1, 2. Ne ‵valo mai pefea i te Tusi Tapu a te gasoloakaga o tokouke a tino Ieova?

A TAVINI fakamaoni a Ieova i te lalolagi nei, kolā ko ana Molimau, e aofia i se fakapotopotoga telā e tu ‵kese. E tonu, e aofia i ei a tino sē ‵lei katoatoa kae fai mea ‵se foki. Kae koi fakagasuesue eiloa ne te agaga tapu o te Atua a tena fakapotopotoga i te lalolagi kātoa ke gasolo o tokouke kae malosi. Mafaufau ki nai mea ‵gali kolā ko oti ne fai ne Ieova ki ana tino loto fia‵fia, faitalia te lotou tulaga sē ‵lei katoatoa.

² I te taimi ne kamata ei aso fakaoti o te olaga masei tenei i te 1914, ne mu‵tana fua a tavini a te Atua i te lalolagi. Kae ne fakamanuia ne Ieova te lotou galuega talai. Mai tua o te fia sefulu o tausaga, ne tauloto a te fia miliona o tino ‵fou ki muna‵tonu i te Tusi Tapu kae fai mo fai ne Molimau a Ieova. Ne fakasino tonu atu eiloa a Ieova ki te gasoloakaga fakaofoofogia tenei, ana muna: “A te tino foliki ka fai pelā me se tokoafe. Kae ko te tino fatauva ka fai mo atufenua malosi. Au, Ieova, ka fakava‵vave ne au te mea tenā i tena taimi tonu.” (Isa. 60:22, NW) Ko oti eiloa ne fakataunu a te fakamatalaga fakapelofeta tenā i aso fakaoti konei. Tela la, a te aofaki o tino o te Atua i te lalolagi ko silia atu nei i te aofaki o tino i te ukega o fenua.

3. Ne fakaasi atu pefea ne tavini a te Atua a te alofa?

 ³ I te taimi tenei, ko oti foki ne fesoasoani atu a Ieova ki ana tino ke ati aka ne latou se uiga sili i te tāua—ko te alofa. (1 Ioane 4:8) A Iesu, telā ne fakaakoako ki te alofa o te Atua, ne fai atu ki ana soko: “Ko tuku atu ne au ki a koutou se fakatonuga fou, ke fakatau a‵lofa koutou . . . Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.” (Ioa. 13:34, 35) Ne momea aka te tāua o te uiga tenei maise eiloa i tala fakamuli nei i te taimi ne aofia ei a atufenua i taua tamate tino kolā e fakapoi ‵ki ki tino. E pelā me se fakaakoakoga, kāti e toko 55 miliona a tino kolā ne tamate i te Taua i te Lua a te Lalolagi. Kae ne seki ‵kau atu a Molimau a Ieova ki te tamatega tenā i te lalolagi. (Faitau te Mika 4:1, 3.) Ne fesoasoani atu a te mea tenei ki a latou ke tumau i te “‵ma i toto o tino katoa.”—Galu. 20:26.

4. Kaia e fakaofoofogia ei te gasolo aka ki luga te aofaki o tino o Ieova?

⁴ E gasolo aka eiloa ki luga te aofaki o tino o te Atua i se lalolagi matagā, telā e fai mai te Tusi Tapu me e pule ki ei a Satani, “te atua o te olaga masani tenei.” (2 Koli. 4:4) E fakatonutonu ne ia a vaega fakapolitiki o te lalolagi, penā foki mo mea e fai ne ia ki mea fakasalalau a te lalolagi. Kae e se mafai o fakagata ne ia a te talaiatuga o te tala ‵lei. Kae ona ko te mea e iloa ne ia me ko toetoe fua tena taimi, e taumafai a Satani ke ‵fuli kea‵tea a tino mai te tapuakiga tonu, kae e fakaaoga ne ia a auala kese‵kese ke fai penā.—Fa. 12:12.

