Kai faitau faka‵lei eiloa koe ki lōmiga ‵fou o Te Faleleoleo Maluga? Onoono aka, me e mafai o tali mai ne koe a fesili konei:

Kaia ne talia ei ne Ieova a taua i Isalaelu i aso mua?

A Ieova e alofa. Kae i nisi taimi, ne talia ne ia a taua māfai ko fakama‵taku a mea ma‵sei mo puapuaga ki ana tino. E fakaiku aka eiloa ne te Atua a tino kolā e ‵kau atu ki te taua e pelā foki mo te taimi.—w15 1/11, itu. 4-5.

Ne a mea tāua e mafai o fai ne mātua ke fakaakoako olotou tama‵liki kolā talavou ke tavini atu ki a Ieova?

Se mea tāua ke fakaasi atu ne mātua a te alofa ki olotou tama‵liki talavou kae fakaasi atu te loto maulalo e auala i olotou fakaakoakoga. E tāua foki ke fakaasi atu ne mātua a te poto kae taumafai malosi ke malama‵lama i olotou tama‵liki kolā ko talavou.—w15 15/11, itu. 9-11.

Kaia e se ‵tau ei o ‵kilo atu ki te pope e pelā me ko te sui o Petelu?

E se fai mai i te Mataio 16:17, 18 me i te apositolo ko Petelu ko te ulu o te fakapotopotoga Kelisiano. E fakaasi mai i te Tusi Tapu me i lō te fakatāua o Petelu, a Iesu ko te fatu tulimanu o te fakapotopotoga. (1 Pe. 2:4-8)—w15 1/12, itu. 12-14.

Kaia e ‵tau ei o mafau‵fau faka‵lei a koi tuai o fa‵pati?

Ke fakaaoga faeloa ‵tou gutu, e ‵tau o masaua ne tatou  (1) te taimi ke faipati atu (Fai. 3:7), (2) pati e ‵tau o fai atu (Faata. 12:18), a ko te (3) te auala e faipati atu ei (Faata. 25:15).—w15 15/12, itu. 19-22.

Ne a nisi auala sē fakamaoni e ‵kalo keatea a Kelisiano mai i ei?

E ‵kalo keatea a Kelisiano ‵tonu mai i te pati ‵loi mo te gutu fatufatu o nisi tino. E se fai ne latou a tala ‵loi kae fakamasei kolā e fakapa‵kia atu ki nisi tino, kae e se fai foki ne latou a aofaga ma‵sei io me kai‵soa.—wp16.1, itu. 5.

Ko oi a “faitaulaga pule” kolā ne taku mai i te Tusi Tapu?

A te tugapati ko te “faitaulaga pule” e mautinoa eiloa me e fakasino atu ki sui ‵tonu o te kāiga faitaulaga, e aofia i ei a faitaulaga sili mua kolā ne faka‵tea.—wp16.1, itu. 10.

E ‵tau o pefea ‵tou faifaiga ki se tino telā e fakaaoga ne ia a mea fakatusa i te fakamanatuga?

E se fakamaluga ne Kelisiano a latou kolā e fakaaoga ne latou a mea fakatusa. A te tino fakaekegina tonu e se manako eiloa ke fakamaluga aka a ia; e se manako o fakaasi atu ki tino a tena tulaga i mua o te Atua. (Mata. 23:8-12)—w16.01, itu. 23-24.

Se a te mea e mafai o tauloto ne tatou mai te fai o Apelaamo mo fai se taugasoa o te Atua?

Ne iloa ne Apelaamo a mea e uiga ki te Atua, kāti mai i a Semu. Kae ne maua ne ia te atamai mai i faifaiga a te Atua ki a ia mo tena kāiga. E mafai foki o taumafai tatou ke fai penā.—w16.02, itu. 9-10.

Ne fakatoka pefea a mataupu mo fuaiupu i te Tusi Tapu?

A Stephen Langton telā ne fai mo fai se pisopo i te 13 senitenali, ne vaevae ne ia a te Tusi Tapu ki mataupu. Ne vaevae aka ne se tino fai ‵kopi Iutaia a fuaiupu ki te Tusi Tapu faka-Epelu, kae i te 16 o senitenali, ne vaevae aka ne Robert Estienne a fuaiupu i te Tusi Tapu Kelisiano faka-Eleni.—wp16.2, itu. 14-15.

E mata, ne avatu tonu eiloa ne Satani a Iesu ki te faletapu ke tofotofo aka a ia?

E se mafai ne tatou o fai atu se mea mautinoa. Ne mafai o fakauiga a te Mataio 4:5 mo te Luka 4:9 me ne avatu a Iesu ki konā i se fakaasiga io me ne tu atu a ia i se koga maluga telā e lavea atu ei a te faletapu.—w16.03, itu. 31-32.

Ne a auala e mafai ei o fai ‵tou galuega faka-Kelsiiano e pelā me se ‵sau o te vaveao?

E ‵sae malielie aka a te sau kae e fakamalosi kae aoga foki ki te ola. A te ‵sau tonu se fakamanuiaga mai i te Atua. (Teu. 33:13) A taumafaiga fai fakatasi a tino o te Atua i te galuega talai e tai ‵pau eiloa.—w16.04, itu. 4.