A TE pati Epelu telā ne ‵fuli ki te “kaliota” i te ‵Fuliga o te Lalolagi Fou e mafai o fakasino atu ki so se kaliota. (Galu. 8:​28, 29, 38) Kae ko te kaliota telā ne tele i ei a te ofisa Aitiope tenei e foliga mai me lasi fakafia atu i kaliota a sotia io me ko kaliota fakatau‵tele. Ke onoono nei tatou ki nisi pogai.

A te tagata Aitiope tenei se ofisa maluga telā ne faimalaga atu ki se koga ‵mao ‵ki. A ia “se tagata maluga a te Kanake, ko te tupu fafine o tino Aitiope, telā e pule i koloa katoa a te tupu.” (Galu. 8:27) A te fenua ko Aitiope i aso mua e aofia i ei a Sudan i aso nei mo te lasiga o te feitu ki saute o Aikupito. Kāti ne seki fanatu te tagata tenā i te kaliota eiloa e tasi i tena malaga kātoa, kāti ne isi ne ana kope ne fano mo ia ona ko te loa o te malaga. E aofia i kaliota kolā ne fakaaoga i te senitenali muamua T.A. ke aveave i ei a pasese, ko kaliota kolā e fa olotou teka kae ufi katoa. “E mafai ne te kaliota tenā o ave a kope e uke, e ‵lei te faimalaga i ei, kae kāti e mafai o faima‵laga i ei a tino ki koga tai ‵mao atu,” e ‵tusa mo pati i te tusi ko te Acts—An Exegetical Commentary.

Ne faitau a te tagata Aitiope tenei i te taimi ne fakapilipili atu a Filipo ki a ia. E fai mai te tala me “ne tele atu a Filipo i tafa o te kaliota kae lagona ne ia a tou tagata [te eunuka] e faitau i se leo maluga ki te tusi a te pelofeta ko Isaia.” (Galu. 8:30) A kaliota faima‵laga ne seki faite ke ‵tele ma‵kini. Ona ko te teletele malie o te kaliota, ne mafai eiloa ne te eunuka tenei o faitau kae mafai foki o sasale a Filipo ki ei.

Ne fakamolemole atu te tagata Aitiope “ke sopo aka a Filipo ke saga‵saga laua.” (Galu. 8:31) I se fakatau‵telega masani o kaliota, a te tino fakatele e masani eiloa o tu i luga. Kae ko te kaliota telā ne faite ke faima‵laga i ei, e avanoa eiloa ke saga‵saga i ei a te eunuka mo Filipo.

E ‵tusa mo fakamatalaga kolā ne fakamau i te Galuega mataupu e 8 mo nisi fakamaoniga mai tala fakasolopito mua, ne fakamatala mai i ‵tou tusi fakamuli nei me i te ofisa eunuka ne tele i se kaliota telā e lasi fakafia atu i kaliota masani a kautau io me ko kaliota fakatau‵tele.