1-2. Kaia e ‵tau ei mo Kelisiano i aso nei o suke‵suke ki te tusi o Levitiko?

NE FAKAMASAUA atu a te apositolo ko Paulo ki tena taugasoa talavou ko Timoteo me i “Tusitusiga Tapu katoa ne māfua mai i te Atua, kae e aoga.” (2 Timo. 3:16) E aofia i ei a te tusi o Levitiko. Se a tau kilokiloga ki te tusi tenā o te Tusi Tapu? Kāti e ‵kilo atu a nisi tino ki ei e pelā me se tusi telā e aofia i ei se fakasologa o tulafono kolā ko sē aoga ki ‵tou aso nei, kae e ‵kese eiloa te kilokiloga a Kelisiano ‵tonu.

² Ne tusi a te Levitiko kāti i se 3,500 tausaga ko ‵teka, kae ne puipui eiloa ne Ieova “ke akoako ei tatou.” (Loma 15:4) Ona ko te mea e fakamaina mai ne te tusi o Levitiko a mafaufauga o Ieova, e ‵tau o loto fia‵fia tatou o suke‵suke ki ei. E uke ‵ki a akoakoga e mafai o tauloto ne tatou mai te tusi tenā mai te Atua. Ke sau‵tala nei tatou ki akoakoga e fa.

3. Kaia ne ‵tau ei o ofo atu a taulaga i tausaga katoa i te Aso o te Faka‵maga?

³ Akoakoga muamua: E ‵tau o maua ne tatou te taliaga a Ieova ko te mea ke talia a ‵tou taulaga. I te Aso o te Faka‵maga i tausaga katoa, ne maopoopo fakatasi a te fenua o Isalaelu kae ne ofo atu ne latou a taulaga manu. Ne fesoasoani atu a taulaga konā ki tino Isalaelu me ne ‵tau o faka‵ma olotou agasala! Kae koi tuai o avatu ne te faitaulaga sili so se taulaga toto mai manu ki te Potu Tafasili i te Tapu i te aso eiloa tenā, ne ‵tau o fai muamua ne ia se suā galuega telā e sili atu i te tāua i te fakamagaloga o agasala a te fenua kātoa.

4. E pelā mo te mea ne fakamatala mai i te Levitiko 16:12, 13, ne a mea ne fai ne te faitaulaga sili i te taimi muamua ne ulu atu ei a ia ki te Potu Tafasili i te Tapu i te Aso o te Faka‵maga? (Ke onoono ki te ata i te ‵kava.)

⁴ Faitau te Levitiko 16:12, 13. Ke fakaataata aka a te mea ne  tupu i te Aso o te Faka‵maga: Ne ulu atu te faitaulaga sili ki loto i te faleie tapu. A te mea tenei ko te taimi muamua mai taimi e tolu telā e ‵tau mo ia o ulu atu ki te Potu Tafasili i te Tapu i te aso tenā. I tena suā lima, e puke ne ia i ei se tīsi telā e ‵fonu i mea ma‵nogi, kae i tena suā lima, ko te mea tuku malala ‵ka telā e ‵fonu i malala ‵ka. Ne mānava malie a ia mai mua o te ‵pui laugatu telā e ‵pui ei te mataloa ki loto i te Potu Tafasili i te Tapu. Ke fakaasi atu te āva sili, ne ulu atu a ia ki loto i te Potu Tafasili i te Tapu kae tu i mua o te pusa o te feagaiga. I se auala fakatusa, e pelā eiloa me ko tu atu a ia i mua o Ieova te Atua! Oti aka, ko ‵ligi atu ei faka‵lei ne te faitaulaga sili a mea ma‵nogi ki luga i malala ‵ka, kae ne ‵fonu a te potu i mea manogi ‵gali. * Fakamuli, ka toe ulu atu a ia ki te Potu Tafasili i te Tapu mo toto mō fai te taulaga mō agasala. Onoono aka la, me ne ‵sunu muamua ne ia a mea ma‵nogi a koi tuai o ofo atu ne ia a toto mō fai te taulaga mō agasala.

