1, 2. E fakaaoga pefea ne Ieova mo te kaimalie ana koloa?

A IEOVA se Atua kaimalie. A mea katoa e maua ne tatou ne aumai mai i a ia. A aulo mo siliva mo nisi maumea o te natula o te lalolagi i a Ieova, kae e fakaaoga ne ia a mea konā ke tuku mai ei a mea kolā e manakogina ke fakatumau ei te ola. (Sala. 104:13-15; Haka. 2:8) E maua i te Tusi Tapu a tala e uke ki te auala ne fakaaoga ei ne Ieova ana koloa i se auala fakavavega ke tausi atu ki ana tino.

² I se 40 tausaga, ne tuku atu ne Ieova te manai mo vai ki te fenua o Isalaelu i te taimi ne ‵nofo ei latou i te koga lavaki. (Eso. 16:35) Ona ko te mea tenā, “e seai se mea ne ma‵tiva latou i ei.” (Nee. 9:20, 21) E auala i te pelofeta ko Elisaia, ne fai ne Ieova se vavega ke fakauke a mu sinu a te fafine fakamaoni telā ko mate tena avaga. Ne fesoasoani atu a te meaalofa a te Atua tenā ke mafai ne tou fafine o ‵togi ana kaitalafu kae lava foki a tupe a ia mo ana tama ke tausi atu ki a latou. (2 Tupu 4:1-7) Ona ko te fesoasoani o Ieova, ne tuku fakavavega atu ei ne Iesu a meakai ke oko ki tupe māfai e manakogina.—Mata. 15:35-38; 17:27.

3. Ne a mea ka sautala tatou ki ei i te mataupu tenei?

³ E seai se gatamaiga o koloa a Ieova kolā e mafai o fakaaoga ne ia ke  fakatumau i ei a te ola o ana mea ne faite i te lalolagi. Kae koi ‵kami mai eiloa ne ia ana tavini ke fakaaoga olotou kope ke ‵lago atu ki te galuega a tena fakapotopotoga. (Eso. 36:3-7; faitau te Faataoto 3:9.) Kaia e manako ei a Ieova ke fakaaoga ‵tou kope e pelā me se auala ke tuku atu a mea ki a ia? Ne ‵lago atu pefea a tino fakamaoni i aso ko ‵teka i mea tau tupe ki faifaiga ne fai ne sui o Ieova? E fakaaoga pefea ne te fakapotopotoga a tupe kolā e tuku fakameaalofa mai i aso nei? A tali ki fesili konei ka tali aka i te mataupu tenei.

4. Kafai e ‵lago atu tatou ki te galuega a Ieova, se a te mea ko fakaasi atu ne tatou?

⁴ E tuku atu ne tatou a mea ki a Ieova ona ko ‵tou a‵lofa mo ‵tou loto fakafetai ki a ia. E ofo tatou māfai e mafau‵fau ki mea katoa ne fai ne Ieova mō tatou. I te taimi ne fakamatala atu ei a mea kolā e manakogina mō te galuega lasi telā ka fai ko te faitega o te faletapu, ne fai ‵tonu mai a te Tupu ko Tavita me i mea katoa e maua ne tatou ne aumai mai i a Ieova kae ko so se mea e tuku atu ne tatou ki a Ieova ne tuku atu mai mea kolā ko oti ne tuku mai ne ia ki a tatou.—Faitau te 1 Nofoaiga Tupu 29:11-14.

