1-2. Se a te mea fakaofoofogia ne tupu i te aso o te Penitekoso i te 33 T.A.?

KO TE taeao o te Aso Sa i Ielusalema. Te tausaga ko te 33 T.A., kae ko te aso o te Penitekoso. Ne maopoopo eiloa se potukau o soko e toko 120 i se potu i luga o se fale. (Galu. 1:13-15; 2:1) I nāi aso mai mua malie, ne fakatonu atu a Iesu ki a latou ke ‵nofo i Ielusalema me ka maua ne latou se meaalofa fakapito. (Galu. 1:4, 5) Se a la te mea ne tupu?

² “I te taimi eiloa tenā, ne lagona ne latou te ‵gulu mai te lagi, e pelā eiloa me se afā.” Ne mafai o lagona a te ‵gulu tenā i te fale kātoa. Oti aka, ne ‵sae mai a “ulaga afi e foliga pelā me ne alelo” i luga i ulu o soko, kae ne “‵fonu latou katoa i te agaga tapu.” (Galu. 2:2-4) I te auala fakaofoofogia tenei, ne ‵ligi mai ei ne Ieova tena agaga tapu ki te potukau tenā. (Galu. 1:8) Ko latou eiloa tino muamua ke fakaekegina ki te agaga tapu * kae tuku atu ki a latou a te fakamoemoega ke pule fakatasi mo Iesu i te lagi.

3. Kaia ne seki fakalotolotolua i ei a tino i te Penitekoso me ne fakaekegina latou ki te agaga tapu?

³ Kafai koe se tokotasi o soko telā ne nofo atu i te potu tafa ki luga i te aso tenā, e mautinoa eiloa me ka sē toe puli i a koe a te aso tenā. Ne maua eiloa ne koe a mea e pelā me ne ulaga afi i luga i tou ulu, kae ne kamata koe o faipati ki ‵gana valevale!  (Galu. 2:5-12) E seai se fakalotolotolua me ne fakaekegina eiloa koe e auala i te agaga tapu. Kae e mata, a latou katoa kolā ne fakaeke ki te agaga tapu ne fakaekegina i se auala fakaofoofogia kae i te taimi eiloa e tasi i olotou olaga? Ikai. E iloa pefea ne tatou?

4. E mata, a tino fakaekegina katoa i te senitenali muamua ne fakaeke eiloa i te taimi e tasi? Fakamatala mai.

⁴ Ka sau‵tala nei tatou ki te taimi e mafai ei o fakaekegina se tino. A te potukau o Kelisiano konei e toko 120 e se ko latou fua ne fakaekegina ki te agaga tapu i te Penitekoso, 33 T.A. Fakamuli ifo i te aso loa tenā, e nofo ki se toko 3,000 tino ne maua foki ne latou a te agaga tapu. Ne fakaekegina latou i te taimi ne papatiso i ei. (Galu. 2:37, 38, 41) Kae i tausaga mai tua ifo, e se ko Kelisiano fakaekegina katoa ne fakaeke i te taimi o te lotou papatisoga. Ne fakaekegina eiloa a tino Samalia i se taimi mai tua o te lotou papatisoga. (Galu. 8:14-17) Kae i se auala tai ‵kese, ne fakaeke eiloa a Konelio mo tena kāiga ki te agaga tapu mai mua o papatiso latou.—Galu. 10:44-48.

5. E ‵tusa mo te 2 Kolinito 1:21, 22, ne a mea e ‵tupu māfai ko fakaekegina se tino ki te agaga tapu?

⁵ Ke na sau‵tala foki tatou ki mea e ‵tupu māfai ko fakaekegina se tino ki te agaga tapu. A nisi tino kolā ne fakaekegina e mafai o faigata o talia ne latou i te taimi muamua me ne filifili ne Ieova latou. E mafai o mafau‵fau latou penei, ‘Kaia ne filifili ei au ne te Atua?’ Nisi tino e mafai o se mafau‵fau penā. Faitalia me ne a olotou lagonaga, kae ne fakamatala mai ne te apositolo ko Paulo a mea e ‵tupu ki tino katoa kolā ne fakaekegina: “I te otiga ne tali‵tonu koutou, ne fakamailogagina * koutou e auala i a ia fakatasi mo te agaga tapu telā ne folafola mai, ko te fakamautinoaga telā ko leva ne fai mai e uiga ki te ‵tou tofi.” (Efe. 1:13, 14; fml.) Tela la, e fakaaoga ne Ieova tena agaga tapu ke fakamautinoa atu ki Kelisiano konei me ko oti ne filifili ne ia latou. I te auala tenei, ko fai ei  te agaga tapu e pelā me “se fakamautinoaga [se tautoga]” e fakatalitonu atu ei ki a latou me ka ola eiloa latou i aso mai mua ki te se-gata-mai i luga i te lagi kae e se i te lalolagi.—Faitau te 2 Kolinito 1:21, 22.

