1-2. Ne a pati a se agelu ki fāfine i te tanuga o Iesu, kae ne a fakatonuga ne tuku atu ne Iesu ki a latou?

KO TE vaveao, o Nisani 16, i te 33 T.A. E isi ne fāfine kolā ne fanoa‵noa kae a‵lofa ki te Atua, ne olo atu ki te tanuga o te Aliki ko Iesu Keliso telā ko oti ne tanu mō itula e silia atu mo te 36. I te lotou okoatuga ki te tanuga, ne ma‵nako latou o fakaaoga a mea fakama‵nogi mo sinu ma‵nogi ki te foitino o Iesu, kae ne ‵poi latou me e seai se foitino i te tanuga! E isi se agelu ne fai atu ki a latou me i a Iesu ko oti ne toetu aka mai te mate, kae toe fai atu: “Ko mua atu a ia i a koutou ki Kalilaia. Ka lavea ne koutou a ia i konā.”—Mata. 28:1-7; Luka 23:56; 24:10.

² I te otiga ne tiaki ne fāfine konei a te tanuga, ne fanatu eiloa a Iesu ki a latou kae fakatonu atu, penei: “Olo o fakailoa atu ki oku taina ke olo ki Kalilaia, kae ka lavea ne latou au i konā.” (Mata. 28:10) E mautinoa eiloa me isi ne fakatonuga tāua ‵ki a Iesu ki ana soko, me tenei te fakatasiga muamua ne fakatoka ne ia mai tua o tena toetuga!

3-4. Kaia e fai atu ei tatou me i te fakatonuga telā ne fakamau i te Mataio 28:19, 20 ne seki fai atu fua ki te kau apositolo? (Ke onoono ki te ata i te ‵kava.)

³ Faitau te Mataio 28:16-20. I te fakatasiga telā ne fakatoka ne Iesu, ne faka‵mafa mai ne ia te galuega tāua telā ka fai ne ana soko i te senitenali muamua—ko te galuega foki loa telā e fai ne tatou i aso nei. Ne fai mai a Iesu: “Tela la, olo atu koutou ki fenua katoa o fai a tino i ei mo fai a soko, . . . akoako atu latou ke faka‵logo ki mea katoa ne fakatonu atu ne au ki a koutou.”

⁴ E manako a Iesu ko ana soko katoa ke olo atu o talai. Ne seki fakatapula fua tena fakatonuga ki ana apositolo fakamaoni e  toko 11. E mafai pefea o mautinoa i a tatou? Ia, e mata, ko te kau apositolo fua ne ‵nofo atu i konā i te taimi ne fai ei te fakatonuga i luga i te mauga i Kalilaia ke olo atu o fai a soko? Masaua la me ne fai atu te agelu ki fāfine, penei: “Ka lavea ne koutou a ia [i Kalilaia].” Tela la, e mautinoa eiloa me ne ‵nofo atu foki a fāfine fakamaoni konā i te fakatasiga tenā. Kae e se ko latou fua konā. E fai mai te apositolo ko Paulo me ne fakasae atu a Iesu “ki taina e sili atu i te toko 500 i te taimi e tasi.” (1 Koli. 15:6) I te koga fea?

5. Se a te mea e tauloto ne tatou mai te 1 Kolinito 15:6?

⁵ E isi ne pogai ‵lei ke tali‵tonu tatou ki te mea ne mafaufau a Paulo ki ei i te 1 Kolinito 15:6 e uiga ki te fakatasiga ne fai i Kalilaia telā ne fakamatala mai i te Mataio mataupu e 28. Ne a pogai? Muamua la, a te tokoukega o soko o Iesu ne tino Kalilaia. Tela la, ne faigofie ke fai se fakatasiga mō se vaitino tokouke i luga i te mauga i Kalilaia—i lō se fale o se tino i Ielusalema. Te lua, a Iesu telā ko oti ne toetu aka ko oti ne fetaui mo ana apositolo e toko 11 i se fale i Ielusalema. Moi ne manako a Iesu ke fakatonu atu fua ana apositolo ke olo o talai kae fai a soko, penei ne mafai loa o fai ne ia te mea tenā i Ielusalema i lō te fakamolemole atu ki a latou mo fāfine mo nisi tino ke fetaui latou i Kalilaia.—Luka 24:33, 36.

6. E fakaasi mai pefea i te Mataio 28:20 me i te fakatonuga ke fai a soko e aoga foki i aso nei, kae pefea te tokouke o tino e faka‵logo ki te fakatonuga tenā?

