1-3. Ne mafai pefea o tupu te fakalavelave i te va o Evotia mo Sunetui, kae ne mafai pefea o faka‵lei aka? (Ke onoono ki te ata i te kamataga.)

E FAKATĀUA malosi ne tavini a Ieova a te tusi totino a Ieova, ko te Tusi Tapu. Ona ko te tulaga se ‵lei katoatoa, e maua katoa ne tatou a pati polopoloki mai te Tusi Tapu i nisi taimi. E ‵saga atu pefea tatou ki ei? Ke sau‵tala tatou ki Kelisiano i te senitenali muamua ko Evotia mo Sunetui. E isi se fakalavelave lasi ne tupu i va o fafine fakaekegina konei. Kae se a te fakalavelave? E seki fakaasi mai i te Tusi Tapu. Kae fakaataata ne tatou me konei a mea ne mafai o ‵tupu.

² Kāti ne ‵kami ne Evotia a nisi taina mo tuagane ki tena fale ki se ‵kaiga mo se maopoopoga aoga. Ne seki ai se ‵kamiga o Sunetui, kae ne logo a ia me ne fia‵fia a tino i ei. Kae ne mafai a Sunetui o fai atu penei: ‘Au e se talitonu i a Evotia ne seki ‵kami ne ia au! E mafaufau au i a māua e taugasoa ‵lei ‵ki.’ Ne nofo a Sunetui mo te lagonaga sē ‵lei, kae ko kilo atu ki a Evotia mo te fakalotolotolua mo te masalosalo. Tela la, ne fakatoka foki ne Sunetui se ‵kaiga kae ne ‵kami ne ia a taina mo tuagane kolā ne ‵kami foki ne Evotia—kae e se ko Evotia! A te fakalavelave ne tupu i te va o Evotia mo  Sunetui ne mafai o fakamasei ei te filemu i te fakapotopotoga kātoa. Ne seki fakaasi mai i te Tusi Tapu te mea ne tupu fakamuli, kae e lavea atu me ne faka‵logo faka‵lei a tuagane konā ki polopolokiga a‵lofa a te apositolo ko Paulo.—Fili. 4:2, 3.

³ A tulaga penei e mafai o fakamāfua aka a fakalavelave i fakapotopotoga a Ieova i aso nei. Kae ui ei, e mafai o faka‵lei aka io me fakaseai a fakalavelave penei māfai e fakaga‵lue ne tatou a pati polopoloki e maua i te Muna a te Atua, ko te Tusi Tapu. Kae kāfai e fakatāua malosi ne tatou te tusi totino a Ieova, ka ola eiloa tatou e ‵tusa mo ana fakatakitakiga.—Sala. 27:11.

4, 5. Ne a pati polopoloki e tuku mai i te Muna a te Atua ki te auala e pule faka‵lei atu ei tatou ki ‵tou lagonaga?

⁴ E sē se mea faigofie ke pule atu ki ‵tou lagonaga maise māfai e fai mai ne se tino a faifaiga sē fakamaoni ki a tatou. Se mea fakafanoanoa māfai e fai masei mai ki a tatou ona ko tou telega, tou ‵kala io me ko ‵tou foliga. E logo‵mae malosi tatou māfai ne māfua mai i sou taina Kelisiano a te fakalavelave tenā! E mata, e maua i te Muna a te Atua a pati polopoloki ke fesoasoani mai māfai e fakafesagai atu tatou ki se tulaga ma‵sei penā?

⁵ A Ieova e iloa faka‵lei ne ia a ikuga o faifaiga a tino talu mai te kamataga eiloa o faite te tagata. E iloa ne ia ‵tou lagonaga mo faifaiga. A ‵tou mafaufauga, mo pati kolā e fakaasi mai ei ki tua a ‵tou lagonaga tonu, ko fai ei ke salamō tatou fakamuli. Se faifaiga poto ke fakagalue ne koe a polopolokiga mai te Tusi Tapu ke taofiofi tou kaitaua kae ke se vave o fakaasi atu a uiga masei! (Faitau te Faataoto 16:32; Failauga 7:9.) E seai se fakalotolotolua me ‵tau o ga‵lue katoa a tatou ki te sē vave o ‵saga ki mea ma‵sei e fai mai ki a tatou kae ke vave o maua te loto fakamagalo. A Ieova mo Iesu e fakatāua malosi ne laua a tino loto fakamagalo. (Mata. 6:14, 15) E mata, e ‵tau o galue malosi ke maua ne koe te loto fakamagalo kae pule faka‵lei atu ki ou lagonaga?

