MATAUPU MŌ SUKESUKEGA 38
“O‵mai ki a Au, . . . me ka Tuku Atu ne Au ki a Koutou se Malosi Fou”
“O‵mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou.” —MATA. 11:28.
PESE 17 “Au e Manako ki ei”
FAKATOE‵TOEGA O MANATU TĀUA *
1. E pelā mo te mea ne fakamau i te Mataio 11:28-30, se a te tautoga ne fai ne Iesu?
NE FAI ne Iesu se tautoga gali ki se vaitino kolā ne fakalogo‵logo atu ki a ia. “O‵mai ki a au,” ne fai atu a ia, “me ka tuku atu ne au ki a koutou se malosi fou.” (Faitau te Mataio 11:28-30.) A te tautoga tenei e aoga eiloa. Mafaufau la ki mea ne fai ne ia ki se fafine telā ne logo‵mae i se masaki matagā.
2. Ne a mea ne fai ne Iesu ki se fafine masaki?
2 Ne manakogina ‵ki eiloa ne te fafine se fesoasoani. Ko oti ne fano a ia ki tokita e tokouke, mo te fakamoemoega ke maua se fakatapūga. Mai tua o se 12 tausaga ne logo‵mae ei a ia, ne seki mafai eiloa o faka‵lei tena masaki. E ‵tusa mo te Tulafono, a ia e se ‵ma. (Levi. 15:25) Kae ne lagona ne ia a tala me e mafai ne Iesu o faka‵lei a latou kolā ne ‵logo‵mae, telā ne fano ei a ia o ‵sala a tou tagata. I te mauaga ne ia tou tagata, ne patele atu tou fafine ki te kapakapa o tena gatu, kae ne ‵lei fakavave tena masaki! Kae ne seki gata fua i te faka‵lei ne Iesu a tou fafine—kae ne fai foki ne ia ke toe maua ne tou fafine a te tulaga fakaaloalo. E pelā me se fakaakoakoga, i te faipatiga ki tou fafine, ne fakaaoga ne ia te pati “Taku tama” ke fakaasi atu ei a tena atafai mo tena āva ki tou fafine. E mautinoa eiloa me ne maua ne te fafine tenā a te malosi fou!—Luka 8:43-48.
3. Ne a fesili ka tali aka ne tatou?
3 Masaua la me ne fanatu te fafine ki a Iesu. Ne taumafai malosi tou fafine ke fanatu ki a ia. E ‵pau foki mo tatou i aso nei—e
‵tau mo tatou o taumafai malosi ke olo atu ki a Iesu. I aso nei, ka sē faka‵lei fakavavega ne Iesu a ma‵saki o latou kolā e olo atu ki a ia. Kae koi ‵tala mai loa ne ia te ‵kamiga tenei: “O‵mai ki a au, . . . me ka tuku atu ne au ki a koutou a te malosi fou.” I te mataupu tenei, ka tali aka ne tatou a fesili e lima: E mafai pefea o olo atu tatou ki a Iesu? Se a te mea ne fakauiga ki ei a Iesu i ana pati konei: “Ke puke ne koutou taku amo”? Ne a mea e mafai o tauloto ne tatou mai i a Iesu? Kaia e maua i ei ne tatou te malosi fou mai te galuega ne tuku mai ne ia ki a tatou? Kae e mafai pefea ne tatou o tumau i te ‵sala atu ki te malosi fou mai lalo o te amo a Iesu?“O‵MAI KI A AU”
4-5. Ne a nisi auala e mafai ne tatou o olo atu ki a Iesu?
4 A te auala e tasi ke olo atu ki a Iesu ko te tauloto ki mea e uke e uiga ki ana akoakoga mo ana pati ne fai. (Luka 1:1-4) E seai aka se tino e mafai o fai ne ia te mea tenei mō tatou—e ‵tau mo tatou o suke‵suke ki tala konei. E olo atu foki tatou ki a Iesu mai te fakaiku aka ke papatiso kae ke fai pelā me ne soko o Keliso.
