Kai faitau faka‵lei eiloa koe ki lōmiga ‵fou o Te Faleleoleo Maluga? Onoono aka, me e mafai o tali mai ne koe a fesili konei:

Ne a mea e fa e mafai o fai ne tatou ke momea aka te ‵lei o ‵tou usu?

E mafai o fakatu faka‵lei tau tusi pese, kae fakasaga ki luga tonu i tou ulu. E ‵tau mo tatou o mā‵nava faka‵lei. Kafai e fakamaga ‵tou gutu kae usu malosi atu, ko mafai ei ne tatou o usu atu i se leo maluga. —w17.11, itu. 5.

Se a te mea e ‵tau o ofo ei tatou i koga mo auala kolā e soko ki fakai faka‵lafi i Isalaelu?

E ono a fakai faka‵lafi kolā ne vaevae i te fenua, fakatasi mo auala ‵lei ke oko atu ki ei. Tela la e mafai o faka‵lafi fakavave atu se tagata ki ei.—w17.11, itu. 14.

Kaia e fai ei a te meaalofa a te Atua ko te togiola e auala i a Iesu e pelā me ko te meaalofa sili e mafai o maua ne tatou?

E fakamalie i ei ‵tou manakoga ke tumau i te ola, kae faka‵fonu aka i ei ‵tou manakoga ke saoloto mai te agasala mo te mate. Mai te mauaga o lagonaga alofa ki luga i fanau a Atamu, ne fakatoka ei ne te Atua a Iesu mō tatou a koi taku tatou e pelā me ne tino agasala.—wp17.6-E, itu. 6-7.

Ne fakasino atu pefea a te Salamo 118:22 ki te toetuga o Iesu?

Ne ‵teke atu latou ki a Iesu kae tamate a ia. Ko te mea ke fai a ia pelā me ko te “fatu tulimanu tafasili i te aoga,” ne ‵tau o toe fakatu aka a ia.—w17.12, itu. 9-10.

E mata, e isi se sokoga o te laina telā e tau atu ki te Mesia ki te tulaga toekimua?

I nisi taimi a te gafa telā e tau atu ki a Iesu ne auala mai i te toekimua, kae ne seki fai faeloa penā. A Tavita e se ko te tama toekimua a Iese; kae ko Iesu ne vau mai te gafa o Tavita.—w17.12, itu. 14-15.

Ne a nisi fakatakitakiga i mea fakatokita e maua ne tatou i te Tusi Tapu?

Mai lalo i te Tulafono, a latou kolā e isi ne olotou masaki e ‵tau o ave ki se koga fakaa‵tea mai nisi tino. E ‵tau o ‵fulu a lima o tino māfai ne fakapa‵tele atu ki se foitino mate. Ne fakatonu mai i te Tusi Tapu a te auala e tanu faka‵lei i ei a fekau o tino. A te pilitome ne ‵tau o fai i te valu o aso, telā ko te ‵toe taimi ‵lei me e ‵poto i ei a toto.—wp18.1, itu. 7.

Kaia e se masei ke isi se alofa paleni o te Kelisiano ki a ia eiloa?

E ‵tau mo tatou o a‵lofa ki ‵tou tuakoi e pelā mo ‵tou a‵lofa ki a tatou eiloa. (Male. 12:31) E ‵tau o “a‵lofa a tāgata a‵vaga ki olotou avaga e pelā eiloa me ko olotou foitino ‵tonu.” (Efe. 5:28) E tonu, a te alofa o te tino ki a ia eiloa e mafai o faka‵segina.—w18.01, itu. 23.

Ne a nisi auala e mafai ei ne tatou o ga‵solo ki mua i te feitu faka-te-agaga?

E ‵tau mo tatou o suke‵suke ki te Muna a te Atua kae mafaufau ‵loto ki ei, ka oti ko fakagalue aka ei a mea e tauloto ne tatou. E ‵tau foki o ‵saga tonu atu ‵tou mafaufau mo loto ki te fakamalosiga a te agaga tapu kae loto fia‵fia o talia a fesoasoani mai nisi tino.—w18.02, itu. 26.

Kaia e se fai ei a te iloiloga o fetū mo te fakamatalaga o mea ‵tupu i aso mai mua e pelā me ne auala ke iloa a mea ka ‵tupu i aso mai mua?

E isi ne pogai, kae ko te pogai tāua me e taku fakamsei ne te Tusi Tapu a faifaiga konei.—wp18.2, itu. 4-5.

E ‵tau o pefea ‵tou kilokiloga ki te taliaga o se ‵kamiga ki te ‵kaiga?

Kafai ne talia ne tatou se ‵kamiga, e ‵tau o taumafai tatou o fakataunu ‵tou pati. (Sala. 15:4) E se ‵tau o fakaseaoga ne tatou te ‵kamiga e aunoa mo se pogai ‵tau. Kāti ne galue malosi eiloa te tino tenā ke fakatoka a mea‵kai.—w18.03, itu. 18.

Se a te mea e mafai o tauloto mai ne tāgata kolā ne ‵tofigina mai i a Timoteo?

Ne saga tonu atu eiloa a Timoteo ki tino kae fakamuamua olotou manakoga faka-te-agaga. Ne galue malosi tou tagata i te taviniga tapu kae fakagalue aka a mea ne tauloto ne ia. Ne tumau faeloa i te akoako ne ia a ia eiloa kae fakalagolago ki te agaga o Ieova. E mafai eiloa ne toeaina mo nisi tino o tau‵tali i tena fakaakoakoga.—w18.04, itu. 13-14.