6. Kaia e ‵tau o fakaeteete i te uiga kaitaua?

⁶ Tino kolā e se pule faka‵lei atu ki olotou lagonaga ne tino e uiga kaitaua. Ko fai ei ke se fia‵fia a nisi tino ki a latou. A te tino kaitaua e mafai o fai pelā me se fakamalosiga masei i loto te fakapotopotoga. E mafai o ‵funa ana uiga kaitaua io me ko uiga takalialia ki nisi tino, kae ko ana mafaufauga sē ‵lei kolā e ‵fonu i tena loto “ka fakaasi faka‵sau atu . . . i loto i te fakapotopotoga.” (Faata. 26:24-26) E mafai o fesoasoani atu a toeaina ke lavea ne tino kaitaua, uiga takalialia kae ita fakamoemoe, me se talia a uiga konā i te fakapotopotoga a te Atua. E manino ‵lei i te Tusi totino a Ieova e uiga ki mea konei. (Levi. 19:17, 18; Loma 3:11-18) E a, e ‵lago koe ki ei?

7, 8. (a) E takitaki pefea ne Ieova a te vaega o tena fakapotopotoga i te lalolagi nei? (e) Ne a nisi fakatonuga e maua i te Muna a te Atua, kae kaia e ‵tau ei o faka‵logo tatou ki ei?

⁷ E takitaki kae fagai ne Ieova a latou kolā i te vaega o tena fakapotopotoga i te lalolagi nei e auala i “te tavini poto kae fakamaoni” mai lalo i te takitakiga a Keliso, te “ulu o te fakapotopotoga.” (Mata. 24:45-47; Efe. 5:23) E pelā mo te potukau pule i te senitenali muamua, e talia kae fakatāua malosi ne tavini konei a pati fakaosofia a te Atua mo tena fekau. (Faitau te 1 Tesalonia 2:13.) Ne a pati fakatonutonu io me ne fakatakitakiga e maua i te Tusi Tapu e aoga mo tatou?

⁸ E fakatonu mai i te Tusi Tapu me e ‵tau o ‵kau faeloa tatou ki fakatasiga. (Epe. 10:24, 25) E fakamalosi mai ei ke tasi i ‵tou akoakoga. (1 Koli. 1:10) E fai mai te Muna a te Atua ke fakamuamua te Malo i ‵tou olaga.  (Mata. 6:33) E faka‵mafa foki mai i te Tusi Tapu a ‵tou tiute mo ‵tou tauliaga ke talai atu mai fale ki fale, koga masani e tokouke ei a tino mo te talai i taimi seki fuafuagina. (Mata. 28:19, 20; Galu. 5:42; 17:17; 20:20) E fakatonu ne te Tusi totino a te Atua a toeaina Kelisiano ke tausi ke ‵ma a te fakapotopotoga. (1 Koli. 5:1-5, 13; 1 Timo. 5:19-21) E fakatonu mai a Ieova i tino katoa i loto i tena fakapotopotoga e ‵tau o ‵ma i te feitu faka-te-foitino mo te feitu faka-te-agaga.—2 Koli. 7:1.

9. Se a te auala fua e tasi e fakaaoga i aso nei ke fesoasoani mai ke malamalama tatou i te Muna a te Atua?

⁹ A nisi tino e mafaufau me e mafai o fakamatala mai ne latou te Tusi Tapu i olotou iloa. E ui ei, a Iesu ko oti ne ‵tofi ne ia a te ‘tavini fakamaoni’ ko te auala fua e tasi e fakasoa mai ei a mea‵kai faka-te-agaga. Talu mai i te 1919, a Iesu Keliso telā ko oti ne faka‵malu ne fakaaoga ne ia a te tavini tenā ke fesoasoani ki ana kau ke malama‵lama i te Tusi totino a te Atua kae ke tau‵tali i fakatakitakiga i ei. Mai te faka‵logo ki faka‵tonuga i loto i te Tusi Tapu, e fakamalosi ne tatou te ‵ma, filemu mo te ‵kau fakatasi i loto i te fakapotopotoga. E ‵tau o fesili ifo te tino ki a ia eiloa, ‘E mata, e fakamaoni Au ki te fakatokaga e fakaaoga ne Iesu i aso nei?’

