1-2. Ne a fakalavelave faiga‵ta e mafai o fe‵paki mo tavini fakamaoni a Ieova?

 A MEA ‵tupu fakafuasei e mafai o ‵fuli fakavave i ei a ‵tou olaga. E pelā mo te taina fakamaoni e igoa ki a Luis a ne maua a ia ne se vaegā kenisa. Ne fai atu te tokita me toe fia fua masina e ola ei a ia. Ne fakalave‵lave malosi a Monika mo tena avaga i te lā taviniga ki a Ieova. Kae i te aso e tasi, ne iloa aka ne Monika i tena avaga, telā se toeaina, ne fai ne ia se agasala ‵funa mō se fia tausaga. A Olivia, se tuagane taka, ne ‵tau o tiaki fakavave ne ia tena fale me ko pili o poko se alikeni fakamataku. I tena fokiatuga, ne lavea ne ia me ko oti ne ofa ne te matagi tena fale. Ne ‵fuli fakavave a olaga o tino konei i se taimi toetoe fua. E mata, kai tupu aka eiloa se mea fakafanoanoa penā ki a koe, kae fai ei ke ‵fuli katoatoa a tou olaga?

² E tiga loa e tavini fakamaoni tatou ki a Ieova, e fe‵paki tatou mo mea faiga‵ta mo famai kolā e pokotia i ei a tino katoa. E se gata i ei, kāti e ‵tau foki o kufaki tatou i ‵tekemaiga io me ko fakasauaga mai i a latou kolā e takalia‵lia ki tino o te Atua. E tiga eiloa e se puipui ne Ieova tatou mai vaegā fakalavelave penā, kae ne tauto mai me ka fesoasoani mai a ia ki a tatou. (Isa. 41:10) Ona ko tena fesoasoani, ka mafai o tumau tatou i te fia‵fia, fai a fakaikuga ‵lei, kae tumau i te fakamaoni ki a ia i toe tulaga faiga‵ta. I te mataupu tenei, ka suke‵suke tatou ki auala e fa e fesoasoani mai a Ieova māfai ko ‵tupu a fakalavelave faiga‵ta i ‵tou olaga. Ka sau‵tala foki tatou ki mea e mafai o fai ke maua a mea aoga mai te fesoasoani e tuku mai ne ia.

KA PUIPUI KOE NE IEOVA

3. Kafai ko tupu se fakalavelave fakapoi, ne a mea kāti ka faigata ke fai ne tatou?

³ Te tulaga faigata. Kafai ko tupu se fakalavelave fakapoi ki a  tatou, kāti ka faigata ke mafau‵fau faka‵lei kae fai a fakaikuga. Kaia? Ona ko te logo‵mae o ‵tou loto. Kāti ko ‵mafa eiloa ‵tou ulu i te manava‵se. E pelā eiloa me ‵galo tatou i loto i se togavao, kae ko se iloa te auala ke olo atu i ei. Mafaufau ki lagonaga o tuagane e tokolua kolā ne ‵sae mai muamua e uiga ki lā fakalavelave. Ne fai mai a Olivia, “I te otiga ne fakamasei ne te alikeni a toku fale, ne se iloa ne au me se a taku mea ka fai kae ne manavase malosi foki.” Ne fai mai a Monika e uiga ki te sē fakamaoni o tena avaga: “Ne fanoanoa malosi au. Ne ‵mae ‵ki toku loto, e pelā eiloa me ne ‵suki au ne se tino ki se pelu. Ne faigata ke fai aku galuega masani i te aso. E se talitonu au me ne tupu a te mea tenei ki a au.” E fesoasoani mai pefea a te tautoga a Ieova māfai ko mafatia tatou?

4. E ‵tusa mo te Filipi 4:​6, 7, se a te tautoga a Ieova ki a tatou?

⁴ Mea e fai ne Ieova. E tauto mai me ka tuku mai ne ia a te mea telā e taku i te Tusi Tapu me ko “te filemu o te Atua.” (Faitau te Filipi 4:​6, 7.) A te filemu tenei e fakasino ki te tulaga tokagamalie o te mafaufau mo te loto telā e maua ne tatou ona ko te pili o te ‵tou fesokotakiga mo ia. A te filemu tenei e “sili fakafia atu i mea katoa kolā e malamalama i ei a tino”; e gali atu fakafia i lō te mea e mafau‵fau tatou ki ei. Kai maua aka eiloa ne koe a lagonaga tokagamalie mai tua o tau ‵talo telā ne fai mo te loto kātoa ki a Ieova? A te lagonaga tenā ko “te filemu o te Atua.”

