TE FALELEOLEO MALUGA (LŌMIGA MŌ SUKESUKEGA) Novema 2016
E aofia i te lōmiga tenei a mataupu mō sukesukega i a Tesema 26, 2016 ki a Ianuali 29, 2017.
Se Pati Telā e Tāua ‵Ki!
Se a te vaegā kalaga e fakaaoga ne Iesu telā e ‵loto atu tena uiga ki te āva
“Tumau i te Fakamalosi Atu te Suā Tino ki te Suā Tino i Aso Taki Tasi”
Kaia e aoga ei a fakamalosiga? Se a te akoakoga e tauloto ne tatou mai i te aulala ne fakamalosi atu ei a Ieova, Iesu mo Paulo ki nisi tino?Kae mafai pefea o tuku atu ne koe a pati fakamalosi aoga ki nisi tino?
Fakatoka ke Fetaui ‵Lei mo te Tusi Totino a te Atua
Ieova, te tino fai fakatokaga tu ‵kese. E mata, e se fakalotolotolua tatou me ka fai foki ana tino tapuaki penā?
E Mata, e Fakatāua Malosi ne Koe a te Tusi Totino a Ieova?
E tau ne tino o te Atua a ikuga gali ‵ki māfai e kausaki malosi o fakagalue a pati fakatonutonu i tena Muna kae a‵lofa fakamaoni o ‵lago ki tena fakapotopotoga.
“Se Galuega Tafasili i te Lasi”
E maua ne koe te tauliaga ke ‵lago ki ei.
Ne Kalaga ki Tua Mo te Pouliga
Kaia ne fai ei i tino o te Atua ne fakapagota i Papelonia talu mai i te senitenali i te lua T.A. o vau ki tua? E pefea kae anafea ne kamata ei o maua ne latou a nai mainaga?
Ne ‵Tele Kea‵tea Latou Mai Lotu ‵Se
Ko te taimi fea ne saoloto katoatoa ei a tino o te Atua mai te pologa ki Papelonia?
“Tino Talai o te Malo i Peletania—Ala Mai!!”
E seai se gasoloakaga i te aofaki o tino talai i Peletania mô se sefulu tausaga! Se a te mea ne ‵fuli ei te tulaga tenâ?
