1, 2. Ne a fakamalosiga a te lalolagi e ‵tau o taua atu ki ei a tavini a Ieova?

KAMATA mai i te tagata fakamaoni muamua ko Apelu, ke oko mai ki ‵tou aso nei, ne tumau eiloa a tino tapuaki fakamaoni i te taua atu. Ne tusi atu a te apositolo ko Paulo ki Kelisiano Epelu, me “ne kufaki kae logo‵mae [latou] mai lalo i tofotofoga fakama‵taku,” i te taimi ne ‵sala atu ei latou ki te taliaga mo fakamanuiaga a Ieova. (Epe. 10:32-34) Ne faka‵pau ne Paulo a te taua atu o Kelisiano ki taumafaiga malosi a tino ‵tele i fakatau‵faiga a te kau Eleni, e pelā mo te fakatau‵tele, tafiti, mo te faipelea. (Epe. 12:1, 4) I aso nei, e ‵tele tatou i te fakatau‵telega ki te ola, kae fakatau‵fai tatou mo ‵tou fili kolā e ma‵nako o fakalavelave mai, sele tatou ke ‵siga, fakavāivāi mai, kae ave keatea ne latou te fiafia mo te taui telā ka maua ne tatou i aso mai mua.

² A te mea muamua, e ‵tau mo tatou o taua malosi atu ki a Satani mo tena lalolagi masei tenei. (Efe. 6:12) Se mea tāua ke ‵teke atu ne tatou a fakamalosiga a te lalolagi “kolā ko leva ne ‵mau olotou aka.” E aofia i ei akoakoga fakalotu, poto o tino, mo faifaiga fakama‵taku, e pelā mo te faiga o amioga fakatauavaga sē ‵tau, te fakaaogaga o paka, mo te fakaaogaga ‵se o meainu ma‵losi mo vailakau tapu. Kae e ‵tau mo tatou o taua atu faeloa ki ‵tou vāivāiga mo mea kolā e faka‵tuka mai.—2 Koli. 10:3-6; Ko. 3:5-9.

3. E akoako pefea tatou ne te Atua ke taua atu ki ‵tou fili?

 ³ E mata, e mafai eiloa o fakatakavale a vaegā fili ma‵losi penā? Ao, māfai fua e taua malosi atu koe. E pelā mo te tino faipelea i aso mua, ne fai mai a Paulo e uiga ki a ia eiloa: “E penā foki māfai ko fusu au, e se fusu atu fua au ki te matagi.” (1 Koli. 9:26) E pelā loa mo te tagata faipelea telā e fakatakavale ne ia tena soa, e ‵tau foki mo tatou o fakatakavale penā ‵tou fili. E akoako kae fesoasoani mai a Ieova ki te ‵tou taua. E tuku mai ne ia a fakatonuga faka‵sao ola i tena Muna. E fesoasoani mai foki a Ia e auala i ‵tou tusi faka-te-Tusi tapu, fakatasiga faka-Kelisiano, fono o te fenua, mo fono o atufenua. E mata, e fakagalue ne koe a mea kolā ne tauloto ne koe? Kafai ne fakatamala koe, e pelā eiloa me ko “fusu atu fua [koe] ki te matagi,” kae sē fusu ‵tonu atu ki tou fili.

4. Ne a ‵tou mea e ‵tau o fai ke mo a e taka‵vale tatou i te masei?

⁴ E taua mai ‵tou fili ki a tatou i taimi kolā e seki fakamoe‵moe tatou ki ei, kae tapa ne latou tatou māfai ko vāivāi ‵ki tatou, tela la e ‵tau o toka faeloa tatou. Ne fakailoa mai a te Tusi Tapu, penei: “Ke se fakatakavale koutou ne te masei, kae ke fakatakavale faeloa ne koutou a te masei ki te ‵lei.” (Loma 12:21) A te fakamalosiga ke sē “fakatakavale [tatou] ne te masei,” e fakaasi mai i ei me e mafai ne tatou o fakatakavale a te Tiapolo. E mafai ne tatou o fai penā māfai e tumau tatou i te taua atu faeloa. E ‵kese mai i ei, e mafai o taka‵vale tatou i a Satani, tena lalolagi masei, mo ‵tou tulaga sē ‵lei katoatoa māfai e se matapula‵pula tatou kae fakagata aka ne tatou a te ‵tou taua atu. Ke mo a eiloa e talia ne koe a Satani ke fakamatakutaku ne ia koe kae fai ei ke tuku ifo ki lalo ou lima i a koe ko takavale!—1 Pe. 5:9.