10. E fakamatala mai pefea ne te tusi a Esekielu a te vaega o te fakapotopotoga a Ieova i te lagi?

¹⁰ E fakaasi mai ne te Muna tusia a Ieova a te vaega o tena fakapotopotoga i te lagi. E pelā me se fakaakoakoga, ne maua ne te pelofeta ko Esekielu se fakaasiga o te vaega o te fakapotopotoga a te Atua i te lagi e sui ne se kaliota faka-te-lagi. (Eseki. 1:4-28) A Ieova e sopo i tena kaliota, kae tele i so se koga e fakatonu atu ne tena agaga. Se gata i ei, a te vaega o tena fakapotopotoga i te lagi e fakamalosi ne ia te vaega o tena fakapotopotoga i te lalolagi nei. A te kaliota tenei ko te telemaiga loa! Mafaufau ki te uke o mafuli‵fuliga ne fai i te fakapotopotoga i te fia sefulu o tausaga ko ‵teka—kae masaua me ko Ieova ko te māfuaga o atiakaga konei. Ko pili o fakaseai atu ne Keliso mo ana agelu tapu a te olaga masei tenei, kae ko te kaliota a Ieova e tele makini eiloa ki mua o fakamaluga a tena pulega sili mo tena igoa tapu!

11, 12. Ne a mea ko oti ne maua io me fakataunu ne te fakapotopotoga a Ieova?

¹¹ Ke mafau‵fau ki mea ne fai ne te vaega o te fakapotopotoga a te Atua i te lalolagi i aso fakaoti konei. Galuega Fakatu‵tu. E lau i selau o tino ga‵lue ne fakalavelave malosi i te faitega a te laumua fou o Molimau a Ieova i Warwick, Niu Ioki, U.S.A. Mai lalo i te takitakiga a te Worldwide Design/Matagaluega Fakatutu, e lau i afe o tino volenitia ne ga‵lue malosi i te faitega o Fale Tapuaki ‵fou mo te faka‵lasiga o Peteli. E loto fakafetai tatou ki ‵tou taina volenitia kolā ne loto fia‵fia o ga‵lue malosi ki galuega konā! Masaua a Ieova e fakamanuia ne ia a tino talai o te Malo kolā e lotomalie kae ‵lago atu i mea tau tupe i galuega fakatutu konei.—Luka 21:1-4.

¹² Akoakoga. Ke mafaufau ki vaega kese‵kese o akoga kolā e fakamalosi aka ei a mea  faka-te-agaga. (Isa. 2:2, 3) E maua ne tatou a Akoga mō Paenia, Akoga mō Tino Talai o te Malo, Akoga Kiliata, Akoga mō Tino ‵Fou ki te Peteli, Akoga mō Ovasia o Fenua mo Olotou Avaga, Akoga mō Toeaina, Akoga mō Toeaina mo Tavini Fesoasoani, mo Akoga mō Komiti o te Ofisa Lagolago mo Olotou Avaga. E fiafia malosi a Ieova o akoako ana tino! E maua i ‵tou fakatuatusi ko te jw.org a te faiga o a‵koga faka-te-Tusi Tapu i se fia selau o ‵gana. E maua foki i te fakatuatusi tenei se vaega e fakapitoa loa mō tamaliki, kāiga mo tala e uiga ki Molimau a Ieova. E mata, e fakaaoga ne koe te fakatuatusi tenei i tau galuega talai mo au tapuakiga a kāiga?

13. Ne a tiute e maua ne so se tino e tapuaki mo te fakamaoni ki a Ieova?

¹³ Ko oko eiloa i te manuia o tatou ke fai pelā me se vaega o te fakapotopotoga a Ieova! A te ‵tou iloa ki tulaga mo mea e manako te Atua mō tatou, e aofia i ei a te fai te mea ‵tonu kae fakamaluga tena pulega ‵sili. Ona te lalolagi nei ko pulu loa ki lalo i amioga fakatakalia‵lia, tela la e ‵tau mo tatou o “takalia‵lia ki amioga ma‵sei,” e pelā eiloa mo Ieova. (Sala. 97:10) E ‵tau o ‵kalo kea‵tea tatou mai tino amio ma‵sei ona ko olotou kilokiloga kae fai ne latou a: “Amioga ma‵sei me ne mea lei, kae taku ne [latou] a amioga lei me ne amioga masei.” (Isa. 5:20) Ona ko tatou e fia fakafia‵fia atu ki te Atua, e ‵tau mo tatou o taumafai ke ‵ma faka-te-foitino, i mea tau amioga kae maise i te feitu faka-te-agaga. (1 Koli. 6:9-11) E a‵lofa tatou ki a Ieova kae tali‵tonu katoatoa tatou ki a ia; e filifili tatou ke fakamaoni ki a ia kae ola e ‵tusa mo ana tulaga kolā e fakaasi manino mai i tena Tusi tāua. E taumafai ma‵losi tatou ke ola e ‵tusa mo ana tulaga i ‵tou fale, i te fakapotopotoga, galuega mo te akoga—i so se koga. (Faata. 15:3) Ke onoono ki nisi auala e mafai foki o tofotofo aka ei ‵tou fakamaoni ki te Atua.

