E fakaata mai ne latou a te kautau faka-te-lagi kolā ne aofia i te fakamaseiga o Ielusalema kae ka aofia foki latou i te fakamaseiga o te lalolagi masei a Satani i Amaketo. Kaia e fetaui ‵lei a te malamalama fou tenei?

Mai tua o te laveaga ne Esekielu a mea ma‵sei ne fai ne aposetate i Ielusalema a koi tuai o fakaseai atu latou i te 607 T.L.M., ne tuku atu ei ki a ia se fakaasiga o mea ‵tupu ke oko ki te fakamaseiga tenā. Ne lavea ne ia a tāgata e tokoono mo olotou meatau. Ne lavea foki ne ia se tagata “e pei ki gatu lino” mo se “mea tusitusi” a te failautusi. (Eseki. 8:6-12; 9:2, 3) Ne fai atu ki te tagata tenei: “Fano i loto i te fa‵kai . . . kae faka‵mau atu se fakailoga ki lae o tino katoa kolā ko oko eiloa i te fanoa‵noa kae mafatia ona ko amioga matagā katoa kolā ne fai i te fa‵kai.” I te otiga ne fai atu ei ki tāgata mo meatau ke olo atu o tamate a tino katoa i te fa‵kai kolā e se maua ne latou a te fakailoga tenā. (Eseki. 9:4-7) Se a te mea e akoako mai ne te fakaasiga tenei ki a tatou, kae ko oi te tagata mo te mea tusitusi a te failautusi?

Ne tuku atu te valoaga tenei i te 612 T.L.M., kae ko tena fakataunuga muamua ne fakasino atu ki te fakamaseiga o Ielusalema ne te kautau o Papelonia—se mea telā ne tupu i te lima tausaga mai tua ifo i ei. E tiga eiloa ne talia a te kau Papelonia ke fakaoko atu ne latou te fakamaseiga, ne fai fua latou mo fai ne tino fakaoko sala a Ieova. (Iele. 25:9, 15-18) Ne tupu te mea tenei ona ko te mea ne fakaaoga latou ne Ieova ke fakasala ana tino aposetate. Kae ne seki sona tamate valevale fua i ei a tino. Ne seki fakaseai atu a tino amio‵tonu fakatasi mo tino ma‵sei. Ne fai eiloa ne Ieova a fakatokaga mo te alofa ke faka‵sao a tino Iutaia kolā ne seki  fia‵fia ki mea matagā ne ‵tupu i te fa‵kai.

Ne seki aofia a Esekielu i te fakamailogaga io me ko te fakamaseiga. I lō te fai penā, ne takitaki ne te kau agelu a te fakaokoatuga o te fakasalaga. Tela la, e auala i te valoaga tenei, ko mafai ei o lavea ne tatou a mea e se matea, i te lagi. Ne fakatonu atu a Ieova ki agelu ke fakatoka te fakaseaiga o tino ma‵sei ke ‵vae keatea foki a tino amio‵tonu mō te faka‵saoga. *

I aso mua, ne fakamatala atu ne tatou me i te fakataunuga o te fakaasiga tenei i aso nei, a te tagata mo te mea tusitusi a te failautusi ne fakaata mai i ei a te ‵toega o te kau fakaekegina. Ne fai pelā me i tino kolā ne talia ne latou mo te fiafia a te fekau telā ko talai atu nei ne maua ne latou a te fakailoga mō te faka‵saoga. Kae i tausaga fakamuli nei, ne momea aka te malamalama me e ‵tau o fai se fakamafuliga ki te fakamatalaga tenei. E pelā mo mea e taku mai i te Mataio 25:31-33, a Iesu ko te tino telā e fakamasino ne ia a tino. E fai ne ia tena toe fakamasinoga i te taimi o te fakalavelave lasi, mai te ‵vae aka o tino e pelā me ne mamoe, kolā ka ‵sao atu, mai tino e pelā me ne kouti, kolā ka fakaseai atu.

Tela la, ona ko te malamalama fou tenei, ne a akoakoga e maua ne tatou mai te fakaasiga a Esekielu? Kāti e lima:

1.  I te vaitaimi telā ne iku atu ki te fakamaseiga o Ielusalema, ne tavini atu a Esekielu e pelā me se leoleo fakatasi mo Ielemia, e pelā eiloa mo te mea ne fai muamua ne Isaia. I aso nei, e fakaaoga ne Ieova se tamā potukau o tavini fakaekegina ke fagai ana tino kae fakailoa atu ki nisi tino ke fakatokatoka faka‵lei kae koi tuai o kamata te fakalavelave lasi. I tafa i ei, e ‵kau atu foki a nisi tavini katoa a Keliso ki te  fakailoaatuga o te mea tenā ki tino.—Mata. 24:45-47.

2.    Ne seki aofia a Esekielu i te faiga o te fakamailogaga o tino kolā e ‵sao; e penā foki a tavini a te Atua i aso nei. E fakaasi atu fua ne latou te fekau a Ieova, telā se vaega o te lotou galuega talai mai lalo i te takitakiga a te kau agelu.—Fa. 14:6.

3.  I aso o Esekielu, e seai se tino ne maua ne ia se fakamailoga tonu i tena lae. E penā foki i aso nei. Ne a mea e ‵tau o fai ne tino ke fakamailoga latou i se feitu fakatusa mō te faka‵saoga? E ‵tau o ‵saga fakavave atu latou ki te galuega talai telā e fai nei, fakaasi a uiga faka-Kelisiano, tuku atu latou ki a Ieova, kae ‵lago atu mo te a‵lofa tumau ki taina o Keliso. (Mata. 25:35-40) Ko latou kolā e fai ne latou a mea konei ka maua ne latou a te fakailoga mō te faka‵saoga i te vaitaimi o te fakalavelave lasi.

4.  I tena fakataunuga i aso nei, a te tagata mo te mea tusitusi a te failautusi, e fakasino atu ki a Iesu Keliso, ko te tino sē matea telā e faka‵mau atu ne ia te fakailoga mō te faka‵saoga. Ka maua ne te vaitino te lotou fakailoga māfai ko fakamasino atu latou e pelā me ne mamoe i te fakalavelave lasi. Ka mafai ei o maua ne latou a te ola se-gata-mai i te lalolagi.—Mata. 25:34, 46. *

5.  I tena fakataunuga i aso nei, a tāgata e tokoono mo meatau e fakasino atu ki te kautau faka-te-agaga a Iesu i te lagi fakatasi mo Iesu telā e takitaki ne ia. Ko pili o fakamasei ne latou a atufenua mo mea ma‵sei katoa.—Eseki. 9:2, 6, 7; Fa. 19:11-21.

A te malamalama i akoakoga tāua konei e fakamalosi aka ei ‵tou loto tali‵tonu me e se fakaseai atu ne Ieova a tino amio‵tonu fakatasi mo tino amio ma‵sei. (2 Pe. 2:9; 3:9) E fakamasaua mai foki i ei a te tāua o te galuega talai i ‵tou aso nei. E ‵tau o lagona ne tino katoa a te fakailoaga a koi tuai o oko mai te gataga!—Mata. 24:14.