5. (a) Se a te mea e mafai o fesoasoani mai ke tumau tatou i te taua atu ke maua a fakamanuiaga a te Atua? (e) Ko oi a tino i te Tusi Tapu ka sau‵tala tatou ki ei?

⁵ Ke mafai o manumalo, a latou kolā e taua atu, e ‵tau o se ‵galo i a latou a te tāua o te olotou taua atu. Ke maua a te taliaga mo fakamanuiaga mai i te Atua, e ‵tau mo latou o ‵saga tonu ki te fakatalitonuga telā e maua ne tatou i te Epelu 11:6: “E ‵tau o talitonu te tino telā e fanatu ki a ia me e ola tonu te Atua kae e avatu ne ia te taui ki tino kolā e ‵sala malosi atu ki a ia.” A te pati Eleni “‵sala malosi” e fakauiga ki te lasi mo te uke o taumafaiga e fai. (Galu. 15:17) E tuku mai i te Tusi Tapu a fakaakoakoga ‵gali a tagata mo fafine kolā ne fakamuamua ne latou a taumafaiga e uke ke ‵sala atu ki fakamanuiaga a Ieova. A Iakopo, Lasela, Iosefa, mo Paulo ne fe‵paki mo tulaga vāivāi i te feitu faka-te-foitino mo mea tau lagonaga, kae ne fakatalitonu mai ne latou me i te kufaki i mea faiga‵ta e iku atu ki fakamanuiaga e uke. E mafai pefea o fakaakoako atu tatou ki tino tokofa konei kolā ne tumau faeloa i te taua atu?

6. Se a te mea ne fesoasoani atu ki a Iakopo ke loto mau, kae se a te taui ne maua ne ia? (Ke onoono ki te ata i te kamataga.)

⁶ A te toeaina ko Iakopo ne taua malosi atu kae kufaki i mea faiga‵ta ona ko tena alofa ki a Ieova, ne loto fakafetai a ia ki mea faka-te-agaga, kae ne katoatoa a tena fakatuanaki ki te folafolaga a Ieova me ka fakamanuia a tena gafa. (Kene. 28:3, 4) E fakamatala mai i konei a te pogai ne fakaoti ne Iakopo a tena malosi i te taimi ko tai kātoa ei tena 100 tausaga ke maua i ei ne ia a fakamanuiaga a te Atua. Ne tafiti laua mo se agelu telā ne fakaliu pelā me se tagata. (Faitau te Kenese 32:24-28.) E mata, ne maua eiloa ne Iakopo i a ia eiloa a te malosi mo te kufaki telā e manakogina ke taua atu ei a ia ki se agelu malosi? Ikai! Kae ko ia se tagata taua loto malosi, kae ne fakatalitonu atu ne ia me ka sē fakaseke kea‵tea a ia mai i te taua tenā! Kae ne maua eiloa ne ia se taui ‵lei mai tena kufaki. Ne maua ne ia se igoa telā e fetaui ‵lei mo ia ko Isalaelu, (telā e fakauiga ki te “Tino telā e fakatau‵fai [Tino loto mau] mo te Atua” io me ko te “Atua e Fakatau‵fai”). Ne  maua ne Iakopo te taui gali telā e ‵sala foki tatou ki ei—ko te taliaga mo fakamanuiaga a Ieova.

7. (a) Se a te tulaga fakaloto vāivāi ne fakafesagai atu ki ei a Lasela? (e) Ne tumau pefea a ia i te taua atu kae ne fakamanuia pefea a ia?

