1. Kaia e seai se fakalotolotolua me i te Muna a te Atua e ‵mana? (Ke onoono ki te ata i te kamataga.)

E PELĀ me ne tino o Ieova, e mautinoa eiloa i a tatou me i te Muna a te Atua, tena fekau ki tino katoa e “ola kae ‵mana.” (Epe. 4:12) Ne fakatalitonu ne te tokoukega o tatou a te auala ne ‵fuli ei ‵tou olaga ne te ‵mana o te Tusi Tapu. Ne fai a nisi taina mo tuagane o tatou pelā me ne tino kai‵soa, umiti ki vailakau tapu, io me ko faifaiga fakatauavaga sē ‵taui i aso mua. Ne gali ki nisi tino a te olaga manuia i te olaga tenei kae ne iloa aka fakamuli ne latou me isi se mea e galo i olotou olaga. (Fai. 2:3-11) I te gasologa o taimi, ne maua ne tino kolā e seai ne olotou fakamoemoega a te lotou auala ki te ola e auala i te ‵fuliga ne te ‵mana o te Tusi Tapu. Se mea gali ke faitau kae fia‵fia ki tala ‵gali konei ne ‵lomi i te vaega o Te Faleleoleo Maluga tenei, “E ‵Fuli ne te Tusi Tapu a Olaga o Tino.” Kae e lavea ne koe me mai tua o te taliaga o te munatonu, e tumau eiloa a Kelisiano i te ga‵solo ki mua i te feitu faka-te-agaga fakatasi mo te fesoasoani o te Tusi Tapu.

2. Ne mafai pefea o galue te ‵mana o te Muna a te Atua i te senitenali muamua?

² E mata, e ‵tau o ‵poi tatou me ne fai ne te tokoukega i aso nei a ‵fuliga tu ‵kese ona ko te sukesuke ki te Muna a te Atua? E se penā eiloa! E fakamasaua mai ne vaegā tala penā a ‵tou taina mo  tuagane i te senitenali muamua, kolā ne maua ne latou te fakamoemoega faka-te-lagi. (Faitau te 1 Kolinito 6:9-11.) Mai tua o te fakamauga o vaegā tino kolā ka se ulu atu ki te Malo o te Atua, ne toe fakaopoopo mai a Paulo, penei: “Kae ne fai eiloa penā a nisi tino o koutou.” Kae ne ‵fuli latou ona ko te fesoasoani o te Tusi Tapu mo te agaga tapu o te Atua. Mai tua foki o te taliaga ne latou te munatonu, ne ‵tau mo nisi tino o manumalo i fakalavelave faka-te-agaga. E taku mai i te Tusi Tapu se Kelisiano fakaekegina e tokotasi i te senitenali muamua telā ne fakatea; fakamuli ifo, ne toe fakafoki mai a ia. (1 Koli. 5:1-5; 2 Koli. 2:5-8) E mata, e se fakamalosi loto ke mafau‵fau ki te uke o fakalavelave ne fe‵paki mo ‵tou taina tali‵tonu kae ne manumalo e auala i te Muna a te Atua?

3. Ne a mea ka suke‵suke tatou ki ei i te mataupu tenei?

³ Ona ko te Muna a te Atua se mea faigaluega ‵mana kae ko maua foki ne tatou, e mautinoa eiloa me ma‵nako tatou o fakaaoga faka‵lei. (2 Timo. 2:15) I te mataupu tenei, ka suke‵suke eiloa tatou ki te auala e mafai ei o fakagalue ne tatou te ‵mana o te Muna a te Atua i (1) ‵tou olaga, (2) māfai e ‵kau atu tatou ki te galuega talai, io (3) me māfai e akoako atu tatou mai te tulaga. Ka fesoasoani mai a fakamasauaga konei ke fakaasi atu ‵tou a‵lofa mo te loto fakafetai ki ‵tou Tamana faka-te-lagi, telā e akoako ne ia tatou ke manuia tatou.​—Isa. 48:17.

4. (a) Se a te mea e manakogina ke maua ne tatou a mea aoga mai te Muna a Atua? (e) E fakaavanoa pefea ‵tou taimi mō te faitauga ki te Tusi Tapu?

