SE MEA fakamalosi loto kae fakamafanafana a te fakaasi atu o te uiga atafai! Kafai e lavea ne tatou se tino e atafai mai, e loto fakafetai eiloa tatou ki a ia. Ona ko te mea e gali ki a tatou māfai e fakaasi mai ne nisi tino a te uiga atafai, e mafai la pefea o ati aka ne tatou a te uiga gali tenei?

A te uiga atafai e aofia loa i ei te saga ‵tonu atu ki te ‵lei o nisi tino—se manakoga ke fakaasi atu e auala i pati fesoasoani mo faifaiga. E tiga eiloa e fakaasi atu i ‵tou faifaiga a te uiga atafai, e se ‵tau fua o fakaasi atu ne tatou te uiga tenā ko te mea ke ‵lei ‵tou ata i mua o tino. A te atafai tonu e ‵tau o fakamalosigina ne te ‵poko o te alofa mo te loto malamalama. Fakaopoopo atu ki ei, a te uiga atafai se vaega o fuataga o te agaga tapu o te Atua telā ne fakatonu atu ki Kelisiano ke ati aka ne latou. (Kala. 5:22, 23) E ‵tau o ati aka ne tatou a te uiga atafai, tela la, ke iloilo aka ne tatou te auala ne fakaasi mai ei ne Ieova mo Iesu a te uiga tenei mo te auala ke fakaakoako tatou ki a lāua.

E atafai kae saga tonu atu a Ieova ki tino katoa, e aofia i ei a “tino sē loto fakafetai mo tino ma‵sei.” (Luka 6:35) E pelā me se fakaakoakoga, ne fai ne Ieova ke “fakamaina mai ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.” (Mata. 5:45) Tela la, a tino foki kolā e se fai ne latou a Ieova pelā me ko te lotou Mafuaga, koi maua eiloa ne latou a mea aoga ne tuku mai ne ia mō te ola kae maua foki ne latou se fiafia mai i ei.

E maua eiloa ne tatou se fakaakoakoga tu ‵kese o te atafai e auala i mea ne fai ne Ieova mō Atamu mo Eva. Mai tua malie o te agasala ne fai ne Atamu mo Eva, ne “‵sui tasi ei ne lāua a lau o te mati kae ‵sai ki lā tega.” Kae ne iloa ne Ieova me e manakogina eiloa ne lāua tokolua ne gatu ‵lei ko te mea ke ola lāua i tua o te fatoaga o Etena, ko te koga telā ne fakamalaia i ei te laukele ki “lakau tala‵tala mo lakau makai‵kai.” Ne saga tonu atu eiloa a Ieova mo te atafai ki mea kolā e manakogina ne lāua mai te faite a lā “gatu ‵loa mai pa‵kili o manu.”—Kene. 3:7, 17, 18, 21.

E tiga eiloa e atafai a Ieova ki “tino ma‵sei mo tino ‵lei,” e manako eiloa a ia ke fakaasi atu tena atafai ki ana tavini fakamaoni. E pelā me se fakaakoakoga, i aso o te pelofeta ko Sakalia, ne fanoanoa eiloa a te agelu e tokotasi i te lavea atu me ko oti ne taofi aka te ‵toe faitega o te faletapu i Ielusalema. Ne fakalogologo eiloa a Ieova ki mea ne manavase ki ei te agelu tenei kae ne tali atu a ia i “pati atafai kae fakamafanafana.” (Saka. 1:12, 13) Ne penā foki loa a faifaiga a Ieova ki tena pelofeta ko Elia. I se taimi e tasi, ne loto vāivāi ‵ki te pelofeta, tenā ne fakamolemole atu ei ki a Ieova ke na mate atu a ia. Ne saga tonu atu eiloa a Ieova ki lagonaga o Elia kae ne uga atu ne ia tena agelu ke fakamalosi atu ki tou tagata. E se gata foki i ei, ne fakamaoni atu ne ia ki te pelofeta me se ko ia fua tokotasi e ‵toe. I te otiga ne maua ne Elia a pati atafai mo te fesoasoani ne manakogina ne ia, ne toe foki atu eiloa a ia o fai tena galuega. (1 Tupu 19:1-18) Mai i tavini katoa a te Atua, ko oi te ‵toe tino ne fakaata mai ne ia te uiga atafai sili kae tu ‵kese tenei o Ieova?

