1. Se a te mea e ‵tau o fai muamua ne se tino koi tuai o faite sena fale?

FAKAATAATA i tou mafaufau se tino ko fakaiku aka ke faite sena fale. E iloa ne ia te vaegā fale e manako a ia o faite. E mata, e ‵tau o fano fakavave a ia ki se sitoa kae ‵togi a mea e manakogina kae kamata o faite te fale? Ikai. Koi tuai o kamata, e isi se mea tāua e fai muamua ne ia—nofo ki lalo o galue te ‵togi o te fale ka faite ne ia. Kaia? Me e manakogina ke iloa ne ia me e lava i ana tupe ke fakaoti a te fale io me ikai. Kafai e galue faka‵lei ne ia te ‵togi mai mua, e mautinoa eiloa me ka mafai o fakaoti faka‵lei ne ia a tena fale fou.

2. E ‵tusa mo te Luka 14:27-30, ne a mea e ‵tau o mafaufau faka‵lei koe ki ei a koi tuai koe o papatiso?

² E mata, ko oti ne fakamalosi aka koe ne te alofa mo te loto fakafetai ki a Ieova ke mafaufau o papatiso? Kafai e penā loa, ko ‵tau o fai ne koe se fakaikuga tai ‵pau pelā loa mo te mea ne fai ne te tagata telā e manako o faite se fale. Kaia e fai atu ei tatou penā? Mafaufau ki pati a Iesu i te Luka 14:27-30. (Faitau.) Ne faipati a Iesu ki te uiga ke fai mo ana soko. Ke fai penā, e ‵tau o toka tatou o talia a “te ‵togi” io me ko mea kolā e aofia i ei—ko mea faiga‵ta mo mea kolā e loto fia‵fia tatou o tiakina. (Luka 9:23-26; 12:51-53) Tela la, koi tuai o papatiso, e ‵tau o mafaufau faka‵lei koe e uiga ki mea katoa kolā e aofia i ei. Ko mafai ei o toka ‵lei koe o tavini atu faeloa ki te Atua mo te fakamaoni e pelā me se Kelisiano papatiso.

3. Ne a mea ka sau‵tala tatou ki ei i te mataupu tenei?

³ E mata, a te fai pelā me se soko papatiso o Keliso e tāua? Ao e tāua! E ‵tala mai ne te papatisoga a te mataloa ki fakamanuiaga e uke—i te taimi nei mo aso mai mua. Ke sau‵tala nei tatou ki nisi fesili tāua e uiga ki te papatisoga. Kafai e fai penā, ka fesoasoani atu eiloa ke mafai ne koe o tali aka te fesili tenei, “E mata, au ko toka o papatiso?”

4. (a) Se a te tukuatuga? (e) Se a te uiga ke “se toe mafaufau” te tino ki a ia eiloa, telā ne fakasae mai i te Mataio 16:24?

⁴ Se a te tukuatuga? Koi tuai koe o papatiso, e ‵tau o fai ne koe se tukuatuga. Kafai e fai tau tukuatuga, e fakapilipili atu koe ki a Ieova e auala i se ‵talo e fai mo te loto kātoa, kae fai atu me ka fakaaoga tou olaga ke tavini atu ki a ia ki te se-gata-mai. Kafai ko tuku atu koe ki te Atua, ko “se toe mafaufau” ei koe ki a koe eiloa. (Faitau te Mataio 16:24.) Ko maua ne koe te tauliaga sili ke fai mo tino o Ieova. (Loma 14:8) Ko fai atu koe ki a ia, me mai te taimi nei o fano ki mua, ka saga tonu atu koe o tavini ki a ia i lō te saga o koe ki a koe loa. A tau tukuatuga se tautoga—se tautoga ‵malu ne fai ki te Atua. E se faimalo ne Ieova tatou ke fai se vaegā tautoga penā. Kae kafai e fai ‵tou tautoga, e manako a ia ke tausi tatou ki ei.—Sala. 116:12, 14.