5 A te suā auala ke olo atu ki a Iesu ko te olo atu ki toeaina i te fakapotopotoga māfai e manakogina se fesoasoani. E fakaaoga ne Iesu a “tāgata [konei] e pelā me ne meaalofa” ke tausi atu ki ana mamoe. (Efe. 4:7, 8, 11; Ioa. 21:16; 1 Pe. 5:1-3) E ‵tau o taumafai malosi tatou o fakamolemole atu ki te lotou fesoasoani. E se fakamoe‵moe tatou ke iloa ne toeaina a ‵tou mafaufauga mo mea e ma‵nako tatou ki ei. Mafaufau la ki pati a se taina e igoa ki a Julian: “Ne ‵tau mo au o tiakina te Peteli ona ko au e masaki, kae ne fai mai soku taugasoa me e ‵tau fakamolemole atu au ki toeaina mō se fesoasoani. Muamua la, ne seki mafaufau au me e manakogina ne au se asiga. Kae fakamuli ne manako au ki ei, kae ne fai te asiga a tausi mamoe tenā e pelā me ko te ‵toe meaalofa sili ne maua ne au.” A toeaina fakamaoni, e pelā mo te tokolua kolā ne asi atu ki a Julian, e mafai o fesoasoani mai ke iloa ne tatou a te “mafaufau o Keliso” telā ko te malamalama kae tau‵tali atu i ana mafaufauga mo tena kilokiloga. (1 Koli. 2:16; 1 Pe. 2:21) A te asiga tenei se tasi o toe meaalofa ‵lei e mafai o tuku mai ne latou ki a tatou.
“PUKE NE KOUTOU TAKU AMO”
6. Se a te mea ne fakauiga ki ei a Iesu i te taimi ne fai mai a ia: “Puke ne koutou taku amo”?
6 I te taimi ne fai ei a Iesu, penei: “Puke ne koutou taku amo,” kāti ne fakauiga eiloa a ia ke “Talia taku pulega.” E mafai foki o fakauiga a ia penei, “Vau ke amo tasi tāua, kae ga‵lue fakatasi mō Ieova.” A auala konei e lua e aofia i ei se galuega.
7. E ‵tusa mo te Mataio 28:18-20, se a te galuega ne tuku mai ke fai ne tatou, kae se a te mea e mautinoa i a tatou?
7 E talia ne tatou te ‵kamiga a Iesu i te taimi e tuku atu ei ‵tou ola ki a Ieova kae papatiso. A te ‵kamiga tenā e ‵tala mai ki a tatou katoa—ka talia eiloa ne Iesu so se tino telā e manako tonu o tavini atu ki te Atua. (Ioa. 6:37, 38) Ko oti ne maua ne soko katoa o Keliso a te tauliaga ke fai te galuega telā ne fakamolemole mai a Ieova mo Iesu ke fai ne tatou. E mautinoa eiloa i a tatou me ka fakatasi mai faeloa a Iesu ki a tatou o fai te galuega tenā.—Faitau te Mataio 28:18-20.
“FAKAAKOAKO MAI KI A AU”
Fakamalosi a nisi tino e pelā mo te mea ne fai ne Iesu (Ke onoono ki te palakalafa e 8-11) *
8-9. Kaia ne fakapili‵pili atu ei a tino loto maulalo ki a Iesu, kae ne a fesili e ‵tau o ‵sili ifo ne tatou ki a tatou eiloa?
8 A tino loto maulalo ne fakapili‵pili atu ki a Iesu. (Mata. 19:13, 14; Luka 7:37, 38) Kaia? Mafaufau aka la ki te ‵kese o Iesu mo te kau Falesaio. A takitaki lotu konā ne sē a‵lofa kae fakamata‵mata. (Mata. 12:9-14) A Iesu ne alofa kae loto maulalo. A te kau Falesaio ne fia takutakua kae fakamata‵mata i olotou tulaga ma‵luga i te fenua. Ne taku fakamasei ne Iesu a te fia takutakua, kae ne akoako ne ia ana soko ke ‵kilo ki a latou e pelā me ne tavini fatauva. (Mata. 23:2, 6-11) Ne pule mālō atu te kau Falesaio ki nisi tino mai te fakamatakutaku atu māfai e se faka‵logo a tino ki a latou. (Ioa. 9:13, 22) Ne fakamalosi ne Iesu a nisi tino e auala i ana faifaiga a‵lofa mo ana pati atafai.
9 E mata, ne tauloto ne koe a akoakoga konei mai i a Iesu? ‵Sili ifo ki a koe eiloa: ‘E mata, e ‵kilo mai a nisi tino ki a au e pelā me se tino uiga filemu kae loto maulalo? E mata, e loto fiafia au o fai a galuega fatauva ke tavini atu ei ki nisi tino? E mata, e atafai au ki nisi tino?’