⁷ Ne olioli malosi a te avaga fakapelepele a Iakopo ko Lasela ke lavea ne ia te auala e fakataunu ei ne Ieova a tena fuafuaga ki tena avaga. Kae e isi se mea telā ne foliga mai me se fakalavelave kae ne faigata ke manumalo a ia i ei. E seai sena tamaliki. I ana aso, a te mea tenā e fai pelā me se mea fakamasiasi. Ne maua pefea ne Lasela a te lagonaga mo te malosi faka-te-fotino ke tumau a ia i te taua atu ki se tulaga fakaloto vāivāi penā kae ko tō siliga foki mo te mea e mafai ne ia o kufaki? Ne seki ‵tuka tena fakamoemoega. Kae ne tumau eiloa a ia i te ‵talo malosi faeloa. Ne lagona ne Ieova a te fakatagi a Lasela mo tena loto kātoa, kae ne fakamanuia eiloa a ia mai te maua ne ia ne tama‵liki. Setioa eiloa o tagi atu penei a Lasela: “Ne tafiti malosi au . . . kae ne manumalo foki au i ei”!—Kene. 30:8, NW; 20-24.

8. Ne a mea faiga‵ta e uke ne fe‵paki mo Iosefa i se taimi leva, kae ne tuku mai pefea ne ia se fakaakoakoga ‵lei ki a tatou i te auala ne saga atu ei a ia ki ei?

⁸ E seai se fakalotolotolua me i te fakaakoakoga o te tu ‵mautakitaki telā ne tuku mai ne Iakopo mo Lasela ne aoga malosi eiloa ki te lā tama ko Iosefa, i te fakafesagai atu ki te tofotofoga o tena fakatuanaki. I te taimi ko 17 ei tausaga o Iosefa, ne ‵fuli fakakotua tena olaga. Ona ko te loto ma‵sei, ne fakatau atu ei ne ana taina a ia e pelā me se pologa. Fakamuli ifo, ne ‵tau mo ia o kufaki mō ne tausaga i te taimi ne ‵pei atu ei a ia ki te falepuipui i Aikupito ona ko pogai sē ‵tonu. (Kene. 37:23-28; 39:7-9, 20-21) Ne seki loto vāivāi a Iosefa; io me ne nofo a ia mo tena loto ita kae e manako o taui atu. I lō te fai penā, ne saga tonu faeloa a tena mafaufau mo tena loto ki tena fesokotakiga mo Ieova telā ne fai pelā me se fakamanuiaga. (Levi. 19:18; Loma 12:17-21) E ‵tau o fesoasoani mai te fakaakoakoga a Iosefa ki a tatou. E pelā me se fakaakoakoga, ke oko foki loa ki mea faiga‵ta kolā e fe‵paki mo tatou i ‵tou folikiga, io me ko ‵tou tulaga i aso nei kolā e foliga mai me ko seai se fakamoemoega ki ei, e ‵tau eiloa o tumau tatou i te taua atu kae loto mau. E tali‵tonu tatou me kafai e fai tatou penā, ka fakamanuia eiloa tatou ne Ieova.—Faitau te Kenese 39:21-23.

9. I te ‵tou fakaakoako atu ki a Iakopo, Lasela mo Iosefa, ne a taumafaiga e ‵tau o fakamuamua ne tatou ke maua ei a fakamanuiaga a Ieova?

⁹ Mafaufau ki se tulaga telā e fakafesagai nei mo koe kae fai pelā me se tofotofoga ki a koe. Kāti se faifaiga sē fakamaoni, fakailoga tino io me ne fakatauemuga. Io me se tofotofoga mai i se tino telā ne ‵losi atu ne ia se mea ‵se ki a koe, kāti ona ko te loto masei. I lō te tuku ifo ou lima i a koe ko takavale, ke masaua a te mea telā ne fai ei ke tumau a Iakopo, Lasela mo Iosefa i te tavini atu ki a Ieova mo te fia‵fia. Ne fakamalosi kae fakamanuia ne Ieova a latou me ne tumau i te fakaasi atu a te ‵poko mo te loto fakafetai ki mea faka-te-agaga. Ne tumau eiloa latou i te taua atu kae ne ga‵lue foki eiloa latou e ‵tusa mo olotou ‵talo. Ko ‵nofo pili atu nei tatou ki te fakaotiga o te olaga masei tenei; tela la, se mea tāua ke ‵piki ‵mau tatou ki te fakamoemoega mautinoa i ‵tou mua! E mata, e loto fiafia koe o fakaoti ou mafi ke maua ne koe te taliaga a Ieova i te taimi e taua atu ei koe?

