1. Kaia e ‵tau ei mo tatou o tapuaki atu fua ki a Ieova tokotasi?

KO IEOVA fua te tino e ‵tau o tapuaki katoatoa atu tatou ki ei, me i a ia ko te ‵tou Mafuaga mo te Tino telā ne tuku mai ne ia te ola. (Faka. 4:11) Kae e fe‵paki eiloa tatou mo se fakalavelave. E tiga eiloa e a‵lofa kae āva tatou ki a Ieova, e mafai eiloa o maleigina tatou ke mo a ma tapuaki katoatoa atu ki a ia. E ‵tau o malamalama tatou i te auala e mafai ei o tupu te mea tenā. Kae muamua la, ke sau‵tala tatou ki nisi vaega kolā e aofia i te ‵tou tapuakiga katoatoa ki a Ieova.

2. E ‵tusa mo te Esoto 34:14, se a te mea ka fai ne tatou māfai e tapuaki atu fua tatou ki a Ieova tokotasi?

² I te Tusi Tapu, a te tapuaki atu fua ki te Atua se fakaasiga o te ‵poko o te ‵tou a‵lofa mō ia. Kafai tatou e tapuaki atu ki a Ieova fua tokotasi, ka se talia ne tatou so se mea ke tapuaki atu tatou ki ei.—Faitau te Esoto 34:14.

3. Kaia e maua ei ne tatou a pogai ‵lei ke tapuaki atu ki a Ieova?

³ E maua eiloa ne tatou a pogai ‵lei e uke ke tapuaki atu ki a Ieova. Kaia? Me e fakavae a mea konā ki muna‵tonu kolā ne tauloto ne tatou e uiga ki a ia. Ko iloa ne tatou ana uiga ‵gali. Ko iloa ne tatou a mea e fiafia a ia ki ei mo mea e takalialia a ia ki ei, kae e ‵pau ‵tou lagonaga mo ia. E malamalama kae ‵lago tatou ki tena fuafuaga mō tatou. E fia‵fia tatou me e talia ne ia ke fai tatou mo ana taugasoa. (Sala. 25:14) A mea katoa e tauloto ne tatou e uiga ki te ‵tou Mafuaga e fai ei ke ‵pili malosi tatou ki a ia.—Iako. 4:8.

4. (a) Se a te mea e fakaaoga ne te Tiapolo ke fakavāivāi ei tatou mai te tapuaki katoatoa atu ki a Ieova? (e) Ne a mea ka sau‵tala tatou ki ei i te mataupu tenei?

 ⁴ E pule ne te Tiapolo a te olaga tenei, kae e fakaaoga ne ia ke fakamalosi aka i ei a manakoga ma‵sei mo manakoga o te foitino. (Efe. 2:1-3; 1 Ioa. 5:19) Tena fakamoemoega ke vaelua ne ia ‵tou a‵lofa ko te mea ke sē katoatoa a ‵tou tapuakiga ki a Ieova. Ke na sau‵tala nei tatou ki auala e lua e mafai ne te Tiapolo o fai te mea tenei. Muamua la, e tofotofo ne ia tatou ke kausaki atu ke maua a tupe e uke, a ko te lua, e taumafai a ia o fakamalosi tatou ke filifili a fakafiafiaga sē ‵lei.

5. Kaia e ‵tau ei mo tatou o fakaeteete i te fiafai tupe?

⁵ E ma‵nako tatou katoa ke maua a mea‵kai e lava, ne gatu ‵lei mo ‵pei, mo se koga ‵lei ke ‵nofo i ei. Kae e ‵tau mo tatou o fakaeteete i te fiafai tupe. A tino e tokouke kolā e fai mo vaega o te lalolagi a Satani e “fia‵fai tupe” mo mea kolā e mafai o ‵togi ki tupe. (2 Timo. 3:2) Ne iloa ne Iesu me e mafai o tofotofogina ana soko ke ati aka ne latou a te fiafai ki tupe. “E seai se tino e mafai o tavini ki matai e tokolua,” ne fai mai a Iesu, “me ka takalialia a ia ki te tino e tokotasi kae alofa ki te suā tino, io me ka ‵piki a ia ki te tino e tokotasi kae e se fiafia ki te suā tino. E se mafai o tavini koutou ki te Atua fakatasi mo Koloa.” (Mata. 6:24) A te tino telā e tapuaki ki a Ieova kae taumafai foki o fakamāumāu ana taimi e uke ke maua a koloa o te lalolagi, e taumafai eiloa a ia o tavini atu ki matai e tokolua. Ka se mafai o katoatoa tena tapuakiga ki a Ieova.