5. Kaia e fai ei ne nisi tino ke logo‵mae tatou i nisi taimi? (Ke onoono ki te ata i te kamataga.)

⁵ E faka‵mafa atu ne te fakapotopotoga Kelisiano a te tāua o te alofa ki te Atua mo tino. Ne fakaasi mai ne Iesu me ka fai eiloa penā. I te tali atu ki se fesili e uiga ki te ‵toe fakatonuga sili, ne fai atu a ia: “‘E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.’ Tenei te ‵toe fakatonuga sili kae tu muamua. E penā foki te lua o fakatonuga: ‘E ‵tau mo koe o alofa ki tou tuakoi e pelā mo koe ki a koe eiloa.’” (Mata. 22:35-39) E tiga eiloa te feitu tenā, e fakaasi manino mai i te Tusi Tapu me ona ko te agasala a Atamu, ne fa‵nau mai tatou katoa mo te sē ‵lei katoatoa. (Faitau te Loma 5:12, 19.) Tela la, i nisi taimi e mafai o logo‵mae tatou i pati io me ko faiga a nisi tino i te fakapotopotoga. E mafai o tofotofo aka ne te mea tenei ‵tou a‵lofa ki a Ieova mo ana tino. Ne a mea ka fai ne tatou i vaegā taimi penā? Ke oko foki eiloa ki tavini fakamaoni a te Atua i aso mua ne fai olotou pati io me ne fai ne latou a mea ke logo‵mae ei a nisi tino, kae e mafai o tauloto ne tatou a mea mai te Tusi Tapu e uiga ki ei.

6. I te auala fea ne fakatamala ei a Eli o polopoloki ana tama tāgata?

⁶ E pelā me se fakaakoakoga, a te Faitaulaga Sili ko Eli e isi ne ana tama tāgata e tokolua kolā ne seki taofi ‵mau ki tulafono a Ieova. E fai‵tau tatou: “A tama tagata a Eli ne tama ma‵sei. E se fia ‵saga lele laua ki te Aliki.” (1 Samu. 2:12) E tiga eiloa ne maua ne te lā tamana se tulaga tāua i te tapuakiga tonu, ne fai ne ana tama tagata e tokolua a agasala matagā. Ne iloa ne Eli a te mea tenei kae ne ‵tau o polopoloki ne ia lāua, kae ne fakatamala tou tagata o fai penā. Ne fakaoko atu ei te fakamasinoga a te Atua ki te kau kāiga kātoa. (1 Samu. 3:10-14) E se leva kae ne seki toe talia ke tavini atu tena kau kāiga e pelā me ne faitaulaga sili. Moi ne ola atu koe i aso o Eli, se a tau kilokiloga e uiga ki te fakatamala o Eli o polopoloki ana tama tā‵gata ki lā agasala ne fai? E mata, ka talia ne koe te mea tenei ke fakavāivāi atu ki a koe ke oko ki te taimi ko se fia tavini atu ki te Atua?

7. Ne fai pefea ne Tavita se agasala matagā, kae ne a mea ne fai ne te Atua ki ei?

⁷ Ne fiafia malosi a Ieova ki a Tavita, telā “ne fai ne ia a mea katoa e manako [te Atua]  ki ei.” (1 Samu. 13:13, 14; Galu. 13:22) Ne mulilua fakamuli a Tavita mo Patisepa, kae ne faitama a ia. Ne tupu te mea tenā i te taimi ne nofo atu ei a te avaga a tou fafine i te taua. I te taimi ne foki mai ei tou tagata mō se taimi toetoe, ne taumafai a Tavita ke ‵moe a Ulia mo Patisepa ko te mea ke fakafoliga atu me i a ia ko te tamana o te tamaliki. Ne seki fai eiloa ne Ulia a te mea ne fai atu ne te tupu, telā ne fakatoka ei ne Tavita ke tamate tou tagata i te taua. Ne fakasala ‵mafa eiloa a Tavita mō tena solitulafono—ne oko atu fakalavelave ki luga i a ia mo tena kau kāiga. (2 Samu. 12:9-12) Kae ne fakaasi atu ne te Atua a te alofa fakamagalo ki te tagata telā ne sasale atu i mua o Ieova mo “te fakamaoni.” (1 Tupu 9:4) Moi ne nofo atu koe i va o tino o te Atua i aso konā, ka saga atu pefea koe ki ei? E mata, ka fakavāivāi atu ki a koe a amioga ma‵sei a Tavita?

8. (a) Ne fakatamala pefea a te apositolo ko Petelu o tausi ki ana pati? (e) Mai tua o te mea ‵se a Petelu ne fai, kaia ne fakaaoga faeloa ne Ieova a Petelu?

