1. Kaia e fai ei a Ieova mo fai te ‵toe Tino sili i te faite o mea ki kele?

I A Novema 2010, ne fai se kapotaeka i Lonitona, i Egelani mō se tia kele a te kau Saina i te 18 senitenali, toeitiiti kae kātoa te 70 miliona tālā. E manino ‵lei i ei, me e mafai ne se tino faite mea ki kele o ‵fuli sena mea ne faite ki se ipu kele gali kae ‵togi ‵mafa. Kae e seai eiloa se tino faite mea ki kele e mafai o fakatusa ne ia a ia eiloa ki a Ieova. I te fakaotiotiga o te ono o aso ne faite ei a mea, ne faite ne te Atua mai “mu [kele] mai i te laukele” se tagata ‵lei katoatoa kae maua ne ia te atamai ke fakaasi atu a uiga o te Tino ne faite ne ia a ia. (Kene. 2:7) A te tagata ‵lei katoatoa tenā ko Atamu, telā ne faite mai te kele, ne ‵tau eiloa o taku ki “te tama a te Atua.”—Luka 3:38.

2, 3. E fakaakoako atu pefea tatou ki te uiga loto sala‵mo o te kau Isalaelu?

² Kae ne galo atu i a Atamu tena tulaga e pelā me ko te tama i te taimi ne ‵teke atu ei a ia ki te Tino ne faite ne ia a ia. E tiga eiloa te feitu tenā, e isi “ne Molimau e tokouke” mai i te gafa telā ne fakasolo mai i a Atamu, ne filifili ke fakamaluga aka ne latou te pulega sili a te Atua. (Epe. 12:1) Mai te faka‵logo mo te loto maulalo ki te Mafuaga, ne fakaasi atu ei ne latou me ne ma‵nako latou ki a ia, e se ko Satani, ke fai mo fai te lotou Tamana mo te Tino faite ki mea mai kele. (Ioa. 8:44) A te a‵lofa fakamaoni ki te Atua e fakamasaua mai i ei a pati a  Isaia e uiga ki tino Isalaelu loto sala‵mo: “E Ieova, a ko koe ko te motou Tamana. A matou ko te kele, kae ko koe ko te motou Tino faite mea ki kele; a matou ko galuega katoa a tou lima.”—Isa. 64:8, NW.

³ I aso nei, e taumafai eiloa a tino katoa kolā e tapuaki ki a Ieova i te agaga mo te munatonu ke fakaasi atu a te kilokiloga loto maulalo kae fakalogo tenā. E ‵kilo atu latou ki ei pelā me se tauliaga ke fakasino atu ki a Ieova e pelā me ko te Tamana kae faka‵logo ki a ia e pelā me ko te lotou Tino faite mea ki kele. E a, e fai koe pelā me se kele i lima o te Atua, e loto fiafia ke fulifuli ne ia koe ki se mea telā e gali i tena kilokiloga? E a, e lavea foki ne koe ou taina mo tuagane faka-te-agaga ko fulifuli olotou olaga, me ko galue te Atua o fulifuli latou? Ke fesoasoani mai ki a tatou i te feitu tenā, ke na mafau‵fau tatou ki feitu e tolu o te galuega a Ieova e pelā me se Tino faite mea ki kele: Te auala e filifili ei ne Ieova a latou kolā ka fulifuli ne ia, te pogai e fulifuli ei ne Ieova ana tino, mo te auala e fulifuli ei ne te Atua a latou kolā e faka‵logo ki a ia.

4. E filifili aka pefea ne Ieova a latou kolā e fai ne ia ke tosina atu ki a ia? Tuku mai ne fakaakoakoga.

⁴ Kafai e kilokilo mai a Ieova ki tino, e se kilo mai fua a ia ki foliga i tua. I lō te fai penā, e iloilo ne ia a te loto o te tino. (Faitau te 1 Samuelu 16:7e.) Ne fakaasi faka‵lei mai eiloa a te manatu tonu tenei i te taimi ne fakatu aka ei ne te Atua a te fakapotopotoga Kelisiano. Ne fai ne ia ke tosina atu ki a ia mo tena Tama a tino e tokouke kolā ne foliga mai i te kilokiloga a tino e pelā me ko seai ne aoga. (Ioa. 6:44) Se tokotasi mai i tino konā ko te Falesaio e igoa ki a Saulo—“se tino ne muna masei, ne uiga fakasaua kae fia sili.” (1 Timo. 1:13) Ne seki kilo atu a te ‘tino e iloilo ne ia te loto o te tagata’ ki a Saulo e pelā me e seai sena aoga. (Faata. 17:3) Kae, ne lavea ne te Atua me e mafai o ‵fuli ne ia ki se tino aoga—a te ‵tonuga loa, “ne filifili” a ia ke molimau “ki fenua fakaa‵tea e pelā foki mo tupu mo te fanauga a Isalaelu.” (Galu. 9:15) Kae ko nisi tino kolā ne kilo atu ki ei a te Atua e pelā me se ipu telā e mafai o ‵fuli “mō se mea ‵lei” ne aofia i ei a tino ne ko‵nā muamua, tino amio ma‵sei, mo tino kai‵soa. (Loma 9:21; 1 Koli. 6:9-11) I te taimi ne maua ei ne latou te iloaga tonu i te Muna a te Atua kae fakaasi atu te lotou fakatuanaki, ne talia eiloa ne latou ke ‵fuli latou ne Ieova.