5. E puipui pefea ne te filemu o te Atua a ‵tou mafaufau mo loto?

⁵ E fai mai foki a te fuaiupu tenā me i te filemu o te Atua “ka puipui ne ia otou loto mo te malosi o otou mafaufau.” A te pati Epelu ki te “puipui” se tugapati a kautau telā e fakaaoga ke fakasino atu ki sotia kolā e leoleo kae puipui ne latou se fakai mai te fili. A tino kolā e ‵nofo i loto i se fakai telā ne puipui faka‵lei e ‵moe mo te filemu, me iloa ne latou me isi ne sotia e leoleo a mataloa o te fakai. I se auala tai ‵pau, kafai e puipui ne te filemu o te Atua a ‵tou loto mo mafaufau, e se manavase tatou, me iloa ne tatou me e puipuigina eiloa tatou. (Sala. 4:8) E pelā mo te mea ne tupu ki a Hana, kafai foki loa e se ‵fuli fakavave a ‵tou fakanofonofoga, koi mafai eiloa o maua ne tatou se filemu. (1 Samu. 1:​16-18) Kae kafai ko tokagamalie tatou, ko faigofie i ei ke mafau‵fau faka‵lei tatou kae fai a fakaikuga ‵poto.

6. Ne a mea e mafai ne tatou o fai ke maua a mea aoga mai te filemu o te Atua? (Onoono foki ki te ata.)

⁶ Mea e ‵tau o fai ne tatou. Kafai ko fepaki koe mo se fakalavelave, kalaga atu ki te leoleo, i se auala fakatusa. Pefea la? ‵Talo ke oko ki te taimi ko lagona ei ne koe a te filemu o te Atua. (Luka 11:9; 1 Tesa. 5:17) A Luis, telā ne taku atu muamua, ne fakamatala mai ne ia te auala  ne kufaki ei lāua mo tena avaga ko Ana i te taimi ne iloa aka ei me ko ‵toe fia fua a masina e ola i ei a ia. Ana muna: “I vaegā taimi penei, se mea faigata ke fai a fakaikuga e uiga ki te ola ‵lei mo nisi mea aka. Kae e auala i ‵talo, ne mafai ei o maua ne māua te filemu i te taimi faigata tenei.” Ne fai mai a Luis mo tena avaga me ne ‵talo malosi faeloa lāua, o fakamolemole ki a Ieova ke tuku atu te filemu o te mafaufau, ke tokagamalie a lā loto, kae ke ‵poto foki i te faiga o lā fakaikuga ‵lei. Kae ne lagona ne lāua a tena fesoasoani. Kafai ko fepaki koe mo se fakalavelave, ‵talo faeloa, kae ka maua ne koe a te filemu o Ieova telā e takitaki ne ia tou loto mo tou mafaufau.—Loma 12:12.

KA FAKA‵MAUTAKITAKI NE IEOVA A KOE

7. Ne a lagonaga kāti ka maua ne tatou māfai e fakafesagai atu ki se fakalavelave faigata?

⁷ Te tulaga faigata. Kafai ko fakafesagai tatou mo se fakalavelave faigata, e mafai o fai valevale a ‵tou lagonaga, ‵tou mafaufauga, kae se iloa o ‵saga faka‵lei atu. E pelā eiloa mo se vaka telā e ‵ti ona ko te sou o te tai, e mafai foki o fai valevale eiloa a ‵tou lagonaga. Ne fai mai ne Ana, telā ne sae mai muamua, a te uke o lagonaga kese‵kese ne maua ne ia mai tua o te mate o Luis. Ana muna: “Kafai ko oko mai a lagonaga se aoga, ne kamata o loto mafatia au. Ne kaitaua foki au me ko galo atu tou tagata.” I nisi taimi, ne kaitaua kae sē sologa a Ana i taimi e ‵tau o fai ne ia a fakaikuga kolā ne masani o fai ne Luis. Ne mafaufau a ia me pelā me agi a ia ne se kaumatagi i te tai. E fesoasoani mai pefea a Ieova māfai ko kamata o fai valevale a ‵tou lagonaga?