I te faiga o tena galuega talai i te lalolagi nei, ne lauiloa eiloa a Iesu i tena uiga atafai mo tena saga  tonu atu ki nisi tino. Ne seki faimālō atu ia io me fai mo fai se amoga ‵mafa ki nisi tino. Ne fai atu a ia mo te loto malamalama, penei: “O‵mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou. . . . Me e amogofie taku amo.” (Mata. 11:28-30) Ona ko tena uiga atafai, ne tau‵tali atu eiloa a te vaitino ki so se koga e fano i ei a ia. Ona ko te mea ne “alofa malosi a ia ki a latou,” ne fagai ne Iesu latou, faka‵lei ne ia olotou tino ma‵saki mo tino sē katoatoa, kae akoako atu ne ia a “mea e uke” ki a latou e uiga ki tena Tamana.—Male. 6:34; Mata. 14:14; 15:32-38.

E pelā me se fakamaoniga o tena atafai sili, ne loto malamalama kae poto a Iesu i te auala e atafai atu ei a ia ki tino. A te ‵tonuga loa, faitalia me ne pefea te faigata o te fakamolemole, ne talia eiloa ne Iesu mo te “atafai” a latou katoa kolā ne ‵sala atu ki a ia. (Luka 9:10, 11) E pelā mo te mea ne tupu, ne seki polopoloki ‵mafa atu ne ia se fafine telā ne mataku, faitalia me sē ‵ma foki a ia e ‵tusa mo te tulafono, ne patele atu eiloa a ia mo te fakamoemoega me ka faka ‵lei aka ei tena masaki e ‵tafe tena sua. (Levi. 15:25-28) Ona ko tena alofa atafai ki te fafine tenei ne tīgaina mai tena masaki mō se 12 tausaga, ne fai atu a Iesu ki tou fafine, penei: “Taku tama, ko tou fakatuanaki ne ‵lei ei koe. Fano mo te filemu kae ke ‵lei tou masaki fakalogo‵mae tenā.” (Male. 5:25-34) Ko oko eiloa i te tu ‵kese o te faifaiga atafai tena!

E pela mo fakaakoakoga ne fakamatala atu mai luga, e lavea ne tatou me i te atafai tonu e fakaasi atu i tou faifaiga. Ne fakamatala mai ne Iesu a te manakoga ke fakaasi atu te atafai i te tala e uiga ki te Samalia alofa. Faitalia me ne takalia‵lia malosi a tino Samalia ki tino Iutaia, ne atafai eiloa a te tagata Samalia i te tala fakatusa ki te tagata telā ne kaisoa ana mea, ta, kae tiakina atu i tafa o te auala me ko tai mate. Ona ko tena atafai, ne gasue eiloa a te tagata Samalia o fesoasoani atu. Ne fusi ne ia ana pa‵kiaga kae avatu ki se fale talimalo. Oti aka, ‵togi ei ne ia te tausi o te fale talimalo ke tausi atu ki te tagata pakia, kae se gata foki i ei, ne fai atu me ka toe ‵togi atu ne ia so se aofaki tupe mō so se mea telā e fakaaoga ne ia.—Luka 10:29-37.

E tiga eiloa e masani o fakaasi atu a te uiga atafai e auala i faifaiga, e mafai foki o fakaasi atu i pati aoga kae fakamalosi loto. Faitalia me i “te manavase i te loto o se tagata e fai ei ke vāivāi a ia,” e fakaopoopo mai te Tusi Tapu me i “te pati ‵lei e fakamalosi i ei a te loto.” (Faata. 12:25) Ka fakamalosi eiloa ne tatou a loto o nisi tino māfai e gasue‵sue tatou ona ko te uiga atafai mo te aga‵lei ke fakatau fakamalosi atu te suā tino ki te suā tino. * A ‵tou pati atafai e fakaasi atu i ei a te saga ‵tonu atu o tatou ki a latou. Kafai ko oti ne fakamalosigina atu latou, ka fesoasoani atu eiloa te mea tenā ke mafai o fakafesagai faka‵lei atu latou ki fakalavelave faiga‵ta e fe‵paki mo latou i te olaga.—Faata. 16:24.