5, 6. Ona ko te ‵tou tali‵tonu ki a Ieova e pelā me ko te ‵tou Tino faite mea ki kele, e ‵tau o pokotia pefea ‵tou kilokiloga ki (a) tino i te galuega talai? (e) ‵tou taina mo tuagane?

⁵ E fesoasoani mai pefea a mea konei ki a tatou? A te ‵tou talitonu ki te malosi o Ieova o iloa a loto o tino kae fai ke tosina atu ki a ia a latou kolā e filifili ne ia, e ‵tau o puipui ei tatou mai te fakamasino atu ki nisi tino, i ‵tou koga talai mo ‵tou fakapotopotoga. Mafaufau ki se tagata e igoa ki a Michael. “I te taimi ne āsi mai ei a Molimau a Ieova,” ne fai mai tou tagata, “e fulitua atu fua au kae fakapuli atu fua e pelā me e se ‵nofo mai latou. Ko se faka‵tau eiloa toku fakamaualuga! Fakamuli ifo, i te suā koga, ne fetaui au mo se kāiga telā ne tavae sāle ne au ona ko olotou amioga ‵lei. Kae i te aso e tasi ne poi masei au—a latou ne Molimau a Ieova! Ne fai eiloa ne olotou amioga ke iloilo aka ne au te pogai o toku fakailoga tino. Ne fatoa iloa aka ne au me ne fakavae eiloa taku kilokiloga ki te sē iloa mo tala ‵loi, kae e se ki fakamatalaga ‵tonu.” Ke maua a fakamatalaga ‵tonu, ne talia ne Michael se akoga faka-te-Tusi Tapu. Fakamuli ifo, ne kau mai a ia ki te munatonu kae aofia i te taviniga tumau.

⁶ A te taliaga ne tatou a Ieova e pelā me ko te ‵tou Tino faite mea ki kele e mafai foki o pokotia ei ‵tou kilokiloga ki taina tali‵tonu. E a, e kilo atu koe ki ou taina mo tuagane e pelā mo te kilokiloga a te Atua—e se pelā me se mea ko oti ne faite, kae e pelā me se mea koi fai eiloa a ‵fuliga ki ei? E mafai o lavea ne ia a te loto o te tino mo te vaegā tino e mafai o ‵fuli ne ia ki ana lima. Tela la, e maua ne Ieova se kilokiloga aoga e uiga ki tino kae e iloa ne ia a olotou tulaga sē  ‵lei katoatoa e se tumau. (Sala. 130:3) E mafai o fakaakoako atu tatou ki a ia mai te mauaga o se kilokiloga ‵lei ki ana tavini. A te ‵tonuga loa, e mafai o ga‵lue fakatasi tatou mo Ia mai te ‵lago atu ki ‵tou taina mo tuagane i te taimi e taumafai ei latou ke ga‵solo atu ki mua i te feitu faka-te-agaga. (1 Tesa. 5:14, 15) I te fai mo “tāgata e pelā me ne meaalofa,” e ‵tau o fai ne toeaina a te takitakiga i te feitu tenei.—Efe. 4:8, 11-13.

7. Kaia e fakatāua ei ne koe a te polopolokiga a Ieova?

⁷ Kāti ne lagona ne koe se tino e fai mai penei: ‘Ne seki fakatāua malosi ne au a polopolokiga ne maua ne au mai i oku mātua ke oko ki te taimi ne isi ei ne aku tama‵liki.’ Kafai e momea aka ‵tou atamai i te olaga, e mafai o ‵kilo atu tatou ki polopolokiga mai i se kiloga fou kae ka ‵kilo tatou ki ei e pelā mo te kilo a Ieova, e pelā me se fakaasiga o tena alofa. (Faitau te Epelu 12:5, 6, 11.) Ao, ona ko te alofa ki ana tama‵liki, e fulifuli eiloa mo te kufaki ne Ieova a tatou. E manako a ia ko tatou ke ‵poto kae fia‵fia, kae ke a‵lofa atu foki ki a ia. (Faata. 23:15) E se fiafia a ia ke logo‵mae tatou; io me ke ‵mate tatou e pelā me ne “fanau o te kaitaua,” telā ko te fakamoemoega ne togi mai ne Atamu.—Efe. 2:2, 3.