8. E pelā mo pati i te Isaia 33:​6, se a te mea ne fakatalitonu mai ne Ieova ki a tatou?

⁸ Mea e fai ne Ieova. E fakatalitonu mai a ia me ka faka‵mautakitaki ne ia tatou. (Faitau te Isaia 33:6.) Kafai ko fepaki se vaka mo se kaumatagi, kāti ka ‵ti malosi eiloa kae fakamataku foki. Ke fakafeoloolo aka te ‵ti o te vaka, e mafai o isi ne mea pelā me ne kapa‵kau i kaokao o vaka kolā e ‵galo i lalo i te tai. E taofi ne kapa‵kau konei ke mo a ma ‵ti malosi te vaka, ke se fakamataku kae ke gali foki te malaga ki pasese. Kae ko kapa‵kau konei e mafai o ga‵lue faka‵lei māfai fua e tele a te vaka. I se auala tai ‵pau, ka faka‵mautakitaki ne Ieova tatou māfai e tumau i te ga‵solo ki mua mo te fakamaoni i taimi o fakalavelave.

9. E fesoasoani mai pefea a ‵tou mea faigaluega mō fai sukesukega ke fakatumau te paleni ‵lei o tatou? (Onoono foki ki te ata.)

⁹ Mea e ‵tau o fai ne tatou. Kafai ko uke a lagonaga kese‵kese e fepaki mo koe, fai ‵toe mea e mafai ke fakatumau au polokalame faka-te-agaga. E tonu, kāti e se mafai ne koe o fai a mea e uke pelā mo taimi mua, kae ke masaua i a Ieova  e loto malamalama. (Fakatusa ki te Luka 21:​1-4.) E pelā me se vaega o tau polokalame faka-te-agaga, fakaavanoa se taimi ke fai au sukesukega totino kae mafaufau ‵loto. Kaia? E auala i tena fakapotopotoga, ne tuku mai ne Ieova a fakamatalaga tu ‵kese faka-te-Tusi Tapu kolā e mafai o fesoasoani mai ke paleni ‵lei tatou. Ke maua a mea e manako koe ki ei, fakaaoga a mea faigaluega kolā e maua i tau ‵gana, e pelā mo te JW Library^® app, Watch Tower Publications Index, mo te Research Guide for Jehovah’s Witnesses. Ne fai mai a Monika, telā ne sae mai muamua, me ne fakaaoga ne ia a mea faigaluega konei māfai ko kamata o ‵sae aka a lagonaga logo‵mae. Pelā me se fakaakoakoga, ne taipa ne ia te pati “anger” ke maua fakamatalaga ki ei. I nisi taimi, ko te pati “betrayal” io me ko te “loyalty.” Tenā ko faitau ei a ia ki ei ke oko ki te taimi ko ‵lei ana lagonaga. Ana muna: “Ne manava‵se ‵ki au i te kamataga o fai aku sukesukega. Kae mai te tumau i te faitau ki ei ne kamata o lagona ne au me e pelā eiloa me ko ‵sai mai a Ieova ki a au. Ne iloa aka ne au me e malamalama a Ieova i oku lagonaga kese‵kese katoa, kae ne fesoasoani mai eiloa a ia ki a au.” A te fesoasoani tenā mai i a Ieova e mafai foki o fai i ei ke paleni ‵lei koe ke oko ki te taimi ko maua ne koe a lagonaga filemu.—Sala. 119:​143, 144.

KA ‵LAGO ATU A IEOVA KI A KOE

10. Ne a lagonaga e mafai o maua ne tatou mai tua o se fakalavelave fakamataku?

¹⁰ Te tulaga faigata. Mai tua o se fakalavelave fakamataku ne tupu, kāti e isi ne aso ko fi‵ta tatou i te feitu faka-te-foitino mo mea tau lagonaga. Kāti ko ‵pau tatou mo se tino tafao telā ne masani o tele makini muamua kae nei ko sasale kae ketuketu. Ko faigata ki a tatou ke fai a mea kolā ne faigofie o fai muamua ne tatou, io me ko seai eiloa se manakoga i a tatou ke fai a mea kolā ne fia‵fia muamua tatou ki ei. E pelā mo Elia, e mafai o mafau‵fau tatou me ko tō faigata ke ‵tu aka ki luga. E ma‵nako fua tatou ke ‵moe eiloa i lalo. (1 Tupu 19:​5-7) Se a te mea ne tauto mai a Ieova ke fai ne ia māfai tatou ko vāi‵vai?