14. E mafai pefea ne mātua Kelisiano o fakaasi atu te alofa fakamaoni ki te Atua?

¹⁴ Akoako a Tama‵liki. E fakaasi atu ne mātua Kelisiano a te lotou a‵lofa fakamaoni ki a Ieova mai te akoako atu olotou tama‵liki e ‵tusa mo tena Muna. E se fakamalosi ne tū mo aganū a mātua Kelisiano ke ako‵ako ki olotou tamaliki. A te agaga o te lalolagi e se talia i loto se kāiga Kelisiano. (Efe. 2:2) E se ‵tau o mafaufau se tamana Kelisiano papatiso penei, ‘I toku fenua, i o fa‵fine te tiute ke akoako tamaliki.’ E fakaasi manino mai i te Tusi Tapu a te mea tenā: “A koutou e tamana, . . . ke puti ake [otou tamaliki] i polopolokiga mo fakatakitakiga a Ieova.” (Efe. 6:4 A tamana mo mātua kolā e ma‵taku ki te Atua e ma‵nako ko olotou tamaliki ke fai pelā mo Samuelu, telā ne fakatasi atu eiloa a Ieova ki a ia i tena tupuakaga.—1 Samu. 3:19.

15. E fakaasi atu pefea a ‵tou a‵lofa fakamaoni ki a Ieova i taimi e fai ei a fakaikuga faiga‵ta?

¹⁵ Faiga o Fakaikuga. I te taimi e fai ei a fakaikuga faiga‵ta i tou olaga, e tasi te auala ke fakaasi atu tou fakamaoni ki te Atua ko te ‵sala atu ki te fesoasoani i tena Muna mo tena fakapotopotoga. Ke sautala tatou ki te pogai e tāua i ei kae e pokotia pefea i ei a mātua e tokouke. Se faifaiga masani e fai ne mātua kolā e olo o ga‵lue i fenua fakaa‵tea ke ave olotou pepe fatoā fa‵nau ke tausi ne olotou mātua ko te mea ke tumau loa latou i te ga‵lue kae maua a sene i te fenua fou. E tonu se fakaikuga totino, kae masaua, ka tuku atu ne tatou taki tokotasi ki te Atua se fakamatalaga e uiga ki ‵tou fakaikuga ne fai. (Faitau te Loma 14:12.) E mata, se mea poto ke fai se fakaikuga tāua e uiga ki ‵tou kāiga mo ‵tou olaga kae e se suke‵suke muamua me se a te fakatakitakiga i te Tusi Tapu e uiga ki ei? E sē se faiga poto! E manakogina te fesoasoani o ‵tou Tamana i te lagi, me sē mafai ne tatou o fakatonutonu ‵tou auala.—Iele. 10:23.

16. I te taimi ne fanau mai ei tena tamaliki tagata, se a te fakaikuga ne ‵tau o fai ne se mātua, kae se a te mea ne fesoasoani atu ki a ia ke fai te fakaikuga ‵tonu?

