1. Kaia ka poi ei koe māfai e fakailoa atu ne koe te fekau mai te Tusi Tapu ki nisi tino mō te taimi muamua?

MASAUA ne koe a te taimi ne fatoa iloa ne koe te munatonu? A akoakoga i te Tusi Tapu kolā ne tauloto ne koe e ma‵nino—e faigofie ke malamalama i ei! Ne mafaufau koe me ka talia ne tino a mea kolā e talitonu koe ki ei. Ne talitonu koe me ka maua ne latou se olaga fiafia mo se fakamoemoega gali i aso mai mua ona ko te fekau mai te Tusi Tapu. (Sala. 119:105) Tela la, ne loto finafinau koe o fakaasi atu a muna‵tonu ne maua ne koe ki ou taugasoa mo kāiga. Kae se a te mea ne tupu? Ka poi koe me ka tokouke ka ‵teke atu ki a koe.

2-3. I aso o Iesu, ne ‵saga atu pefea te tokoukega o tino ki a ia?

² E se ‵tau mo tatou o ‵poi māfai e ‵teke mai a tino ki te fekau e talai atu ne tatou. I aso o Iesu, e tokouke ne ‵teke ki a ia faitalia me ne fai ne ia a vavega ke fakamaoni atu me e maua ne ia te fesoasoani o te Atua. Pelā me se fakaakoakoga, ne toe fakatu aka ne Iesu a Lasalo—se vavega telā ne seki ‵tau o isi se fakamasakoga a tino kolā ne ‵teke atu ki ei. Kae tiga te feitu tenā, ne seki talia ne takitaki Iutaia a Iesu e pelā me ko te Mesia. Ne ma‵nako foki latou o tamate a Iesu mo Lasalo!—Ioa. 11:47, 48, 53; 12:9-11.

³ Ne iloa ne Iesu me e tokouke a tino ka sē talia ne latou a ia pelā me ko te Mesia. (Ioa. 5:39-44) Ne fai atu a ia ki se potukau o soko o Ioane te Papatiso: “Ka fiafia a te tino telā e se siga ona ko au.” (Mata. 11:2, 3, 6) Kaia ne ‵teke atu ei a tino e tokouke ki a Iesu?

4. Ne a mea ka sau‵tala tatou ki ei i te mataupu tenei?

⁴ I te mataupu tenei mo te mataupu telā ka ‵soko mai, ka suke‵suke tatou ki nisi pogai ne seki fakatuanaki ei a tino e  tokouke i te senitenali muamua ki a Iesu. Ka onoono foki tatou ki te pogai e talia ei ne te tokoukega o tino i aso nei ke ‵siga latou. Kae ko te ‵toe mea tāua, ka tauloto tatou ki pogai e mafai ei o maua ne tatou te fakatuanaki malosi ki a Iesu, ko te mea ke mo a e ‵siga tatou.

5. Kaia ne mafai ei o mafau‵fau a nisi tino i a Iesu e se ko te Mesia telā ne folafola mai?

⁵ E tokouke a tino ne ‵siga ona ko te koga ne tupu mai ei a Iesu. Ne iloa ne latou i a Iesu se faiakoga poto kae ne fai ne ia a vavega. Kae ki a latou, a ia ko te tama tagata a se kamuta fatauva. Kae ne vau a ia mai Nasaleta, se fakai telā e ‵kilo atu a te tokoukega ki ei e pelā me e se tāua. Ke oko foki ki a Natanielu, telā ne fai mo soko o Iesu, ne fai atu muamua penei: “E a, e mafai o maua se mea ‵lei mai Nasaleta?” (Ioa. 1:46) Kāti ne seki fiafia a Natanielu ki te fakai telā ne nofo i ei a Iesu. Io me kāti ne mafaufau a ia ki te valoaga i te Mika 5:2, telā ne ‵valo mai i te Mesia ka fanau mai i Peteleema, kae e se i Nasaleta.

