I TAIMI o te Tusi Tapu, ne tuku atu te ‵togi o te tamafine ka fakaipoipo ki kāiga o te fafine i te taimi e fai ei a fakatokatokaga mō te avaga. E aofia i te ‵togi o te tamafine ko kope ‵togi ‵mafa, manu, io me ne tupe. I nisi taimi, e ‵togi se tamafine ki te faiga o se galuega ‵mafa, e pelā mo te mea ne fai ne Iakopo, i te taimi ne lotomalie a ia ke galue mō te tamana o Lasela i tausaga e fitu ke mafai o avaga lāua mo tou fafine. (Kene. 29:17, 18, 20) Se a te aoga o te tuu mo te aganuu tenei?

Ne fai mai te tino poto i te Tusi Tapu ko Carol Meyers: “A te ‵togi o te tamafine e mafai o sui ki ei a galuega a te tamafine ka fakaipoipo kolā ka se toe fai ne ia kae e tāua ‵ki ki kāiga [fai fatoaga].” E mafai foki o fakamalosi aka ne te ‵togi o te tamafine a te va o kāiga e lua kolā ko fai pelā me se kāiga ona ko te fakaipoipoga tenā. A te va fakakāiga tenei ka aoga eiloa i taimi o fakalavelave faiga‵ta. E se gata i ei, a te ‵togi o te tamafine ka fakaipoipo se fakamaoniga me i a ia ko ‵sai feagaiga kae ko pili o nofo a ia mai lalo i te tausiga mo te puipuiga a tena avaga i lō tena tamana.

A ‵togi o te tamafine ka fakaipoipo e se fakauiga i ei me i te avaga fafine ka fai pelā me se kope telā e mafai o ‵togi mai io me fakatau atu. E fai mai te tusi ko te Ancient Israel—Its Life and Institutions: “A te tiute ke ‵togi se aofaki tupe, io me ko te aofaki ‵tau, ki te kāiga o te fafine e foliga mai eiloa pelā me e ‵togi a avaga a tino Isalaelu. Kae ko te [‵togi o te tamafine] e foliga mai me ko te ‵togi e ‵tau o tuku atu ke sui ki ei te galo o te tamafine mai tena kāiga.”

I nisi fenua i aso nei, koi tau‵tali atu eiloa a tino ki te tuu mo te aganuu tenei e uiga ki te ‵togi o te tamafine ka fakaipoipo. Kafai e mafau‵fau a mātua Kelisiano ki se ‵togi o te tamafine ka fakaipoipo, ka se akai atu eiloa lāua mō se ‵togi lasi ‵ki, telā e fakaasi atu ei “ke iloa ne tino katoa i a [lāua] e uiga faigofie.” (Fili. 4:5; 1 Koli. 10:32, 33) I te auala tenei, e fakaasi atu i ei me i a lāua e se “fia‵fai tupe,” io me kaima‵nako. (2 Timo. 3:2) E se gata i ei, kafai e se tō lasi te ‵togi mai mātua Kelisiano, ka se faimālō ei te tagata ka fakaipoipo ke taofi malie te avaga ke oko ki te taimi e lava ei a tupe mo fai te ‵togi o te tamafine. Io me ka se fai ei ke fakaiku aka ne te tagata ka fakaipoipo ke tiaki tena taviniga fakapaenia ke ‵sala sena galuega ‵togi ke maua a tupe mo fai te ‵togi o te tamafine telā ko oko eiloa i te lasi.

I nisi koga o te lalolagi, e isi ne tulafono a te malo e uiga ki te ‵togi o te tamafine. I koga penei, e ‵tau mo mātua Kelisiano o faka‵logo ki tulafono konā. Kaia? E fai mai te Muna a te Atua me e ‵tau mo Kelisiano o “faka‵logo ki pule ma‵luga” mo tulafono kolā e se fe‵paki mo tulafono a te Atua.—Loma 13:1; Galu. 5:29.