6. Se a te akoakoga e mafai o tauloto ne tatou mai pati a Iesu ki te fakapotopotoga i Laotikaia?

⁶ I te fakaotiotiga o te senitenali muamua T.A., ne fai mai a te fakapotopotoga i te fakai o Laotikaia mo te fakamata‵mata, penei: “Au e maumea kae ne maua ne au a koloa e uke kae e se manako au ki se mea.” Kae i te  kilokiloga a Ieova mo Iesu, a latou e “fakaalofa kae mativa kae ‵kivi kae nofo fuafua.” Ne polopoloki ne Iesu latou, e se ona ko latou e mau‵mea, kae ona ko te mea ko fakamasei te lotou fesokotakiga mo Ieova ona ko te fia mau‵mea. (Faka. 3:14-17) Kafai ko kamata o ati aka ne tatou i ‵tou loto se manakoga ke kausaki atu ke maua a tupe e uke, e ‵tau o gasue‵sue fakavave tatou o faka‵tonu aka a ‵tou mafaufauga. (1 Timo. 6:7, 8) Kafai e se fai tatou penā, ka vaelua a ‵tou loto kae ka se talia ne Ieova a ‵tou tapuakiga. E manako a ia “ke tapuaki atu fua a tino ki a ia tokotasi.” (Teu. 4:24) E mafai pefea o se paleni ‵lei ‵tou kilokiloga e uiga ki tupe?

7-9. Ne a mea e tauloto ne koe mai te tala o te toeaina tenei ko David?

⁷ Mafaufau ki te fakaakoakoga a David, se toeaina galue malosi telā e nofo i Amelika. Ne taku ne ia a ia eiloa e pelā me se tino galue fakamaoni. Ne siki aka tena tulaga i te kamupane kae ne taku foki a ia pelā me se tokotasi o tino galue fakamaoni i te atufenua. “I te taimi tenā, ne mafaufau au me i mea konei ne fakamanuiaga mai i a Ieova,” ne fai mai a David. Kae e mata, a mea konā ne fakamanuiaga eiloa?

⁸ Ne kamata malielie o lavea ne David me ko pokotia tena fesokotakiga mo Ieova ona ko tena galuega tenei. “I fakatasiga a te fakapotopotoga mo te galuega talai, ne mafaufau faeloa au ki fakalavelave i te galuega,” e fai mai a ia. “Ne maua ne au a tupe e uke, kae ne kamata o loto mafatia au, kae ko kamata o maua ne au fakalavelave i toku olaga avaga.”

⁹ Ne iloa aka ne David me ne ‵tau o toe iloilo aka ne ia a mea kolā e ‵tau o fakamuamua ne ia. “Ne fai ne au se fakaikuga ke faka‵tonu aka aku mea e fai,” e fai mai a ia. Ne manako a David o ‵fuli ana taimi ga‵lue, kae ne tuku atu ne ia  ki tena pule. Se a te ikuga? Ne fakamalōlō a David! Ne saga atu pefea a ia ki ei? “I te suā aso, ne faka‵fonu taku pepa paenia lagolago,” ne fai mai a ia. Ko te mea ke mafai o maua mea tāua mō tausi lāua, ne kamata o ga‵lue a David mo tena avaga e pelā me ne tino ‵teu kae ‵fulu fale. E se leva, kae paenia tumau a ia, kae ne kau fakamuli atu tena avaga ki te galuega fakapaenia. Ne filifili ne te tauavaga tenei se galuega ‵togi telā e manatu mā‵ma ki ei a te tokoukega, kae se galuega telā e se na loa ko tāua malosi ki a latou. Faitalia te foliki o te lā peofuga ne maua ne lāua i te taimi nei i lō te taimi muamua, kae ne mafai eiloa o maua ne lāua i masina takitasi a mea kolā ne manakogina ne lāua. Ne ma‵nako lāua o fakamuamua a Ieova, kae ne kamata o lavea ne lāua me e tausi eiloa ne ia a latou kolā e fakamuamua ne latou a manakoga o te Malo.—Mata. 6:31-33.

