1-2. Ne a fakalavelave e fe‵paki mo Molimau e tokouke?

NE FAKAMALOSI ne te apositolo ko Paulo a Timoteo mo Kelisiano katoa ke fakataunu katoatoa te lotou galuega talai. (2 Timo. 4:5) E fakatāua ne tatou a pati fakatonutonu a Paulo. Kae i nisi taimi e faigata foki ke fai penā. Ki ‵tou taina mo tuagane e tokouke, e manakogina te loto malosi tonu ke ‵kau atu ki te galuega talai. (2 Timo. 4:2) Mafaufau aka la ki ‵tou taina e ‵nofo i fenua e fakatapu i ei te galuega talai. E fai ne latou te galuega talai faitalia te fakamataku!

² E fakafesagai a tino o Ieova mo fakalavelave e uke kolā e mafai o fakavāivāi atu ki a latou. E pelā me se fakaakoakoga, e tokouke e ‵tau o ga‵lue mō se fia itula ke tausi atu ki manakoga tāua o olotou kāiga. E ma‵nako latou ke uke atu olotou taimi i te galuega talai, kae e se lava te lotou malosi i te fakaotiga o te vaiaso. Nisi tino ko se uke olotou mea e mafai o fai ona ko masaki io me ko te tulaga matua, ko se mafai latou o oloolo kae ko ‵nofo fua i fale. Kae ko nisi tino e mafau‵fau faeloa i a latou ko sē aoga. Ne fai mai te tuagane ko Mary * penei: “Ne manakogina a taumafaiga e uke ke taua atu au ki oku lagonaga sē ‵lei i te taimi e loto vāivāi ei au. Ne fai ei ne lagonaga konā ke seai soku taimi mo te malosi ke kau atu ki te galuega talai.”

3. Ne a mea ka sau‵tala tatou ki ei i te mataupu tenei?

³ Faitalia ‵tou fakalavelave, e mafai ne Ieova o fakamalosi tatou ke kufaki i ‵tou fakalavelave totino kae ke fai ne tatou te ‵toe mea e mafai ke tavini atu ki a ia. Koi tuai o sau‵tala tatou ki te auala e mafai o fesoasoani mai a Ieova, ka suke‵suke tatou ki te auala ne fakamalosi ne ia a Paulo mo Timoteo ke fakataunu te lā galuega talai faitalia a fakalavelave.

4. Ne a fakalavelave ne fe‵paki mo Paulo?

⁴ Ne fepaki a Paulo mo fakalavelave e uke. Ne manakogina malosi ne ia te fesoasoani o Ieova i te taimi ne ‵kini ei a ia, peipei ki fatu kae ‵pei ki te falepuipui. (2 Koli. 11:23-25) Ne fakaasi ‵tonu mai ne Paulo me i nisi taimi ne taua ‵tonu atu a ia ki lagonaga sē ‵lei. (Loma 7:18, 19, 24) Ne kufaki foki a ia i se masaki telā e fai pelā me “se mea makaikai ki tena foitino” telā ne manako malosi a ia ke ave kea‵tea ne te Atua.—2 Koli. 12:7, 8.

5. Se a te mea ne fakataunu ne Paulo faitalia a fakalavelave ne fe‵paki mo ia?

⁵ Ne tuku atu ne Ieova ki a Paulo a te malosi ke fai tena galuega faitalia a fakalavelave katoa ne fepaki mo ia. Ke mafau‵fau ki mea ne fai ne Paulo. E pelā me se fakaakoakoga, i te taimi ne ‵loka ei a ia i se fale i Loma, ne loto finafinau a ia o ‵pulu te tala ‵lei i mua o takitaki Iutaia mo ofisa o te malo. (Galu. 28:17; Fili. 4:21,22) Ne talai atu foki a ia ki sotia leoleo a te tupu e tokouke, penā foki mo tino e tokouke kolā ne āsi atu ki a ia. (Galu. 28:30, 31; Fili. 1:13) I te taimi foki tenā, ne tusi ne Paulo a tusi fakaosofia kolā ne aoga ki Kelisiano i aso mua mo aso nei. E se gata i ei, ne fakamalosi a te fakaakoakoga a Paulo ki te fakapotopotoga i Loma, telā ne iku atu ei ki te mauaga ne ana taina “te loto ‵toa ke faipati atu a te Muna a te Atua e aunoa mo te ma‵taku.” (Fili. 1:14) E tiga eiloa ne seki mafai ne Paulo o fai a mea e uke i nisi taimi, ne fai ne ia te ‵toe mea e mafai e ‵tusa mo tena fakanofonofoga “telā ne fai ei ke gasolo aka ki mua a te tala ‵lei.”—Fili. 1:12.

