A te tamana o Leopoamo ko Solomona, telā ne pule i Isalaelu mō se 40 tausaga. (1 Tupu 11:42) A Solomona ne mate i te 997 T.L.M. Telā ne fanatu ei a Leopoamo mai te feitu ki matū o Ielusalema ki Sekema ke fakaeke mo fai te tupu. (2 Nofo. 10:1) E mata, e mafaufau koe me ne mataku a ia ke tautali atu i kalafaga o Solomona, telā ne lauiloa i tena poto fakaofoofogia? E mafai pefea ne Leopoamo o talitonu me ko pili o faka‵lei aka ne ia a fakalavelave faiga‵ta ona ko tena poto?

Ne ‵tau o uke a fakalavelave ne fakafesagai mo Leopoamo i Isalaelu. E se leva, kae ne olo atu a sui o tino ki a ia ke fakatoka aka a mea e manava‵se latou ki ei i ona mua: “A tou tamana ne fai ne ia te motou amoga ke faigata. Kae kafai e fakafaigofie ne koe a galuega faiga‵ta a tou tamana, kae fakamāmā ne koe te amoga ‵mafa ne tuku mai ne ia ki a matou, ka tavini atu matou ki a koe.”—2 Nofo. 10:3, 4.

Ne tosina atu eiloa a Leopoamo ki te malei! Kafai e fai ne ia te mea e ma‵nako ki ei a tino, ka mu‵tana a maumea e maua ne ia mo tena kāiga, pelā foki ana ofisa i te palesi. I te suā feitu, kafai e se fai ne ia, e mafai eiloa o ‵teke atu a tino ki a ia. Se a te mea ne fai ne ia? Ne fai‵pati muamua te tupu fou mo tāgata ma‵tua kolā ne fai mo tino fakatonutonu a Solomona. Kae e fakamuli ifo, ne ‵sala atu a Leopoamo ki manatu fesoasoani mai tamataene kolā ne ‵tupu tasi aka mo ia. Mai te tautali ki olotou manatu fakatonutonu, ne fakaiku aka ne ia ke fai fakamasei a tino. Ne tali atu a ia: “Kafai ne au a te otou amoga ke ‵mafa atu, kae ka fakaopoopo atu ne au a mea ki ei. A toku tamana ne fakasala ne ia koutou ki ‵kini, kae ka fakasala ne au koutou ki ‵kini makai‵kai.”—2 Nofo. 10:6-14.

E mata, e lavea ne koe se akoakoga mō tatou? E manino ‵lei, me e maua eiloa te poto mai te fakalogologo ki tino ma‵tua, kolā ko ma‵tua ‵lei i te feitu faka-te-agaga. Ona ko te ata‵mai, e mafai o tuku mai ne latou a manatu fakatonutonu ‵lei kolā e mafai o maua i ei ne tatou a ikuga fakafiafia.—Iopu 12:12.

Ke saga atu ki te taua, ne fakatoka ne Leopoamo tena kautau. Kae ne saga mai a Ieova e auala i tena pelofeta ko Semaia, kae fai atu: “E se ‵tau mo koutou o olo o taua atu ki otou taina Isalaelu. E ‵tau mo koutou taki tokotasi o ‵foki ki otou fale, me ne fai ne au ke tupu te mea tenei.”—1 Tupu 12:21-24. *

Kaia ne seki ai ei se taua? Fakaataata aka ne koe te fakalavelave atu o te mea tenā ki a Leopoamo! Ne a mafaufauga o tino e uiga ki te tupu telā ne fakamatakutaku ke fakasala ne ia a tino o tena fenua “ki ‵kini makai‵kai” kae se leva ko taofi foki ne ia te taua tenei ki tino kolā ne ‵teke atu ki a ia? (Fakatusa ki te 2 Nofoaiga Tupu 13:7.) Kae ko te tupu mo tena kautau “ne faka‵logo . . . ki te muna a Ieova kae toe ‵foki ki olotou fale.”

Se a te akoakoga mō tatou? Se mea poto ke faka‵logo ki te Atua faitalia me e mafai o fakatauemu mai a tino ki a tatou. A te fakalogo ki te Atua e iku atu ki te mauaga o tena taliaga mo fakamanuiaga.—Teu. 28:2.

Se a te ikuga ne maua ne Leopoamo? Mai te fakalogo ke mo a ma fakataunu tena palani ke taua atu ki te fenua telā ne fatoa fakatu aka, ne saga atu eiloa a ia ki te faitega o fakai o matakāiga o Iuta mo Peniamina kolā e pule atu foki a ia ki ei. Ne toe fakamalosi aka ne ia a nisi fakai “ke ma‵losi ‵ki.” (2 Nofo. 11:5-12) Kae sili atu i te taua, ne fakalogo a ia i se taimi ki tulafono a Ieova. I te taimi ne kamata ei o tapuaki atu a matakāiga e sefulu o Isalaelu mai lalo i te pulega a Ielopoamo ki tupua, e tokouke a tino mai konā ne “‵lago atu ki a Leopoamo” mai te faima‵laga atu ki Ielusalema ke ‵lago atu ki te tapuakiga tonu. (2 Nofo. 11:16, 17) Tela la, ne fakamalosi aka ne te fakalogo o Leopoamo a tena tulaga fakatupu.