5. E soko pefea te tukuatuga ki te papatisoga?

⁵ E soko pefea a te tukuatuga ki te papatisoga? A tau tukuatuga se mea totino e fai eiloa ne koe i a koe; se mea loa i tou va mo Ieova. Te papatisoga se mea e fai i mua o tino e tokouke; e masani o fai i taimi o fono o te seketi mo fono o te atufenua. Kafai koe ko papatiso, ko fakaasi atu ne koe ki nisi tino me ko oti ne tukugina atu koe ki a Ieova. * Tela la, a tau papatisoga se fakailoaga ki nisi tino me i a koe e alofa ki a Ieova tou Atua mo tou loto kātoa, tou ola, tou mafaufau mo tou malosi kātoa, kae ko oti ne fakaiku aka ne koe ke tavini atu ki a ia ki te se-gata-mai.—Male. 12:30.

6-7. E ‵tusa mo te 1 Petelu 3:18-22, ne a pogai e lua e tāua i ei te papatisoga?

⁶ E mata, se mea ‵tau eiloa ke papatiso? Mafaufau ki pati i te 1 Petelu 3:18-22. (Faitau.) E pelā loa mo te vaka o Noa se fakaasiga manino o te fakatuanaki o Noa, a tou papatisoga se fakaasiga manino e uiga ki tau tukuatuga ki a Ieova. Kae e mata, se mea ‵tau eiloa ke papatiso? Ao. Ne fakamatala mai ne Petelu a pogai e tāua i ei. Muamua la, e “fakasao” i ei koe. E mafai ne te papatisoga o faka‵sao tatou māfai e fakaasi atu i ‵tou faifaiga me e fakatuanaki tatou ki a Iesu kae tali‵tonu me i a ia ne mate mō tatou, ne toe fakatu aka ki te lagi, kae ko “nofo nei a ia i te feitu fakaatamai o te Atua.”

⁷ Te lua, a te papatisoga e iku atu ki te mauaga o “se loto lagona ‵lei.” Kafai e tuku atu tatou ki te Atua kae papatiso, ko maua eiloa ne tatou se fesokotakiga fakapito mo ia. Ona ko te ‵tou sala‵mo tonu kae fakatuanaki ki te togiola, e fakamagalo ne te Atua a ‵tou agasala. Tela la, ko mafai o maua ne tatou se loto lagona ‵lei i ana mua.

8. Se a te mea tāua e ‵tau o fakavae ki ei tau fakaikuga ke papatiso?

⁸ Se a te mea e ‵tau o fakavae ki ei a ‵tou fakaikuga ke papatiso? Mai te sukesuke faka‵lei ki te Tusi Tapu, ne tauloto ei ne koe a mea e uke e uiga ki a Ieova—ana uiga mo ana mea e fai. Ne otia tou loto i mea ne tauloto ne koe e uiga ki a ia kae fakamalosi atu ke alofa malosi koe ki a ia. A tou alofa ki a Ieova ko te pogai tāua e fakavae ki ei tau fakaikuga ke papatiso.

9. Se a te uiga ke papatiso i te igoa o te Tamana mo te Tama mo te agaga tapu, telā ne fai mai i te Mataio 28:19, 20?

⁹ A tau fakaikuga ke papatiso e fakavae foki ki muna‵tonu i te Tusi Tapu kolā ne talia ne koe. Mafaufau ki pati a Iesu ne fai i te taimi ne tuku mai ne ia te fakatonuga ke fai a soko. (Faitau te Mataio 28:19, 20.) E ‵tusa mo pati a Iesu, a latou kolā e papatiso e ‵tau o papatiso “i te igoa o te Tamana mo te Tama mo te agaga tapu.” Se a te uiga o te mea tenei? E ‵tau mo koe o talitonu mo te loto kātoa ki muna‵tonu i te Tusi Tapu e uiga ki a  Ieova; tena Tama, ko Iesu; mo te agaga tapu. A muna‵tonu konei e ‵mana kae e mafai o otia malosi i ei a tou loto. (Epe. 4:12) Ke onoono nei tatou ki nisi fakamaoniga.

10-11. Ne a muna‵tonu e uiga ki te Tamana ne tauloto kae talia ne koe?

