KO ‵FONU te Tusi Tapu i tugapati ‵loto mai tino kolā e isi ne olotou “lagonaga e penei mo tatou.” (Iako. 5:17) E pelā me se fakaakoakoga, e mafai o malamalama faka‵lei tatou i te mea ne fakauiga a Paulo ki ei i ana pati ne fakamau i te Loma 7:21-24: “Kafai e manako au o fai a te mea ‵lei, kae e nofo i a au a te mea masei . .  Ko oko eiloa i toku fakaalofa!” A vaegā lagonaga fakamaoni penā e fakamalosi mai ki a tatou māfai o fakafesagai tatou mo ‵tou tulaga sē ‵lei katoatoa.

Ne fakaasi mai foki ne Paulo ana nisi lagonaga ‵tonu. I te Kalatia 2:20, ne fai mai ne ia mo te loto talitonu me i a Iesu “ne alofa mai [ki a ia] kae tuku mai foki tena ola mō [ia]”! E mata, e ‵pau mo ‵tou “lagonaga”? Kāti e se penā faeloa.

Kafai e maua ne tatou a lagonaga me i a tatou ko se aoga ona ko mea ‵se ne fai i taimi ko ‵teka, kāti e mafai o faigata i nisi taimi ke talia ne tatou a te alofa mo te alofa fakamagalo o Ieova, kae ko faigata ke ‵kilo atu ki te taulaga togiola e pelā me se meaalofa ki a tatou taki tokotasi. E mata, e manako eiloa a Iesu ke maua ne tatou te kilokiloga tenā e uiga ki te togiola? Kafai e penā loa, se a te mea e mafai o fesoasoani mai ke fai ne tatou te mea tenā? Ke na suke‵suke nei tatou ki fesili konā e lua.

E tonu, a Iesu e manako ko tatou ke ‵kilo atu ki tena taulaga e pelā me se meaalofa. E mafai pefea o mautinoa i a tatou a te mea tenā? Mafaufau ki pati ne fakamau i te Luka 23:39-43. Se tagata e tautau i te pou fakasaua i tafa o Iesu. Ne fai ‵tonu atu a ia me ne fakasala a ia ona ko ana mea ‵se i aso ko ‵teka. E mautinoa eiloa me tai matagā loa tena agasala ne fai, me i te vaegā fakasalaga tenei e fakaoko fua ki vaegā pagota fatauva penā. Ona ko te mafatia i te tulaga o ia, ne fakamolemole ei tou tagata ki a Iesu, penei: “Masaua mai au māfai e oko koe ki tou Malo.”

Ne saga atu pefea a Iesu ki ei? Mafaufau aka la ki te logo‵mae o Iesu i te taimi ne ‵fuli atu ei tena ulu o kilo ki te pagota tenā. E ui loa tena tigaina, ne saga atu a ia mo te fakamisikata kae fakamalosi atu ki te tagata, ana muna: “Au e fai ‵tonu atu ki a koe i te aso nei, ka ‵nofo fakatasi eiloa tāua i te Palataiso.” Ne mafai fua o fai atu a Iesu ki te tagata me i “te Tama a te tagata” ne vau ke “tuku atu foki tena ola e pelā me se togiola mō tino e tokouke.” (Mata. 20:28) Kae i lō te fai penā, ne fai atu a Iesu mo te atafai ki te pagota me i tena taulaga ka aoga eiloa ki a ia totino. Ne faipati atu a ia i se leo filemu i te taimi ne fakaaoga ne ia a te suinauna ko te “koe” mo “au.” Kae ne fai atu a ia ki te pagota me ka nofo eiloa a ia i te lalolagi palataiso.

E seai se fakalotolotolua, me ne manako a Iesu ke talia ne te tagata a te taulaga tenei telā ka pili o ofo atu e pelā me se meaalofa ki a ia totino. Kafai ne penei a lagonaga o Iesu e uiga ki se pagota telā ne seki ‵tau o maua ne ia te avanoaga ke tavini atu ki te Atua, ka mautinoa eiloa me ka penā foki ana lagonaga e uiga ki se Kelisiano telā e tavini atu ki te Atua. Tela la, se a te mea e mafai o fesoasoani mai ke ati aka ne tatou se lagonaga ‵lei penā e uiga ki a tatou eiloa faitalia ‵tou agasala i taimi ko ‵teka?