6. E ‵tusa mo te 2 Kolinito 12:9, 10, se a te mea ne fesoasoani atu ki a Paulo ke fakataunu tena galuega talai?

⁶ Ne iloa ne Paulo me ne mafai ne ia o fai a mea katoa i te taviniga a Ieova ona ko te malosi ne tuku mai ne te Atua kae e se ko tena malosi. Ne fai mai a ia i te ‵mana o te Atua “e katoatoa ‵lei i taimi e vāivāi ei au.” (Faitau te 2 Kolinito 12:9, 10.) E auala i Tena agaga tapu, ne tuku atu ne Ieova te malosi ki a Paulo ke fakataunu katoatoa tena galuega talai—faitalia a fakasauaga, ‵pei ki te falepuipui, mo nisi fakalavelave faiga‵ta ne fepaki mo ia.

7. Ne a fakalavelave kolā ne ‵tau o manumalo i ei a Timoteo ke mafai ei o fakataunu a tena galuega talai?

⁷ A Timoteo te taugasoa talavou o Paulo, ne ‵tau foki o fakalagolago ki te ‵mana o te Atua ke fai tena galuega talai. Ne olo tasi foki a Timoteo mo Paulo i ana malaga ‵loa fakamisionale. E se gata i ei, ne uga foki ne Paulo a ia ke asi  kae fakamalosi atu a fakapotopotoga. (1 Koli. 4:17) Kāti ne mafaufau a Timoteo i a ia ko tō foliki kae e se lasi tena atamai. Tenā te pogai ne fakamalosi atu a Paulo ki a ia: “Ke mo a eiloa ma talia se tino ke manatu fatauva ki tou tulaga talavou.” (1 Timo. 4:12) E se gata i ei, i te taimi tenei, ne maua ne Timoteo se mea makaikai i tena foitino—“se masaki e masaki ‵soko ei a ia.” (1 Timo. 5:23) Kae ne iloa ne Timoteo me ka tuku atu ne Ieova tena agaga tapu ke maua ne ia te malosi o talai atu te tala ‵lei kae tavini atu ki ana taina.—2 Timo. 1:7.

8. E fakamalosi pefea ne Ieova ana tino i aso nei?

⁸ I aso nei, e tuku atu ne Ieova ki ana tino “te malosi telā e sili atu i te malosi masani” ko te mea ke mafai o tumau latou i te tavini atu ki a ia mo te fakamaoni. (2 Koli. 4:7) Ke sau‵tala nei tatou ki fakatokaga e fa ne fai ne Ieova ke fakamalosi kae fesoasoani mai ki a tatou ke tumau i te fakamaoni ki a ia: ‵talo, te Tusi Tapu, ‵kau fakatasi mo taina mo tuagane, mo te ‵tou galuega talai.