10. E pefea te gali ke ga‵lue fakatasi mo Iesu?
10 Ne fai ne Iesu se fakatokaga gali mō latou kolā ka ga‵lue tasi mo ia, kae ne fiafia a ia o akoako latou. (Luka 10:1, 19-21) Ne fai ne faifaiga a Iesu ke faigofie ki ana soko ke ‵sili atu ne latou a fesili. Kae ne manako foki a Iesu o fakalogologo ki olotou manatu. (Mata. 16:13-16) Ne olaola ‵lei eiloa a soko o Iesu e pelā loa mo lakau kolā e puipui mai aso ma‵sei. Ne mafaufau ‵loto latou ki akoakoga ne akoako atu ne Iesu kae ne ‵fua mai a fuataga o olotou galuega ‵lei.
Ke uiga faigofie kae mata fiafia
Ke malosi kae loto finafinau
Ke loto maulalo kae galue malosi *
11. Ne a fesili e ‵tau o ‵sili ifo ne tatou ki a tatou eiloa?
11 E mata, e maua ne koe se tulaga pule? Kafai e isi, ke ‵sili ifo ki a koe eiloa: ‘E pefea aku faifaiga ki nisi tino i te koga ga‵lue io me i te fale? E mata, e fakamalosi aka ne au te filemu? E mata, e fai ne aku faifaiga ke faigofie o ‵sili mai ne tino a fesili? E mata, e toka au o fakalogologo ki olotou manatu?’ Ka se ma‵nako lele eiloa tatou ke fai pelā mo te kau Falesaio, kolā ne kaitāua ki tino kolā ne fakafesili ne latou a olotou akoakoga kae fakasaua ne latou a tino kolā ne fakaasi atu ne latou a manatu kolā e ‵kese mai i olotou manatu.—Male. 3:1-6; Ioa. 9:29-34.
“KA MAUA NE KOUTOU I EI SE MALOSI FOU”
12-14. Kaia e maua i ei ne tatou a te malosi fou mai te galuega telā ne tuku mai ne Iesu ki a tatou?
12 Kaia e maua ei tatou te malosi fou mai te faiga o te galuega ne tuku mai ne Iesu? E uke a pogai, kae ka onoono fua tatou ki nāi mea.
13 E maua ne tatou a toe ovasia ‵lei. A Ieova, te ‵tou Ovasia Tafasili i te maluga, e sē se matai masei telā e se fakaasi mai ne ia te loto fakafetai. E fakatāua ne ia a galuega e fai ne tatou. (Epe. 6:10) Kae e tuku mai ne ia a te malosi telā e manakogina ne tatou ke amo io me ke a fai ‵tou tiute. (2 Koli. 4:7; Kala. 6:5, fml.) Ne tuku mai ne te ‵tou Tupu ko Iesu se fakaakoakoga ‵lei katoatoa. (Ioa. 13:15) Kae ko toeaina kolā e tausi ne latou a tatou e taumafai o fakaakoako ki a Iesu, “te tausi mamoe sili.” (Epe. 13:20; 1 Pe. 5:2) E taumafai latou o atafai, fakamalosi, kae loto malosi i te taimi e fagai kae puipui ei ne latou a tatou.
14 E maua ne tatou a toe taugasoa ‵lei. E seai aka se tino e maua ne ia ne taugasoa a‵lofa mo se galuega aoga penei mo tatou. Mafaufau ki te mea tenei: E maua ne tatou te tauliaga ke ga‵lue fakatasi mo tino kolā e ma‵luga olotou tulaga i mea tau amioga kae e se fia amio‵tonu. A latou e ata‵mai kae e uiga agamalu, kae ‵kilo atu latou ki nisi tino e pelā me ma‵luga fakafia atu i a latou. E ‵kilo mai latou ki a tatou e pelā me ne tino ga‵lue kae ne taugasoa foki. Kae e malosi ‵ki eiloa a te lotou a‵lofa ki a tatou, me e toka latou o ‵mate mō tatou!
15. E ‵tau o pefea a ‵tou lagonaga e uiga ki te galuega e fai ne tatou?
15 E fai ne tatou a te ‵toe galuega ‵lei. E akoako ne tatou a tino ki te munatonu e uiga ki a Ieova kae fakaasi faka‵sau atu a loi o te Tiapolo. (Ioa. 8:44) E fakaopoopo atu ne Satani a amoga kolā e se mafai ne tino o amo. E pelā me se fakaakoakoga, e manako a ia ke tali‵tonu tatou me i a Ieova ka sē fakamagalo ne ia ‵tou agasala kae ko tatou e se alofagina. Konei a loi matagā kolā e fai ne latou a tino ke loto vāi‵vai! Kafai e olo atu tatou ki a Keliso, ka fakamagalo eiloa a ‵tou agasala. Kae ko te ‵tonuga loa, a Ieova e alofa malosi mai ki a tatou katoa. (Loma 8:32, 38, 39) Se mea fakafiafia eiloa ke fesoasoani atu ki tino ke fakalago‵lago ki a Ieova kae ke momea aka te ‵lei o olotou olaga!