11. Se a te suā auala e fesoasoani mai a Ieova ki a tatou? (Salamo 94:18)

¹¹ Mea e fai ne Ieova. E tauto mai me ka ‵lago mai a ia ki a tatou. (Faitau te Salamo 94:18.) E pelā me se tino tafao pakia telā e manako ki se fesoasoani ke gasuesue a ia, ka ma‵nako foki tatou ki se fesoasoani ke ga‵lue malosi i te taviniga a Ieova. I vaegā taimi penā, e fakatalitonu mai a Ieova ki a tatou: “Au, Ieova tou Atua, e puke ki tou lima fakaatamai, ko te Atua telā e fai atu ki a koe, ‘Sa mataku. Au ka  fesoasoani atu ki a koe.’” (Isa. 41:13) Tenā loa te fesoasoani ne maua ne te tupu ko Tavita. I te taimi ne fakafesagai atu a ia ki ana fili mo tofotofoga e uke, ne fai atu a ia ki a Ieova: “Tou lima fakaatamai e ‵lago mai ki a au.” (Sala. 18:35) Kae e fesoasoani mai pefea a Ieova ki a tatou?

12. Ko oi e mafai o fakaaoga ne Ieova ke fesoasoani mai māfai ko vāi‵vai tatou?

¹² E ‵lago mai faeloa a Ieova ki a tatou mai te fakamalosi ne ia a nisi tino ke fesoasoani mai. E pelā me se fakaakoakoga, i te taimi e tasi ne vāivāi i ei a Tavita, ne āsi atu a tena taugasoa ko Ionatana o fakamalosi a ia. (1 Samu. 23:​16, 17) I se auala tai ‵pau, ne ‵tofi aka ne Ieova a Elisaia ke fesoasoani atu ki a Elia. (1 Tupu 19:​16, 21; 2 Tupu 2:2) I aso nei, e mafai o fakaaoga ne Ieova a kāiga, taugasoa, io me ko toeaina ke fesoasoani mai ki a tatou. Kae kafai e logo‵mae tatou, kāti ka se ma‵nako tatou o fakatasitasi mo nisi tino. E ma‵nako fua tatou o ‵nofo i a tatou eiloa. Te mea tenā se kilokiloga masani. Ne a mea e mafai ne tatou o fai ke maua te fesoasoani o Ieova?

13. Ne a mea e ‵tau o fai ne tatou ke maua a mea aoga mai te fesoasoani o Ieova? (Onoono foki ki te ata.)

¹³ Mea e ‵tau o fai ne tatou. Taumafai malosi ke se faka‵mao koe mai tino. Kafai e faka‵mao tatou mai nisi tino, kāti ka kamata fua o mafau‵fau tatou ki a tatou eiloa penā foki mo fakalavelave e fe‵paki mo tatou. E mafai o pokotia a ‵tou fakaikuga e fai i vaegā mafaufauga penā. (Faata. 18:1) E tonu, e ma‵nako tatou ki se taimi mō tatou eiloa, maise māfai ko tupu se fakalavelave fakapoi i ‵tou olaga. Kae kafai e faka‵mao tatou mai tino mō se taimi leva, e mafai eiloa o ‵teke ne tatou a tino kolā e fakaaoga ne Ieova ke fesoasoani mai ki a tatou. Tela la, faitalia te faigata o te fakalavelave e fepaki mo koe, ke na talia eiloa ne koe te fesoasoani mai ou kāiga, taugasoa, mo toeaina. Kilo ki a latou e pelā me e fakaaoga ne Ieova ke fesoasoani atu ki a koe.—Faata. 17:17; Isa. 32:​1, 2.