6. Se a te mea ne ‵tau o fesoasoani atu ki tino i aso o Iesu ke iloa ne latou i a Iesu ko te Mesia?

⁶ Ne a pati a te Tusi Tapu? Ne ‵valo mai te pelofeta ko Isaia me i fili o Iesu ka sē ‵saga tonu atu “ki fakamatalaga likiliki e uiga ki [te] kautama” o te Mesia. (Isa. 53:8) E uke a fakamatalaga penā ne ‵valo mai. Kafai ne fakamāumāu ne tino konā a taimi e uke ke suke‵suke ki fakamatalaga ‵tonu katoa, ka iloa ei ne latou i a Iesu ne fanau i Peteleema, kae ko ia ne vau i te gafa o te Tupu ko te Tavita. (Luka 2:4-7) Tela la, a te koga ne fanau ei a Iesu e fetaui ‵lei mo te valoaga i te Mika 5:2. Kae se a la te fakalavelave? Ko tō vave a te fakaikuga ne fai ne tino. Ne seki maua ne latou a fakamatalaga ‵tonu katoa. Ona ko te mea tenā, ne ‵siga ei latou.

7. Kaia e ‵teke atu ei a tino e tokouke i aso nei ki tino o Ieova?

⁷ E mata, tenā foki te fakalavelave i aso nei? Ao. E pelā me se fakapotopotoga, e ‵kilo mai a te tokoukega ki tino o Ieova e pelā me ne tino e “seki a‵koga faka‵lei kae ne tino fatauva foki.” (Galu. 4:13) Nisi tino e mafau‵fau me e se ‵tau o akoako ne tino o te Atua a te Tusi Tapu i a latou seki a‵koga io me ne maua olotou pepa mai akoga fakafaifeau. E fai mai nisi tino i Molimau a Ieova se “talitonuga Amelika,” kae ko te ‵tonuga loa, a te tokoukega o Molimau a Ieova e se ‵nofo katoa i Iunaite Sitete. Kae ko nisi tino e fai mai i Molimau e se tali‵tonu ki a Iesu. I te fia o tausaga, ne taku a tino o Ieova e pelā me ne “tino kominisi,” “sipai Amelika,” mo “tino ‵teke.” Ona ko te mea e se maua io me talia ne latou a fakamatalaga ‵tonu, ko ala ei o ‵siga latou.

8. E ‵tusa mo te Galuega 17:11, ne a mea e ‵tau o fai ne tino ke iloa ne latou a tino o te Atua i aso nei?

⁸ Ne a mea e ‵tau o fai ne se tino ke mo a e siga? E ‵tau o iloilo ne tino a fakamatalaga ‵tonu. Tenā loa te mea ne fai ne Luka telā ne tusi ne ia a Tusi Evagelia. Ne galue malosi a ia o ‵sala a “mea katoa me e ‵tonu.” Ne manako a ia ke “iloa faka‵lei . . . mo te mautinoa a mea” kolā ne lagona ne tino fai‵tau e uiga ki a Iesu. (Luka 1:1-4) Ne fai eiloa a tino Iutaia i Pelea e pelā mo Luka. I te taimi muamua ne lagona ne latou te tala ‵lei e uiga ki a Iesu, ne fakatusa‵tusa ne latou mo Tusitusiga Epelu ke fakamautinoa aka me e ‵tonu a mea kolā ne akoako atu ki a latou. (Faitau te Galuega 17:11.) I se auala tai ‵pau, e ‵tau mo tino i aso nei o iloilo aka a fakamatalaga ‵tonu. E ‵tau o fakatusa‵tusa ne latou a mea kolā ne akoako atu ne tino o te Atua mo pati a te Tusi Tapu. E ‵tau foki mo latou o suke‵suke ki tala o tino o Ieova i aso nei. Kafai e “sukesuke faka‵lei” ne latou, ka sē talia ne latou a te fakailoga tino io  me ko fakamatalaga sē ‵tonu ke faka‵kivi ei latou.

9. Se a te mea ne tupu i te taimi ne seki talia ne Iesu ke fakaasi atu se fakailoga mai te lagi?

⁹ Ne seki lotoma‵lie a nisi tino i aso o Iesu ki ana akoakoga fakaofoofogia. Ne ma‵nako latou ki mea e uke atu. Ne ma‵nako latou ke fakamaoni atu ne ia i a ia ko te Mesia mai te fakaasi atu o “se fakailoga mai te lagi.” (Mata. 16:1) Kāti ne ‵fuli fakakotua ne latou a te mainaga tenei i te Tanielu 7:13, 14. Kae e seki oko ki te taimi o Ieova ke fakataunu te valoaga tenā. Ne ‵tau o lava kae ‵toe a akoakoga kolā ne fai atu ne Iesu ke fakamaoni atu i a ia ko te Mesia. Kae i te taimi ne seki talia ne ia ke fakaasi atu se fakailoga telā e ‵sala latou ki ei, ne ‵siga latou.—Mata. 16:4.