TUMAU I TE ‵SALA ATU KI TE MALOSI FOU MAI LALO O TE AMO A IESU
16. I te auala fea e ‵kese i ei a te amoga telā e fakamolemole mai a Iesu ke amo ne tatou mai nisi amoga aka?
16 A te amoga telā e fakamolemole mai a Iesu ke amo ne tatou e ‵kese mai nisi amoga kolā e amo ne tatou. E pelā me se fakaakoakoga, i te fakaotiga o te aso i te galuega, e tokouke e mafai eiloa o fi‵ta kae sē fia‵fia. E ‵kese mai i ei, e maua eiloa ne latou kolā e tavini atu ki a Ieova mo Keliso a te lotomalie. E mafai o fi‵ta tatou i te fakaotiga o te aso ga‵lue, kae taumafai malosi tatou ke ‵kau atu ki se fakatasiga a te fakapotopotoga i te po. Kae e maua faeloa ne tatou a te malosi fou mo fakamalosiga mai te fakatasiga tenā. E penā foki loa māfai e taumafai tatou o talai kae fai ‵tou sukesukega totino ki te Tusi Tapu. A te taui e maua ne tatou mai i ei, e sili fakafia atu i lō te malosi telā ne fakamāumāu ne tatou!
17. Kaia e ‵tau ei mo tatou o loto malamalama kae fakaeteete foki?
17 E ‵tau mo tatou o loto malamalama. E isi se tapula ki ‵tou malosi taki tokotasi. Tela la, e ‵tau o fakaeteete tatou ki mea ka fai ne tatou. E pelā mo te mea tenei, e mafai o fakamāumāu ‵tou malosi mai te fakaputuga o koloa faka-te-foitino. Onoono aka la ki pati a Iesu ki se tamataene maumea telā ne ‵sili atu ki a ia: “Ne a mea e ‵tau o fai ne au ke maua ei te ola se-gata-mai?” Ne fakalogo eiloa a te tamataene ki te Tulafono. E mautinoa eiloa i a ia se tagata ‵lei me e fai mai te Evagelia a Maleko me i a Iesu “ne alofa” ki a ia. Ne tuku atu ne Iesu ki te tamataene se ‵kamiga. “Fano o fakatau atu au mea,” ne fai atu a Iesu, “ko vau ei koe o fai mo oku soko.” Ne seki iloa ne tou tagata o fai tena filifiliga, kae e foliga mai me ne seki mafai o tiaki ne ia ana “kope” e uke. (Male. 10:17-22) Tela la, ne seki talia ne ia te amoga a Iesu telā ne ofo atu ki a ia kae ne tumau eiloa a ia i te pologa ki “Koloa.” (Mata. 6:24) Se a te filifiliga ka fai ne koe?
18. Ne a mea e ‵tau o fai faeloa ne tatou, kae kaia?
18 I te gasologa o taimi, se mea ‵lei ke toe iloilo aka ne tatou a mea kolā e ‵tau o fakamuamua i ‵tou olaga. Kaia? Ko te mea ke fakamautinoa aka ne tatou me e fakaaoga ne tatou a ‵tou malosi i se auala poto. Mafaufau la ki pati a se tamataene e igoa ki a Mark: “I te fia tausaga, ne mafaufau au me ne ola au i se olaga faigofie. Au ne paenia, kae ne mafaufau faeloa au ki tupe mo se olaga gali. Ne taumafai au ke malamalama i te pogai ne faigata ei toku olaga. Telā ne fatoa iloa aka ne au me ne kausaki atu au ki oku manakoga totino kae tuku atu te ‵toega o toku malosi ki a Ieova.” Ne ‵fuli a mafaufauga o Mark mo te auala ne ola ei a ia kae fakaavanoa faeloa a ia mō te galuega a Ieova. “E manavase au i nisi taimi,” e fai mai a Mark, “kae ona ko te fesoasoani a Ieova mo Iesu, ko mafai ei ne au o manumalo i oku fakalavelave.”