9. E mafai pefea o fesoasoani mai te ‵talo?

⁹ Ne fakamalosigina e auala i ‵talo. E pelā mo te mea ne fakamau i te Efeso 6:18, ne fakamalosi mai a Paulo ke ‵talo atu tatou ki te Atua “i taimi katoa.” Kae ka fakamalosi mai eiloa a te Atua ki a tatou. A Jonnie, telā e nofo i Bolivia, ne lavea ne ia a te fesoasoani tenā i te taimi ne fakafesagai atu a ia ki fakalavelave e uke. A tena avaga mo ana mātua ne ma‵saki eiloa i te taimi e tasi. Ne faigata ki a Jonnie ke tausi atu ki manakoga o latou e tokotolu. Ne mate tena mātua kae ne leva ‵ki te taimi ke ‵toe ‵lei mai a tena tamana mo tena avaga i lā ma‵saki. Mai te mafaufau ki te taimi tenā, ne fai mai a Jonnie, “Kafai ko manavase malosi au, ne fesoasoani mai a te ‵talo faeloa ki a Ieova kae fakaasi atu oku lagonaga.” Ne tuku atu ne Ieova a te malosi ki a Jonnie ke kufaki. A Ronald, se toeaina i Bolivia, ne iloa aka ne ia i tena mātua e kenisa, kae ne mate i se masina mai tua. Se a te mea ne fesoasoani atu ki tou tagata ke kufaki? Ana muna: “A te ‵talo atu ki a Ieova ne fai ei ke ‵ligi atu ne au ki a ia a mea i toku loto kae fakaasi atu oku lagonaga ‵tonu. E iloa ne au me malamalama fakafia atu a ia i a au i lō nisi tino, kae iloa faka‵lei atu ne ia au i lō au eiloa.” I nisi taimi, kāti e manava‵se tatou io me e se iloa ne tatou a pati e ‵tau o fai i ‵tou ‵talo. Kae ‵kami tatou ne Ieova ke ‵talo atu ki a ia faitalia foki loa e faigata ke fakaasi atu ne tatou ki a ia a ‵tou lagonaga mo mafaufauga e auala i pati.—Loma 8:26, 27.

10. E pelā mo te Epelu 4:12, kaia e tāua ‵ki ei ke faitau faeloa ki te Tusi Tapu kae mafaufau ‵loto ki ei?

¹⁰ Ne fakamalosigina e auala i te Tusi Tapu. E pelā mo Paulo telā ne fakalagolago ki te Tusi Tapu ke maua ne ia te malosi mo fakamafanafanaga, e mafai foki o fai tatou penā. (Loma 15:4) I te taimi e fai‵tau tatou ki te Muna a te Atua kae mafaufau ‵loto ki ei, e mafai o fakaaoga ne Ieova tena agaga ke fesoasoani mai ke malamalama tatou i te auala e fesoasoani mai ei te Tusi Tapu ki ‵tou fakalavelave. (Faitau te Epelu 4:12.) Ne fai mai a Ronald telā ne sae mai muamua: “E fiafia au me ne ati aka ne au a te fiafia ke faitau ki se vaega o te Tusi Tapu i po katoa. Ne tauloto au ki uiga o Ieova e uke mo ana faifaiga alofa ki ana tavini. Ne fesoasoani mai te mea tenei ke toe maua ne au te malosi.”

11. I te auala fea ne fakamalosi atu te Tusi Tapu ki se tuagane telā ne mafatia?

¹¹ E mafai o ati aka ne tatou se kilokiloga ‵lei e uiga ki ‵tou fakalavelave mai te mafaufau ‵loto ki te Muna a te Atua. Mafaufau la ki mea aoga ne maua ne se fafine ko mate tena avaga telā ne loto mafatia, mai i te Tusi Tapu. Ne fai  atu se toeaina me e mafai o maua ne tou fafine a akoakoga aoga mai te faitau ki te tusi o Iopu. I te taimi ne faitau a ia ki ei, ne seki fiafia a ia i te taimi muamau ki a Iopu ona ko ana mafaufauga sē ‵tonu. Ne fai ifo a ia i tena mafaufau: “Iopu! Sa mafaufau fua ki ou fakalavelave!” Kae ne fatoa iloa aka ne ia i tena kilokiloga e ‵pau fua mo Iopu. Ne fesoasoani atu te mea tenei ke ‵fuli tena kilokiloga kae ne fakamalosi atu ei ke kufaki a ia i te logo‵mae ona ko te galo atu o tena avaga.

