1. Se a te pogai fakapito e ‵tau ei mo tatou o fia‵fia?

SE MEA fakafiafia eiloa ke lavea atu te gasolo aka ki luga o te aofaki o tino o Ieova! I te tausaga ko teka, e sili atu mo te 10,000,000 o a‵koga faka-te-Tusi Tapu ne fai. E mautinoa eiloa me e fakaasi mai i te mea tenei me e maina atu eiloa te mainaga o tavini o te Atua! Kae mafaufau la ki te fia miliona o tino fia‵fia kolā e tali fiafia ne tatou i te Fakamanatuga. Ne mafai eiloa o tauloto latou ki te alofa telā ne fakaasi mai ne te Atua i te taimi ne tuku mai ne ia te togiola.—1 Ioa. 4:9.

2, 3. (a) Se a te mea telā e se taofi ne ia tatou mai te ‘maina atu e pelā me ne moli’? (e) Mai te mafau‵fau ki pati a Iesu kolā ne fakamau i te Mataio 5:14-16, se a te mea ka sau‵tala tatou ki ei?

² I te lalolagi kātoa, e fai‵pati eiloa a tino o Ieova ki ‵gana kese‵kese e uke. Kae e se taofi aka ne te mea tenei latou mai te avatuga o vikiga ki te ‵tou Tamana, ko Ieova. (Faka. 7:9) Faitalia ‵tou ‵gana io me ko te koga e ‵nofo ei tatou, e mafai o maina atu tatou “e pelā me ne moli i te lalolagi.”—Fili. 2:15.

³ A te gasolo aka o te aofaki o tatou, te ‵kau fakatasi mo te matapula‵pula ke fai fakavave te galuega, e fesoasoani mai eiloa ki te avatuga ne tatou o vikiga ki a Ieova. I te mataupu tenei, ka sau‵tala  eiloa tatou ki te auala e mafai ei o fai te mea tenā.—Faitau te Mataio 5:14-16.

4, 5. (a) E se gata i te talai atu, e mafai pefea o maina atu a ‵tou mainaga? (e) Ne a mea aoga e mafai o maua ne tatou mai ‵tou uiga atafai? (Ke onoono ki te ata i te kamataga.)

⁴ “E seai se tino e mafai o fakamaoni kae fai mea tonu ki te Aliki i aso fakaoti konei . . . vaganā ke fakaaoga ne ia te avanoaga tenā ke maina atu tena mainaga.” Tenā te fakamatalaga mai te mataupu “Light in the Darkness,” telā ne ‵lomi i The Watch Tower i a Iuni 1, 1925. Kae ne toe fakamatala mai te mataupu: “E ‵tau o fai ne ia te mea tenei mai te fakailoa atu te tala ‵lei ki tino i te lalolagi, kae mai te tautali i te mainaga tenā.” E manino ‵lei me i te auala e tasi e fai ei ke maina atu ‵tou mainaga ko te talai atu a te tala ‵lei kae fai a soko. (Mata. 28:19, 20) E se gata i ei, e mafai o ‵viki atu tatou ki a Ieova mai ‵tou amioga faka-Kelisiano. E kilo‵kilo mai a tino i fale mo tino e oloolo i ‵tou tafa ki ‵tou amioga. A te fakamisikata mo te fakatalofa atu mo te atafai se fakaasiga me ko tatou ne vaegā tino pefea e pena foki te Atua telā e tapuaki tatou ki ei.