10. Ne fakataunu pefea ne Iesu a pati a Isaia e uiga ki te Mesia?

¹⁰ Ne a pati a te Tusi Tapu? E uiga ki te Mesia, ne tusi mai te pelofeta ko Isaia: “Ka se tagi a ia io me fakamaluga tena leo, kae ka se fai ne ia ke lagona tena leo i te auala.” (Isa. 42:1, 2) Ne fai ne Iesu tena galuega talai i se auala agamalu. Ne seki faite ne ia a faletapu ‵lasi kae ‵gali, kae ne seki pei a ia ki gatu fakapito e fakaaoga i tapuakiga io me manako ke fakaaoga ne tino a tofiga fakalotu mā ka‵laga atu ki a ia. I te taimi ne fakamasino ei a ia, ne seki talia ne Iesu ke fakafiafia ne ia te tupu ko Helota mai te fakaasi atu o se fakailoga ki a ia. (Luka 23:8-11) Ne fai ne Iesu a nisi vavega, kae ko te talaiatuga o te tala ‵lei, ko te ‵toe galuega tāua ki a ia. “Tenā te pogai ne vau ei au,” ne fai atu a ia ki ana soko.—Male. 1:38.

11. Ne a kilokiloga ‵se e maua ne nisi tino i aso nei?

¹¹ E mata, tenā foki te fakalavelave i aso nei? Ao. I aso nei, e tokouke a tino e ofo i te ‵lasi o falesa kolā e teu ki tupua e uke mo mea fakagaligali ‵togi ‵mafa, ko takitaki lotu kolā e maua ne latou a tofi ma‵luga, mo aso fakamanatu kolā e se iloa ne te tokoukega me ne māfua mai i mea fapau‵pau. Kae ko tino kolā e ‵kau atu ki lotu konā, e se uke olotou mea e  tauloto e uiga ki te Atua mo ana fuafuaga. A latou kolā e ‵kau mai ki ‵tou fakatasiga Kelisiano e tauloto ne latou a mea e manako a Ieova ke fai ne latou, mo te auala e fakafetaui ei olotou olaga mo tena loto. A ‵tou Fale Tapuaki e ‵ma kae fakatoka faka‵lei, kae e se teu ki mea fakagaligali ‵togi ‵mafa. Latou kolā e fai ne latou te takitakiga e se ‵pei ki gatu fakapito, io me e maua ne latou a tofi ma‵luga. E fakavae eiloa a ‵tou akoakoga mo talitonuga ki te Muna a te Atua. E ui i ei, e tokouke a tino i aso nei ko ‵siga me e mafau‵fau latou i te auala e fai ei te ‵tou tapuakiga ko tō faigofie, kae ko mea kolā e akoako ne tatou e se fetaui mo mea e ma‵nako ke lagona ne latou.

12. E pelā mo te Epelu 11:1, 6, se a te mea e ‵tau o fakavae ki ei a te ‵tou fakatuanaki?

¹² Ne a ‵tou mea e ‵tau o fai ke mo a e ‵siga? Ne fai atu te apositolo ko Paulo ki Kelisiano i Loma, penei: “E maua te fakatuanaki mai mea kolā e lagona. Kae e maua a mea kolā e lagona e auala i te muna e uiga ki te Keliso.” (Loma 10:17) Tela la, e ati aka ne tatou te fakatuanaki mai te suke‵suke ki te Tusi Tapu, kae e se mai te aofia i fakamanatuga fakalotu kolā e se fetaui mo te Tusi Tapu, faitalia me e foliga ‵gali mai ki a tatou. E ‵tau o maua ne tatou te fakatuanaki malosi telā e fakavae ki te iloaga tonu, me e “aunoa mo te fakatuanaki e se mafai o fakafiafia faka‵lei atu [se tino] ki te Atua.” (Faitau te Epelu 11:1, 6.) Tela la, e se manakogina ke maua ne tatou se fakailoga fakaofoofogia mai te lagi ke fakamaoni atu me ko maua ne tatou a te munatonu. A te sukesuke faka‵lei ki akoakoga mai te Tusi Tapu kolā e fakamalosi aka ei te fakatuanaki, ko lava kae ‵toe ke fakamaoni mai ei ki a tatou me ko maua ne tatou a te munatonu e aunoa mo te fakalotolotolua.