6. Se a te mea e ‵tau o fai ne se Kelisiano ke maua ne ia a tena taui ke ola i te lagi?

⁶ Kafai ko oti ne fakaekegina se Kelisiano, e mata, ka maua eiloa ne ia a te taui ke ola i te lagi? Ikai. E mautinoa eiloa i a ia me ko oti ne filifili a ia ke fanatu ki te lagi. Kae e ‵tau o masaua ne ia a pati fakaosofia konei: “Taina, ga‵lue malosi o fakamautinoa faka‵lei te otou kalagaga mo te otou filifiliga, me kafai e fai faeloa ne koutou a mea konei, ka se mafai eiloa o taka‵vale koutou.” (2 Pe. 1:10) Tela la, e tiga eiloa ko oti ne filifiligina se Kelisiano fakaekegina, io me kalagagina ke ola i te lagi, ka maua eiloa tena taui māfai fua a ia e tumau i te fakamaoni.—Fili. 3:12-14; Epe. 3:1; Faka. 2:10.

7. E iloa pefea ne tino fakaekegina me ko maua ne latou te kalagaga faka-te-lagi?

⁷ Kae e iloa pefea ne se tino me e maua tonu eiloa ne ia te kalagaga faka-te-lagi? E manino ‵lei a te tali i pati a Paulo ki a latou i Loma kolā ne taku pelā me ne “tino tapu.” Ne fai atu a ia ki a latou: “Ne seki maua ne koutou te agaga o te pologa ke toe ma‵taku koutou, kae ne maua ne koutou te agaga ke fai koutou mo tama puke, Ko te agaga eiloa tenā e ka‵laga atu ei tatou: ‘Apa, te Tamana!’ Ko te agaga eiloa tenā e molimau mai ki ‵tou agaga i a tatou ko tama a te Atua.” (Loma 1:7; 8:15, 16) Tela la, e auala i tena agaga tapu, ka fakaasi manino atu ne te Atua ki tino fakaekegina me ko maua ne latou te lotou kalagaga faka-te-lagi.—1 Tesa. 2:12.

8. E fakaasi mai pefea i te 1 Ioane 2:20, 27 me e se manakogina ne Kelisiano fakaekegina ke fakamautinoa atu ne nisi tino i a latou ne fakaekegina?

⁸ E seai se fakalotolotolua me e fakamautinoa atu eiloa ne Ieova a te mea tenā ki loto mo mafaufau o latou kolā e maua ne latou tena ‵kamiga ke olo ki luga i te lagi. (Faitau te 1 Ioane 2:20, 27.) E tonu, e ‵tau o akoakogina a Kelisiano fakaekegina ne Ieova e auala i te fakapotopotoga e pelā mo tino katoa. Kae e se ma‵nako latou ke fakamautinoa atu ne so se tino me i a latou ne fakaekegina. E fakaaoga eiloa ne Ieova a te ‵toe malosi sili eiloa i te iunivesi, ko te agaga tapu, ke fakatalitonu atu me i a latou ne fakaekegina!

9. Kafai ko fakaekegina se tino, ne a ‵fuliga e oko atu ki a ia, e pelā mo te fakamatalaga i te Efeso 1:18?

⁹ E faigata ki te tokoukega o tavini a te Atua i aso nei ke malamalama i mea e ‵tupu ki se tino māfai ko fakaekegina a ia ne te Atua. A te mea tenei se mea masani loa me i a latou ne seki fakaekegina eiloa. Ne faite ne te Atua a tino ke ola ki te se-gata-mai i te lalolagi, kae e se i te lagi. (Kene. 1:28; Sala. 37:29) Kae ne filifili ne Ieova a nisi tino ke ola i te lagi. Tela la i te taimi e fakaeke ei ne ia latou, e ‵fuli ne ia olotou fakamoemoega mo te auala e mafau‵fau ei latou i se auala lasi ‵ki, ko te mea ke olioli latou ki te olaga i te lagi.—Faitau te Efeso 1:18.

