a Tena Tama moi ne manako a ia ki ei. Kae ko te mea telā e tāua malosi atu ki a Ia, ko te fakanofonofoga faka-te-agaga telā ka puti aka i ei a Iesu.

⁸ Mai te tala faka-te-Tusi Tapu tenei e uiga ki te fanauga o Iesu, ko mafai ei ne tatou o malamalama i te kilokiloga a Ieova e uiga ki kope faka-te-foitino. E ma‵nako eiloa a nisi mātua ki te ‵lei o olotou tama‵liki i te feitu  faka-te-foitino, faitalia me e mafai o pokotia i ei te ola ‵lei faka-te-agaga o olotou tama‵liki. Kae e manino ‵lei, me e fakatāua malosi eiloa ne Ieova a mea faka-te-agaga. E mata, ko oti ne maua ne koe te kilokiloga a Ieova? Se a te mea e fakaasi mai i au faifaiga?—Faitau te Epelu 13:5.

9, 10. E mafai pefea o fakaasi atu ne tatou me e maua ne tatou a te kilokiloga a Ieova e uiga ki te fakavāivāi atu ki nisi tino?

⁹ A te suā fakaakoakoga, ko te kilokiloga a te Atua e uiga ki te fakavāivāi atu ki nisi tino. Ne fai mai a Iesu: “Kae ko so se tino e fakavāivāi ne ia se tino i tino fatauva konei, kolā e fakatuanaki mai ki a au, e ‵lei atu moi ne ‵sai tena ua ki se fatu solo saito telā e toso ne se asini kae ‵pei atu a ia ki te moana.” (Male. 9:42) E fakaasi mai i pati konā me i te fakavāivāi ne tatou a nisi tino se mea eiloa e se ‵tau o fai! Ona ko te mea ne fakaata mai ne Iesu i se auala ‵lei katoatoa a uiga o tena Tamana, e mafai o tali‵tonu tatou me ka penā foki a lagonaga o Ieova ki so se tino telā e fakaasi atu ne ia a faifaiga sē atafai ki se tasi o soko o Iesu.—Ioa. 14:9.

¹⁰ E mata, e fakaasi atu ne tatou a te kilokiloga a Ieova mo Iesu? E mata, ka fai ne tatou a mafaufauga konā e pelā me i o tatou? Se a te mea e fakaasi atu ne tatou i ‵tou faifaiga? E pelā me se fakaakoakoga, mafaufau la māfai e isi ne vaegā teuga mo gatu kolā e ‵gali ki a tatou kae kāti e se fia‵fia ki ei a nisi tino i te fakapotopotoga io me e mafai o fakaalaala aka i ei a lagonaga sē ‵lei i mafaufau o nisi tino. E mata, ka fakamuamua ne tatou a te ‵tou a‵lofa ki ‵tou taina tapuaki i lō teuga fakagali‵gali kolā e fia‵fia tatou ki ei?—1 Timo. 2:9, 10.

11, 12. Ka puipui pefea ne tatou a tatou eiloa māfai e takalia‵lia tatou ki mea kolā e takalialia ki ei a Ieova kae ati aka a te loto pulea?

¹¹ Te tolu o fakaakoakoga: A Ieova e takalialia ki te sē amiotonu. (Isa. 61:8) E tiga e iloa ne ia me isi ne ‵tou vāivāiga ona ko te tulaga sē ‵lei katoatoa ne fa‵nau mai mo tatou, e fakamalosi mai a ia ke ati aka ne tatou a te takalialia ki te sē amiotonu. (Faitau te Salamo 97:10.) A te mafaufau ‵loto ki te pogai e takalialia ei a Ieova ki mea ma‵sei, ka fesoasoani mai ke maua ne tatou tena kilokiloga kae ka fakamalosi mai foki ke ‵kalo kea‵tea tatou mai te faiga o se mea ‵se.

¹² A te atiakaga o te kilokiloga a Ieova e uiga ki te sē amiotonu ka fesoasoani mai foki ke lavea ‵lei ne tatou a nisi faifaiga e pelā me ‵se, e tiga iloa e se fakaasi ‵tonu mai i te Muna a te Atua. E pelā me se fakaakoakoga, a te vaegā saka telā e sagasaga te fafine i luga i vae o se tagata se vaega o faifaiga fakatauavaga sē ‵tau telā ko lauiloa malosi eiloa i te lalolagi nei. Kāti e fakasako‵sako mai a nisi tino me i te mea tenā e se ‵pau mo faifaiga fakatauavaga sē ‵tau. * Kae e mata, e fakaata mai i vaegā faifaiga penā a mafaufauga o te Atua, telā e takalialia ki vaega katoa o amioga ma‵sei? Ke faka‵mao kea‵tea tatou mai te faiga o mea ‵se e auala i te atiakaga o te loto pulea e penā foki mo te takalialia malosi ki mea kolā e takalialia ki ei a Ieova.—Loma 12:9.