10. E mafai pefea ne tatou o puipui ‵tou loto?

¹⁰ Faitalia me e mu‵tana io me uke a ‵tou tupe, e ‵tau o puipui ne tatou a ‵tou loto. I te auala fea? Ke mo a ma ati aka ne tatou a te fiafai ki tupe. Kae ke mo a ma fakamuamua ne koe a tau galuega ‵togi i lō tau taviniga ki a Ieova. E mafai pefea o iloa ne koe māfai ko isi se manakoga penā i a koe? E mafai o ‵sili ifo ne koe a fesili konei: ‘E mata, e mafaufau faeloa au ki taku galuega ‵togi i taimi o fakatasiga io me i te galuega talai? E mata, e manavase faeloa au ke maua ne au ne tupe e uke i aso mai mua? E mata, e fakamāfua aka ne tupe mo koloa a fakalavelave i toku vā mo taku avaga? E mata, e loto fiafia au o galue i se galuega ‵togi telā e manatu mā‵ma ki ei a tino e tokouke, māfai e manako au ke uke oku taimi mō te taviniga ki a Ieova?’ (1 Timo. 6:9-12) I te taimi e mafau‵fau ei tatou ki fesili konei, ke masaua me e alofa mai a Ieova kae ne tauto mai a ia ki tino kolā e tapuaki katoatoa atu ki a ia: “Ka se tuku tiaki lele eiloa ne au a koe.” Tenā te pogai ne tusi mai ei te apositolo ko Paulo: “Ke ‵kalo kea‵tea mai te fia‵fai ki tupe i olotou olaga.”—Epe. 13:5, 6.

11. Se a te mea e mafai o tupu ki se tino ona ko fakafiafiaga kolā e filifili ne ia?

¹¹ A Ieova e manako ke fia‵fia tatou i te olaga, kae e mafai o fai penā e auala i fakafiafiaga. E tonu, e fai mai te Muna a te Atua me “e seai se mea e ‵lei atu ki te tagata i lō te kai kae inu kae maua te fiafia i ana galuega ‵mafa.” (Fai. 2:24) Kae ko te ukega o fakafiafiaga i te lalolagi nei e se ‵lei. E fakamasei ne latou a tulaga ‵lei o tino i mea tau amioga, kae fakamalosi latou ke talia—io me fia‵fia ki mea kolā e se talia i te Muna a te Atua.

12. E ‵tusa mo te 1 Kolinito 10:21, 22, kaia e ‵tau ei mo tatou o filifili aka faka‵lei a fakafiafiaga?

 ¹² E ma‵nako tatou o tapuaki katoatoa atu ki a Ieova fua tokotasi, tela la e se mafai ne tatou o ‵kai mai te “taipola a Ieova” mo te “taipola a temoni.” (Faitau te 1 Kolinito 10:21, 22.) A te ‵kai fakatasi mo se tino se fakaasiga o te vā fakataugasoa. Kafai e filifili ne tatou a fakafiafiaga kolā e fakamalosi aka i ei a fakasauaga, mea faivailakau, amioga fakatauavaga sē ‵tau, io me ko nisi manakoga o te foitino, e mautinoa eiloa me ko aofia tatou i te ‵kaiga ne fakatoka ne fili o te Atua. Ona ko te mea tenā, e se fakapa‵kia fua ne tatou a tatou eiloa kae e fakamasei foki ne tatou a te ‵tou fesokotakiga mo Ieova.