5. Ne a mea e mafai o tauloto ne tatou mai te auala e fakaaoga ei a mea ma‵nogi i te Aso o te Faka‵maga?

⁵ Ne a mea e mafai o tauloto ne tatou mai te auala ne fakaaoga ei a mea ma‵nogi i te Aso o te Faka‵maga? E fakaasi mai i te Tusi Tapu me i ‵talo a tino tapuaki fakamaoni o Ieova kolā e fai atu mo te loto kātoa, e fai pelā me ne mea ma‵nogi. (Sala. 141:2; Faka. 5:8) Masaua la me ne fakaasi atu ne te faitaulaga sili te āva lasi i te taimi ne ofo ei ne ia a mea ma‵nogi ki a Ieova. I se auala tai ‵pau, kafai e fakapili‵pili atu tatou ki a Ieova e auala i ‵talo, e fakaasi atu eiloa ne tatou te āva. E loto fakafetai tatou me e talia ne te Mafuaga o te iunivesi ke fakapili‵pili atu tatou ki a ia, e pelā eiloa mo se tamaliki ki tena tamana. (Iako. 4:8) E talia ne ia tatou e pelā me ne ana taugasoa! (Sala. 25:14) Ona ko te ‵tou loto fakafetai ki te tauliaga tenei, ka sē ma‵nako tatou o fai so se mea ke fakafanoanoa atu a ia.

6. Ne a mea e mafai o tauloto ne tatou mai te auala ne ‵sunu ei ne te faitaulaga sili a mea ma‵nogi a koi tuai o ofo atu ne ia a taulaga?

⁶ Masaua me ne ‵tau o ‵sunu ne te faitaulaga sili a mea ma‵nogi a koi tuai o ofo atu ne ia a taulaga. I te auala tenā, e fakamautinoa ne ia me ko maua ne ia te taliaga a te Atua ke ofo atu a taulaga. Ne a mea e mafai o tauloto ne tatou mai i ei? I tena nofoga i te lalolagi nei, ne ‵tau o fai ne Iesu se mea tāua—se mea telā e sili atu i te tāua i lō te faka‵saoga fua o tino katoa—a koi tuai o ofo atu ne ia tena ola e pelā me se taulaga. Se a te mea tenā? Mai te ola i se olaga fakamaoni kae fakalogo muna, ne ‵tau o fakatoka ne Iesu a te auala ke talia ne Ieova a tena taulaga. I auala tenā, ko fakamaoni atu ei ne Iesu me i te faiga o mea i auala o Ieova ko te auala tonu eiloa tenā. Ka fakamaluga kae fakamaoni atu ne Iesu a te ‵lei mo te fai mea tonu o te pulega sili a tena Tamana.

7. Kaia ne fai ei te olaga o Iesu i te lalolagi nei e pelā me se mea fakafiafia ki tena Tamana?

⁷ I tena olaga kātoa i te lalolagi, ne tumau a Iesu i te fakalogo muna ki tulaga amio‵tonu a Ieova. E seai se tofotofoga io me ne mea faiga‵ta—ke oko foki loa ki te mate fakalogo‵mae—ne mafai o fakavāivāi atu ki te manakoga o Iesu ke ‵pulu ne ia a te auala e pule mai ei a tena Tamana. (Fili. 2:8) I te taimi ne fepaki ei mo tofotofoga, ne ‵talo a Iesu “mo te ‵tagi malosi mo loimata.” (Epe. 5:7) Ne fakaasi mai i tena ‵talo mo te loto kātoa, me i a ia ne fakamaoni kae tumau i te fakalogo ki a Ieova. Ne kilo atu a Ieova ki te ‵talo a Iesu e pelā me se mea manogi gali. I te olaga kātoa o Iesu, ne fakafiafia malosi ne ia tena Tamana, kae fakamaluga aka ne ia a Tena pulega sili.