⁴ Ona ko te mea e isi se aoga o te Muna a te Atua ki a tatou, e ‵tau o fai‵tau faeloa tatou ki ei—i aso takitasi māfai e mafai. (Iosu. 1:8) E tonu, a te tokoukega o tatou e fakalave‵lave faeloa. Kae e ‵se ‵tau o talia ne tatou so se mea—ke oko foki loa ki ‵tou tiute tāua—ke fakaseaoga ei ‵tou polokalame ki te faitauga ki te Tusi Tapu. (Faitau te Efeso 5:15, 16.) Ne maua ne te tokoukega o tino o Ieova a auala ‵lei ke fakaavanoa ki te faitauga ki te Tusi Tapu i aso katoa, kāti i te tafataeao, tutonu io me ko te po. Ne ‵pau olotou lagonaga mo te faisalamo telā ne tusi mai penei: “Ko oko eiloa au i te fiafia ki tau tulafono.”​—Sala. 119:97.

5, 6. (a) Kaia e tāua ei a te mafaufau ‵loto? (e) E mafai pefea o aoga a te mafaufau ‵loto? (i) Ne a mea aoga ne maua ne koe mai te faitauga ki te Muna a te Atua kae mafaufau ‵loto ki ei?

⁵ E se gata fua i te faitau ki te Tusi Tapu, se mea tāua ke mafaufau ‵loto ki mea e fai‵tau ne tatou. (Sala. 1:1-3) Mai konā, ko mafai ei ne tatou o fakagalue faka‵lei a te poto se gata-mai. Faitalia me fai‵tau tatou ki ‵kopi o te Muna a te Atua kolā ne ‵lomi io me i loto i komupiuta, e ‵tau o fakamoe‵moe tatou ke ‵goto te fekau i loto i ei ki ‵tou loto.

⁶ E mafai pefea o aoga ki a tatou a te mafaufau ‵loto? Ne aoga ki tino e tokouke a te  mānava malie mai tua o te faitauga o se fuaiupu o te Tusi Tapu kae mafaufau ki vaegā fesili penei: ‘Se a te mea e fakaasi mai i te mea tenei e uiga ki a Ieova? Ne a auala ko oti ne fakagalue ne au a te fakatakitakiga telā e maua i te fuaiupu tenei o te Muna a te Atua? Ne a auala e mafai o faka‵lei aka ne au?’ I te taimi e ‵talo atu ei kae mafaufau ‵loto ki te Muna a te Atua, ka fakamalosigina eiloa tatou ke fakagalue katoatoa ne tatou a pati fakatonutonu i ‵tou olaga.​—2 Koli. 10:4, 5. 

7. E fakaaoga faka‵lei pefea ne tatou a te Muna a te Atua i te ‵tou galuega talai?

⁷ Se a te mea e mafai o fesoasoani mai ke fakaaoga faka‵lei ne tatou te Muna a te Atua i te galuega talai? A te auala muamua ko te fakaaoga faeloa ne tatou māfai e talai kae akoako atu. Ne fakaasi mai ne se taina tokotasi ana lagonaga i te auala tenei, “Kafai e talai atu koe mai fale ki fale fakatasi mo Ieova, e mata, ka faipati fua koe io me tuku atu se avanoaga ki a ia?” Tenei tena manatu: Kafai e faitau ‵tonu atu ne tatou a te Tusi Tapu ki se tino i te galuega talai, ko talia ne tatou a Ieova ke faipati atu ki te tino i te fale. Ka aoga malosi eiloa a te filifili faka‵lei o se tusi siki i lō so se pati e mafai ne tatou o fai atu. (1 Tesa. 2:13) Fesili ifo ki a koe penei, ‘E mata, e ‵sala atu au ki so se avanoaga ke fakaasi se fuaiupu i te Muna a te Atua ki tino kolā e avatu ne au ki ei te tala ‵lei?’