⁸ A te suā fakaakoakoga i te Tusi Tapu ko te apositolo ko Petelu. Ne filifili ne Iesu a ia e pelā me se apositolo e tokotasi; kae faipati io me e fai eiloa ne Petelu a mea kolā ne salamo fakamuli a ia i ei. E pelā mō te ‵toe taimi tāua, ne tiaki ne apositolo a Iesu. Ne fai atu muamua ne Petelu me kafai e fai penā a nisi tino, kae ka se fai a ia penā. (Male. 14:27-31, 50) E tiga eiloa te feitu tenā, i te taimi ne avatu ei a Iesu ke fakamasino, a te kau apositolo katoa—e aofia i ei a Petelu—ne tiakina ne latou a ia. Ne fakafiti faeloa ne Petelu a te manatu me e se iloa ne ia a Iesu. (Male. 14:53, 54, 66-72) Ne fakaasi atu ne Petelu a te loto salamo kae ne fakaaoga faeloa ne Ieova a ia. Moi ne fai koe mo fai se soko i aso konā, e a, ka pokotia tou alofa fakamaoni ki a Ieova ona ko faifaiga a Petelu?

9. Kaia e talitonu koe me e fai meatonu faeloa a te Atua?

⁹ A tala mai luga nei ne nai fakaakoakoga fua o tino taki tokotasi kolā ne fakalogo‵mae atu ki nisi tino. E uke foki a nisi tala penā i senitenali ko ‵teka mo aso fakamuli nei, i taimi kolā ne fai ei ne nisi kolā ne tavini atu ki a Ieova a mea ma‵sei kae fakalogo‵mae atu ei ki nisi tino. A te manatu i konei, ka saga atu pefea koe ki ei? E mata, ka fakavāivāi koe ona ko  olotou mea ‵se ne fai, ko te mea ke tiaki ne koe a Ieova mo ana tino, e aofia i ei a tino i tau fakapotopotoga? Io me talitonu koe me e tuku mai ne Ieova se taimi ki te tino fai mea ‵se ke salamo, kae ka faka‵tonu aka ne ia ana mea ‵se kae gasuesue i se auala fai meatonu? I te suā feitu, i nisi taimi, a latou kolā e ma‵sei ‵ki olotou loto lagona ona ko olotou agasala matagā, e ‵teke atu ki te alofa fakamagalo o Ieova kae e se sala‵mo. I vaegā tulaga penā, e mata, ka talitonu koe me ka fakamasino aka ne Ieova i se taimi a vaegā tino fai mea ‵se penā, kāti mai te faka‵tea o latou mai te fakapotopotoga?

10. Se a te mea ne malamalama i ei a Iesu e uiga ki mea ‵se ne fai ne Iuta te Isikaliota mo Petelu?

¹⁰ E fakaasi mai i te Tusi Tapu a tala o tavini a te Atua kolā ne a‵lofa tumau ki a Ieova mo ana tino faitalia a agasala matagā a nisi tino i olotou tafa. E pelā me se fakaakoakoga, mai tua o te ‵taloga ki tena Tamana i te po kātoa, ne filifili aka ne Iesu ana apositolo e toko 12. A Iuta te Isikaliota se tokotasi o latou. I te taimi ne fakatogafiti ei ne Iuta a ia, ne seki talia ne Keliso a te uiga masei tenā ke fakamasei ei tena fesokotakiga mo tena Tamana, ko Ieova; ne seki talia foki ne ia te fakafitiga ne Petelu a ia ke fai penā. (Luka 6:12-16; 22:2-6, 31, 32) Ne iloa ne Iesu me i mea ‵se konā e se māfua mai i a Ieova io me ko ana tino. Ne tumau a Iesu i tena galuega gali faitalia a mea fakafanoa‵noa ne fai ne ana nisi soko ki a ia. Ne taui atu ne Ieova a ia mai te toe fakatuakaga mai te mate, kae ne ‵tala mai ei te auala ke fai a Iesu mo fai te Tupu i te Malo faka-te-lagi.—Mata. 28:7, 18-20.