8. E mafai pefea o fakaakoako tatou ki te auala ne ola ei a Iesu?

 ⁸ E mafai o fakaakoako tatou ki a Iesu mai te fai o te ‵toe mea e mafai ke ola i se olaga fakamaoni kae fakalogo muna ki a Ieova. Kafai e fe‵paki tatou mo tofotofoga, ke ‵talo atu mo te loto kātoa mō te fesoasoani o Ieova, me e ma‵nako tatou o fakafiafia a ia. Mai te faiga penā, e fakaasi atu me e ‵lago tatou ki te auala e pule mai ei a Ieova. Ka iloa ne tatou me ka se talia fua ne Ieova ‵tou ‵talo māfai e fai ne tatou a amioga kolā e takalialia a ia ki ei. Kae kafai e ola tatou e ‵tusa mo tulaga o Ieova, e tali‵tonu tatou me ka fai eiloa a ‵tou ‵talo kolā e fai mo te loto kātoa e pelā me ne mea ma‵nogi gali ki a Ieova. Kae e mafai o mautinoa i a tatou me ka fakafiafia ne tatou a te ‵tou Tamana faka-te-lagi ona ko te ‵tou fakamaoni mo te faka‵logo muna.—Faata. 27:11.

9. Kaia ne ofo atu ei a taulaga ‵kai fakatasi?

⁹ Akoakoga i te lua: E tavini tatou ki a Ieova me e loto fakafetai tatou ki a ia. Ke faka‵mafa atu te mea tenei, ke sau‵tala tatou e uiga ki te taulaga ‵kai fakatasi, te suā vaega tāua o te tapuakiga tonu i Isalaelu mua. * I te tusi o Levitiko, e tauloto tatou me e mafai ne se tino Isalaelu o ofo atu se taulaga ‵kai fakatasi e pelā me se “fakaasiga o te loto fakafetai.” (Levi. 7:11-13, 16-18) Ne ofo atu ne ia te taulaga tenei, e se ona ko te mea e ‵tau o fai ne ia, kae ona ko te mea e manako a ia o fai. Tela la, a te taulaga tenei e pelā me se fakaasiga o te loto fakafetai ona ko tena alofa ki tena Atua ko Ieova. A te tino telā ne  ofo ne ia te taulaga tenā fakatasi mo tena kāiga mo nisi faitaulaga, ka kai ne latou a ‵kano o te manu telā ne ofo atu pelā me se taulaga. Kae ko nisi vaega o te manu telā e ofo atu pelā me se taulaga, e ‵tau fua o ofo atu ki a Ieova tokotasi. Ne a la vaega konā?

10. E pelā mo te mea e fakaasi mai i te Levitiko 3:6, 12, 14-16, se a te mea e akoako mai i te taulaga ‵kai fakatasi e uiga ki te kilokiloga a Iesu ke fai te loto o tena Tamana?

¹⁰ Akoakoga i te tolu: Ona ko te alofa, e tuku atu ne tatou ki a Ieova a toe mea ‵lei. Ne kilo atu a Ieova ki gako e pelā me ko te ‵toe vaega ‵lei o se manu. Ne fai mai foki a ia me i nisi vaega o te foitino o te manu, e pelā mo ana nonu, ne mea tāua ‵ki eiloa. (Faitau te Levitiko 3:6, 12, 14-16.) Tela la, ne fiafia malosi a Ieova i te taimi ne ofo atu ne se Isalaelu mo te loto fiafia a vaega tāua o se manu mo gako ki a ia. A te tino Isalaelu telā ne ofo ne ia se taulaga penā, ne fakaasi atu ne ia tena manakoga ke tuku atu te ‵toe mea ‵lei ki te Atua. I se auala tai ‵pau, ne loto fiafia a Iesu o ofo atu ki a Ieova a te ‵toe mea ‵lei mai te tavini atu ki a Ia mo te loto kātoa ona ko te alofa ki a ia. (Ioa. 14:31) Ki a Iesu, a te faiga o te loto o te Atua ko tena fiafia; ne ‵poko tena alofa ki tulafono a te Atua. (Sala. 40:8) E mautinoa eiloa me ne fiafia malosi a Ieova ke lavea te loto fiafia o Iesu o tavini atu ki a ia!

11. I te auala fea e fai ei ‵tou taviniga e pelā me se taulaga ‵kai fakatasi, kae kaia e fakamafanafana mai ei te mea tenā ki a tatou?