5. E fakaasi mai pefea i te Tusi Tapu me i te tuku atu o mea mo te kaimalie se vaega tāua o te tapuakiga tonu?

⁵ A te tuku atu o mea se fakaasiga foki tenā o ‵tou tapuakiga ki a Ieova. I se fakaasiga, ne lagona ne te apositolo ko Ioane a tavini a Ieova i te lagi e fai mai: “E ‵tau eiloa o maua ne koe e Ieova, te motou Atua, te vikiga mo te ‵malu mo te malosi, me ne faite ne koe a mea katoa, kae ona ko tou loto ne ola mai ei a mea konā me ne faite ne koe.” (Faka. 4:11) E a, e se lotomalie koe me ‵tau eiloa o maua ne Ieova te vikiga mo te ‵malu kolā e mafai o tuku atu ne tatou ki a ia mai te tukuatuga o toe mea ‵lei kolā e maua ne tatou? E auala i a Mose, ne fakatonu atu a Ieova ki te fenua o Isalaelu ke olo atu ki mua o Ieova i taimi o ‵kaiga fia‵fia e tolu o te tausaga. E pelā me se vaega o te lotou tapuakiga i ‵kaiga fia‵fia konā, e se ‵tau mo tino Isalaelu “o tu i mua o Ieova e aunoa mo ne mea i [olotou] lima.” (Teu. 16:16) E penā foki i aso nei, a te tuku atu o mea mo te kaimalie ke ‵lago atu ki te galuega a te fakapotopotoga a Ieova i te lalolagi nei se vaega tāua o te tapuakiga.

6. Kaia e ‵lei ei ki a tatou a te tuku atu o mea? (Onoono ki te ata i te kamataga.)

⁶ A te tukuatuga o mea se mea ‵lei mō tatou. E aoga eiloa ki ‵tou ola ‵lei māfai e fai tatou e pelā me ne tino e tuku atu a mea mo te kaimalie kae e se ko te mauaga fua o mea. (Faitau te Faataoto 29:21.) E mafai o fakaataata i ‵tou mafaufau se tamaliki e tuku atu ne ia se meaalofa ki ana mātua mai i se aofaki tupe foliki telā ne tuku atu ne lāua ki a ia. E loto fakafetai eiloa ana mātua ki te meaalofa tenā! E mafai ne se tamaliki tagata io me se tamailiki fafine telā e paenia kae ‵nofo tasi mo ana mātua o tuku atu ne mu sene ki ana mātua ke fesoasoani ki te ‵togiga o mea mō te fale. E ui eiloa e seki fakamoe‵moe a mātua ke maua te sene tenei, kae e mafai o talia ne lāua a meaalofa konā me se auala e tasi e fakaasi atu ei ne te tamaliki a te loto fakafetai ki mea ne fai ne lāua mō ia. E penā foki eiloa mo Ieova, e iloa ne ia me i te tuku atu o mea mai ‵tou kope tāua se mea ‵lei mō tatou.

7, 8. Ne tuku mai pefea ne tino o Ieova i aso o te Tusi Tapu se fakaakoakoga i te tukuatuga o meaalofa (a) mō se galuega fakapito? (e) ke ‵lago atu ki te galuega?

⁷ A te tukuatuga o mea mai ‵tou koloa totino se faifaiga telā e fakaasi faka‵lei mai i te Tusi Tapu. I nisi taimi, ne fai ne tino o Ieova a meaalofa mō se galuega fakapito. E pelā me se fakaakoakoga, ne manako a Mose ke tuku mai ne meaalofa mō te faitega o te faleie tapu, e pelā eiloa mo te mea ne manako a te Tupu ko Tavita ki ei i te faitega o te faletapu. (Eso. 35:5; 1 Nofo. 29:5-9) I te taimi o te Tupu ko Ioasa, ne fakaaoga ne faitaulaga a tupe kolā ne maua mai ke faite faka‵lei ki ei a te fale o Ieova. (2 Tupu 12:4, 5) I te taimi ne fakailoa  atu ei ki taina i te fakapotopotoga Kelisiano mua e uiga ki te manakoga telā ne sae aka ona ko te oge meakai, ne “fakaiku aka ne soko katoa ke avatu se fesoasoani ki taina kolā e ‵nofo i Iuta, e ‵tusa mo te mea e mafai ne latou taki tokotasi o tuku atu.”—Galu. 11:27-30.

⁸ I nisi taimi, ne tuku atu ne tino o Ieova a meaalofa tupe ki tino kolā e fai ne latou te takitakiga o te galuega. Mai lalo i te Tulafono faka-Mose, ne seki maua ne tino Levi se tofi e pelā mo nisi matakāiga. Kae ne tuku atu ne tino Isalaelu se tasi-vae-sefulu ki a latou, ko te mea ke mafai ne tino Levi o ‵saga tonu atu ki olotou galuega i te faleie tapu. (Nume. 18:21) I se auala tai ‵pau, ne aoga fakamuli ifo ki a Iesu mo ana soko a meaalofa ne tuku mai mo te kaimalie ne fāfine “kolā ne fakaaoga olotou kope totino ke tavini atu ki a latou.”—Luka 8:1-3.