11. Se a te mea ne ‵valo mai i te Tusi Tapu e uiga ki tavini a Ieova i te taimi tenei?

¹¹ A te loto talitonu o Iesu ki a Ieova mo ana tino ne ‵mautakitaki eiloa kae koi fai eiloa penā. A te ‵tonuga loa, kafai e mafau‵fau tatou ki mea e fakataunu ne Ieova e auala i ana tavini i aso fakaoti konei, e fakaofoofogia eiloa. E seai aka foki ne tino e talai atu te munatonu i te lalolagi kātoa, me e se maua ne latou te takitakiga a Ieova e pelā mo tena fakapotopotoga ‵kau fakatasi i aso nei. E fakamatala mai i te Isaia 65:14, NW a te tulaga faka-te-agaga o tino o te Atua: “Kiloke! Aku tavini ka ka‵laga mo te fia‵fia ona ko te tulaga ‵lei i olotou loto.”

12. E ‵tau o pefea ‵tou kilokiloga ki mea ‵se a nisi tino?

¹² E fia‵fia a tavini a Ieova i mea ‵lei e mafai ne latou o fai ona ko te mea e takitaki latou ne Ieova. E ‵kese mai i ei, a tino kolā e ‵nofo mai lalo i fakamalosiga a Satani e fanoa‵noa, i te gasolo aka faeloa o masei te tulaga o te lalolagi. E sē se faiga poto ke tiaki ne tatou a Ieova io me ko tena fakapotopotoga i te lalolagi ona ko mea ‵se kolā e fai ne nai tavini a te Atua. E ‵tau o fakatumau te ‵tou a‵lofa fakamaoni ki a Ieova mo ana fakatokaga kae tauloto ki te auala e mafai ei o maua te kilokiloga ‵lei ki mea ‵se a nisi tino.

13, 14. (a) Kaia e ‵tau ei o fakatau fakaasi atu ne tatou a te kufaki? (e) Se a te folafolaga e ‵tau o masaua ne tatou?

¹³ E mafai pefea o ‵saga atu tatou ki mea ‵se i nai taimi māfai ko faipati io me fai ne se tavini a te Atua se mea telā e fakalogo‵mae mai ki a tatou? Tenei te akoakoga fakavae i te Tusi Tapu: “Taofiofi sāle tou kaitaua; se uiga valea o ‵teu se mea masei i tou loto.” (Fai. 7:9) E ‵tau o mafau‵fau tatou me ko nofo nei ki te 6,000 tausaga talu mai te taimi ne galo atu ei te tulaga‵lei katoatoa o tino i Etena. A tino sē ‵lei katoatoa e faigofie ke fai ne latou a mea ‵se. Tela la, ke mo a e fakamoe‵moe tatou me ka fai ne ‵tou taina tali‵tonu a mea ‵tonu i taimi katoa, kae ke mo a foki e talia ne tatou olotou mea ‵se ke ave kea‵tea ne ia te fiafia telā e maua ne tino o te Atua i aso fakaoti konei. Kae e sili atu te masei māfai ko talia ne tatou a mea ‵se a nisi tino ke fakavāivāi mai kae fai ei ke tiaki ne tatou a te fakapotopotoga a  Ieova. Kafai e tupu se mea penā, ka galo atu ei i a tatou a te tauliaga ke fai te loto o te Atua kae penā foki te fakamoemoega ki te ola i te lalolagi fou a te Atua.

¹⁴ Ke fakatumau te ‵tou fia‵fia lasi mo te fakamoemoega ‵mautakitaki, e ‵tau o masaua faka‵lei ne tatou a te folafolaga fakamafanafana loto a Ieova: “Ko toe faite nei ne au se lalolagi fou mo ne lagi fou. A mea ne ‵tupu i aso ko ‵teka ka se toe manatua eiloa.” (Isa. 65:17; 2 Pe. 3:13) Ke mo a ma talia a mea ‵se a nisi tino ke taofi aka ei koe mai te mauaga o vaegā fakamanuiaga penā.