8. Kaia e ‵tau o uke atu ‵tou mea e fai i lō te faitau fua a tusi fai‵tau māfai e talai atu?

⁸ E tonu, e uke atu a mea e manakogina i lō te faitau atu fua o fuaiupu i te Tusi Tapu ki tino kolā e sau‵tala mo tatou. Kaia? Me i te tokoukega o tino e se lava io me e se malamalama i te Tusi Tapu. Tenā te mea ne tupu i te senitenali muamua, kae e penā foki i aso nei. (Loma 10:2) Tela la, e se ‵tau o mafau‵fau tatou me ka malamalama te tino i te fuaiupu tenā ona ko te mea ne faitau atu ne tatou. E ‵tau o uke a taimi e manakogina ke fakasoa faka‵lei ne tatou a pati  i se fuaiupu—kāti mai te ‵toe faitau atu a pati tāua kae fakamatala atu olotou uiga. Ka fesoasoani malosi atu te faiga tenā ke oko faka‵lei atu te fekau mai te Muna a te Atua ki mafaufau mo loto o ‵tou tino fakalogo‵logo.​—Faitau te Luka 24:32.

9. E mafai pefea o fakaasi atu ne tatou a tusi fai‵tau i se auala telā e fakamalosi aka ei te āva o tino ki te Tusi Tapu? Taku mai se fakaakoakoga.

⁹ E ‵tau foki o fakamaina faka‵lei atu ne tatou a tusi fai‵tau i se auala e fakamalosi aka ei te āva o se tino ki te Tusi Tapu. E pelā me se fakaakoakoga, e mafai o fai atu tatou penei, “Onoono aka me ne a pati a ‵tou Atua e uiga ki te mataupu tenei.” Kafai e fai‵pati tatou ki se tino sē Kelisiano, e mafai o fai atu penei, “Onoono aka ki pati e fakaasi mai i Tusitusiga Tapu.” Io me kafai e talai tatou ki se tino telā e se fiafia ki lotu, e mafai o ‵sili atu tatou penei, “E mata, kai lagona muamua aka eiloa ne koe a faigamuna mua konei?” E tonu, e iloilo ne tatou a fakanofonofoga o tino taki tokotasi ko fakamafulifuli ei ne tatou a ‵tou pati e ‵tusa mo fakanofonofoga konā.​—1 Koli. 9:22, 23.

10. (a) Fakamatala mai se tala a te taina. (e) Ne molimau pefea ne koe te ‵mana o te Muna a te Atua i tau galuega talai?

¹⁰ Ne iloa aka ne tino e tokouke me i te fakaaogaga o te Muna a te Atua i te galuega talai e mafai o aoga ki tino kolā e talai latou ki ei. Mafaufau ki se fakaakoakoga. Ne toe asi atu se taina ki se toeaina telā ko leva ne faitau sale ki ‵tou mekesini. I lō te avatu fua ne ia a ‵kopi fou o Te Faleleoleo Maluga, ne fakaiku aka ne te taina ke faitau atu ne ia se tusi faitau e tasi mai te lōmiga tenā. Ne faitau ne ia te 2 Kolinito 1:3, 4, telā e fai mai: “Te Tamana o te alofa fakamagalo mo te Atua o fakamafanafanaga katoa . . . e fakamafanafana mai ki a tatou i ‵tou tofotofoga.” Ne otia te toeaina i pati konā telā ne toe fakamolemole atu ki te taina ke toe faitau te tusi faitau. Ne fakaasi atu ne te tagata a te lasi o te fakamafanafanaga ne manakogina ne laua mo tena avaga, kae ne fakaasi atu ne ia tena fiafia i te taimi tenā ki te fekau mai te Tusi Tapu. E mata, e se ‵lago koe ki te ‵mana o te Muna a te Atua i te ‵tou galuega talai?​—Galu. 19:20.

11. Se a te tiute e fai ne taina kolā e akoako mai luga i te tulaga?

¹¹ E fia‵fia katoa tatou o ‵kau ki ‵tou fakatasiga Kelisiano pelā foki mo fono o te fenua mo fono o te atufenua. Te mea tāua, ko te ‵kau atu o tapuaki ki a Ieova. E maua foki ne tatou a mea aoga mai fakatakitakiga faka-te-agaga e maua ne tatou. E maua ne taina kolā e fai‵pati mai i te tulaga i taimi penei se tauliaga sili. Kae e ‵tau foki o iloa ne latou me isi ne olotou tiute ‵mafa e fai. (Iako. 3:1) E ‵tau o fakamautinoa aka ne latou me i olotou akoakoga e fakavae tonu mai te Muna a te Atua. Kafai ne filifili aka koe ke akoako mai te tulaga, e mafai pefea o fakagalue aka ne koe a te ‵mana o te Tusi Tapu i tau lāuga?