Ona ko te mea ne faite ne te “Atua a te tagata ki tena fakatusa,” e mafai ne tino katoa o ati aka a te uiga atafai. (Kene. 1:27) I se taimi e tasi, ne “atafai eiloa a Iulio ki a Paulo kae talia ne ia ke fano ki ana taugasoa ko te mea ke fia‵fia fakatasi latou” i te fakai lasi o Saitonu, kae ko Iulio ko te ofisa o kautau o Loma telā ne puke fakapagota ne ia a Paulo ke faima‵laga atu ki Loma. (Galu. 27:3) Fakamuli ifo, ne “atafai malosi” eiloa a tino i te fenua o Melita ki a Paulo mo nisi tino kolā ne fatoa kasa te lotou vaka. Ne faka‵ka ne tino o te fenua se afi ke fakavelavela latou i tafa i ei. (Galu. 28:1, 2) Ko oko aka eiloa i te tavaegina o olotou mea ne fai, kae ko te fakaasi atu o te atafai tonu e aofia i ei te fakatumauga o te uiga tenei i taimi katoa.

Ke fakafiafia katoatoa atu ki te Atua, e ‵tau o ati aka ne tatou te uiga atafai e pelā me se vaega tumau o ‵tou amioga totino mo te auala e ola i ei tatou. Tenā te pogai, ne fai mai a Ieova ke “fakapei” ki luga i a tatou a te atafai. (Ko. 3:12) Kae ko te ‵tonuga loa, se mea faigata eiloa ke fakatumau a te uiga fakaatua tenei i loto i a tatou. Kaia? Me e mafai o fakatalave tatou mai te fakaasi atu o te uiga atafai ona ko te ‵mā, seai se loto talitonu,  ‵tekemaiga e fe‵paki mo tatou, mo te tulaga sē ‵lei katoatoa o tatou. E ui i ei, e mafai eiloa o manumalo tatou i mea faiga‵ta mai te fakalagolago ki te agaga tapu mo te fakaakoako atu ki te auala e fakaasi atu ei ne Ieova a te uiga atafai.—1 Koli. 2:12.

E mata, e mafai o iloilo aka ne tatou a nisi feitu kolā e manakogina ke ga‵lue tatou ki ei ke ati aka te ‵lei o te fakaasi atu ne tatou a te uiga atafai? Ke fesili ifo ki a tatou eiloa: ‘E mata, au se tino telā e fakalogologo faka‵lei? E mata, e saga tonu atu au ki manakoga o nisi tino? Anafea ne fakaasi atu ei ne au te atafai ki se tino telā e sē se kāiga io me se taugasoa ‵pili o oku?’ Ko mafai ei o fai ne fakamoemoega e pelā mo te taumafai ke iloa ne tatou a tino i ‵tou tafa, maise eiloa i loto i te fakapotopotoga Kelisiano. I te auala tenei ko mafai o malamalama tatou i fakanofonofoga mo manakoga o latou. A ko te suā mea, e ‵tau o taumafai tatou ke fakaasi atu te atafai ki nisi tino i te auala telā e ma‵nako foki tatou ke fakaasi mai ne latou a te atafai ki a tatou. (Mata. 7:12) A ko te ‵toe mea, ka fakamanuia eiloa ne Ieova ‵tou taumafaiga ke ati aka ne tatou te uiga atafai, māfai e akai atu tatou ki ei mō se fesoasoani.—Luka 11:13.