15. Ne a muna a Iesu ki mea e ‵tau o fai ne tatou māfai ko fai ne nisi tino a mea ‵se?

¹⁵ Kae ona ko te mea e seki oko atu tatou ki te lalolagi fou, e ‵tau o mafau‵fau tatou ki te kilokiloga a te Atua ki te auala e ‵saga atu ei tatou ki pati mo faifaiga a tino kolā e fakalogo‵mae mai ki a tatou. E pelā me se fakaakoakoga, ke masaua a te akoakoga fakavae e tasi tenei a Iesu: “Me kafai e fakamagalo ne koutou olotou agasala ka fakamagalo foki koutou ne te otou Tamana telā i te lagi; kae kafai e se fakamagalo ne koutou olotou agasala ka se fakamagalo foki otou agasala ne te otou Tamana.” Ke masaua foki me i te taimi ne fesili atu ei a Petelu me e mata e ‵tau o fakamagalo ne tatou se tino “fakafitu taimi,” ne tali atu a Iesu: “Au e fai atu ki a koe, e se fakafitu taimi, kae ke fakafitu sefulu fitu taimi.” E manino ‵lei, me ne fakauiga a Iesu me e ‵tau mo tatou o loto fia‵fia ke fakamagalo atu; tenei eiloa te mea muamua e ‵tau o fai kae e ‵tau o fai mo fai te ‵toe manakoga sili.—Mata. 6:14, 15; 18:21, 22.

16. Se a te fakaakoakoga ‵lei ne tuku mai ne Iosefa?

¹⁶ A te fakaakoakoga ‵lei ki te auala ke saga atu ki mea ‵se, ne tuku mai ne Iosefa, te tama muamua a Iakopo i tama e tokolua i a Lasela. Ne loto ma‵sei a āfa taina o Iosefa ona ko te mea ne fakapelepele a ia ne te lotou tamana. Telā ne ‵togi atu ei ne latou a Iosefa e pelā me se pologa. Mai tua o te fia o tausaga, ne iku atu a galuega ‵lei ne fai ne Iosefa i Aikupito ki tena fai mo fai te tokolua ki te pule o te fenua tenā. I te taimi ne tupu ei te oge i te fenua tenā, ne olo atu a taina o Iosefa ki Aikupito ke ‵togi mai ne meakai kae ne seki lavea ne latou a ia. Ne mafai eiloa o fakaaoga ne Iosefa tena pulega ke toe taui atu a faifaiga matagā ne fai atu ne ana taina ki a ia. I lō te fai penā, ne tofotofo aka ne ia ana taina ke onoono aka me ko oti ne ‵fuli olotou uiga. I te taimi ne lavea ne Iosefa me ko ‵fuli a uiga o ana taina, ne fakailoa atu ei ne ia me ko oi a ia ki a latou. Kae ne fai atu ne ia fakamuli penei: “E seai se mea e tau o ma‵taku koutou ki ei. Ka tausi eiloa ne au a koutou mo otou tamaliki.” Ne toe fai mai te Tusi Tapu: “Tena, ne faka‵lei ei ne ia olotou loto ki ana pati alofa ki a latou.”—Kene. 50:21.

17. Se a te mea e manako koe ke fai māfai ko fai ne nisi tino a mea ‵se?

¹⁷ Se mea poto foki ke masaua te mea tenei, ona ko tatou katoa ne tino fai mea ‵se, e mafai o fai ne tatou a nisi tino ke ita. Kafai e iloa ne tatou me ko oti ne fai tatou penā, e fakatonutonu mai te Tusi Tapu ke olo atu tatou ki te tino ne fai ne tatou ke ita kae taumafai o toe faka‵lei aka te fakalavelave. (Faitau te Mataio 5:23, 24.) E fia‵fia tatou māfai e se tausi ne nisi tino ‵tou mea ‵se, tela la, e ‵tau foki o fai tatou penā ki a latou. E fakamalosi mai te Kolose 3:13: “Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā.” A te alofa faka-Kelisiano e se “fakamasausau ne ia a mea ‵se a se tino,” ko pati i te 1 Kolinito 13:5. Kafai e fakamasani tatou o fakamagalo a nisi tino, ka fakamagalo foki tatou ne Ieova. E tonu, a te auala faka-Kelisiano ke ‵saga atu ki mea ‵se a nisi tino, ko te fakaakoako ki faifaiga a te ‵tou Tamana alofa fakamagalo ki a tatou māfai ko fai ne tatou a mea ‵se.—Faitau te Salamo 103:12-14.