12. E mafai pefea o fakamautinoa aka ne te failauga me i te Tusi Tapu ko te kī tāua o tena lāuga?

¹² Masaua me i te Tusi Tapu e fai pelā me ko te ivi malosi o tau lāuga. (Ioa. 7:16) Ne a mea e aofia i ei? Te mea muamua, ke fakaeteete ke mo a ma tō faka‵mafa atu ne koe—a tala, tala fakatusa, io me ko te auala e fai ei tau lāuga, ko se saga ei koe ki te Tusi Tapu. E se gata i ei, masaua me i te faitau fua o tusi faitau e se ‵pau eiloa mo te akoako atu mai te Tusi Tapu. A te ‵tonuga loa, a te fakaaogaga o tusi fai‵tau e uke e mafai o se masaua ‵lei ne au tino fakalogo‵logo. Tela la, ke filifili faka‵lei a tusi fai‵tau tāua, kae ke uke a taimi ke faitau, mafaufau, kae fakagalue ne koe. (Nee. 8:8) Kafai ne fakavae se lāuga ki fakasologa o manatu kolā e tuku mai ne te fakapotopotoga, ke sukesuke ki ei fakatasi mo tusi fai‵tau kolā e fakaaoga. Taumafai ke malamalama i te sokoga o fakamatalaga konā mo tusi fai‵tau. Ko fakaaoga ei a tusi fai‵tau kolā ne filifili aka ke akoako atu ei a manatu tāua mai te  lāuga. (E mafai o maua ne koe a manatu aoga i te mataupu e 21 ki te 23 o te tusi ko te Benefit From Theocratic Ministry School Education.) Mai mea katoa, ke ‵talo fakamolemole atu ki a Ieova mō tena fesoasoani ke mafai o fakamatala faka‵lei atu ne koe a manatu tāua kolā e maua i tena Muna.​—Faitau te Esela 7:10; Faataoto 3:13, 14.

13. (a) Ne aoga pefea ki se tuagane a te fakaaogaga o tusi fai‵tau i se fakatasiga faka-Kelisiano? (e) Ne a mea aoga e maua ne koe mai akoakoga faka-te-Tusi Tapu kolā e maua ne tatou i ‵tou fakatasiga?

¹³ Ne otia malosi eiloa se tuagane i Ausetalia i te fakaaogaga o tusi fai‵tau i se fakatasiga a te fakapotopotoga. E tiga eiloa ne puti aka a ia i se auala se ‵lei i tena folikiga, ne talia ne ia te fekau mai te Tusi Tapu kae ne tuku atu tena ola ki a Ieova. E se gata i ei, ne faigata ki a ia ke talia te alofa o Ieova ki tou fafine. Kae fakamuli ifo, ne loto talitonu tou fafine ki te alofa o te Atua ki a ia. Se a te mea ne fesoasoani atu ke fai ne ia te fakaikuga tenā? Ne ‵fuli eiloa a ia i te taimi ne mafaufau ‵loto ei a ia ki te tusi faitau telā ne fakaaoga i se fakatasiga e tasi kae ne fakafetaui aka ne ia mo nisi fuaiupu o te Tusi Tapu. * E mata, ne fai foki koe penā mai te fakaaogaga o te Muna a te Atua i fakatasiga, fono o fenua mo fono o atufenua?​—Nee. 8:12.

14. E mafai pefea o fakaasi atu ne tatou a te loto fakafetai mō te Muna a Ieova?

¹⁴ E mata, e se loto fakafetai tatou ki a Ieova ona ko tena Muna tusia, ko te Tusi Tapu? Ne seki alofa fua a ia o tuku mai ki te kaukāiga o tino kae ke fakataunu foki tena tautoga me ka tumau eiloa. (1 Pe. 1:24, 25) E mautinoa eiloa me ka fai‵tau faeloa tatou ki te Muna a te Atua, fakagalue i ‵tou olaga, kae fakaaoga ne tatou ke fesoasoani atu ki nisi tino. I te faiga tenā, ko fakaasi atu ne tatou te alofa mo te loto fakafetai ki te koloa tāua tenā, kae ko te ‵toe mea tāua ko te Tino ne aumai ne ia, ko Ieova te Atua.