8, 9. E akoako pefea ne Ieova a tatou i aso nei, kae e fakatumau pefea a te akoakoga tenei i aso mai mua?

⁸ E pelā me ne “fanau o te kaitaua,” ne fakaasi atu muamua ne tatou a uiga e uke kolā e se fakafiafia atu ki te Atua, kāti e aofia i ei a nisi uiga fakamanu! Kae e fakafetai tatou ki te fulifuliga a Ieova, ne ‵fuli ei tatou; ko fai ei tatou e pelā me ne mamoe. (Isa. 11:6-8; Ko. 3:9, 10) Tela la, a fakanofonofoga kolā e fulifuli nei tatou ne Ieova e fai pelā me se palataiso faka-te-agaga telā e fulifuli ne ia tatou i te taimi nei. E maua i ei ne tatou a te tokagamalie faitalia a te lalolagi masei e ‵nofo tatou i ei. E se gata i ei, ko latou kolā ne ‵tupu aka i kāiga sē a‵lofa kae fai valevale, ko fatoa maua ne latou a te alofa tonu. (Ioa. 13:35) Ne tauloto ne tatou a auala ke fakaasi atu te alofa ki nisi tino. E sili atu i mea katoa, ko iloa ‵lei ne tatou a Ieova kae lagona foki nei ne tatou tena alofa fakatamana.—Iako. 4:8.

⁹ I te lalolagi fou, ka maua katoatoa eiloa ne tatou a fakamanuiaga i te palataiso faka-te-agaga. Kae ka maua foki ne tatou te fiafia i te palataiso faka-te-foitino—ko te palataiso tonu mai lalo i te Malo o te Atua. I te taimi tenā e toe faka‵fou aka ei a mea i te lalolagi kātoa, ka tumau eiloa a Ieova i te fulifuli o tino i te lalolagi, kae akoako foki i se auala telā e faigata o fakaataata i ‵tou mafaufau i aso nei. (Isa. 11:9) E se gata i ei, ka fai ne te Atua ‵tou mafaufau mo foitino ke ‵lei katoatoa, ko te mea ke mafai o maua ne tatou ana akoakoga kae fai katoatoa foki tena loto. Tela la, ke na fakaiku aka ne tatou ke tumau i te faka‵logo ki a Ieova, mai te fakaasi atu me e ‵kilo atu tatou ki tena fulifuliga e pelā me se fakaasiga o tena alofa ki a tatou.—Faata. 3:11, 12.

10. Ne fakaasi atu pefea ne Iesu a te kufaki mo te atamai o te Tino sili i te faite mea ki kele?

¹⁰ E pelā me se tino apo i te faite mea ki kele, e iloa ne Ieova a te vaegā “pefu” mo tena malosi, kae e ‵fuli eiloa ne ia ki ei e ‵tusa mo mea konā. (Faitau te Salamo 103:10-14.) A te ‵tonuga loa, e iloa ne Ieova a tatou taki tokotasi, e iloa ne ia ‵tou vāivāiga, ‵tou tapula, mo te tulaga o ‵tou gasolo ki mua i te feitu faka-te-agaga. Ne fakaasi mai eiloa ana faifaiga ki ana tavini sē ‵lei katoatoa e auala i tena Tama. Mafaufau ki faifaiga a Iesu ki vāivāiga o ana soko, maise eiloa ki te lotou kinau ‵soko me ko oi e sili i a latou. Kafai ne lavea ne koe a te fakatau kinau o te kau apositolo, e mata, ka kilo atu koe ki tāgata konei e pelā me ne tino agamalū kae fulifuligofie? Kae ne seki maua ne Iesu se kilokiloga sē ‵lei. Ne iloa ne ia me ne mafai o fulifuli ana apositolo fakamaoni ki pati atafai, fakatonutonu mo te kufaki mo te kilo‵kilo atu ki tena fakaakoakoga ko te loto maulalo. (Maleko 9:33-37; 10:37, 41-45; Luka 22:24-27) Mai  tua o te toetuga o Iesu mo te ‵ligiifoga o te agaga tapu, ne ‵saga tonu atu a apositolo ki te galuega ne tuku atu ke fai ne latou kae e se ki tulaga maluga.—Galu. 5:42.