19. Kaia e tāua ‵ki ke maua se kilokiloga tonu?
19 Ka tumau eiloa tatou i te ‵sala atu ki te malosi fou mai lalo o te amo a Iesu māfai e fai ne tatou a mea konei e tolu. Muamua, fakatumau se kilokiloga tonu. E fai ne tatou te galuega a Ieova, tela la e ‵tau o fai i auala o Ieova. A tatou ko tino ga‵lue, kae ko Ieova ko te Matai. (Luka 17:10) Kafai e taumafai tatou o fai tena galuega i ‵tou auala, ka fai fua i ei ke faigata ki a tatou. Ke oko foki loa ki se pulumakau tagata malosi, e mafai eiloa o pakia a ia māfai e taumafai a ia o fano loa i tena auala kae se tautali i te auala telā e fakatonutonu atu ne tena matai. I te suā feitu, e mafai o fai ne tatou a mea e tai uke atu kae manumalo i so se fakalavelave māfai fua e tau‵tali tatou i te takitakiga a Ieova. Masaua me e seai se tino e mafai o taofi ne ia te faiga o te loto o Ieova!—Loma 8:31; 1 Ioa. 4:4.
20. Se a te kilokiloga e ‵tau o maua ne tatou e uiga ki te amo o te amoga a Iesu?
20 Te lua, galue mo te kilokiloga tonu. A te ‵tou fakamoemoega ko te ‵viki atu ki te ‵tou Tamana alofa ko Ieova. A tino i te senitenali muamua kolā ne fakamalosigina ne te uiga kaimanako, ne seki fia‵fia kae ne tiakina ne latou a te amo a Iesu. (Ioa. 6:25-27, 51, 60, 66; Fili. 3:18, 19) E ‵kese mai i ei, a latou kolā ne fakamalosigina ne te alofa sē fakapito ki te Atua mo te alofa ki tuakoi, ne loto fia‵fia o amo te amoga tenā i olotou olaga kātoa i te lalolagi, mo te fakamoemoega ke tavini fakatasi atu mo Keliso i te lagi. E pelā mo latou, ka tumau eiloa tatou i te fia‵fia mai te amo ne tatou a te amoga a Iesu mo se kilokiloga tonu.
21. E ‵tusa mo te Mataio 6:31-33, se a te mea e mafai o fakamoe‵moe tatou ke fai ne Ieova?
21 Te tolu, ke maua ne fakamoemoega ‵tonu. Ne filifili ne tatou se olaga ke talia a mea faiga‵ta kae ke ga‵lue malosi. Ne fakailoa mai ne Iesu me ka fakasauagina tatou. Kae e mafai o fakamoe‵moe tatou me ka tuku mai ne Ieova a te malosi ke kufaki i so se mea faigata. Ko te lasi o te ‵tou kufaki, ko te ma‵losi foki o tatou. (Iako. 1:2-4) E mafai foki o fakamoe‵moe tatou me ka tuku mai ne Ieova a mea e ma‵nako tatou ki ei, me ka tausi tatou ne Iesu, kae ka fakamalosi tatou ne ‵tou taina mo tuagane. (Faitau te Mataio 6:31-33; Ioa. 10:14; 1 Tesa. 5:11) Ne a foki la a nisi mea koi manakogina ne tatou?
22. Se a te mea e ‵tau o loto fakafetai tatou ki ei?
22 A te fafine telā ne faka‵lei ne Iesu ne maua ne ia te malosi fou i te aso eiloa telā ne faka‵lei ei tou fafine. Kae e mafai eiloa o maua ne ia te malosi fou ki te se-gata-mai māfai fua e fai a ia mo soko fakamaoni o Keliso. Se a tau faka‵tau, ne a ana mea ne fai? Kafai ne filifili ne tou fafine ke fai a ia mo soko o Iesu, mafaufau aka la ki te taui—ke tavini fakatasi a ia mo Iesu i te lagi! So se mea faigata ne talia ne ia ke tautali atu i a Keliso ka aoga ‵ki eiloa. Faitalia me se a ‵tou fakamoemoega—me ola ki te se-gata-mai i te lagi io me i te lalolagi nei—e loto fakafetai eiloa tatou me ne talia ne tatou a te ‵kamiga a Iesu: “O‵mai ki a au!”
PESE 13 Keliso te ‵Tou Fakaakoakoga ‵Lei
^ pala. 5 E ‵kami ne Iesu tatou ke olo atu ki a ia. Ne a mea e aofia i te taliaga o te ‵kamiga a ia? Ka tali mai ne te mataupu tenei a te fesili tenā, kae ka fakamasaua mai ki a tatou e uiga ki te auala e mafai o maua ne tatou te malosi fou mai te ga‵lue fakatasi mo Keliso.
^ pala. 60 FAKAMATALAGA O ATA: E uke auala ne tuku atu ei ne Iesu a te malosi fou ki nisi tino.
^ pala. 66 FAKAMATALAGA O ATA: I se auala tai ‵pau, e fai eiloa se taina e pelā me se fakamalosiga ki nisi tino i auala kese‵kese.