⁵ “Kafai e ulu atu koutou ki se fale,” ko muna a Iesu ki ana soko, “fakatalofa atu ki tino i loto i ei.” (Mata. 10:12) I te koga telā ne talai atu faeloa i ei a Iesu mo ana apositolo, se faifaiga masani ke ‵kami ne tino a tino fakaa‵tea ki loto i olotou fale. I ‵tou aso nei, a te mea tenei e sē se faifaiga masani i fenua e uke. Kae ko au faifaiga ‵gali kae āva i te taimi e fakamatala atu ei te pogai o tou oko atu, e mafai o fai ei ke sē manavase te tino i te fale io me fakafeoloolo aka i ei a tena sē fiafia. A te fakamisikata atu mo te fiafia ko te ‵toe fakatomuaga ‵lei eiloa tenā. Ko oti ne fakamaoni aka ne taina mo tuagane kolā ne ‵tu atu mo olotou kā tusi i koga e tokouke i ei a tino. Kafai e aofia koe i te vaega tenā o te galuega talai, e mafai o lavea ne koe te ‵saga tonu mai o tino ona ko te fakamisikata mo pati fakatalofa kolā e fai atu ne koe. E mafai o fakamalosi latou ke solo mai o puke olotou tusi. A ou uiga atafai e mafai foki o fesoasoani atu ke kamata ne koe se sau‵talaga.

6. Ne fakalauefa atu pefea ne se tauavaga ma‵tua te lā galuega talai?

⁶ Ne fakafesagai eiloa se tauavaga ma‵tua mo masaki o te foitino telā ne faigata ki a lāua ke olo atu o talai mai fale ki fale. Ne fakaiku aka ne lāua ke maina atu te lā mainaga mai te talai atu mai tua fua o te lā fale. Ne fakatu ne lāua se taipola o tusi faka-te-Tusi Tapu i te taimi e au‵mai ei a mātua o puke olotou tama‵liki mai se akoga pili ki te lā fale. Ne fai ne te fia logo ke tokouke a tino e puke ne latou a ‵kopi o te Questions Young People Ask—Answers That Work, Tusi 1 mo te 2, penā foki mo polosiua. Ne kau atu foki ki a lāua se tuagane paenia mai te lā fakapotopotoga ki te vaega tenei o te galuega talai. Ne fai ne uiga atafai o tou fafine mo taumafaiga loto fesoasoani a te tauavaga ma‵tua konei ke talia ne se mātua e tokotasi se akoga faka-te-Tusi Tapu.

7. Se a te fesoasoani e mafai o tuku atu ne koe ki tino ‵fou i te koga e nofo koe i ei?

⁷ I tausaga fakamuli nei, e tokouke a tino ko ga‵sue ki nisi fenua e pelā me ne tino fakaa‵lofa. Se a te mea e mafai ne koe o fai ke fesoasoani atu ki vaegā tino penā ke iloa ne latou a Ieova mo tena fuafuaga? Muamua la, kaia e se tauloto koe ki pati fakatalofa i ‵gana kolā e masani ki ei a tino ‵fou konā i te koga e nofo ei koe? A te app ko te JW Language se mea faigaluega e mafai o fesoasoani atu ke fai ne koe te mea tenā. E se gata i ei, kaia e se tauloto ei koe ki ne nāi fuaiupu kolā e mafai o fakamalosi aka i ei te lotou fia‵fia? Mai konā, ko mafai ei ne koe o takitaki atu latou ki te jw.org kae fakaasi atu ki a latou a vitio mo tusi kese‵kese kolā e avanoa i olotou ‵gana.—Teu. 10:19.

8, 9. (a) Se a te fesoasoani aoga e maua ne tatou i ‵tou fakatasiga i loto i te vaiaso? (e) E mafai pefea o fesoasoani atu a mātua ki olotou tama‵liki ke fai olotou tali i fakatasiga?

⁸ Ne fakatoka eiloa ne Ieova mo te alofa a te Fakatasiga ko te ‵Tou Olaga Kelisiano mo  te Galuega Talai ko te mea ke mafai o magoi te ‵tou galuega talai. A manatu fakatonutonu aoga kolā e maua ne tatou i te fakatasiga tenei e fesoasoani mai ke loto tali‵tonu te tokoukega o tatou i te faiga o toe asiga mo akoga faka-te-Tusi Tapu.