Kae i te taimi ne malosi ei tena pulega fakatupu, ne fai ne Leopoamo se mea fai fakaa‵tea. Ne fulitua atu a ia ki te tulafono a Ieova kae talia ne ia a tapuakiga fapau‵pau! Kae kaia la? E mata, ne fakamalosigina a ia ne tena mātua, telā se tino Amoni? (1 Tupu 14:21) Faitalia me ne a pogai, ne tau‵tali atu eiloa a te fenua kātoa i a ia. Tela la, ne talia ne Ieova a te tupu o Aikupito ko Sesaka ke puke fakapagota a te ukega o fakai o Iuta, faitalia me ko oti ne faite ne Leopoamo a fakai konā ke ma‵losi!—1 Tupu 14:22-24; 2 Nofo. 12:1-4.

Ne gasolo o ma‵sei atu a te tulaga tenā i te taimi ne oko atu ei a Sesaka ki Ielusalema, telā ne pule ki ei a Leopoamo. I te taimi tenei, ne avatu ne te pelofeta ko Semaia te fekau a te Atua ki a Leopoamo mo ana tupu lagolago: “Ko oti ne tiaki ne koutou au, tela la, ko tiaki foki ne au koutou ki lima o Sesaka.” Ne saga atu pefea a Leopoamo ki te fekau o polopolokiga tenā? I se auala ‵lei! E fai mai te Tusi Tapu: “Tenā ne loto mau‵lalo ei a pelenise o Isalaelu penā foki mo te tupu kae fai aka: ‘A Ieova e amiotonu.’” Tela la, ne fakasao ne Ieova a Leopoamo mo Ielusalema mai te fakamaseiga.—2 Nofo. 12:5-7, 12.

Mai tua ifo, ne tumau eiloa a Leopoamo i te pule atu ki te malo ki saute. Mai mua o tena mate, ne tufatufa atu ne ia a meaalofa mo te kaimalie ki ana tamaliki tāgata e tokouke, ke fakamautinoa ei me e se ‵teke atu latou ki te lotou taina ko Avia, tena sui. (2 Nofo. 11:21-23) I te faiga tenei, ne fakaasi atu ei ne Leopoamo te poto telā ne seki fakaasi atu ne ia i te taimi muamua.

E tiga eiloa ne taumafai a ia o fai te mea ‵lei, kae ne seki maua ne Leopoamo a te taliaga a te Atua. E fakamatala mai i te Tusi Tapu a tena pulega, penei: “Ne fai ne tou tagata a mea ma‵sei.” Kaia? Me ne “seki fakaiku ne ia i tena loto ke ‵sala atu ki a Ieova.”—2 Nofo. 12:14.

Mafaufau aka la ki ikuga: Ne fakalogo eiloa a Leopoamo i nisi taimi ki te Atua. Kae ne fai ne ia a nisi mea ‵lei mō te fenua o Ieova. Kae ne seki ati aka ne ia se fesokotakiga ‵pili mo Ieova io me se manakoga tonu ke fakafiafia atu ki a ia. Kae ne agasala kae tosina atu ki tapuakiga ‵se. E mafai o mafaufau koe, penei: ‘I te taimi ne fakalogo ei a Leopoamo ki fakatonutonuga mai te Atua, ne fai ne ia ona ko fakamalosiga a nisi tino io me ne fai ne ia ona ko tena salamō tonu kae manako ke fakafiafia atu te Atua?’  (2 Nofo. 11:3, 4; 12:6) I se taimi fakamuli ifo, ne toe fulitua atu a ia o fai a mea ma‵sei. Ko oko eiloa i te ‵kese o ia mo tena tupuna tagata, ko te tupu ko Tavita! E tonu, ne fai ne Tavita a mea ‵se, kae ne fakavae eiloa tena olaga ki te alofa ki a Ieova, mo te tapuakiga tonu, kae ne salamō tonu eiloa a ia ki ana mea ‵se ne fai.—1 Nofo. 14:8; Sala. 51:1, 17; 63:1.

E mautinoa eiloa me e mafai o tauloto ne tatou se akoakoga mai i a Leopoamo. Se mea ‵lei māfai e tausi atu a tino ki olotou kāiga kae taumafai ke fai se mea aoga i te taviniga a Ieova. Kae ke maua te taliaga a te Atua, e ‵tau muamua mo tatou o ‵lago atu ki te tapuakiga tonu kae puke ‵mau ki ei.

Ke fai ne tatou te mea tenei, e ‵tau mo tatou o taumafai ke fakatumau te ‵poko o te ‵tou a‵lofa ki a Ieova. E pelā eiloa mo te tafu ne tatou o te afi ke kā faeloa, e ‵tau o tumau te ‵tou a‵lofa ki te Atua mai te sukesuke faeloa ki tena Muna, mafaufau ‵loto ki mea e faitau ne tatou, kae ‵talo faeloa. (Sala. 1:2; Loma 12:12) Kae ka fakamalosi aka ne te ‵tou a‵lofa ki a Ieova a te ‵tou manakoga ke fakafiafia atu ki a ia i mea katoa e fai ne tatou. Kae ka fakamalosi ne ia tatou i nisi taimi ke fakaasi atu te sala‵mo tonu. E se pelā mo Leopoamo, ka ‵tu ‵mautakitaki eiloa tatou i te tapuakiga tonu.—Iuta 20, 21.