9. Ne maua mai i fea a meaalofa a tino i aso mua?

⁹ E tonu, e kese‵kese a auala ne maua mai ei a meaalofa konā. I te faiga o meaalofa mō te faitega o te faleie tapu i te koga lavaki, kāti ne aofia i mea kolā ne tuku atu ne tino Isalaelu ko mea ne aumai ne latou mai Aikupito. (Eso. 3:21, 22; 35:22-24) I te senitenali muamua, ne fakatau atu ne nisi Kelisiano olotou mea, e pelā mo manafa io me ko fale, kae ne aumai ne latou a tupe ki te kau apositolo. Ko fakasoa atu ei ne te kau apositolo a tupe konei ki tino kolā e manakogina ne latou. (Galu. 4:34, 35) A nisi tino ne tuku fakaa‵tea ne latou a tupe ko tuku atu ei e pelā me se meaalofa masani ke ‵lago atu ki te galuega. (1 Koli. 16:2) Tela la, a tino mai tulaga kese‵kese o te olaga—mai toe tino mau‵mea ke oko ki toe tino ma‵tiva —ne isi eiloa ne olotou tusaga ne fai.—Luka 21:1-4.

10, 11. (a) E mafai pefea o fakaakoako tatou ki tavini kaima‵lie a Ieova i taimi o te Tusi Tapu? (e) E pefea ou lagonaga ki te tauliaga ko maua ne koe ke ‵lago atu ki te galuega o te Malo?

¹⁰ I aso nei, e mafai eiloa o fakamolemole mai ki a tatou ke fai ne meaalofa mō se pogai fakapito. E pelā me se fakaakoakoga, e mata, e isi se fakatokaga ke faite se Fale Tapuaki fou telā ka fakaaoga ne te otou fakapotopotoga? Io me e a, ko toe fakafou aka a te Fale Tapuaki tenei e fakaaoga ne koutou? E mafai o fakailoa mai ki a tatou māfai ko manakogina a mea tau sene ki te fakafouga o te ‵tou ofisa lagolago, se fono o te atufenua telā ka ‵kau tatou ki ei, io me fesoasoani atu ki ‵tou taina mai tua o se fakalavelave o te natula telā ne tupu. A tatou foki e fai meaalofa ke ‵lago atu ki a latou kolā e fai te galuega i te ‵tou laumua e pelā foki mo ofisa lagolago i te lalolagi kātoa. E fesoasoani atu a ‵tou meaalofa ki misionale, paenia fakapito, mo ovasia o te fenua. E mautinoa eiloa me e isi se fakaikuga ko oti ne fai ne te otou fakapotopotoga ke tuku atu se fesoasoani i mea tau tupe ki te polokalame i te lalolagi kātoa mō te faitega o Fale Fai Fono mo Fale Tapuaki, kolā ka aoga ki ‵tou taina i te lalolagi kātoa.

¹¹ E mafai ne tatou katoa o fai ‵tou tusaga ke ‵lago atu ki te galuega telā ko fakataunu ne Ieova i aso fakaoti konei. A te ukega o meaalofa e se iloa me ne aumai mai fea. E tuku atu eiloa ne tatou mo te ‵poto a meaalofa ki loto i pokisi o meaalofa i te Fale Tapuaki, io me mafai o tuku atu ‵tou meaalofa mai te fakaaogaga o te itaneti e auala i te jw.org. E mafai o mafau‵fau tatou me seai se aoga o ‵tou tamā meaalofa kolā e tuku atu. Kae ko te ukega o meaalofa kolā e tuku mai i aso nei e maua mai i tamā meaalofa e uke konā i lō nai meaalofa ‵lasi kolā e tuku mai. A ‵tou taina, ke oko ki a latou kolā e ‵nofo i toe tulaga ma‵tiva, e fai pelā mo te kau Maketonia kolā ne ‘lasi te lotou ma‵tiva’ kae ne akai atu ke maua te tauliaga ke tuku atu olotou mea kae ne fai eiloa latou penā mo te kaimalie.—2 Koli. 8:1-4.