I te taimi ne fai atu ne Paulo a te auala ne tu ‵kese ei a ia e pelā me se tino talai a te Atua, ne aofia i ei te “atafai.” (2 Koli. 6:3-6) Ne fia‵fia a tino ki a Paulo ona ko tena saga tonu atu ki a latou, telā ne fakaasi atu ne ia e auala i ana pati mo ana faifaiga. (Galu. 28:30, 31) I se auala tai ‵pau, ka mafai o tosina mai a tino ki te munatonu ona ko ‵tou uiga atafai. Kafai e fakaasi atu ne tatou a te atafai ki tino katoa, e aofia i ei latou kolā e ‵teke mai ki a tatou, ka mafai eiloa o fakamafanafana ki olotou loto a te mea tenā kae ka sē kaitāua malosi mai latou ki a tatou. (Loma 12:20) Fakamuli loa, ka mafai eiloa o fia‵fia latou ki te fekau mai i te Tusi Tapu.

I te lalolagi Palataiso i aso mai mua nei, ka lavea eiloa ne tino kolā ka toe faka‵tu aka a te atafai tonu, kāti mō te taimi muamua. Ona ko te loto fakafetai, ka fakamalosi aka ne te mea tenā ke fakaasi atu foki ne latou a te uiga atafai ki nisi tino. Kafai e se manako se tino mai i a latou konei o fakaasi atu a te uiga atafai kae fesoasoani atu foki ki nisi tino, ka seai eiloa se vaega o latou ke ‵nofo tumau ki te se-gata-mai i lalo i te Malo o te Atua. I te suā feitu, a latou kolā ne talia ne te Atua ke ola ki te se-gata-mai, ka fakaasi atu eiloa ne latou a te uiga atafai kae alofa te suā tino ki te suā tino. (Sala. 37:9-11) Ko tafaga lā te tokagamalie mo te filemu o te lalolagi i te taimi tenā! Kae koi tuai o oko mai te taimi gali tenā, ne a mea aoga e maua ne tatou mai te fakaasi atu a te uiga atafai i te taimi nei?

“A te tagata atafai e maua ne ia a mea aoga,” ko muna a te Tusi Tapu. (Faata. 11:17) E fia‵fia eiloa a tino ki se tino uiga atafai, kae e atafai foki latou ki te tino tenā. Ne fai mai a Iesu, penei: “Me ko te fua telā e fua atu ne koutou, ka fua mai foki ne latou ki a koutou.” (Luka 6:38) A te tino atafai ka faigofie o maua ne ia ne taugasoa kae maua se fesokotakiga tumau mo taugasoa ‵lei.

Ne fakamalosi atu a te apositolo ko Paulo ki te fakapotopotoga i Efeso “ke fakatau atafai te suā tino ki te suā tino, ke fakatau a‵lofa atafai, ke fakatau fakamagalo atu a te suā tino ki te suā tino.” (Efe. 4:32) E maua eiloa ne te fakapotopotoga a mea aoga e uke māfai e fakaasi atu ne Kelisiano katoa a te loto malamalama mo te atafai, kae fesoasoani atu te suā tino ki te suā tino. Ka sē fai atu ne tino penā a pati sē ‵lei, fakamaseiga matagā, io me ko pati faka‵mae loto. I lō te fakasalalau atu a tala fatufatu, e fakaaoga eiloa ne latou olotou gutu ke fesoasoani atu ki nisi tino. (Faata. 12:18) Kae ko te ikuga, ka malosi eiloa te fakapotopotoga i te feitu faka-te-agaga kae tavini atu ki a Ieova mo te fia‵fia.

E tonu, a te uiga atafai e fakaasi atu eiloa i pati mo faifaiga. Kafai e uiga atafai tatou, e fakaata atu eiloa ne tatou a te uiga filemu kae kaimalie o Ieova te Atua. (Efe. 5:1) Kae ko te ikuga e maua mai i ei, ka fakamalosigina ei a ‵tou fakapotopotoga kae ka tosina mai foki a tino ki te tapuakiga tonu. Ke fai faeloa tatou e pelā me ne tino e uiga atafai!