⁹ Ko oti ne lavea ne tino ‵fou e tokouke a ‵tou tama‵liki e fai olotou tali i fakatasiga. Mātua, fesoasoani atu ki otou tama‵liki ke maina atu olotou mainaga mai te akoako latou ke fai olotou tali i olotou pati totino. A olotou tali faigofie kae fai mo te loto kātoa se fakamalosiga ki tino fia‵fia ‵fou konā ke lavea ne latou a te munatonu.—1 Koli. 14:25.

10. Se a te tusaga o te tapuakiga a kāiga i te fakamalosiakaga o te ‵kau fakatasi?

¹⁰ A te suā auala e maina atu ei tou mainaga ko te fakamalosi aka te ‵kau fakatasi i tou kāiga mo tau fakapotopotoga. A te auala e tasi e mafai ne mātua o fai penā ko te fakatoka ki te polokalame mō te Tapuakiga a Kāiga. E aofia ne tino e tokouke a te onoono ki te Leo Fakasalalau o te JW kāti i se taimi e tasi i loto i te masina. Kafai ko oti ne onoono i te polokalame, kaia e se fakaaoga ei te taimi ke sau‵tala ki te auala e mafai ei o fakagalue aka a manatu kolā ne onoono ki ei? Kafai e fai te tapuakiga a kāiga, e ‵tau o masaua ne mātua me ‵kese a takitakiga e tuku atu ki tamaliki fo‵liki mo tamaliki ma‵tua. Fakaaoga faka‵lei a mea faigaluega mō sukesukega ko te mea ke maua ne tino taki tokotasi i tou kāiga a mea aoga mai i ei.—Sala. 148:12, 13.

11-13. E mafai pefea ne tino katoa o fakamalosi aka te ‵kau fakatasi i te fakapotopotoga kae fesoasoani ki nisi tino ke maina atu te lotou mainaga?

¹¹ E mafai pefea ne talavou o fakamalosi aka te ‵kau fakatasi i te fakapotopotoga kae fakamalosi atu a nisi tino ke maina atu te lotou mainaga? Kafai koe se talavou Kelisiano, kaia e se fai ei pelā me se fakamoemoega ke saga atu ki tino ma‵tua? E mafai o ‵sili atu koe mo te āva ke fakamatala mai olotou tala e uiga ki olotou taviniga. Ka aoga malosi ‵ki a te mea tenei ki a koe, kae ka fakamalosi foki ki tino ma‵tua ke maina atu te lotou mainaga e uiga ki te munatonu. Ke fai pelā me se fakamoemoega, ke tali fia‵fia ne tatou a tino kolā e ‵kau atu ki fakatasiga i te Fale Tapuaki. A te faiga tenā ka fakamalosi aka i ei ne tatou a te ‵kau fakatasi, kae fai ei ke ma‵nako a tino ‵fou konā ke aofia i te fakamaina atu o te ‵tou mainaga. E mafai o aofia i au taumafaiga a te fakatalofa kae fakamisikata atu ki tino ‵fou, kae fesoasoani atu foki i te ‵salaga o olotou nofoaga. Taumafai ke fakamasani ne koe latou ki nisi tino, ko te mea ke sē ‵mā latou.

 ¹² Kafai ne ‵tofi aka koe ke fai a fakatasiga mō te galuega talai, e mafai ne koe o fai a mea e uke atu ke fesoasoani ki tino ma‵tua ke mafai o aofia i te galuega talai. E mata, e isi ne koga talai e fetaui ‵lei mō latou? I nisi feitu, e mafai o filifili ne koe latou ke ga‵lue tasi mo se talavou telā e mafai o fesoasoani atu ki a latou. E mafai foki o fakaasi atu ne koe te loto malamalama mai te saga atu ki a latou kolā e fakamasaki‵saki io me ko latou kolā ko se uke olotou mea e mafai o fai ona ko olotou fakanofonofoga. E tonu, a tou saga tonu atu mo te malamalama e mafai o fesoasoani atu ki talavou mo tino ma‵tua, tino apo mo tino ‵fou ke talai atu te tala ‵lei mo te loto finafinau.—Levi. 19:32.

