E sae mai faeloa a te Epelu 4:12 i ‵tou tusi ke fakaasi mai ei me i te Tusi Tapu e isi sena ‵mana ke ‵fuli ne ia a olaga o tino, kae ko te ‵toe auala ‵lei ke fakagalue ne tatou te mea tenā. Kae se mea gali foki ke fakalauefa ‵tou kilokiloga ki te Epelu 4:12. Ne fakamalosi atu a Paulo ki Kelisiano Epelu ke ga‵lue fakatasi i fuafuaga a te Atua. Ne maua a te ukega o o fuafuaga konā i tusitusiga tapu. Ne fakaaoga ne Paulo a te fakaakoakoga o tino Isalaelu kolā ne faka‵sao mai i Aikupito. Ne maua ne latou a te fakamoemoega ke ulu atu ki loto i te fenua o te folafolaga telā e “maumea kae ola ‵lei,” te koga e mafai ei o maua ne latou se malōlōga tonu.—Eso. 3:8; Teu. 12:9, 10.

Tenā eiloa te fuafuaga a te Atua. Kae fakamuli ifo, ne loto ma‵keke a te kau Isalaelu kae seki fakatuanaki, tela la e tokouke i a latou ne seki ulu atu ki loto i te koga malōlō tenā. (Nume. 14:30; Iosu. 14:6-10) Kae ne fakaopoopo mai a Paulo me e isi foki se ‘folafolaga koi ‵toe ke ulu atu ki loto i te koga malō‵lo o [te Atua].’ (Epe. 3:16-19; 4:1) E manino ‵lei me i te “folafolaga” tenā se vaega o te fuafuaga a te Atua telā ko oti ne fakaasi mai. E pelā mo te mea ne fai ne Kelisiano Epelu, e mafai o fai‵tau kae ga‵lue fakatasi tatou i te fakaasiatuga o te fuafuaga tenā a te Atua. Ke faka‵mafa ki tino a te tāua o te folafolaga tenei telā e fakavae mai i te Tusi Tapu, ne siki mai ei ne Paulo a vaega o pati i te Kenese 2:2 mo te Salamo 95:11.

E mautinoa eiloa, me e ‵tau o otia ‵tou loto i te ‘folafolaga koi ‵toe ke ulu atu ki te koga malōlō o [te Atua].’ E tali‵tonu tatou me i te fakamoemoega i te Tusi Tapu e uiga ki te ulu atu ki loto i te koga malōlō o te Atua se mea mautinoa eiloa, kae ko gasue‵sue nei tatou ke ulu atu ki loto i ei. Ne seki fai ne tatou te mea tenā mai te taumafai o tausi a Tulafono faka-Mose io me ke maua ne tatou te taliaga a Ieova i te faiga o nisi galuega. Kae ona ko te fakatuanaki, ko mafai eiloa o ‵kau fakatasi tatou mo te fia‵fia kae tumau i te ga‵lue fakatasi o fakaasi atu a fuafuaga a te Atua. E se gata i ei, e pelā mo te mea ne fakaasi mai i luga, e lau i afe o tino i te lalolagi kātoa ko oti ne kamata o suke‵suke ki te Tusi Tapu kae tauloto ki auala e fakaasi mai ei ne te Atua ana fuafuaga. Ko oti ne kamata o gasue‵sue a te tokoukega o ‵fuli olotou olaga, fakatuanaki, kae papatiso e pelā me ne Kelisiano. A te auala telā ne ‵fuli i ei latou, se fakamaoniga manino me i “te muna a te Atua e ola kae ‵mana.” A te fuafuaga a te Atua telā ne fakaasi mai e auala i te Tusi Tapu, ko oti ne fai ei ke ‵fuli ‵tou olaga, kae ka tumau o fakagalue te ‵mana tenā i ‵tou olaga.