“TE FAFINE.” Tenā te auala e taku sale ne Iesu i nisi taimi a fafine. E pelā me se fakaakoakoga, i te taimi ne faka‵lei ei ne ia se tino masaki telā ne makau mō tausaga e 18, ne fai atu a ia: “Te fafine, ko fakasaoloto koe mai tou masaki.” (Luka 13:10-13) Ne fakaaoga foki ne Iesu te vaegā kalaga tenei, telā se fakaasiga o te āva i taimi o te Tusi Tapu, māfai e faipati ki tena mātua ‵tonu. (Ioa 19:26; 20:13) Kae isi aka se suā pati telā e ‵loto atu i te āva.

E fakaaoga i te Tusi Tapu se pati ki te alofa mo te atafai, māfai e fakasino atu ki fafine kolā e fakapitoa eiloa ki ei se mea. Ne fakaaoga ne Iesu te pati tenā i te taimi ne faipati atu ei ki se fafine telā ne ‵tafe tena sua mō tausaga e 12. Te auala ne fanatu ei a ia ki a Iesu e se fetaui mo te Tulafono a te Atua, telā e fai mai i te fafine e nofo i se tulaga penā e se ‵ma. Ne mafai o kinau atu me ne ‵tau eiloa mo ia o fakamavae kea‵tea ona ko tena masaki. (Levi. 15:19-27) Kae ko oko eiloa i te manako malosi o tou fafine ke faka‵lei tena masaki. I te tonuga loa “ne fakalogo‵mae a ia i taimi e uke ne tokita e tokouke kae ko oti foki ne fakaaoga ana tupe katoa e aunoa mo se ‵lei ne maua, kae ne gasolo aka eiloa o masei atu.”—Male. 5:25, 26.

Ne fanatu lemū a te fafine i loto i te vaitino kae fakapatele atu ki te kapakapa o te gatu o Iesu mai tua. Ne ‵lei fakavave ei tena masaki! Ne fakamoemoe tou fafine me ka sē ‵poa a ia, kae ne fesili atu a Iesu: “Ko oi ne patele mai ki a au?” (Luka 8:45-47) Ne mataku kae ne polepole tou fafine, fakasiga atu ei i ana mua “kae fakaasi atu a mea katoa ki a Iesu.”—Male. 5:33.

Ke faka‵noga aka te mataku o te fafine, ne fai atu a Iesu mo te atafai: “Taku Tama, ke malosi tou loto!” (Mata. 9:22) E pelā mo sukesukega a tino ‵poto ki te Tusi Tapu, a te pati Epelu mo te pati Eleni ki te “taku tama” e mafai o fakaaoga i se auala fakatusa ki te fakaasiatuga o te “alofa mo te atafai.” Ne toe fakamalosi atu foki ne Iesu a tou fafine mai i te fai atu: “Ko ‵lei tou masaki ona ko tou fakatuanaki. Fano mo te filemu mo te malosi mai tou masaki fakalogo‵mae tenā.”—Male 5:34.

“Taku Tama.” Tenā foki te auala ne kalaga ne te tagata maumea Isalaelu ko Poasa a te fafine Moapi ko Luta. Ne mafai foki o sē ‵lei a lagonaga o tou fafine ona ko ia e ‵tae saito i se manafa o se tagata telā e sē iloa ne ia. “Fakalogo mai, e taku tama,” ko pati a Poasa. Ne fakamalosi atu tou tagata ki a Luta ke nofo eiloa o ‵tae saito i tena fatoaga. Ne fakasiga ifo a Luta mo ana mata e ‵fuli ki lalo, kae fesili atu me kaia ko oko eiloa i te atafai atu o tou tagata ki a ia, te tino fakaa‵tea. Ne tali atu a Poasa mai i te ‵toe fakamalosi atu: “Ko oti ne logo au i se lipoti e uiga ki au mea katoa ne fai ki te mātua o tau avaga [ko Naomi telā ko mate tena avaga] . . . Ke taui atu ne Ieova ki a koe e ‵tusa mo au mea ne fai.”—Luta 2:8-12.

Ne tuku mai ne Iesu mo Poasa se fakaakoakoga gali ‵ki mō toeaina Kelisiano! I nisi taimi, e mafai o sau‵tala ne toeaina tokolua mo se fafine Kelisiano telā e manakogina malosi ne ia se fesoasoani mo fakamalosiga mai i te Tusi Tapu. Mai tua o te akai atu ki te fakatakitakiga a Ieova e auala i ‵talo kae fakalogologo faka‵lei ki pati a te lā tuagane, ka mafai ei ne toeaina o tuku atu a fakamalosiga mo fakamafanafanaga mai i te Muna a te Atua.—Loma 15:4.