13-14. E pelā mo te mea e fakaasi mai i te Iakopo 1:14, 15, kaia e ‵tau ei mo tatou o fakaeteete e uiga ki fakafiafiaga e filifili ne tatou? Fakamatala mai.

¹³ Mafaufau ki nisi auala mautinoa e fai ei a fakafiafiaga e pelā me se mea‵kai. Kafai e ‵kai tatou, e mafai o filifili ne tatou a mea‵kai e kai ne tatou. Kae i te taimi e folo ei ‵tou mea‵kai, e se mafai o iloa ne tatou te auala e pokotia ei ‵tou foitino i mea kolā e kai ne tatou. E mafai o malosi ‵lei tatou māfai e ‵kai ki mea‵kai paleni; ka se maua te malosi ‵lei māfai e ‵kai ki mea‵kai sē paleni. Kāti e se mafai eiloa o ma‵saki tatou i te taimi tenā, kae mautinoa eiloa me ka ‵sae mai fakamuli.

¹⁴ I se auala tai ‵pau, kafai e filifili ne tatou a fakafiafiaga, e mafai o filifili faka‵lei ne tatou a mea kolā e faulu ne tatou ki ‵tou mafaufau. Mai tua, ka pokotia eiloa ‵tou lagonaga mo mafaufauga ona ko fakafiafiaga ne filifili ne tatou. A fakafiafiaga ‵lei e mafai o fakamalosi ei tatou; kae ko fakafiafiaga sē ‵lei ka fakavāivāi io me fakapa‵kia ei tatou. (Faitau te Iakopo 1:14, 15.) E se mafai o lavea fakavave ne tatou a pokotiaga o fakafiafiaga ma‵sei, kae mautinoa eiloa me ka ‵sae mai fakamuli. Tenā te pogai e fakailoa mai te Tusi Tapu ki a tatou, penei: “Ke se fakaloiloigina koutou; e seai se tino e mafai o fakavalea ne ia te Atua. Me ko so se mea e ‵toki ne se tino, ka tau eiloa ne ia te mea tenā; me ko te tino telā e ‵toki ne ia a mea mō tena foitino ka tau ne ia a mea ma‵sei mai tena foitino.” (Kala. 6:7, 8) Ko oko eiloa i te tāua ke ‵teke atu tatou ki fakafiafiaga katoa kolā e fakamalosi aka ei a mea kolā e takalialia ki ei a Ieova!—Sala. 97:10.

15. Se a te meaalofa ne fakatoka ne Ieova ke maua ne tatou?

¹⁵ E tokouke a Molimau a Ieova e fia‵fia o onoono atu ki te Leo Fakasalalau o te JW^®, te ‵tou polokalame i televise. Ne fai mai se tuagane e igoa ki a Marilyn: “Ne fesoasoani mai te Leo Fakasalalau o te JW ke fai au mo fai se tino fiafia, kae e mafai o onoono au ki te polokalame kātoa me e aoga ki a au. Kafai ko sē sologa io me loto vāivāi au, e ‵sala atu au ki se lāuga fakamalosi loto i polokalame o Tapuakiga i Taeao ke onoono ki ei. E fai ne te mea tenā ke pili malosi atu au ki a Ieova mo tena fakapotopotoga. Ne ‵fuli katoatoa ne te fakatokaga tenei ki te Leo Fakasalalau o te JW a toku olaga.” E mata, e maua ne koe mea aoga mai te meaalofa a Ieova? I tafa o se polokalame fou i masina takitasi, e isi foki ne polokalame fakalogo‵logo io me ko vitio mo pese fakamalosi loto kolā e maua ne tatou i so se taimi.

16-17. Kaia e ‵tau ei mo tatou o pule faka‵lei atu ki te aofaki o taimi e fakamāumāu ne tatou ki fakafiafiaga, kae e mafai pefea ne tatou o fai te mea tenā?