⁶ Onoono ki te tolu o pogai tāua. A te fakato nuga a Iesu ke fai a soko ne seki fakatapula fua ki Kelisiano kolā ne ola i te senitenali muamua. E iloa pefea ne tatou? Ne fakaoti a fakatonuga a Iesu ki ana soko ki pati konei: “Au e fakatasi faeloa mo koutou i aso katoa ke oko eiloa ki te gataga o te olaga tenei.” (Mata. 28:20) E pelā loa mo pati a Iesu, ko tokouke nei a tino e fai a soko. Mafaufau ki te mea tenei! Toeitiiti ko kātoa te 300,000 tino i tausaga katoa e papatiso ke fai pelā me ne Molimau a Ieova kae fai mo soko o Iesu Keliso!

7. Ne a mea ka sau‵tala tatou ki ei, kae kaia?

⁷ E tokouke a tino kolā e suke‵suke ki te Tusi Tapu ko ga‵solo ki mua kae papatiso. Kae ko nisi tino kolā e suke‵suke faeloa mo tatou ki te Tusi Tapu e ma‵taku ke fai pelā me ne soko. E fia‵fia ki olotou akoga, kae e se ga‵solo ki mua kae papatiso. Kafai e fai ne koe se akoga faka-te-Tusi Tapu, e mautinoa eiloa me e manako koe o fesoasoani atu ki tau tino akoga ke fakagalue aka ne ia a mea e tauloto ne ia kae ke fai mo soko o Keliso. Ka fakamatala mai i te mataupu tenei a te auala e mafai o faka‵goto ne tatou a te munatonu ki loto o tino a‵koga mo te auala e mafai ne tatou o fesoasoani atu ke ga‵solo ki mua i te feitu faka-te-agaga. Kaia e manakogina ei ke sau‵tala tatou ki te mataupu tenei? Me i nisi taimi, e ‵tau o fakaiku aka ne tatou me e mata, e ‵tau o faka‵soko te akoga io me ikai.

8. Kaia e faigata ei i nisi taimi ke faka‵goto ne tatou a te munatonu ki loto o ‵tou tino a‵koga?

⁸ A Ieova e manako ko tino ke tavini atu ki a ia ona ko te a‵lofa ki a ia. Tela la, a ‵tou fakamoemoega ko te fesoasoani atu ki ‵tou tino a‵koga ke malamalama me i a Ieova e atafai malosi ki a latou taki tokotasi kae alofa ‵ki ki a latou. E ma‵nako tatou o fesoasoani atu ke ‵kilo atu latou ki a Ieova e pelā me se “tamana o tama‵liki e seai ne tamana mo te tino e puipui ne ia a fāfine ko ‵mate olotou avaga.” (Sala. 68:5) Kafai ko lavea ne au tino a‵koga a te alofa o Ieova mō latou, e mautinoa loa me ka otia olotou loto kae ka gasolo aka o a‵lofa malosi ki a ia. Nisi tino a‵koga e faigata loa o ‵kilo atu ki a Ieova e pelā me se Tamana alofa, ona me ne seki fakaasi atu ne olotou tamana ‵tonu a te a‵lofa mo te atafai ki a latou. (2 Timo. 3:1, 3)  Kae i te taimi e fai ne koe te akoga, ke faka‵mafa atu a uiga ‵gali o Ieova. Fesoasoani atu ki au tino a‵koga ke malamalama me i te ‵tou Atua alofa e manako ke maua ne latou te ola se-gata-mai, kae e toka a ia o fesoasoani ki a latou ke maua te fakamoemoega tenā. Ne a nisi mea aka e mafai ne tatou o fai?

9-10. Ne a tusi e ‵tau o fakaaoga ne tatou māfai e fai a akoga faka-te-Tusi Tapu, kae kaia?

⁹ Fakaaoga a tusi ko te “Ne a Mea e Mafai o Tauloto ne Tatou Mai te Tusi Tapu?” mo “Te Auala ke Tumau ei i te Alofa o te Atua.” A tusi konā ne fakatoka fakapitoa loa ke fesoasoani mai ke mafai o faka‵goto ne tatou ki loto o ‵tou tino a‵koga a te alofa ki a Ieova. E pelā me se fakaakoakoga, a te mataupu 1 o te tusi ko te Tauloto ne Tatou e tali aka i ei a fesili konei: E Mata, e Atafai Mai te Atua ki a Tatou io me se Atua Masei?, E Pefea a Lagonaga o te Atua Māfai e Logo‵mae Tatou?, mo te E Mafai o Fai Koe mo Taugasoa o Ieova? Kae pefea te tusi ko te Tumau i te Alofa o te Atua? Ka fesoasoani atu te tusi tenā ki te tino akoga ke malamalama i te auala e fesoasoani atu a te fakagalue aka o  fakatakitakiga mai te Tusi Tapu, ke momea aka te ‵lei o tena olaga kae fakapilipili malosi atu ki a Ieova. Kafai foki loa ko oti ne suke‵suke fakatasi koe mo nisi tino ki tusi konei, fakatoka faka‵lei mō akoga takitasi, ko te mea ke mafai o fakafetaui ne koe mo manakoga o te tino akoga.