13. Ne a mea ne fai ei ke taku fakamasei ne tino e tokouke a Iesu?

¹³ I aso o Iesu, ne ‵numi a soko o Ioane te Papatiso me i soko o Iesu ne seki fakaliki‵liki. Ne fakamatala atu ne Iesu me e seai se pogai ke fakaliki‵liki ei latou i te taimi koi ola ei a ia.  (Mata. 9:14-17) E ui i ei, ne taku fakamasei ne Falesaio mo nisi tino ‵teke a Iesu me ne seki tautali a ia ki olotou tuu masani. Ne kaitāua latou i te taimi ne faka‵lei ei ne ia a tino ma‵saki i te Sapati. (Male. 3:1-6; Ioa. 9:16) I te suā feitu, ne ‵losi atu latou mo te fia amio‵tonu ke faka‵malu te Sapati; kae tela la, ne fai olotou pisinisi i loto i te faletapu. Ne kaitāua latou i te taimi ne fakamasei ei ne Iesu a latou ona ko olotou mea konā ne fai. (Mata. 21:12, 13, 15) Kae ko latou kolā ne talai ki ei a Iesu i te sunako i Nasaleta, ne kaitāua i te taimi ne fai atu ne Iesu a tala ke fakaasi faka‵sau atu te lotou kaima‵nako mo te sē lava o te fakatuanaki. (Luka 4:16, 25-30) E tokouke a tino ne ‵siga ona ko te mea ne seki fai ne Iesu a mea kolā ne mafau‵fau latou me ka fai ne ia.—Mata. 11:16-19.

14. Kaia ne taku fakamasei ei ne Iesu a tuu a tino kolā e se fetaui ‵lei mo te Tusi Tapu?

¹⁴ Ne a pati a te Tusi Tapu? Ne fai mai a Ieova e auala i tena pelofeta ko Isaia: “A tino konei e fakapili‵pili mai ki a au i olotou gutu, kae e āva mai latou ki a au i olotou laugutu, kae ko olotou loto e ‵mao ‵ki mai i a au; kae e fakavae te lotou ma‵taku ki luga i fakatonuga a tāgata kolā ne akoako atu ki a latou.” (Isa. 29:13) Ne tonu eiloa a Iesu i te taku fakamaseiga ne ia a tuu a tino kolā e se fetaui mo te Tusi Tapu. A latou kolā e fakatulaga muamua ne latou a tulafono a tāgata mo tuu i lō te Tusi Tapu, ne ‵teke ki a Ieova penā foki mo te tino telā ne uga mai ne ia e pelā me ko te Mesia.

15. Kaia e se fia‵fia ei a tino e tokouke i aso nei ki Molimau a Ieova?

¹⁵ E mata, tenā foki te fakalavelave i aso nei? Ao. E tokouke a tino e se fia‵fia māfai e se ‵kau atu a Molimau ki fakamanatuga o tuu kolā e se fetaui mo te Tusi Tapu, pelā mo aso fanau mo te Kilisimasi. Nisi tino e kaitāua māfai e se ‵kau atu a Molimau a Ieova ki fakamanatuga a fenua io me ko tuu kolā e fai i mate kae e se fetaui mo te Muna a te Atua. A latou kolā e ‵siga ona ko mea konei, e tali‵tonu me e talia eiloa ne te Atua a te lotou tapuakiga. Kae ko te ‵tonuga loa, e se mafai o fakafiafia ne latou a ia māfai e talia ne latou a tuu a te lalolagi i lō a akoakoga ma‵nino e maua ne latou i te Tusi Tapu.—Male. 7:7-9.

16. E ‵tusa mo te Salamo 119:97, 113, 163-165, ne a mea e ‵tau o fai ne tatou kae ne a mea e ‵tau o ‵kalo tatou kea‵tea mai ei?

¹⁶ Ne a ‵tou mea e ‵tau o fai ke mo a e ‵siga? E ‵tau o fakamalosi aka a te ‵tou a‵lofa ki tulafono mo fakatakitakiga a Ieova. (Faitau te Salamo 119:97, 113, 163-165.) Kafai e a‵lofa tatou ki a Ieova, ka ‵teke ne tatou so se tuu telā e fakafanoanoa atu ki a ia. Ka sē talia ne tatou so se mea ke fakamasei ei a te ‵tou a‵lofa ki a Ieova.