¹⁶ E se ‵tau fua o pule faka‵lei atu tatou ki vaegā fakafiafiaga kolā e fia‵fia tatou ki ei kae e penā foki te aofaki o taimi e fakamāumāu ne tatou ki ei. Kafai e se fakaeteete tatou, e mafai o uke atu ‵tou taimi e fakamāumāu ki fakafiafiaga i lō te taviniga ki a Ieova. E faigata ki tino e tokouke ke pule faka‵lei atu ki te aofaki o taimi e fakamāumāu ne latou ki fakafiafiaga. Ne fai mai a Abigail, se tuagane ko 18 ana tausaga, penei: “A te onoono ki te TV e fesoasoani mai ke  tai mānava mai galuega ne fai ne au i te aso. Kae kafai e se fakaeteete au, e mafai o fakamāumāu ne au a itula e uke i mua o te vitio.” Ne fai mai se taina talavou e igoa ki a Samuel: “E onoono faeloa au ki vitio toe‵toe i luga i te itaneti. Ne kamata loa au o onoono atu ki se vitio e tasi, kae e seiloa ne au me ko tolu io me ko fa a vitio ko oti ne onoono au ki ei.”

¹⁷ E mafai pefea o pule faka‵lei atu koe ki te aofaki o taimi e fakamāumāu ne koe ki fakafiafiaga? Te auala muamua ko te fakamautinoa aka te aofaki o taimi e masani o fakamāumāu ne koe ki ei. Kaia e se fakamau ei ne koe ki lalo mō se vaiaso e tasi? Tusi ki se kalena a te aofaki o itula e fakamāumāu ne koe i te onoono ki te TV, itaneti, mo te tafao i tafaoga vitio i tau selefoni. Kafai e mafaufau koe me ko tō uke a taimi e fakamāumāu ne koe ki ei, taumafai o fai sau polokalame. Taumafai o fakatoka muamua a taimi e fakamāumāu ne koe ki mea kolā e sili atu i te tāua, ko fakaavanoa ei ne koe se taimi mō fakafiafiaga. Te lua, akai atu ki a Ieova ke fesoasoani atu ke ‵piki ‵mau koe ki tau polokalame tenā. Te faiga tenā, ka fesoasoani atu ke fakaaoga ne koe ou taimi mo tou malosi mō sukesukega totino ki te Tusi Tapu, tapuakiga a kāiga, fakatasiga a te fakapotopotoga, mo te tavini atu ki a Ieova i te galuega talai mo te galuega ko te akoako atu. Kāti ka se ma‵sei foki ei ou lagonaga e uiga ki taimi e fakamāumāu ne koe ki fakafiafiaga.

18-19. E mafai pefea o fakamaoni atu ne tatou me e tapuaki katoatoa atu tatou ki a Ieova?

¹⁸ Mai tua o tena tusi e uiga ki te fakaseaiga o te lalolagi a Satani penā foki mo te lalolagi fou telā ka oko mai, ne fai mai te apositolo ko Petelu, penei: “Aku fagasele, kae ko fakatali‵tali koutou ki mea konei, fai te ‵toe mea e mafai o fai ke maua atu koutou ne ia e seai ne otou pona io me ne lailaiga kae e filemu.” (2 Pe. 3:14) Kafai e faka‵logo tatou ki te polopolokiga tenā kae fai te ‵toe mea e mafai ke tumau i te ‵ma i mea tau amioga mo te feitu faka-te-agaga, e fakamaoni atu eiloa ne tatou me e tapuaki katoatoa atu fua tatou ki a Ieova tokotasi.

¹⁹ Ka tumau eiloa i te tofotofo ne Satani mo tena lalolagi a tatou ke fakamuamua a nisi mea i ‵tou olaga i lō a Ieova. (Luka 4:13) Kae faitalia so se fakalavelave e fe‵paki mo tatou, ka se talia ne tatou so se tino io me se mea ke sui ne ia te tulaga o Ieova i ‵tou loto. Ke na fakaiku aka ne tatou ke tuku atu a te mea telā e ‵tau fua o maua ne Ieova tokotasi—ko te ‵tou tapuakiga katoatoa ki a ia!