¹¹ E pelā mo taulaga ‵kai fakatasi konā, a ‵tou taviniga telā e fai atu ki a Ieova e fakaasi i ei ne tatou a ‵tou lagonaga e uiga ki a ia. E tuku atu ne tatou a toe mea ‵lei ki a Ieova, kae e fai ne tatou ona ko te ‵tou a‵lofa ki a ia mo te loto kātoa. Ko oko eiloa i te fiafia o Ieova ke lavea ne ia te fia miliona o tino tapuaki e loto fia‵fia o tavini atu ki a ia ona ko te a‵lofa ki a ia mo ana auala! Se mea fakamafanafana ke iloa ne tatou me e lavea kae fakatāua ne ia a ‵tou mea e fai mo ‵tou kilokiloga. E pelā me se fakaakoakoga, kafai koe ko matua kae ko se uke au mea e mafai o fai, ke loto talitonu me e lavea kae malamalama a Ieova i ou tapula. Kāti e mafaufau koe me e se uke au mea e fai mō Ieova, kae e lavea ne ia a te lasi o tou alofa telā e fakamalosi ei koe ke fai a mea e mafai ne koe o fai. E fiafia a ia o talia a te ‵toe mea e mafai ne koe o tuku atu ki a ia.

12. Se a te fakatalitonuga e mafai o maua ne tatou mai te auala ne saga atu ei a Ieova ki taulaga ‵kai fakatasi?

¹² Ne a mea e mafai o tauloto ne tatou e uiga ki taulaga ‵kai fakatasi? I te taimi ne ‵sunu ei a toe vaega tāua o se manu, ne fanaka te au ki luga kae ne fiafia ki ei a Ieova. Tela la, ke loto talitonu me ka fiafia a Ieova ki tau taviniga telā e fai mo te loto kātoa. (Kolose 3:23) Fakaataata aka la ne koe māfai ko fakaasi mai ne ia tena taliaga e auala i se fakamisikata. E kilo atu a ia ki au taumafaiga e fai i tena taviniga, e pelā me ne penina tāua kolā ka masaua faeloa ne ia ki te se-gata-mai, faitalia te lasi io me ko te foliki.—Mata. 6:20; Epe. 6:10.

13. E ‵tusa mo te Levitiko 9:23, 24, ne fakaasi mai pefea ne Ieova me ne talia ne ia a tofi fakafaitaulaga konei?

¹³ Akoakoga i te fa: E fakamanuia ne Ieova a te vaega o tena fakapotopotoga i te lalolagi nei. Mafaufau aka la ki te mea ne tupu i te 1512 T.L.M. i te taimi ne fakatu ei a te faleie tapu i te tafito o te mauga o Sinai. (Eso. 40:17) Ne fai ne Mose se fakamanatuga ke faū a Alona mo ana tama tagata e pelā me ne faitaulaga. Ne maopoopo a te fenua o Isalaelu ke molimau ne latou a te ofoatuga o taulaga manu muamua telā ka fai ne faitaulaga. (Levi. 9:1-5) Ne fakaasi atu pefea ne Ieova me ne talia ne ia a tofi faitaulaga ‵fou konei? I te taimi ne fakamanuia ei ne Alona mo  Mose a tino, ne fai ne Ieova ke tō ifo se afi ke mafai o ‵ka katoatoa a te taulaga i luga i te fatafaitaulaga.—Faitau te Levitiko 9:23, 24.

14. Kaia e tāua ei ki a tatou i aso nei a te taliaga ne Ieova a te ‵tofi fakafaitaulaga o Alona?

¹⁴ Se a te mea ne fakaasi mai i te afi telā ne tō mai te lagi i te fāuga o te faitaulaga sili? Ne fakaasi atu ne Ieova tena ‵lago katoatoa ki te ‵tofi fakafaitaulaga o Alona. I te laveaga ne tino Isalaelu a te fakamaoniga matea tenei o te ‵lago atu o Ieova ki faitaulaga, ne ‵tau foki mo latou o ‵lago katoatoa atu ki ei. E mata, e aoga te mea tenā ki a tatou? Ao! A te ‵tofi fakafaitaulaga i Isalaelu se ata foliki fua o se ‵tofi fakafaitaulaga telā e ‵lei fakafia atu. A Keliso, ko te ‵toe Faitaulaga Sili, kae e toko 144,000 ana faitaulaga lagolago kolā ka tavini fakatasi mo ia i te lagi.—Epe. 4:14; 8:3-5; 10:1.