¹⁰ Toe mafaufau aka ki te taimi ne tauloto ne koe a muna‵tonu konei e uiga ki te Tamana: Ko “Ieova [tena] igoa,” a ia ko “te Atua Tafasili i te Maluga i te lalolagi kātoa,” ko ia fua tokotasi ko “te Atua tonu.” (Sala. 83:18; Isa. 37:16) A ia ko te ‵tou Mafuaga, kae ko te “fakaolataga i a Ieova.” (Sala. 3:8; 36:9) Ne fai ne ia se fakatokaga ke faka‵sao tatou mai te agasala mo te mate kae ne tuku mai ne ia te fakamoemoega ke ola ki te se-gata-mai. (Ioa. 17:3) A tau tukuatuga mo te papatisoga ka fakamailoga ei koe e pelā me se tokotasi o Molimau a Ieova. (Isa. 43:10-12) Ka fai koe mo vaega o te kaukāiga i te lalolagi kātoa o tino tapuaki kolā e fakamata‵mata ke taku latou ki te igoa o te Atua, kae fakailoa atu ne latou ke iloa ne nisi tino.—Sala. 86:12.

¹¹ Se tauliaga eiloa ke malamalama i mea e akoako mai i te Tusi Tapu e uiga ki te Tamana! Kafai ko talitonu koe ki muna‵tonu tāua konei, ka fakamalosi aka ei tou loto ke tuku atu koe ki a Ieova kae ke papatiso.

12-13. Ne a muna‵tonu e uiga ki te Tama ne tauloto kae talia ne koe?

¹² Se a tau kilokiloga i te taimi ne tauloto ei koe ki muna‵tonu e uiga ki te Tama? A Iesu ko te tokolua o toe tino tāua i te iunivesi. A ia ko te ‵tou Togiola. Ne loto fiafia a ia o tuku mai tena ola mō tatou. Kafai e fakaasi atu ne tatou i ‵tou faifaiga me e fakatuanaki tatou ki te togiola, ko mafai ei o fakamagalo ‵tou agasala, ati aka se fesokotakiga mo te Atua, kae maua te ola se-gata-mai. (Ioa. 3:16) A Iesu ko te ‵tou Faitaulaga Sili. A ia e manako o fesoasoani mai ke maua ne tatou a mea aoga mai te togiola kae ke maua se fesokotakiga ‵pili mo te Atua. (Epe. 4:15; 7:24, 25) E pelā me ko te Tupu o te Malo o te Atua, ka fakaaoga a ia ne Ieova ke fakamaluga aka a Tena igoa, fakaseai atu a mea ma‵sei katoa, kae aumai a fakamanuiaga se-gata-mai i te Palataiso telā ka oko mai. (Mata. 6:9, 10; Faka. 11:15) A Iesu ko te tino telā e ‵tau o fakaakoako tatou ki ei. (1 Pe. 2:21) Ne tuku mai ne ia se fakaakoakoga mō tatou mai te fakaaoga ne ia tena olaga kātoa ke fai te loto o te Atua.—Ioa. 4:34.

¹³ Kafai ko talia ne koe a akoakoga a te Tusi Tapu e uiga ki a Iesu, ka alofa loa koe ki te Tama pele a te Atua. Ko te alofa tenā ka fakamalosi atu ke fakaaoga tou olaga ke fai te loto o te Atua, pelā mo te mea ne fai ne Iesu. Mai te faiga tenā, ka fakamalosi ei koe ke tuku atu tou ola ki a Ieova kae ke papatiso.

14-15. Ne a muna‵tonu e uiga ki te agaga tapu ne tauloto kae talia ne koe?