10. Se a te uiga ke “toe fanau mai”? (Ke onoono foki ki te fakamatalaga mai lalo.)

¹⁰ I te taimi e fakaekegina i ei a Kelisiano ki te agaga tapu, e “toe fa‵nau” mai latou io me “fanau mai luga.” * Ne fakaasi mai foki ne Iesu me e se mafai o fakamatala faka‵lei atu ki se tino telā ne seki fakaekegina a te lagonaga ke “toe fanau mai,” io me “fanau mai i te agaga.”—Ioa. 3:3-8; fml.

11. Fakamatala mai a ‵fuliga i mafaufauga kolā e mafai o ‵sae aka māfai ko fakaekegina se tino.

 ¹¹ I te auala fea ka kamata o ‵kese a mea e mafau‵fau ki ei a Kelisiano kolā ne fakaekegina? Koi tuai o fakaeke ne Ieova a Kelisiano konei, ne fia‵fia eiloa latou ki te fakamoemoega ke ola ki te se-gata-mai i te lalolagi. Ne olioli eiloa latou mo te loto finafinau ki te taimi ka ‵fulu faka‵ma ei ne Ieova a tino amio ma‵sei kae fai te lalolagi mo fai se palataiso. Kāti ne fakaataata ne latou a te taimi ka fakafetaui atu ei latou ki olotou kāiga io me ko taugasoa pele kolā ka faka‵tu aka mai te mate. Kae i te otiga ne fakaekegina latou, ko kamata o ‵fuli olotou mafaufauga. Kaia la? Ne seki ‵fuli ona ko te mea e se lotoma‵lie latou ki te fakamoemoega i te lalolagi nei. Ne seki ‵fuli olotou mafaufauga ona ko te fi‵ta i mea tau lagonaga io me ko logo‵maega. Ne seki mafau‵fau latou me i te ola i te lalolagi ki te se-gata-mai ka sē fakafiafia. I lō te mafau‵fau penā, ne fakaaoga eiloa ne Ieova tena agaga tapu ke ‵fuli a te auala e mafau‵fau ei latou mo te fakamoemoega telā e olioli latou ki ei.

12. E ‵tusa mo te 1 Petelu 1:3, 4, e pefea a lagonaga o Kelisiano fakaekegina e uiga ki te lotou fakamoemoega?

¹² A te tino telā ne fakaekegina e mafai o mafaufau me e se ‵tau o maua ne ia te tauliaga tāua tenei. Kae e se ‵tau o fakalotolotolua a ia me ne filifili a ia ne Ieova. E ‵fonu tena loto i te fiafia mo te loto fakafetai māfai e mafaufau a ia ki tena fakamoemoega i aso mai mua.—Faitau te 1 Petelu 1:3, 4.

13. E pefea a lagonaga o tino fakaekegina e uiga ki olotou olaga i te lalolagi nei?

¹³ E mata, e fakauiga te mea tenei me e ma‵nako eiloa a tino fakaekegina o ‵mate? Ne tali mai ne te apositolo ko Paulo a te fesili tenā. Ne fakatusa ne ia olotou foitino ki se faleie kae fai mai: “E tonu, a tatou kolā e ‵nofo i te faleie tenei e manāva fi‵ta kae e loto mafatia, me e se ma‵nako tatou o tapale kea‵tea te mea tenei, kae ma‵nako tatou o ‵pei ki te suā mea, ko te mea ke mafai o sui te mea telā e mafai o mate ki te ola.” (2 Koli. 5:4) Ne seki fai pelā me ne ma‵nako a Kelisiano konei ke ‵mate fakavave atu ona ko te sē fia‵fia o latou ki te olaga tenei. E ‵kese mai i ei, e ma‵nako eiloa latou i aso takitasi o tavini atu ki a Ieova fakatasi mo olotou kāiga mo taugasoa. Kae faitalia me ne a mea e fai ne latou, e masaua eiloa ne latou te lotou fakamoemoega ‵malu mō aso mai mua.—1 Koli. 15:53; 2 Pe. 1:4; 1 Ioa. 3:2, 3; Faka. 20:6.