¹³ Ne fakaosofia eiloa te faisalamo ke folafola mai penei: “Ko oko eiloa i te ‵lei kae gali mō taina ke ‵nofo fakatasi i te fealofani!” (Faitau te Salamo 133:1, 2.) Mai te maopoopo fakatasi, ne maua ne tino Isalaelu a mea aoga mai fakamalosiga ‵lei a nisi tino kolā ne tapuaki atu ki a Ieova. E fai eiloa e pelā mo se sinu telā e fakafiafia kae fakamalosi loto. Kaia e se fakaiku aka ei ke maua se kilokiloga ‵lei, mai te fakamalosi aka te ‵kau fakatasi i te vā o taina mo tuagane? Kafai ko oti koe ne fai penā, e fakamālō atu eiloa ki a koe. E mata, e mafai ne koe o ‘‵tala tou loto’ mai te fai ke iloa ‵lei ne koe ou taina i te fakapotopotoga?—2 Koli. 6:11-13.

14. Ne a mea e mafai ne koe o fai ke maina atu tou mainaga ki ou tuakoi?

¹⁴ Kae e a ma taumafai koe ke momea aka te maina atu o tou mainaga e uiga ki te munatonu ki ou tuakoi? E mafai o tosina mai ou tuakoi ki te munatonu ona ko au pati mo faifaiga atafai. Ke ‵sili ifo ki a koe eiloa: ‘E pefea te kilokiloga a oku tuakoi ki a au? E mata, e tausi ne au toku fale mo kope ke ‵ma, ke fakaasi atu ei se ata ‵lei ki tuakoi? E mata, e gasue muamua au o fesoasoani atu ki nisi tino?’ Kafai e sau‵tala koe mo nisi Molimau, kaia e se fakaasi atu ei ne koe te auala e aoga ei olotou amioga ‵lei kae atafai ki olotou kāiga, tuakoi, tino e ga‵lue tasi mo latou, io me ko tama‵liki i te akoga? E mautinoa eiloa me ka lagona ne koe olotou tala fakamalosi loto.—Efe. 5:9.

15. Kaia e tāua ei ke tumau i te matapula‵pula?

¹⁵ Kafai e ma‵nako tatou ke tumau i te maina atu ‵tou mainaga, e ‵tau o matapula‵pula tatou i te taimi ko ola nei i ei tatou. Ne fakamalosi faeloa a Iesu ki ana soko, penei: “Tumau i te matapula‵pula.” (Mata. 24:42; 25:13; 26:41) E manino ‵lei me kafai e tali‵tonu tatou me koi tai ‵mao te “fakalavelave lasi,” kae ka oko mai eiloa i se taimi leva, ka sē matapula‵pula eiloa tatou ki so se avanoaga ke fai fakavave te galuega talai. (Mata. 24:21) I lō te maina atu ki ‵tou tuakoi, ka sē maina malosi ‵tou mainaga kae e mafai foki loa o mate atu.

16, 17. Ne a mea e mafai ne koe o fai ke tumau i te matapulapula?

¹⁶ Ona ko te gasolo aka o masei te vaitaimi tenei, e ‵tau mo tatou katoa o tumau i te matapula‵pula. Ka gasuesue eiloa a Ieova i tena taimi tonu. E seai se tino e fakafesili ne ia te mea tenā. (Mata. 24:42-44) I te taimi nei, ke kufaki, mai te matapula‵pula faeloa. Faitau te Muna a te Atua i aso katoa, kae ke mataala kae ‵talo faeloa. (1 Pe. 4:7) Mafaufau ki fakaakoakoga ‵lei o taina mo tuagane kolā ne maua ne latou se olaga fiafia mai te tumau i te matapula‵pula kae maina atu olotou mainaga. E tasi o fakaakoakoga ‵lei ko te tala i te mataupu “Seventy Years of Holding On to the Skirt of a Jew,” telā ne ‵lomi i The Watchtower i a Apelila 15, 2012, itulau e 18-21.