¹⁴ Ne a mea ne mafaufau koe ki ei i te taimi ne tauloto ei koe ki muna‵tonu e uiga ki te agaga tapu? A te agaga tapu e sē se tino, kae ko te malosi galue o te Atua. Ne fakaaoga ne Ieova te agaga tapu ke fakaosofia a tāgata ke tusi ne latou te Tusi Tapu, kae e fesoasoani mai te agaga ke malamalama kae ke fakagalue aka a mea e fai‵tau ne tatou i ei. (Ioa. 14:26; 2 Pe. 1:21) E auala i te agaga tapu, e tuku mai ne Ieova ki a tatou a te “malosi telā e sili atu i te malosi masani.” (2 Koli. 4:7) E tuku mai ne te agaga a te malosi ki a tatou ke talai atu te tala ‵lei, ‵teke atu ki fakaosoosoga, fakafesagai atu ki te loto vāivāi, kae ke kufaki i mea faiga‵ta. E fesoasoani mai ke fakaasi atu ne tatou a uiga ‵gali kolā e aofia i “fuataga o te agaga tapu.” (Kala. 5:22) E tuku mai ne te Atua a tena agaga e aunoa mo se ‵togi ki a latou kolā e tali‵tonu ki a ia kae fakamolemole atu ke maua ne latou.—Luka 11:13.

¹⁵ Se mea fakafiafia kae fakamafanafana  loto ke iloa atu me i tino tapuaki o Ieova e mafai o fakalago‵lago ki te agaga tapu ke fesoasoani atu ki a latou i te taviniga ki te Atua! Kafai ko talia ne koe a muna‵tonu ne tauloto ne koe e uiga ki te agaga tapu, ka fakamalosi aka ei ke tuku atu a koe eiloa ki te Atua kae papatiso.

16. Ne a mea ne tauloto ne koe i ‵tou sau‵talaga?

¹⁶ A tau fakaikuga ke tuku atu tou ola ki te Atua kae papatiso se mea tāua ‵ki loa. E pelā mo mea ne tauloto ne tatou, e ‵tau o loto fiafia koe o talia a te ‵togi telā e aofia i ei—ko mea faiga‵ta mo mea kolā e loto fiafia koe o tiakina. A fakamanuiaga e maua ne koe ka sili fakafia atu i lō mea ne tiaki ne koe. A te papatisoga e mafai o fakasao ne ia koe, kae e iku atu ki te mauaga o se loto lagona ‵lei i mua o te Atua. A tau fakaikuga ke papatiso, e ‵tau o fakavae muamua ki tou alofa ki a Ieova te Atua. E ‵tau foki o talitonu koe mo tou loto kātoa ki muna‵tonu ne tauloto ne koe e uiga ki te Tamana, te Tama mo te agaga tapu. I te otiga ne mafau‵fau ki mea ne tauloto ne tatou, ka tali mai pefea ne koe te fesili, “E mata, au ko toka ke papatiso?”

17. Ne a nisi mea e ‵tau o fai muamua a koi tuai koe o papatiso?

¹⁷ Kafai koe mafaufau i a koe ko toka ke papatiso, e mautinoa eiloa me ko oti ne fai ne koe a mea e uke ke ati aka tou fesokotakiga ‵lei mo Ieova. * E auala i au sukesukega ki te Tusi Tapu i aso katoa, ko kamata o iloa ne koe a mea e uke e uiga ki a Ieova mo Iesu. Ko ati aka ne koe te fakatuanaki. (Epe. 11:6) Ko talitonu katoatoa koe ki folafolaga a Ieova i te Tusi Tapu, kae ko talitonu koe me i tou fakatuanaki ki te taulaga a Iesu, e mafai o fakasao ne ia koe mai te agasala mo te mate. Ko salamō koe ki au agasala; ko se ‵lei ou lagonaga ona ko mea ‵se ne fai ne koe, kae fakamolemole atu koe ki a Ieova mō tena fakamagaloga. Ko ‵fuli tou olaga; ko tiaki katoatoa ne koe ou auala ma‵sei kae kamata o ola i se olaga telā e fakafiafia atu ki te Atua. (Galu. 3:19) E loto finafinau koe o fakailoa atu ki tino a tou fakatuanaki. Ko fetaui ‵lei koe ke fai pelā me se tino talai seki papatiso kae kamata o talai fakatasi mo te fakapotopotoga. (Mata. 24:14) E fakamatamata eiloa a Ieova ona ko te mea ne fai ne koe a mea tāua konei. Ne fai eiloa ne koe ke fiafia malosi a ia.—Faata. 27:11.