¹⁰ Kae mafaufau aka la māfai e isi se mataupu ne gali ki tau tino akoga, kae e se aofia i tusi i ‵tou Pusa o Mea Faigaluega mo fai Akoakoga. Kāti e mafai o fakamalosi ne koe a ia ke faitau ki ei i tena taimi saosao ko te mea ke faka‵soko loa tena akoga i tusi kolā ko oti ne fakatoka mō fai a akoga faka-te-Tusi Tapu.

11. Ko te taimi fea e ‵tau ei o kamata kae fakaoti se akoga faka-te-Tusi Tapu ki se ‵talo, kae e mafai pefea o fesoasoani tatou ki te tino akoga ke malamalama i te tāua o te ‵talo?

¹¹ Kamata te akoga ki se ‵talo. E pelā mo te masani, e ‵lei atu ke kamata kae fakaoti te akoga ki se ‵talo māfai e mafai, mai tua o ne nāi vaiaso ne kamata i ei te akoga. E ‵tau o fesoasoani atu tatou ki te tino akoga ke iloa ne ia me e mafai fua o malamalama tatou i te Muna a te Atua mai te fesoasoani o te agaga o te Atua. E faka‵sae aka ne nisi faiakoga o te Tusi Tapu a te mataupu e uiga ki ‵talo mai te fai‵tau ki te Iakopo 1:5, telā e fai mai: “Kafai se tino i a koutou e se lava te poto i a ia, ke fakamolemole atu faeloa a ia ki te Atua.” Ka oti ko ‵sili atu ei te faiakoga ki tena tino akoga, “E mafai pefea o fakamolemole atu tāua ki te Atua ke maua te poto?” E mautinoa eiloa me ka ‵lago mai te tino akoga ki te manatu me e ‵tau o ‵talo lāua ki te Atua.

12. I te auala fea ka fakaaoga ne koe a te Salamo 139:2-4 ke fesoasoani ki tau tino akoga ke momea aka te ‵lei o ana ‵talo?

¹² Akoako tau tino akoga ke iloa o ‵talo. Fakamautinoa atu ki a ia me i a Ieova e manako o fakalogologo ki tena ‵talo e fai atu mo te loto kātoa. Fakamatala atu me i ‵tou ‵talo totino, e mafai eiloa o ‵tala atu ‵tou loto ki a Ieova—fakaasi atu a lagonaga kolā e se mafai o fai atu ne tatou ki so se tino. Masaua, me ko leva ne iloa ne Ieova a ‵tou mafaufauga. (Faitau te Salamo 139:2-4.) E mafai foki o fakamalosi ne tatou a ‵tou tino akoga ke akai ki te fesoasoani o te Atua ke ‵fuli a mafaufauga ‵se kae ke manumalo i amioga ma‵sei. Mafaufau la ki se tino telā ko leva ne fai tena akoga, kae ko ia loa ko fiafia ki vaegā aso fakamanatu kolā ne māfua mai i talitonuga fapaupau. E iloa ne ia me e ‵se, kae ko te ‵tonuga loa, koi fiafia loa a ia ki nisi vaega o te fakamanatuga tenā. Fakamalosi atu a ia ke fai atu ki a Ieova ana lagonaga kae akai atu mō se fesoasoani ke fiafia fua ki mea e fiafia ki ei te Atua.—Sala. 97:10.

13. (a) Kaia e ‵tau ei o ‵kami fakavave ne tatou a ‵tou tino a‵koga ki fakatasiga? (e) E mafai pefea o fesoasoani atu tatou ke sē mā tau tino akoga i te Fale Tapuaki?

¹³ ‵Kami fakavave tau akoga faka-te-Tusi Tapu ke kau ki fakatasiga. A mea kolā e lagona kae fakalogo ki ei tau tino akoga i fakatasiga Kelisiano e mafai o otia i ei tena loto kae fai ei ke gasolo ki mua. Fakaasi atu te vitio Ne a Mea e Fai i se Kingdom Hall? kae ‵kami fakaaloalo atu a ia ke olo koulua. Fakatoka se mea fakateletele mo ave a ia ki te fakatasiga māfai e mafai. Se manatu ‵lei ke ‵kami ne koe a tino talai kese‵kese ke ‵kau atu ki tau akoga. I te auala tenā, ka masani ‵lei tau tino akoga mo nisi tino i te fakapotopotoga, kae ka se mā a ia māfai ko kau atu ki nisi fakatasiga.