11. Ne a auala ne fai ei a Tavita e pelā me se kele malūlū, kae e mafai pefea o fakaakoako atu tatou ki a ia?

¹¹ E fulifuli muamua ne Ieova ana tavini i aso nei e auala i tena Muna, tena agaga tapu, mo te fakapotopotoga Kelisiano. E mafai o fulifuli tatou ne te Muna a te Atua i te taimi e fai‵tau faka‵lei ei tatou ki ei, mafaufau ‵loto ki ei, kae akai atu ki a Ieova mō se fesoasoani ke fakagalue aka ne tatou. Ne tusi mai a Tavita: “Kafai e takato au i toku moega e masaua ne au koe; e mafaufau foki au ki a koe i te po katoa.” (Sala. 63:6) Ne tusi mai foki a ia: “E tavae au ki [a Ieova], me takitaki ne ia au, kae fakatonu mai foki ne ia au i te po.” (Sala. 16:7) Ao, ne talia ne Tavita a pati polopoloki mai te Atua ke goto ki tena ‵loto, ke ‵fuli ei ana mafaufauga mo lagonaga ‵loto, faitalia te ‵mafa o pati polopoloki. (2 Samu. 12:1-13) Ko oko eiloa i te ‵lei o te fakaakoakoga o te loto maulalo mo te fakalogo ne fakaasi mai ne Tavita! E mata, e mafaufau ‵loto koe ki te Muna a te Atua, mai te taliaga ke fakatonutonu ne ia ou lagonaga ‵loto? E mata, e ‵tau o momea aka tou mafaufau ‵loto ki ei?—Sala. 1:2, 3.

12, 13. E fulifuli pefea tatou ne Ieova e auala i tena agaga tapu mo te fakapotopotoga Kelisiano?

¹² E mafai eiloa o fulifuli tatou ne te agaga tapu i auala e uke. E pelā me se fakaakoakoga, e mafai ne ia o fesoasoani mai ke ati aka a uiga o Keliso, kolā e fakaasi mai i fuataga o te agaga o te Atua. (Kala. 5:22, 23) A te alofa se vaega e tasi o fuataga konā. E a‵lofa tatou ki te Atua kae e ma‵nako tatou ke faka‵logo kae fulifuli ne ia tatou, ona ko te iloa atu me e se ‵mafa ana fakatonuga. E mafai foki o tuku mai ne te agaga tapu a te malosi ke ‵teke atu ki fulifuliga ma‵sei a te lalolagi mo tena agaga masei. (Efe. 2:2) A te apositolo ko Paulo, telā ne lasi ‵ki te fakamalosiga a takitaki lotu fakamata‵mata o te kau Iutaia ki a ia e pelā me se talavou, ne mafai o tusi fakamuli mai: “Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.” (Fili. 4:13) Tela la, e pelā mo Paulo, ke tumau i te akai atu mō te agaga tapu. Ka talia eiloa ne Ieova a fakatagi mo te fakamaoni a tino loto mau‵lalo.—Sala. 10:17.

¹³ E fakaaoga ne Ieova a te fakapotopotoga Kelisiano mo ana ovasia ke fulifuli tatou taki tokotasi. E pelā me se fakaakoakoga, kafai ko lavea ne toeaina me e fe‵paki tatou mo fakalavelave i te feitu faka-te-agaga, e taumafai  latou o fesoasoani mai—kae e se fakavae te lotou fesoasoani ki te poto o te tagata. (Kala. 6:1) I lō te fai penā, e ‵kilo atu latou mo te loto maulalo ki te Atua, kae akai atu mō te malamalama mo te poto. E iloa ‵lei ne latou ‵tou tulaga, tela la e ‵tusa mo olotou ‵talo, e sukesuke latou ki te Muna a te Atua mo ‵tou tusi faka-Kelisiano ke fesoasoani mai ki a tatou. E mafai ei o toka latou ke fakafetaui aka te lotou fesoasoani ki ‵tou manakoga. Kafai e au‵mai latou ki a koe o tuku atu se fesoasoani atafai kae alofa, e pelā mo te auala e fai ei ou gatu mo teuga, e mata, ka talia ne koe olotou pati fakatonutonu e pelā me se fakaasiga o te alofa o te Atua ki a koe? Mai te faiga penā, e fakamaoni atu ei ne koe me i a koe se kele malūlū i lima o Ieova, telā ko toka ke fulifuligina kae maua ne koe a mea aoga mai i ei.

14. E tiga eiloa e isi sena pulega ki luga ki te kele, e fakaasi mai pefea ne Ieova a te āva ki ‵tou saolotoga ke fai a filifiliga?