18. Ne a foki a nisi mea koi manakogina ke fai ne koe a koi tuai o papatiso?

¹⁸ A koi tuai o papatiso, e isi ne nāi mea e manakogina ke fai ne koe. E pelā mo te mea ne tauloto ne tatou muamua, e ‵tau o tuku atu koe ki te Atua. Fakapilipili atu ki a ia mai te ‵talo atu mo te loto kātoa, kae tauto atu me ka fakaaoga tou olaga ke fai tena loto. (1 Pe. 4:2) Ka oti, ko fakailoa atu ei ki te kouotineita o te potukau o toeaina ke iloa ne ia i a koe ko manako o papatiso. Ka fakamolemole a ia ki nisi toeaina ke sau‵tala mo koe.  Sa mataku māfai ko fai‵pati mo latou. Masaua me i taina pele konei ko oti ne iloa ne latou a koe, kae a‵lofa ki a koe. Ka sau‵tala latou mo koe ki akoakoga fakavae i te Tusi Tapu kolā ne tauloto ne koe. E fia fakamautinoa ne latou me ko malamalama koe i akoakoga konā kae ke iloa ne koe te tāua o tau tukuatuga mo te papatisoga. Kafai ko ‵lago latou me ko toka koe ki ei, ko fakailoa atu ei ne latou me ko mafai koe o papatiso i te suā fono o te seketi io me ko te fono o te atufenua.

19-20. Ne a mea ka manakogina ke fai ne koe mai tua o tau papatisoga, kae e mafai pefea o fai ne koe a mea konā?

¹⁹ Kafai koe ko oti ne papatiso, ne a mea ka manakogina ke fai ne koe? * Masaua me i te tukuatuga se tautoga kae e manako a Ieova ke tausi koe ki ei. Tela la, mai tua o tau papatisoga, e ‵tau mo koe o ola e ‵tusa mo tau tukuatuga. E mafai pefea ne koe o fai a mea konā?

²⁰ Ke ‵piki ‵mau ki tau fakapotopotoga. Pelā me se Kelisiano papatiso, ko fai nei koe pelā me se vaega o se “kautaina.” (1 Pe. 2:17) A ou taina mo tuagane i te fakapotopotoga ko ou kāiga faka-te-agaga. Mai te kau faeloa ki fakatasiga, ka fakamalosi aka ne koe tou fesokotakiga mo latou. Faitau te Muna a te Atua kae mafaufau ‵loto ki ei i aso katoa. (Sala. 1:1, 2) Kafai ko oti ne faitau ki se vaega o te Tusi Tapu, fakaavanoa se taimi ke mafaufau ‵loto e uiga ki au mea ne faitau. Kae ka ‵goto a pati konā ki tou loto. “‵Talo faeloa.” (Mata. 26:41) Ka fai ne au ‵talo mo te loto kātoa ke fakapilipili malosi atu koe ki a Ieova. “Ke ‵sala muamua faeloa . . . te Malo.” (Mata. 6:33) E mafai ne koe o fai te mea tenā mai te fakamuamua te galuega talai i tou olaga. Kafai e kau atu faeloa koe ki te galuega talai, ka fakatumau ne koe te malosi o tou fakatuanaki, kae e mafai o fesoasoani atu koe ki nisi tino ke sa‵sale i te auala telā e tau atu ki te ola se-gata-mai.—1 Timo. 4:16.

21. Se a te avanoaga ka ‵tala atu ki a koe mai tua o tau papatisoga?

²¹ A te fakaikuga ke tuku atu tou ola ki a Ieova kae papatiso ko te ‵toe fakaikuga tāua eiloa ka fai ne koe. E tonu e isi ne mea ka aofia i ei. Kae e mata, e aoga? Ao e aoga eiloa! So se fakalavelave faigata e fepaki mo koe i te lalolagi tenei e “vave oti . . . kae e mā‵ma foki.” (2 Koli. 4:17) E ‵kese mai i ei, a tau papatisoga ka ‵tala atu ei te auala ki se olaga fakamalie loto i te taimi nei mo “te ola tonu” telā ko pili o oko mai. (1 Timo. 6:19) Mai mea katoa, ke na mafaufau faka‵lei kae ‵talo e uiga ki tau tali ki te fesili tenei, “E mata, au ko toka ke papatiso?”