10, 11. (a) E mafai pefea o taua atu tatou ke maua a fakamanuiaga a te Atua? (e) Se a te mea ka fesoasoani mai ke fai ne tatou a filifiliga ‵tonu kae ke manumalo foki i ‵tou vāivāiga mo mea kolā e fakalavelave mai?

¹⁰ Ne a fakanofonofoga e fai ei ke taua atu tatou ke maua a fakamanuiaga a te Atua? E tasi te fakanofonofoga telā e fakafesagai atu ki ei a te tokoukega ko te taua atu ki vāivāiga faka-te-foitino. A nisi tino ne taumafai malosi ke fakatumau ne latou se kilokiloga ‵lei ki te galuega talai. Io me kāti e manakogina ke tumau  koe i te kufaki faitalia te masaki io me ko te sē sologa o koe i te nofo tokotasi. Ke mo a foki e manatu mā‵ma tatou ki te taumafai malosi o nisi tino ke fakamagalo atu ne latou se tino telā ne fakamasei ne ia latou io me ne agasala atu ki a latou. Faitalia me pefea te leva ne tavini atu tatou ki a Ieova, e ‵tau mo tatou katoa o taua atu ki mea kolā e mafai o fakafaigata i ei a te ‵tou taviniga ki te Atua, telā e tuku mai ne ia te taui ki tino fakamaoni.

¹¹ E tonu, e mafai eiloa o faigata ke fai a filifiliga ‵tonu kae tau‵tali atu i auala faka-Kelisiano. Maise eiloa māfai ko ‵futi tatou ne ‵tou loto faka‵se tino ki te auala ‵se. (Iele. 17:9) Kafai ko iloa ne koe me ko faka‵segina koe, ke ‵talo atu mō te fesoasoani o te agaga tapu. E mafai o tuku atu ne te ‵talo mo te agaga tapu a te malosi ke kausaki atu koe ki te auala telā e iloa ne koe me sao kae mafai foki ei o fakamanuia ne Ieova a koe. Galue e ‵tusa mo au ‵talo. Taumafai o faitau faeloa ki se vaega o te Tusi Tapu i aso katoa, kae fakaavanoa faeloa a taimi mō sukesukega totino penā foki mo te fai faeloa o Tapuakiga a Kāiga.—Faitau te Salamo 119:32.

12, 13. Ne maua pefea ne Kelisiano e tokolua a te fesoasoani ke ‵teke atu ki manakoga ma‵sei?

¹² E uke a fakaakoakoga ki te auala ne fesoasoani mai ei te Muna a te Atua, tena Agaga, mo ‵tou tusi faka-Kelisiano ke manumalo ei Kelisiano i manakoga ma‵sei. E tokotasi te talavou ko 17 ana tausaga ne faitau ne ia te mataupu ko te “How Can You Resist Wrong Desires?” telā e maua i te Awake! i a Tesema 8, 2003. Ne a ana mea ne fai? Ne fai mai a ia: “Ne taua malosi atu au ke fakagata oku mafaufauga ma‵sei. I te taimi ne faitau ei au ki te mataupu telā ‘ki te tokoukega, a te taua ke fakatakavale a manakoga ‵se ko lasi ‵ki,’ ne fai ei ke maua ne  au te lagonaga e pelā me se tokotasi i loto i te kautaina. Ne iloa ne au me sē ko au fua tokotasi.” Ne maua foki ne te talavou tenei a mea aoga mai te mataupu “Alternative Life-Styles—Does God Approve?” telā e maua i te lōmiga i a Oketopa 8, 2003. Ne lavea ne ia me ne fakaasi mai ei me fai ne nisi a te taua tenei e pelā me se “mea makaikai ki te foitino.” (2 Koli. 12:7) Kae i te taimi tenei koi taua atu ei latou ke fakatumau a faifaiga amio‵tonu, e mafai eiloa o ‵kilo atu latou ki aso mai mua mo te manuia. Ne fai mai a ia “ona ko te pogai tenā, i aso takitasi konei ko teka atu e iloa ne au, me mafai eiloa o tumau au i te fakamaoni. Ko oko eiloa i toku loto fakafetai ki a Ieova me ne fakaaoga ne ia tena fakapotopotoga ke fesoasoani mai ke ‵sao tatou i aso takitasi mai te olaga masei tenei.”

