NE FAI mai a Iesu: “E sili atu te fiafia o te tino telā e tuku atu ana mea i lō te maua ne ia.” (Galu. 20:35) A te munatonu tenā e fakavae ki te auala e fesokotaki ei tatou mo Ieova. Kaia? Ne tuku mai ne Ieova ki a tatou a meaalofa e uke kolā e fai ei ke fia‵fia tatou, kae e mafai o lasi atu ‵tou fia‵fia māfai e tuku atu ne tatou se meaalofa ki a Ieova. Ne a meaalofa e mafai o tuku atu ne tatou ki a Ieova? E fai mai te Faataoto 3:9 penei: “Ke fakaaloalo ki a Ieova fakatasi mo au mea tāua.” A ‵tou “mea tāua” e aofia ei ‵tou taimi, taleni, malosi mo kope faka-te-foitino. I te taimi e fakaaoga ei ne tatou a mea tāua konei ke fakalauefa atu te tapuakiga tonu, e tuku atu ne tatou ki a Ieova se meaalofa, kae ko te faiga tenā e aumai ne ia te fiafia lasi ki a tatou.

E uiga ki ‵tou kope faka-te-foitino, se a te mea ka fesoasoani mai ke sē fakatamala tatou i te tuku atu o ‵tou meaalofa ki a Ieova? Ne fai atu te apositolo ko Paulo ki te kau Kolinito ke “tuku fakaa‵tea ne tino taki tokotasi i a koutou se mea” e pelā me se meaalofa. (1 Koli. 16:2) Se a te mea e mafai ne koe o fai māfai e manako koe ke maua a fakamatalaga e uke ki auala kese‵kese e fai ei a ‵tou meaalofa i te koga e nofo ei koe? Fakamolemole ke onoono ki te pokisi mai lalo.

E se mafai o fai a meaalofa i te itaneti i fenua katoa. Kae ko fakamatalaga ki nisi auala ke fai ei a meaalofa e mafai o maua i te fakatuatusi ko te donations. I nisi fenua, e isi eiloa se fakamatalaga i itulau tenā e mafai o maua i ei a fesili e uiga ki te faiga o meaalofa.