12. I te auala fea e fakaaoga ne Ieova a ‵tou taina tapuaki ke fakama‵losi tatou?

¹² Ne fakamalosigina e auala i te ‵kau fakatasi mo taina mo tuagane. A te suā auala e fakamalosi ne Ieova a Kelisiano ko ‵tou taina tapuaki. Ne manako eiloa a Paulo ke fetaui mo ana taina mo tuagane faka-te-agaga, “ke fakatau fakamalosi aka ei latou.” (Loma 1:11, 12) A Mary telā ne sae mai muamua ne fakatāua ne ia a vaegā taimi penā, ana muna: “Ne fakaaoga ne Ieova a taina mo tuagane kolā e se iloa ne latou oku fakalavelave. Ne fai mai ne latou a pati fakamalosi io me lafo mai se card, kae tenā loa te mea ne manakogina ne au. Ne fesoasoani mai foki ke mafai o fakaasi atu ne au ki nisi tuagane kolā e ‵pau omotou fakalavelave, kae ke tauloto foki mai i a latou. Kae fesoasoani mai faeloa a toeaina ke lavea ne au me i taina mo tuagane i te fakapotopotoga e a‵lofa mai.”

13. E mafai pefea o fakatau fakamalosi atu ne tatou a nisi tino i fakatasiga a te fakapotopotoga?

¹³ Tasi o toe koga ‵lei ke maua ne tatou a fakamalosiga, ko fakatasiga a te fakapotopotoga. Kafai e kau atu koe ki fakatasiga, kaia e se taumafai ei koe o fakamalosi atu a nisi tino mai te fakaasi atu o faifaiga a‵lofa kae atafai? Pelā me se fakaakoakoga, koi tuai o kamata se fakatasiga, ne fai atu te toeaina ko Peter ki se tuagane telā a tena avaga se tino sē talitonu: “Ko oko loa i te fakamalosi loto a tou kau mai faeloa ki fakatasiga. E fakatoka faeloa ne koe au tamaliki e toko ono ke toka kae ke fai foki olotou tali.” Ne tagi tou fafine ona ko tena loto fakafetai, kae ne fai atu a ia: “Ko oko loa toku fiafia i te lagona atu ne au o pati konā.”

14. E aoga pefea ki a tatou a te ‵kau atu ki te galuega talai?

¹⁴ Ne fakamalosigina e auala i te galuega talai. Kafai e fakaasi atu ne tatou a muna‵tonu mai te Tusi Tapu ki nisi tino, e maua faeloa ne tatou a te malosi fou faitalia me ‵saga mai a tino io me ikai. (Faata. 11:25) Ne lavea ne te tuagane e igoa ki a Stacy a te fakamalosi loto o te galuega talai ki a ia. I te taimi ne fakatea ei sena kāiga, ne fanoanoa ‵ki a ia, kae ne fesili ifo a ia ki a ia eiloa, ‘E mata, ne mafai ne au o fai a mea e tai uke atu ke fesoasoani atu ki ei?’ Ne faigata o fakagata ne Stacy tena mafaufau ki tena fakalavelave tenā. Se a te mea ne fesoasoani atu ke kufaki a ia i te fakalavelave tenā? Te galuega talai! Kafai ko fano a ia i te galuega talai, ne mafaufau fua a ia ki tino i te koga talai kolā e ma‵nako ki tena fesoasoani. Ne fai mai a ia: “I te taimi tenā, ne tuku mai ne Ieova ki a au se akoga faka-te-Tusi Tapu telā ne gasolo vave ki mua. Ne fakamalosi mai ki a au a te mea tenā. A te ‵toe mea tāua telā ne fesoasoani mai ki a au, ko te galuega talai.”