¹⁴ A te malamalama i te auala e fulifuligina ei tatou ne te Atua, e mafai o fesoasoani mai i ‵tou fesokotakiga mo taina tali‵tonu mo ‵tou kilokiloga ki tino i ‵tou koga talai, e aofia i ei ‵tou akoga faka-te-Tusi Tapu. I taimi o te Tusi Tapu, a te tino faite mea ki kele, e se keli ne ia ne nai kele kae kamata fakavave o faite ne ia se mea mai i ei. E fakatoka muamua ne ia te kele, e tasi mai i ei, ko te tapalepalega o fatu mo nisi mea sē aoga mai i ei. I te feitu faka-te-agaga, e fesoasoani mai te Atua ke fakatoka ne ia a tino loto fia‵fia taki tokotasi ko te mea ke mafai ne ia o fulifuli latou. E se faimalo ne ia tatou ke fai a ‵fuliga, kae e fakaasi mai ne ia ana tulaga amio‵tonu ko te mea ke mafai o faka‵ma olotou olaga io me e fai a ‵fuliga mo te lotomalie.

15, 16. E fakaasi atu pefea ne akoga faka-te-Tusi Tapu me e ma‵nako latou ke fulifuli ne Ieova? Fakamatala mai.

¹⁵ Mafaufau ki te tala o Tessie, se tuagane i Ausetalia. “Ne tauloto a Tessie ki te munatonu i te Tusi Tapu kae seki fakatāua ne ia,” ko pati a te tuagane ne fai ne ia tena akoga. “Kae e seai eiloa ne ana taumafaiga ke gasolo atu ki mua i te feitu faka-te-agaga—ke oko foki eiloa ki te sē kau atu ki fakatasiga Kelisiano! Tela la, mai te mafaufau faka‵lei kae ‵talo e uiga ki ei, ne fakaiku aka ne au ke taofi tena akoga. Kae ne tupu eiloa se mea fakaofoofogia. I te taimi telā ne mafaufau au me ko te mā toe akoga faka-te-Tusi Tapu, ne fakaasi mai ne Tessie a mea i tena loto. Ne fakaasi mai ne tou fafine ana lagonaga me i a ia se tino loi ona ko te mea ne aofia a ia i te kemupolo. Kae nei la, ko oti ne fakaiku aka ne ia ke fakagata tena amioga masani tenei.”

¹⁶ E seki leva, ne kamata o kau atu a Tessie ki fakatasiga Kelisiano kae fakaasi atu foki a uiga faka-Kelisiano—ke oko foki eiloa ki te fe‵paki o tou fafine mo fakatauemuga mai i ana taugasoa. Ne toe fai mai te tuagane: “Mai tua ifo, ne papatiso a Tessie kae ne tavini atu fakamuli e pelā me se paenia tumau, tiga eiloa koi fo‵liki ana tamaliki.” Ao, kafai ko kamata o faka‵ma ne akoga faka-te-Tusi Tapu olotou olaga ke fakafiafia atu ki te Atua, ka fakapilipili atu eiloa a Ia ki a latou kae fulifuli latou ke fai pelā me ne mea e tāua ‵ki.

17. (a) Se a te mea e gali ei ki a koe a te fai o Ieova mo fai tau Tino faite ki mea ki kele? (e) Ne a nisi fulifuliga ka mafau‵fau ki ei tatou i te suā taimi?

¹⁷ Ke oko mai ki aso nei, a nisi meaafale kele koi faite eiloa ki lima, kae e fakagaligali eiloa ne te tino faite mea ki kele a tena mea e faite. E pena foki a te ‵tou Tino faite mea ki kele e ga‵lue fakatasi mo tatou mo te loto kufaki, mai te fulifuliga o tatou ki ana pati fesoasoani kae kilokilo mai ki te auala e ‵saga atu ei tatou ki ei. (Faitau te Salamo 32:8.) E mata, e lagona ne koe te saga tonu atu o Ieova ki a koe? E mata, e lavea atu a te fulifuli o koe ki ana lima atafai? Kafai e penā loa, ne a nisi uiga ka fesoasoani atu ke tumau koe e pelā mo kele kolā e mafai o faite ki ei so se mea i mua o Ieova? Ne a uiga e ‵tau mo koe o ‵kalo keatea mai i ei ko te mea ke se uiga makeke koe kae fui ‵fuli? Kae e mafai pefea o ga‵lue fakatasi a mātua mo Ieova i te fulifuliga o olotou tama‵liki? Ka fakamatala mai i te suā mataupu a mea konei.