 ¹⁶ Ne fanau mai ne se fafine se tamaliki tagata i te taimi ne nofo ei a ia i se fenua fou, kae ne fakaiku aka ne ia ke ave tena pepe ki tena fenua tonu ke tausi ne mātua o tena avaga. I te taimi ne fanau ei a ia, ne kamata o fai tena akoga faka-te-Tusi Tapu ne se fafine Molimau a Ieova. Ne gasolo ki mua tena akoga kae ne tauloto ne ia me i o ia eiloa te tiute ne tuku atu ne te Atua ke puti aka tena tamaliki ke tapuaki atu ki a Ieova. (Sala. 127:3; Faata. 22:6) Ne fakaasi katoatoa atu ne te fafine tenei a mea i tena loto ki a Ieova, e pelā eiloa mo mea e fakaasi mai i te Tusi Tapu ke fai ne tatou. (Sala. 62:7, 8) Ne fakaasi atu foki ne ia a mea i tena loto ki tena faiakoga i te Tusi Tapu mo nisi tino i te fakapotopotoga. Faitalia a fakamalosiga mai ana kāiga mo ana taugasoa ke ave tena pepe ki tena tupuna, ne tumau a ia i tena fakaikuga me e se ‵tau o fai penā. Ne fiafia ‵ki tena avaga tagata ki te auala ne fesoasoani atu te fakapotopotoga ke fai pelā me se koga e ‵lafi ei tena avaga mo tena pepe kae ne talia foki ne tou tagata ke fai tena akoga faka-te-Tusi Tapu kae ne kamata o kau ki fakatasiga fakatasi mo tena avaga mo lā pepe. E mata, e mafaufau te mātua tenei me ko tali mai ne te Atua tena ‵talo? E seai se fakalotolotolua, me ne penā eiloa ana lagonaga.

17. Se a te takitakiga ne maua ne tatou e uiga ki ‵tou tino akoga i te Tusi Tapu?

¹⁷ Fakalogo ki te takitakiga. Se auala tāua e fakaasi atu ei ne tatou te a‵lofa fakamaoni ki te Atua ko te fakalogo ki te takitakiga e maua mai tena fakapotopotoga. Se fakaakoakoga, ke mafaufau ki manatu kolā ne tuku mai e uiga ki ‵tou tino akoga faka-te-Tusi Tapu. Ko oti ne fakamalosi mai, me kafai ko kamata se akoga faka-te-Tusi Tapu mo te tino i te tusi ko te Ne a Mea e Akoako ‵Tonu Mai i te Tusi Tapu? mai tua o te akoga e ‵tau o fakaaoga ne nai minute ke sau‵tala ki mea kolā e fai i loto i te fakapotopotoga. E mafai o fakaasi atu te vitio Ne a Mea e Fai i se Kingdom Hall? mo te polosiua Ko oi e Fai ne Latou te Loto o Ieova i Aso Nei? E fakamalosi mai me kafai ko oti te tusi ko te Akoakoga a te Tusi Tapu mo se tino akoga telā e gasolo ki mua, ke faka‵soko tena akoga ki te tusi Ke Tumau “i te Alofa o te Atua,” faitalia me ko oti ne papatiso a ia. E tuku mai ne te fakapotopotoga a fakatakitakiga konā ki soko ‵fou ke “‵mautakitaki te otou fakatuanaki.” (Ko. 2:7) E mata, e tautali koe ki takitakiga konā mai te fakapotopotoga a Ieova?

18, 19. Ne a nisi pogai e ‵tau o fakaasi atu ei te ‵tou loto fakefetai ki a Ieova?

¹⁸ E uke a mea e ‵tau o fakaasi ei te ‵tou loto fakafetai ki a Ieova! E ‵nofo kaitalafu tatou i a ia, moi seai a ia e se maua ne tatou a te ola, e se gasue‵sue foki tatou. (Galu. 17:27, 28) Ne tuku mai ne ia se tusi tāua ‵ki—ko tena tusi totino, ko te Tusi Tapu. E talia ne tatou mo te loto fakafetai me se fekau mai te Atua, e pelā mo Kelisiano i Tesalonia ne maua ne latou te muna a te Atua kae ne talia foki ne latou.—1 Tesa. 2:13.

¹⁹ Ko maua ne tatou a te Muna tusia a te Atua, ko fakapili‵pili tatou ki a Ieova kae ko fakapilipili mai foki a ia ki a tatou. (Iako. 4:8) Ko oti ne tuku mai ne te ‵Tou Tamana i te lagi a te tauliaga ke fai pelā me se vaega o tena fakapotopotoga. Ko oko loa i te ‵tou loto fakafetai ki se vāega fakamanuiga penā! Ne usu atu ne te fai Salamo se pese gali e uiga ki ei: “Fakafetai atu ki a Ieova, me i a ia e ‵lei; A tena alofa fakamaoni e tumau ki te se-gata-mai.” (Sala. 136:1, NW) E faka- luasefuluono taimi e maua ne tatou a pati ko “tena alofa fakamaoni e tumau ki te se-gata-mai” i te Salamo 136. Ko tena uiga a te tumau i te alofa fakamaoni ki a Ieova mo tena fakapotopotoga, ka lavea eiloa ne tatou te ‵tonu o pati konā me ka maua eiloa ne tatou te ola ki te se-gata-mai!