15. Ne a mea e tauloto ne koe mai pati a Mary?

¹⁵ Ona ko olotou fakanofonofoga, e mafau‵fau a nisi tino me e se mafai o uke olotou mea e fai i te galuega talai. Kafai konā loa ou lagonaga, masaua me i a Ieova e fiafia māfai e fai ne koe te ‵toe mea e mafai ne koe o fai. Ke toe mafau‵fau ki te fakaakoakoga o Mary. I te taimi ne fanatu ei a ia ki se koga telā e fai‵pati ki se ‵gana fakaa‵tea, ne mafaufau a ia me e se manakogina a ia i konā. Ne fai mai a ia, “Ne mafai fua ne au o fai se tali toetoe, io me faitau se fuaiupu i te Tusi Tapu, io me ofo atu fua se tamā pepa i te galuega talai.” Ne mafaufau a ia  me e se lasi tena atamai ma faka‵pau ki tino kolā e fai‵pati faka‵lei ki te ‵gana tenā. Kae ne ‵fuli tena kilokiloga. Ne iloa ne ia me e fakaaoga ne Ieova a ia faitalia me e se faipati faka‵lei a ia ki te ‵gana tenā. Ne fai mai a ia, “A pati i te Tusi Tapu e faigofie, kae ko muna‵tonu konā e mafai o ‵fuli ne ia a olaga o tino.”

16. Se a te fesoasoani e mafai o maua ne tino kolā e se mafai o oloolo kae ‵nofo fua i fale?

¹⁶ E lavea kae fiafia a Ieova ki te ‵tou manakoga ke ‵kau atu ki te galuega talai, faitalia me ko sē mafai ne tatou o oloolo kae ‵nofo fua i fale. E ‵tala mai ne ia avanoga e uke ke talai atu tatou ki tino kolā e tausi mai e pelā mo nēsi mo tokita. Kafai e fakatusa‵tusa ne tatou a ‵tou galuega i te taimi nei mo mea ne mafai ne tatou o fai i aso ko ‵teka, e mafai eiloa o loto vāi‵vai tatou. Kae kafai e malamalama tatou i te auala e fesoasoani mai ei a Ieova ki a tatou i te taimi nei, ka maua eiloa ne tatou a te malosi e manakogina ke kufaki mo te fia‵fia i so se fakalavelave.

17. E ‵tusa mo te Failauga 11:6, kaia e ‵tau ei o tumau tatou i te faiga o te galuega talai faitalia me e se maua fakavave ne tatou a ikuga mai i ei?

¹⁷ E se iloa ne tatou me kofea a fuataga o te munatonu kolā ne ‵toki ne tatou ka mafai o ola aka. (Faitau te Failauga 11:6.) A Barbara, se tuagane telā ko 80 tupu ana tausaga, ne talai atu faeloa e auala i telefoni mo tusi. I sena tusi e tasi, ne lafo atu ne ia Te Faleleoleo Maluga o Mati 1, 2014, “Mea ne Fai ne te Atua mō Koe.” Ne seki iloa ne tou fafine me ne lafo atu ne ia te tusi tenā ki se tauavaga kolā ko se fai nei mo Molimau a Ieova. Ne fai‵tau faeloa lāua ki te mekesini tenā. Ne mafaufau ei te tagata me e pelā eiloa me ko Ieova ko faipati ‵tonu atu ki a ia. Ne kamata o ‵kau atu te tauavaga tenei ki fakatasiga, kae fakamuli loa ne toe fai lāua mo Molimau mai tua o tausaga e silia atu mo te 27. Mafaufau aka la ki te fakamalosi loto ki a Barbara ke lavea atu ne ia a ikuga ‵gali mai te tusi telā ne tusi ne ia!

18. Ne a ‵tou mea e ‵tau o fai ke fakamalosigina tatou ne te Atua?

¹⁸ E tuku mai ne Ieova ki a tatou a avanoaga e uke ke maua ne tatou a tena fesoasoani. Kafai e fakaaoga ne tatou ana fakatokaga konei—pelā mo te ‵talo, te Tusi Tapu, te ‵kau fakatasi mo taina mo tuagane mo te galuega talai—e fakaasi atu ei te ‵tou tali‵tonu me e mafai kae manako a Ieova o fesoasoani mai ki a tatou. Ke na fakalago‵lago faeloa tatou ki te ‵tou Tamana i te lagi, telā e fiafia “ke fakaasi atu tena malosi ona ko latou kolā e tuku katoatoa atu olotou loto ki a ia.”—2 Nofo. 16:9.