13. Kaia e ‵tau ei mo tatou o mafau‵fau muamua ki te auala e mafai ei o pokotia a kilokiloga a Ieova i ‵tou fakaikuga e uiga ki aso mai mua?

¹³ I te taimi e fai ei ‵tou sukesukega, e ‵tau o mafau‵fau faka‵lei tatou ki te tāua o mafaufauga o Ieova e uiga ki tulaga kolā e mafai o fakafesagai mo tatou i aso mai mua. I te faiga tenā, kafai ko ‵tu atu tatou i se tulaga telā e manakogina ke fai se fakaikuga fakavave, ka toka kae ka iloa foki ne tatou a mea e ‵tau o fai ne tatou. (Faata. 22:3) Ke onoono nei ki nisi fakaakoakoga i te Tusi Tapu.

14. Se a te mea e tauloto ne tatou mai te ‵teke atu o Iosefa ki te avaga a Potifala?

 ¹⁴ Mai te ‵teke fakavave atu ki takolekolega a te avaga a Potifala, ne fakaasi atu ne Iosefa me ne fakatāua ne ia te kilokiloga a Ieova e uiga ki te fakamaoni i te olaga avaga. (Faitau te Kenese 39:8, 9.) E se gata i ei, a tena tali tenei ki te avaga a Potifala: “E mafai pefea ne au o fai te matugā mea masei tenei ke agasala ei au i mua o te Atua?” e fakaasi mai i ei me maua ne ia te kilokiloga a te Atua e uiga ki te mea tenā. Kae e pefea tatou? Mafaufau la māfai ko kamata o fakaasi mai ne se tino e ga‵lue tasi mo koe a amioga fakatāgata io me fakafafine. Io me e a māfai ne lafo mai ne se tino se fekau fakafamau ki tau selefoni? * E faigofie ‵ki eiloa ke fai ne tatou se fakaikuga māfai ko oti ne iloa kae maua ne tatou a te kilokiloga a Ieova ki vaegā tulaga penā, kae ko oti foki ne fakaiku aka a te mea ka fai ne tatou.

15. E pelā mo tamataene Epelu e tokotolu, e mafai pefea ne tatou o ‵teke atu a fakamalosiga ke gutugutulua i te ‵tou fakamaoni ki a Ieova?

¹⁵ Mafau‵fau nei ki te fakaakoakoga a tamataene Epelu ko Satalaka, Mesako mo Apeteniko. A te lotou fakaikuga ke ‵teke ki te tapuaki atu ki te fakatusa aulo telā ne faite ne te tupu ko Nepukanesa mo te lotou tali manino ki te tupu, ne fakaasi mai ei me ko leva ne mafau‵fau latou ki mea e ‵tau o fai ne latou ke tumau i te fakamaoni ki a Ieova. (Eso. 20:4, 5; Tani. 3:4-6, 12, 16-18) Mafaufau la me ne fakamolemole atu tou pule ke tuku fakameaalofa atu a tupe mō se fakafiafiaga telā e isi sena sokoga ki tapuakiga ‵se. Se a te mea ka fai ne koe? I lō te faka‵tali ke ‵tupu a vaegā mea penei, kaia e se na fakaasi atu nei a mafaufauga o Ieova e uiga ki mea konei? Kae kafai e toe ‵sae aka a vaegā tulaga penei, e mata, ka faigofie ki a koe ke faipati kae fai atu a te mea tonu, e pelā eiloa mo te mea ne fai ne tamataene Epelu konei e tokotolu.

16. E mafai pefea o fesoasoani mai a te malamalama ‵lei i mafaufauga o Ieova ke fakatoka tatou mō se fakalavelave fakafuasei e uiga ki togafiti fakatokita?

¹⁶ A te mafaufau ‵loto ki mafaufauga o Ieova ki te manakoga ke tumau i te fakamaoni e mafai foki o fesoasoani mai māfai e isi se fakalavelave fakafuasei e sae aka i togafiti fakatokita. E tiga eiloa ko oti ne fakaiku aka ne tatou ke ‵kalo kea‵tea mai te fagai ki te toto io me fakaaoga a vaega ‵lasi e fa o te toto, e isi ne nisi auala kolā e aofia i ei te toto e manakogina i ei se fakaikuga totino a se tino telā e fakavae ki fakatakitakiga mai te  Tusi Tapu kolā e fakaasi mai i ei a mafaufauga o Ieova. (Galu. 15:28, 29) E manino ‵lei me i te ‵toe taimi ‵lei ke iloilo aka a tulaga penā e se ko te taimi e nofo ei koe i loto i te fakaimasaki, maise loa māfai ko logo‵mae kae ko fakamalosigina tatou ke fai fakavave se fakaikuga. Tenei eiloa te taimi ke fai ne sukesukega ki ei, kae faka‵fonu te pepa o togafiti fakatokita telā e fakamatala faka‵lei mai i ei a mea kolā e ma‵nako tatou o fai, kae ke fai‵pati ki te tokita. *

17-19. Kaia e tāua i ei ke iloa a mafaufauga o Ieova e uiga ki mea i te taimi nei? Taku mai se fakaakoakoga e uiga ki se tulaga telā e ‵tau o fakatoka tatou ki ei.