14. Se a te mea e mafai o fakamalosi atu ki se tino akoga ke gasolo ki mua i te feitu faka-te-agaga?

¹⁴ A te ‵tou fakamoemoega ko te fesoasoani atu ki ‵tou akoga faka-te-Tusi Tapu ke ga‵solo ki mua i te feitu faka-te-agaga. (Efe. 4:13) Kafai e fiafia se tino ke suke‵suke mo koe ki te Tusi Tapu, kāti ka fiafia eiloa a ia ki te auala ka aoga ki a ia te akoga. Kae kafai ko gasolo aka ki luga  tena alofa ki a Ieova, ka kamata eiloa o mafaufau a ia ki te auala ke fesoasoani atu ki nisi tino, e aofia i ei a latou kolā ko oti ne fai mo vaega o te fakapotopotoga. (Mata. 22:37-39) Kafai ko oko atu ki te taimi tonu, sa fakatalave o fakailoa atu ki tau tino akoga a te tauliaga ke ‵lago atu ki te galuega o te Malo e auala i mea tau tupe.

15. E mafai pefea o fesoasoani atu tatou ki se akoga faka-te-Tusi Tapu ke fakafesagai atu i se auala ‵lei māfai ko ‵sae aka a fakalavelave?

¹⁵ Akoako tau akoga faka-te-Tusi Tapu ke iloa o fakafesagai atu māfai ko ‵sae aka a fakalavelave. E pelā me se fakaakoakoga, mafaufau me e fai atu tau tino akoga, se tino talai seki papatiso, me i a ia e se fiafia ki se tino i te fakapotopotoga. I lō te oso i a ia, kaia e se fakamatala atu ei a manatu fesoasoani mai te Tusi Tapu ki mea e ‵tau o fai ne ia? E mafai o fakamagalo ne ia tena taina, io me kafai e se mafai ne ia o fai, ke faipati atu ki te taina tenā i se auala atafai kae alofa mo te fakamoemoega ‘ke maua ne ia tena taina.’ (Fakatusa ki te Mataio 18:15.) Fesoasoani ki tau tino akoga ke fakatoka ana pati ka fai atu. Fakaasi atu ki a ia te auala ke fakaaoga te app ko te JW Library^®, te Research Guide for Jehovah’s Witnesses, mo te jw.org^® ke tauloto ki auala tāua ke fakafesagai atu ki tulaga penā. Ko te uke o akoakoga e maua ne ia mai mua o papatiso, ko te ‵lei foki o tena fesokotakiga mo nisi tino i te fakapotopotoga mai tua o tena papatisoga.

16. Kaia e ‵lei ei ke ‵kami ne tatou a nisi tino talai ke ‵kau mai ki ‵tou akoga?

¹⁶ ‵Kami a nisi tino mai te fakapotopotoga—mo te ovasia o te seketi māfai e asi atu ki te fakapotopotoga—ke kau atu ki tau akoga. Kaia? I tafa o pogai kolā ne faka‵sae mai muamua, e mafai ne nisi tino talai o tuku atu ki tau tino akoga a te fesoasoani telā ne seki mafai o tuku atu ne koe ki ei. E pelā mo taumafaiga a se tino akoga ke ‵kati tena ‵pusi kae seki mafai loa o fai penā i te ukega o taimi. ‵Kami se Molimau telā ne manumalo i te faifaiga tenā kāti mai tua o taumafaiga e uke, ke kau atu ki tau akoga. E mafai o tuku atu ne ia se manatu fesoasoani aoga telā e fia fakalogo ki ei tau tino akoga. Kafai e se ‵lei ki a koe ke fai te akoga mo se taina apo, fakamolemole atu ki te taina tenā ke fai ne ia te akoga. Kafai e ‵kami ne koe a nisi taina ki tau akoga faka-te-Tusi Tapu, e mafai loa o maua ne tau tino akoga a mea aoga mai i a latou. Masaua, a te ‵tou fakamoemoega ko te fesoasoani atu ki te tino akoga ke gasolo ki mua i te feitu faka-te-agaga.

17-18. Se a te mea e ‵tau o mafaufau koe ki ei māfai ko fakaiku aka me e ‵tau o fakagata se akoga io me ikai?