KA FAKAMAFANAFANA NE IEOVA A KOE

14. Ne a tulaga fakama‵taku e mafai o fe‵paki mo tatou?

¹⁴ Te tulaga faigata. Kāti e isi ne taimi ko ma‵taku tatou. I te Tusi Tapu, e fai‵pati a tavini fakamaoni a te Atua ki taimi ne loto mafatia kae ma‵taku latou ona ko olotou fili mo nisi tofotofoga. (Sala. 18:4; 55:​1, 5) I se auala tai ‵pau, e mafai o fakafesagai tatou mo ‵tekemaiga i te akoga, i te koga ga‵lue, mai ‵tou kāiga, io me mai te malo. E mafai foki o ma‵taku tatou i te mate ona ko se masaki. I taimi penā, e mafai  o seiloa ne tatou me se a te mea e ‵tau o fai e pelā loa mo se tamā tamaliki. E mafai pefea o fesoasoani mai a Ieova ki a tatou i taimi penā?

15. Se a te fakatalitonuga e maua ne tatou i te Salamo 94:19?

¹⁵ Mea e fai ne Ieova. E fakamafanafana kae fakamalosi ne ia tatou. (Faitau te Salamo 94:19.) E mafai o fai ne te salamo tenei ke mafau‵fau tatou ki se tamaliki fafine telā e mataku kae e se mafai o moe ona ko te ‵lapa o uila mo te ‵pa o fa‵tili. E mafai o fakaataata ne tatou a tena tamana e sau aka ne ia tou fafine ki ana lima ke oko ki te taimi ko tō ei a tena moe. E tiga eiloa koi ‵lapa a uila kae ‵pa a fa‵tili, kae ko se mataku tou fafine, me ko moe a ia i luga i lima mafanafana o tena tamana. Kafai e fe‵paki tatou mo fakalavelave fakama‵taku, ka ma‵nako eiloa tatou ke ‵sai mai te ‵tou Tamana faka-te-lagi i se auala fakatusa ke oko ki te taimi ko galo atu te mataku. E maua pefea ne tatou a te fakamafanafanaga tenā mai i a Ieova?

16. Ne a mea e mafai ne tatou o fai ke maua a mea aoga mai te fakamafanafanaga a Ieova? (Onoono foki ki te ata.)

¹⁶ Mea e ‵tau o fai ne tatou. Ke fakamāumāu faeloa ‵tou taimi mo Ieova—mai te ‵talo atu ki a ia kae faitau tena Muna. (Sala. 77:​1, 12-14) Me kafai ko loto mafatia koe, kāti a te mea muamua ka mafaufau koe ki ei ko te ‵sala atu ki te fesoasoani o ‵tou Tamana faka-te-lagi. Fakaasi atu ki a Ieova a mea e mataku kae manavase koe ki ei. Kae tuku ke faipati kae fakamafanafana ne ia koe e auala i te Tusi Tapu. (Sala. 119:28) Kāti ka maua ne koe ne nai fuaiupu mai te Tusi Tapu kolā e mafai o fakamafanafana atu māfai ko mataku koe. E pelā me se fakaakoakoga, kāti ka maua ne koe ne pati fakamalosi i te tusi o Iopu, Salamo, mo Faataoto e pelā foki mo pati a Iesu i te Mataio mataupu e 6. Kafai e ‵talo koe ki a Ieova kae faitau tena Muna, ka maua eiloa ne koe a tena fakamafanafanaga.

17. Se a te loto talitonu e mafai o maua ne tatou?

¹⁷ E mafai o maua ne tatou a te loto talitonu me ka fakatasi mai a Ieova ki a tatou i taimi faiga‵ta o ‵tou olaga. Ka se tuku tiaki eiloa tatou. (Sala. 23:4; 94:14) E tauto mai a Ieova ke puipui, faka‵mautakitaki, fesoasoani kae fakamafanafana ne ia tatou. E uiga ki a Ieova, e fai mai te Isaia 26:3: “Ka puipui ne koe a latou kolā e fakalago‵lago katoatoa ki a koe; ka tuku atu ne koe ki a latou a te filemu tumau, me ko koe e tali‵tonu latou ki ei.” Tela la, ke talitonu ki a Ieova, kae fai ‵toe mea e mafai ke maua a mea aoga mai tino kolā e fakaaoga ne Ieova ke fesoasoani atu ki a koe. Kafai e fai koe penā, ka maua ne koe a te malosi i taimi faiga‵ta.