Ne fakamalosigina te galuega talai a Paulo ne te auala ne kilo atu ei a ia ki te taulaga a Iesu. E pefea la? Ne fakamatala mai a ia: “Au e fakafetai ki a Keliso Iesu te ‵tou Aliki, telā ne tuku mai ne ia te ‵mana ki a au, me ne talitonu a ia i a au e fakamaoni o fai te galuega ne tuku mai ne ia, e tiga eiloa au se tino ne muna masei, ne uiga fakasaua kae fia sili i aso mua.” (1 Timo. 1:12-14) Ne fakatalitonu mai ne te galuega a Paulo a te alofa fakamagalo o Iesu, tena alofa, mo tena loto talitonu. I se auala tai ‵pau, ne tuku mai ne Iesu ki a tatou a te galuega tenei ke talai atu te tala ‵lei. (Mata. 28:19, 20) E mata, e mafai o aoga foki ki a tatou?

A Albert, telā ne toe foki ki a Ieova mai tua o te fakateaga mō se 34 tausaga ne fai mai: “E se mafai o puli i a au a aku agasala ne fai. Kae kafai ko fano au i te galuega talai, e mafaufau eiloa au pelā mo te apositolo ko Paulo, me ne tuku mai eiloa ne Iesu ki a au se galuega. E fakamalosi kae fakatumau ne ia se kilokiloga ‵lei e uiga ki a au eiloa, toku olaga, penā foki mo toku olaga i aso mai mua.”—Sala. 51:3.

A Allan, telā ne ola i se olaga matagā kae amio fakasaua i aso mua, ne tauloto ki te munatonu, kae fai mai, penei: “Koi mafaufau eiloa au ki mea ma‵sei katoa ne fai ne au ki tino. I nisi taimi, e fai ei ke loto mafatia au. Kae fakafetai au ki a Ieova me e talia ne ia a vaegā tino agasala penei mo au ke talai atu te tala ‵lei ki nisi tino. Kafai e lavea ne au a te auala e ‵saga mai ei a tino ki te tala ‵lei, e fakamasaua mai ei ki a au e uiga ki te ‵lei mo te alofa o Ieova. E mafaufau au me e fakaaoga ne ia au ke fesoasoani atu ki nisi tino kolā e fe‵paki mo vaegā tulaga tai ‵pau penā.”

E fai ne te ‵tou galuega talai ke ‵saga ‵tonu atu tatou kae mafaufau foki ki mea ‵lei. E fakamautinoa mai ki a tatou e uiga ki te alofa fakamagalo o Iesu, tena alofa mo tena loto talitonu ki a tatou.

Ke oko eiloa ki te taimi e fakaseai ei te olaga masei tenei a Satani, e mafai eiloa o se ‵lei ‵tou loto ona ko ‵tou mea ‵se ne fai i aso ko ‵teka. Se a te mea ka fesoasoani mai ke fakatakavale ne tatou a vaegā lagonaga penā?

“E fiafia au ke iloa atu me i te ‘Atua e sili fakafia atu i ‵tou loto,’” e fai mai a Jean, telā ne fakafesagai atu faeloa ki lagonaga sē ‵lei o te ola i se olaga magalua i te taimi koi talavou ei a ia. (1 Ioa. 3:19, 20) E mafai foki o maua ne tatou a fakamafanafanaga mai te iloa atu me i a Ieova mo Iesu e malamalama fakafia atu i ‵tou tulaga agasala i lō tatou. Masaua, me ne fakatoka ne lāua mo te a‵lofa a te togiola, e se mō tino ‵lei katoatoa, kae mō latou kolā e sala‵mo i olotou agasala.—1 Timo. 1:15.

E loto tali‵tonu tatou e uiga ki te munatonu tāua tenei māfai e ‵talo kae mafaufau ‵loto ki te auala ne fai faka‵lei ei ne Iesu a tino sē ‵lei katoatoa, i te taimi e fai ei ne tatou te ‵toe mea e mafai o fai ke fakataunu te ‵tou galuega talai telā ne tuku mai ki a tatou. Mai te faiga penā, ko mafai o fai atu tatou e pelā mo Paulo: A Iesu “ne alofa mai ki a au kae tuku mai foki tena ola mō au.”