¹⁷ A ko te ‵toe mea, mafaufau aka la ki te tali telā ne fai fakavave atu ne Iesu ki te manatu ‵se tenei o Petelu: “Te Aliki, ke alofa koe ki a koe eiloa.” E manino ‵lei me ne mafaufau ‵loto eiloa a Iesu ki te loto o te Atua mō ia, penā foki mo valoaga e uiga ki tena olaga mo tena mate i te lalolagi nei. Ne fakamalosi aka ne te iloaga tenei a tena fakaikuga ke fakatumau tena fakamaoni, kae ke tuku atu tena ola mō tatou katoa.—Faitau te Mataio 16:21-23.

¹⁸ I aso nei, ko te loto eiloa o te Atua ke ati aka ne ana tino se vā fakataugasoa mo ia kae ke aofia katoatoa i tena galuega. (Mata. 6:33; 28:19, 20; Iako. 4:8) E pelā mo Iesu, e isi eiloa ne tino e taumafai o ‵taki kea‵tea tatou mai te auala tenā. E pelā me se fakaakoakoga, e a māfai e fakamasiki aka tou tulaga ne tou pule fakatasi mo tou peofuga, kae ka fakalavelave atu te mea tenā ki au polokalame faka-te-agaga? Io me kafai koe e akoga, kāti ne ofo atu ki a koe se avanoaga ke maua nisi akoakoga fakaopoopo. I te taimi tenā, ka manako koe o ‵talo, fai au sukesukega kae sau‵tala fakatasi mo tou kāiga io me ko toeaina, kae ka oti ko fai ei sau fakaikuga? Kaia e se tauloto ei ki mafaufauga o Ieova e uiga ki vaegā tulaga penā i te taimi nei kae taumafai ke fai ana mafaufauga e pelā me i o koe? Kae kafai e toe ofo atu ki a koe se avanoaga penā i aso mai mua, ka sē kilo atu eiloa koe ki ei e pelā me se tofotofoga. Ka iloa ‵lei ne koe au mea ka fai me ko oti ne fai tau fakaikuga i tou loto ke saga tonu atu koe o tavini ki a Ieova.

¹⁹ E mafai o mafaufau koe ki nisi tulaga kolā e mafai o ‵sae fakapoi mai i se auala seki fakamoemoegina. E tonu, e se mafai ne tatou o fakatoka mō so se tulaga. Kae kafai e mafaufau ‵loto tatou ki mafaufauga o Ieova i te taimi e fai ei ‵tou sukesukega totino, ka faigofie eiloa ke masaua ne tatou a mea kolā ne suke‵suke tatou ki ei kae fakagalue aka i so se tulaga telā e mafai o sae aka. Tela la, ke na masaua ne tatou a te tāua ke iloa a mafaufauga o Ieova e uiga ki mea, fai ne tatou ana mafaufauga e pelā me i o tatou, kae mafau‵fau ki te auala ka pokotia i ei a te kilokiloga a Ieova i ‵tou faifaiga i aso nei mo aso mai mua.

20, 21. (a) Kaia ka maua i ei ne tatou a te saolotoga tonu i te lalolagi fou? (e) E mafai pefea o maua ne tatou a te fiafia i te taimi nei?

²⁰ E olioli malosi eiloa tatou ki te lalolagi fou. A te tokoukega o tatou e olioli ke ola ki te se-gata-mai i te lalolagi palataiso. Mai lalo o te pulega a te Malo, ka fakasaoloto eiloa a tino mai te logo‵mae mo puapuaga kolā e fakafesagai mo tatou i te olaga tenei. E tonu, i te taimi foki tenā, ka tumau eiloa o fakagalue aka ne tino a te saolotoga. Ka fai ne tino taki tokotasi a filifiliga e ‵tusa mo olotou manakoga mo mea e fia‵fia ki ei latou.

²¹ E tonu, a te vaegā saolotoga tenā ka sē katoatoa. E uiga ki te mea tonu mo te mea ‵se, ka takitakigina a tino loto maulalo ki tulafono mo mafaufauga o Ieova. Ka maua mai i ei te fiafia mo te filemu. (Sala. 37:11) Kae i te taimi nei, e mafai o maua ne tatou a te fiafia i te taimi e fai ei ne tatou a mafaufauga o Ieova e pelā me i o tatou.