15-16. I te auala fea ne fakaasi mai ei ne Ieova me e talia ne ia a “te tavini fakamaoni kae poto”?

¹⁵ I te 1919, ne ‵tofi aka ne Iesu se potukau foliki o taina fakaekegina e pelā me “se tavini fakamaoni kae poto.” E fai ne te tavini tenā a te takitakiga i te galuega talai kae tuku atu ki soko o Keliso “a mea‵kai i te taimi tonu.” (Mata. 24:45) E mata, e lavea ne tatou a fakamaoniga manino o te taliaga ne te Atua a te tavini fakamaoni kae poto?

¹⁶ E uke ‵ki a mea ne fai ne Satani mo tena lalolagi ke fakafaigata ei te galuega a te tavini fakamaoni tenā, kae taumafai foki ke se mafai o fai te galuega tenā. Faitalia loa a taua e lua a te lalolagi, fakasauaga kolā e se mafai o oti, fakalavelave i mea tau tupe i te lalolagi kātoa, mo faifaiga sē fakamaoni, e tumau eiloa te tavini fakamaoni kae poto i te tuku mai o mea‵kai faka-te-agaga mō soko o Keliso i te lalolagi nei. Mafaufau aka la ki te uke o mea‵kai faka-te-agaga ko maua nei ne tatou i aso  nei, kolā e se ‵togi, kae ko oti ne ‵lomi i ‵gana e silia atu mo te 900! E seai se fakalotolotolua me e ‵lago mai eiloa a Ieova. Mafaufau foki la ki te suā fakamaoniga o te fakamanuiaga a Ieova: te galuega talai. Ko oti ne talai atu a te tala ‵lei “ki te lalolagi nofoaki kātoa.” (Mata. 24:14) E mautinoa eiloa me e takitaki kae fakamanuia tonu eiloa ne Ieova a tena fakapotopotoga i aso nei.

17. E mafai pefea o fakaasi atu ‵tou ‵lago katoatoa ki te fakapotopotoga telā e fakaaoga ne Ieova?

¹⁷ E ‵tau o ‵sili ifo tatou ki a tatou eiloa, ‘E mata, e fiafia au o ‵kau fakatasi mo te vaega o te fakapotopotoga a Ieova i te lalolagi nei?’ Ko oti ne tuku mai ne Ieova se fakamaoniga e pelā eiloa mo te afi telā ne tō mai te lagi i aso o Mose mo Alona. E ‵tau eiloa o loto fakafetai tatou ki ei. (1 Tesa. 5:18, 19) E fakaasi atu pefea a te ‵tou ‵lago atu ki te fakapotopotoga telā e fakaaoga ne Ieova? Mai te tau‵tali i fakatonuga kolā e fakavae ki te Tusi Tapu i ‵tou tusi mo fakatasiga, fono o fenua, mo fono o atufenua. E se gata i ei, e mafai o fakaasi atu ‵tou ‵lago katoatoa atu, mai te aofia katoatoa i te galuega talai mo te galuega ko te akoako atu.—1 Koli. 15:58.

18. Se a te fakaikuga e ‵tau o fai ne koe?

¹⁸ Ke na fakaiku aka ke fakagalue aka ne tatou a akoakoga ne tauloto ne tatou mai te tusi o Levitiko. E ma‵nako tatou ke talia ne Ieova a ‵tou taulaga. Ke na tavini atu tatou ki a Ieova me e loto fakafetai tatou ki a ia. Ke na tumau tatou i te tuku atu o te ‵toe mea ‵lei ki a Ieova me e a‵lofa tatou ki a ia mo ‵tou loto kātoa. Kae ke na ‵lago katoatoa atu tatou mo ‵tou loto kātoa ki tena fakapotopotoga telā e fakamanuia ne ia i aso nei. I auala katoa konei, e mafai o fakaasi atu ne tatou ki a Ieova me e fia‵fia tatou ki te tauliaga ke tavini atu ki a ia e pelā me ne ana Molimau!