14. Se a te fakailoaga e fakamaoni mai ei me i te tino tenā ne seki fakaekegina ki te agaga tapu?

¹⁴ Kāti e mafaufau eiloa koe māfai ko oti koe ne fakaekegina ki te agaga tapu. Kafai ko maua ne koe, ke mafaufau la ki nāi fesili tāua: E mata, e isi se manakoga malosi i a koe ke fai te loto o Ieova? E mata, e loto finafinau malosi koe i te galuega talai? E mata, e fiafia malosi koe o sukesuke kae tauloto ki “mea ‵loto a te Atua” i tena Muna? (1 Koli. 2:10) E mata, ko oti ne maua ne koe a fakamanuiaga mai i a Ieova i te galuega talai? E mata, e maua ne koe a lagonaga loto alofa ke fesoasoani atu ki nisi tino i te feitu faka-te-agaga? E mata, ko oti ne fakamaoni ne koe te fesoasoani o Ieova ki tou olaga i auala e uke? Kafai tau tali ki fesili katoa konei ko te ao, e mata, e fakamaoni atu i ei me ko maua nei ne koe te kalagaga ke ola i te lagi? Ikai, e se fai eiloa penā. Kaia? Me i tavini katoa a te Atua e mafai o mafau‵fau penei, faitalia me ne fakaekegina latou io me ikai. Kae e auala i te agaga tapu, e mafai o tuku mai ne Ieova a te malosi loa tenā ki so se tavini a ia, faitalia me se a te lotou fakamoemoega. A te ‵tonuga loa, kafai koi mafaufau eiloa koe me e mata ko oti koe ne fakaekegina io me ikai, e fakaasi mai i ei me e seki maua eiloa ne koe. A tino kolā ne  kalagagina ne Ieova e se fakalotolotolua me e mata e kalagagina latou io me ikai! E iloa ‵lei eiloa ne latou!

15. E iloa pefea ne tatou me e se ko tino katoa kolā ne maua ne latou te agaga tapu o te Atua ne filifiligina ke olo ki luga i te lagi?

¹⁵ I te Tusi Tapu kātoa, e uke a fakaakoakoga o tāgata fakatuanaki kolā ne maua ne latou te agaga tapu; kae ne seki maua ne latou te fakamoemoega ke ola i te lagi. Ne takitakigina a Tavita ne te agaga tapu. (1 Samu. 16:13) Ne fesoasoani atu te agaga tapu ke malamalama a ia i mea ‵loto e uiga ki a Ieova kae ne takitaki foki a ia ke tusi ne ia a nisi tusi o te Tusi Tapu. (Male. 12:36) E se gata i ei, ne fai mai te apositolo ko Petelu me i a Tavita ne “seki fano ki te lagi.” (Galu. 2:34) A Ioane te Papatiso ne ‘‵fonu i te agaga tapu.’ (Luka 1:13-16) Ne fai mai a Iesu me e seai se tagata e sili atu i a Ioane, kae ne toe fai mai a ia me i a Ioane ka se aofia i te Malo o te lagi. (Mata. 11:10, 11) Ne fakaaoga ne Ieova tena agaga tapu ke tuku atu ki tāgata konei a te malosi ke fai a mea fakaofoofogia, kae ne seki fakaaoga ne ia te agaga tenā ke filifili latou ke ola i te lagi. E mata, e fakauiga i ei me i a latou konei e se katoatoa te lotou fakamaoni e pelā mo latou kolā ne filifili ke pule i te lagi? Ikai. E fakauiga eiloa me ka toe faka‵tu mai ne Ieova latou ki te ola i te lalolagi Palataiso.—Ioa. 5:28, 29; Galu. 24:15.

16. Se a te fakamoemoega e olioli ki ei a te tokoukega o tavini a te Atua i aso nei?

¹⁶ A te tokoukega o tavini a te Atua i aso nei e se maua ne latou a te fakamoemoega ke ola i te lagi. E pelā mo Apelaamo, Sala, Tavita, Ioane te Papatiso, mo nisi tāgata mo fāfine e tokouke i taimi o te Tusi Tapu, e olioli eiloa latou ke ola i te lalolagi nei māfai ko pule mai a te Malo o te Atua ki luga i a latou.—Epe. 11:10.

17. Ne a fesili ka sau‵tala tatou ki ei i te suā mataupu?

¹⁷ Ona ko te mea a nisi tino fakaekegina koi ‵nofo fakatasi mo tino o te Atua i aso nei, e mautinoa eiloa me e mafai o ‵sae aka ei a fesili. (Faka. 12:17) E pelā me se fakaakoakoga, e ‵tau o pefea te kilokiloga a tino fakaekegina ki a latou eiloa? Kafai se tino i tau fakapotopotoga ko kamata o fakaaoga ne ia a mea fakatusa i te Fakamanatuga, e ‵tau o pefea au faifaiga ki te tino tenā? Kae e a māfai a te aofaki o tino kolā e fai mai i a latou ko oti ne fakaekegina e tumau eiloa i te fanaka ki luga? E mata, e ‵tau o manavase koe ki ei? Ka tali aka ne tatou a fesili konei i te suā mataupu.