¹⁷ Kafai e seai ne ‵fuliga e fai ne tau akoga faka-te-Tusi Tapu, i nisi taimi se mea ‵lei ke ‵sili ifo ki a koe eiloa, ‘E mata, ka fakagata ne au te akoga?’ Mai te iloilo aka te tulaga tenā, e ‵tau o mafaufau koe ki te atamai o te tino. E leva te taimi mō nisi tino ke ga‵solo ki mua i lō a nisi tino. Fesili ifo ki a koe, penei: ‘E mata, a taku tino akoga e gasolo ki mua?’ ‘E mata, ko kamata o “fakalogo,” io me fakagalue ne ia ana mea e  tauloto?’ (Mata. 28:20) E mafai o gasolo malielie ki mua se tino akoga, kae e ‵tau loa o fai faeloa ne ia a ‵fuliga i tena olaga.

¹⁸ Kae e a māfai ko sē fakatāua ne se tino telā ne a‵koga mo koe a mea e suke‵suke koulua ki ei? Ke fakaataata aka a te mea tenei: Ko oti te lua akoga i te tusi ko te Tauloto ne Tatou kae kāti ko oti foki ne kamata koulua i te tusi ko te Tumau i te Alofa o te Atua, kae seki kau aka loa ki se fakatasiga a te fakapotopotoga—penā foki loa te Fakamanatuga! Kae e taofi sāle ne ia te akoga ona fua ko pogai sē tāua. I vaegā tulaga penā, ko ‵tau eiloa mo koe o faipati ‵tonu ki tau tino akoga. *

19. Ne a au pati e mafai o fai atu ki se tino telā ko kamata o se fakatāua ne ia tena akoga faka-te-Tusi Tapu, kae ne a mea ka manakogina ke mafaufau koe ki ei?

¹⁹ E mafai o kamata koe mai te ‵sili atu ki a ia, ‘Se a loa te ‵toe mea faigata ki a koe ke fai mo fai se Molimau a Ieova?’ E mafai o tali mai te tino akoga, ‘E sē se mea e fai i ei a toku sukesuke ki te Tusi Tapu, kae ka sē mafai o fai au mo fai se Molimau a Ieova!’ Kafai tenā tena kilokiloga mai tua o se vaitaimi ne fai ei tena akoga, e mata, e isi se pogai ke faka‵soko tena akoga? I te suā feitu, e mafai o fakaasi atu ne tau tino akoga mō te taimi muamua a pogai e se gasolo ei a ia ki mua. Pelā me se fakaakoakoga, kāti e mafaufau a ia me e se mafai eiloa o talai atu a ia mai fale ki fale. I te taimi nei, ona ko te mea ko iloa ne koe ana lagonaga, ka faigofie ke fesoasoani atu koe ki a ia.

20. E mafai pefea o fesoasoani mai a te manatu i te Galuega 13:48 ke iloa ne tatou me e mata, e ‵tau o fakagata se akoga io me ikai?

²⁰ Se mea fakafanoanoa, me i nisi tino a‵koga e ‵pau eiloa mo tino Isalaelu i aso o Esekielu. E uiga ki a latou, ne fai atu a Ieova ki a Esekielu: “Kiloke! A koe e fai pelā me se pese fakafamau ki a latou, e usu i se leo gali kae tātā mo te atamai i luga i se mea fakatagitagi e isi ne uka i ei. Ka lagona ne latou au pati, kae seai se tino e fai ne ia a mea konā.” (Eseki. 33:32) E mafai o faigata ki a tatou ke fai atu ki se tino me ka fakagata tena akoga. Kae, “ko toetoe te taimi koi ‵toe.” (1 Koli. 7:29) I lō te fakamāumāu taimi o fai a akoga kolā e se ga‵solo ki mua, e ‵tau o ‵sala ne tatou se isi tino loto ‵lei telā “e ‵tau o maua ne [ia] a te ola se-gata-mai.”—Faitau te Galuega 13:48.

21. Se a te ‵tou tusi siki fakavae mō te tausaga 2020, kae kaia e tāua i ei?

²¹ I te 2020, ka fesoasoani mai a te ‵tou tusi siki fakavae mō te tausaga ke ‵saga tonu o momea aka te ‵lei o te ‵tou galuega ko te faiga o soko. E aofia i ei a nisi pati a Iesu i te fakatasiga tāua i luga i se mauga i Kalilaia: “Olo atu koutou, . . . , o fai a tino . . . . mo fai a soko, kae papatiso atu latou.”—Mata. 28:19.