17. Ne a fakamoemoega ne ala ei o ‵siga a te tokoukega i aso o Iesu?

¹⁷ Ne ma‵nako a nisi tino i aso o Iesu ki se ‵fuliga fakavave i te malo. Ne fakamoe‵moe latou ke fakasaoloto ne te Mesia latou mai te pulega fakasaua a te kau Loma. Kae i te taimi ne taumafai latou ke fai a Iesu mo olotou tupu, ne ita a ia. (Ioa. 6:14, 15) A nisi tino—e aofia ei a faitaulaga—ne manava‵se i te mea ma ‵fuli ne Iesu a te malo kae kaitāua a te kau Loma, kolā ne tuku atu ne latou ki takitaki lotu konā se tulaga pule. Ona ko te manava‵se ki te tulaga o te malo, ne ‵siga ei a te tokoukega o tino Iutaia.

18. Ne a valoaga i te Tusi Tapu e uiga ki te Mesia kolā ne seki fakatāua ne tino e tokouke?

¹⁸ Ne a pati a te Tusi Tapu? E tiga eiloa e uke a valoaga ne ‵valo mai me ka fai a te Mesia mo Sotia manumalo, e fakaasi mai i nisi valoaga me ka mate muamua a ia mō ‵tou agasala.  (Isa. 53:9, 12) Tela la, kaia ne maua ei ne latou a kilokiloga ‵se e uiga ki te Mesia? Me ne seki fakatāua ne te tokoukega i aso o Iesu so se valoaga telā e se ‵valo mai ei a faka‵leiga fakavave ki olotou fakalavelave.—Ioa. 6:26, 27.

19. Ne a kilokiloga sē ‵tonu ne ala ei o ‵siga a te tokoukega o tino i aso nei?

¹⁹ E mata, tenā foki te fakalavelave i aso nei? Ao. E tokouke a tino i aso nei e ‵siga ona ko te sē ‵kau atu o tatou ki se feitu i mea fakapolitiki. E fakamoe‵moe latou ke aofia tatou i palota. Kae e iloa ne tatou mai te kilokiloga a Ieova, kafai e filifili ne tatou se tino ke pule mai ki a tatou, ko ‵teke ne tatou a Ia. (1 Samu. 8:4-7) Kāti e mafau‵fau foki a tino me e ‵tau o faite ne tatou a akoga mo fakaimasaki kae fesoasoani atu foki ki nisi tino i mea tau tupe. E ‵siga latou ona ko tatou e ‵saga atu ki te ‵tou galuega talai, i lō te faka‵lei fakavave aka o fakalavelave i te lalolagi nei.

20. E pelā mo pati a Iesu i te Mataio 7:21-23, se a te mea e ‵tau o ‵saga tonu atu tatou ki ei?

²⁰ Ne a ‵tou mea e ‵tau o fai ke mo a e ‵siga? (Faitau te Mataio 7:21-23.) E ‵tau o ‵saga tonu atu fua tatou o fai te galuega ne fakatonu mai ne Iesu. (Mata. 28:19, 20) E se ‵tau o fakalave‵lave tatou i te taumafaiga o faka‵lei a fakalavelave i mea fakapolitiki mo nisi fakalavelave aka o te lalolagi nei. E a‵lofa tatou ki tino kae manava‵se ki olotou fakalavelave, kae e iloa ne tatou me i te ‵toe auala ‵lei ke fesoasoani atu ki ‵tou tuakoi, ko te akoako atu o latou e uiga ki te Malo o te Atua kae fesoasoani atu ke ati aka ne latou se vā fakataugasoa mo Ieova.

21. Se a te mea e ‵tau o fakaiku aka ke fai ne tatou?

²¹ I te mataupu tenei, ne sau‵tala tatou ki auala e fa kolā ne fai ei ke ‵siga a te tokoukega o tino kae ‵teke atu ki a Iesu i te senitenali muamua, kae ne fai foki ei ke ‵teke atu a nisi tino i aso nei ki soko o Iesu. Kae e mata, konei fua a mea kolā e ‵tau o ‵kalo kea‵tea tatou mai ei? Ikai. I te suā mataupu, ka suke‵suke tatou ki nisi auala e fa kolā e fai ei ke ‵siga tatou. Ke na fakaiku aka ke mo a e ‵siga tatou kae ke tumau faeloa te ma‵losi o ‵tou fakatuanaki!