¹³ Ke mafaufau foki ki se tala a se tuagane i te Iunaite Sitete. Ne tusi mai tou fafine: “E manako au o fakafetai atu mo te fagai mai faeloa o matou ki mea kolā e manakogina ne matou i te taimi tonu. E masani sale au o mafaufau me i mataupu konei ne tusi mai fua mō au. I tausaga e uke, ne taua atu au ki se manakoga malosi telā ne takalialia ki ei a Ieova. I nisi taimi ko se maua ne au o taua atu. E iloa ne au i a Ieova e alofa kae loto fakamagalo, kae ona ko toku loto koi fiafia eiloa ki te manakoga masei tenei, e mafaufau au me ko sē mafai o maua ne au a tena fesoasoani. Ne pokotia a feitu katoa o toku olaga i te taua tenei. . . . Kae i te otiga ne faitau ne au a te mataupu tenei ‘E mata, e isi sou “Loto ke Iloa ne Koe” a Ieova?’ i Te Faleleoleo Maluga i a Mati 15, 2013, ne iloa ‵lei ne au me e manako eiloa a Ieova o fesoasoani mai ki a au.”

14. (a) Ne a lagonaga o Paulo e uiga ki tena taua atu? (e) E mafai pefea o taua atu tatou mo te manumalo ki ‵tou vāivāiga faka-te-foitino?

¹⁴ Faitau te Loma 7:21-25. Ne lagona tonu ne Paulo a te faigata ke taua atu ki vāivāiga mo manakoga o te fotiino sē ‵lei katoatoa. Kae ui i ei, ne talitonu katoatoa a ia me mafai ne ia o manumalo i te taua totino tenei mai te fakalagolago ki a Ieova i ‵talo kae fakagalue te fakatuanaki ki te taulaga togiola a Iesu. Kae pefea tatou? E mafai eiloa o manuia tatou i te ‵tou taua atu ki ‵tou vāivāiga faka-te-foitino. E pefea? Mai te fakaakoako atu ki a Paulo, mai te fakalagolago katoatoa ki a Ieova i lō ‵tou malosi totino mo te fakatuanaki ki te togiola.

15. Kaia e mafai ei ne ‵talo o fesoasoani mai ke tumau tatou i te fakamaoni kae ke kufaki i tofotofoga?

¹⁵ E isi ne taimi e talia ne te Atua ke fakaasi atu ne tatou a te ‵loto o te ‵tou manava‵se ki se mea. E pelā me se fakaakoakoga, e a māfai ko ma‵saki tatou (io me se tino o te kāiga) io me fakafesagai atu tatou ki faifaiga sē ‵tonu? E mafai ne tatou o fakaasi atu te ‵tou tali‵tonu katoatoa ki a Ieova e auala i ‵talo ke tuku mai te malosi ke tumau i te fakamaoni kae ke mo a e galo te ‵tou fia‵fia mo te ‵tou fesokotakiga ‵pili mo Ia. (Fili. 4:13) A te mea telā ko oti ne iloa ne te tokoukega, e aofia i ei latou kolā i aso o Paulo mo ‵tou aso nei, e fakatalitonu mai ei me mafai ne ‵talo o fesoasoani mai ke fakafou aka te malosi kae ke ati aka foki ei se loto talitonu ke mafai o tumau i te kufaki.

16, 17. Se tau fakaikuga e pelā me se tino telā e taua atu?

¹⁶ E manako eiloa te Tiapolo ke lavea ne ia a koe ko loto vāivāi kae ko tuku ifo ou lima i a koe ko takavale. Ke fakaiku aka ke “puke ‵mau ki mea ‵lei.” (1 Tesa. 5:21) Ke loto talitonu me e mafai eiloa o manumalo koe i te taua atu ki a Satani, tena lalolagi masei, mo manakoga agasala. E mafai o fai koe penā mai te talitonu katoatoa ki te mafai ne te Atua o fakamalosi koe.—2 Koli. 4:7-9; Kala. 6:9.

¹⁷ Mai mea katoa, ke tumau i te taua atu. Ke tumau i te kausaki atu. Tumau i te ‵teke atu, kae kufaki. Ke maua te loto talitonu me e mafai ne Ieova o “‵ligi ki luga i a koutou a fakamanuiaga ke oko ki te taimi ko seai se mea koi manakogina.”—Mala. 3:10, NW.