¹⁷ Ke fakalavelave malosi i galuega mo fakatasitasiga fakamalosi loto mo taina mo tuagane. Ka aumai ne te mea tenā a te fiafia sili, kae ka lavea ne koe te vave o te taimi. (Efe. 5:16) I se selau tausaga ko ‵teka, ne maua ne ‵tou taina a ikuga ‵gali e uke mai te fakalave‵lave malosi i te faiga o te galuega. Kae ko uke atu fakafia a ‵tou mea e fai i aso nei mai lalo i te takitakiga a Ieova. E se mafai  o fakaataata ne tatou i ‵tou mafaufau a te lasi o te maina atu o te ‵tou mainaga.

18, 19. E mafai pefea o fesoasoani mai a toeaina i te fakapotopotoga ke mataala kae ga‵solo ki mua tatou? Fakamatala mai.

¹⁸ E fakamalosi mai eiloa ki ‵tou fakatuanaki ke iloa atu me e se taofi ne ‵tou tulaga sē ‵lei katoatoa tatou mai te tavini atu ki a Ieova mo te fiafia. Tela la, ke loto fakafetai ki te fakatokaga a Ieova e uiga ki “tāgata e pelā me ne meaalofa,” ko toeaina i te fakapotopotoga. (Faitau te Efeso 4:8, 11, 12.) I te suā taimi e āsi atu ei se toeaina ki a koe, fakaaoga faka‵lei te avanoaga ke tauloto mai tena poto kae ke maua a mea aoga mai ana manatu fesoasoani.

¹⁹ Ne ‵saga tonu atu eiloa a toeaina e tokolua i Egelani ki se fakamolemole mai se tauavaga kolā ne isi ne lā fakalavelave. Ne mafaufau te fafine me sē fai ne tena avaga te takitakiga i te feitu faka-te-agaga. Ne fai ‵tonu atu tena avaga me i a ia e sē se faiakoga ‵lei kae ne seki fakatoka a ia mō tapuakiga a kāiga. Ne fakasae atu ne toeaina konei ki te tauavaga a te fakaakoakoga a Iesu. Ne tausi faka‵lei ne ia ana soko kae saga atu ki olotou manakoga. Ne fakamalosi atu a toeaina ki te tagata ke fakaakoako atu ki a Iesu. Ne fakamalosi atu lāua ki te fafine ke kufaki. Ne tuku atu foki ne toeaina ki te tauavaga a nisi manatu fesoasoani ki te auala e mafai o ga‵lue fakatasi lāua ke fai a tapuakiga a kāiga fakatasi mo lā tama‵liki e tokolua. (Efe. 5:21-29) Fakamuli ifo, ne fakamālō atu a toeaina ki te tagata mo ana taumafaiga ne fai. Ne fakamalosi ne lāua a ia ke kufaki kae fakalagolago ki te agaga tapu ke fesoasoani atu ki a ia ke fai e pelā me se ulu o te kāiga ‵lei i te feitu faka-te-agaga. Ne fesoasoani atu te lā ‵saga tonu atu mo te a‵lofa penā foki mo te lā ‵lago atu ke maina atu te mainaga o te kāiga tenei.

20. Se a te mea e mafai o fakamoemoe koe ki ei i te taimi e maina atu ei tou mainaga?

²⁰ “E fia‵fia a latou katoa kolā e ma‵taku ki a Ieova, ko latou kolā e sa‵sale i Ana auala,” ne usu mai te faisalamo. (Sala. 128:1) Kafai e maina atu tou mainaga—mai te ‵kami o nisi tino ke tavini atu ki te Atua, mai te ‵sala atu ki se auala telā e fakamalosi aka i ei te ‵kau fakatasi, kae tumau i te matapulapula—ka gasolo aka eiloa tou fiafia. Ka lavea ne nisi tino au galuega ‵lei, kae ka tokouke a tino ka gasue‵sue o ‵viki atu ki te ‵tou Tamana.—Mata. 5:16.