12. E taumafai pefea te fakapotopotoga ke fakaaoga faka‵lei a meaalofa tupe?

¹² Fakatasi mo te faiga o ‵talo, e taumafai malosi te Potukau Pule ke fakamaoni kae fakaaoga ne latou mo te ‵poto a tupe a te fakapotopotoga. (Mata. 24:45) A tupe kolā e maua, e pateti faka‵lei ko fakaaoga ei e ‵tusa mo te fakatokaga ko oti  ne fai. (Luka 14:28) I aso o te Tusi Tapu, a tavini kolā e onoono ki mea tau tupe e tau‵tali faka‵lei ki fakanofonofoga ko oti ne fai ko te mea ke fakaaoga a tupe ki mea e ‵tau o fakaaoga ki ei. E pelā me se fakaakoakoga, ne foki atu a Esela ki Ielusalema mo meaalofa mai te tupu o Pelesia—aulo, siliva mo nisi kope tāua kolā e nofo ki se $100 miliona (tupe Amelika) i ‵tou tupe i aso nei. Ne kilo atu a Esela ki tupe konei e pelā me ne meaalofa ne tuku atu mo te lotomalie ki a Ieova kae ne fai ne ia ne tulafono liki‵liki ke puipui ei a koloa konei i te malaga fakamataku kae faigata ne olo atu ei latou. (Esela 8:24-34) Ne ‵tae ne te apositolo ko Paulo ne tupe ke fesoasoani atu ei ki taina i Iuta. Ne onoono faka‵lei a ia ke fakamautinoa aka me i tino kolā ne olo o avatu a tupe e tausi ki “mea katoa mo te fakamaoni, e se gata fua i mua o Ieova kae e pelā foki i mua o tino katoa.” (Faitau te 2 Kolinito 8:18-21.) I te tau‵tali atu ki te fakaakoakoga a Esela mo Paulo, e fai ne te ‵tou fakapotopotoga i aso nei ne fakanofonofoga ‵lei e uiga ki te tausiga mo te fakaaogaga o meaalofa tupe.

13. E ‵tau o pefea te ‵tou kilokiloga ki faifaiga faigofie ne fai ne te fakapotopotoga fakamuli nei?

¹³ Kāti e fai ne se kāiga ne fakamafulifuliga i te taimi e taumafai ei latou o fakapaleni aka olotou tupe maua mo tupe fakamāumāu io me i te taimi e mafau‵fau ei latou ki te auala ke fakafaigofie aka te lotou olaga kae fakamu‵tana a tupe fakamāumāu ko te mea ke uke olotou galuega e fai mō Ieova. E penā foki eiloa i te fakapotopotoga a Ieova. I tausaga fakamuli nei, e uke ‵ki a mea ‵gali kae ‵fou i te fakapotopotoga. I nisi taimi, e iku atu i ei ki te uke o tupe e fakamāumāu ki ei i lō tupe e maua mō se taimi tai mata leva. Tela la, e salasala te fakapotopotoga ki se auala ke fakamu‵tana a tupe e fakamāumāu kae fakafaigofie te galuega ko te mea ke uke a mea e mafai o fai ki otou meaalofa kolā ne tuku mai mo te kaimalie.

14-16. (a) Ne a nisi mea ko oti ne fakataunu aka ona ko otou meaalofa kolā ne tuku mai mo te kaimalie? (e) Ne aoga pefea ki a koe a fakatokaga konei?

¹⁴ E uke a tavini a Ieova kolā ne tavini i se taimi leva ‵ki ne fai mai me e seki lavea aka eiloa ne latou ke uke katoa penei a fakatokaga faka-te-agaga e pelā mo te vaitaimi nei. Mafaufau ki te mea tenā! I tausaga fakamuli nei, ne lavea ne tatou te kamataga o te jw.org mo te Leo Fakasalalau o te JW. A te Tusi Tapu i te ‵Fuliga o te Lalolagi Fou ko oti ne ‵lomi i ‵gana e uke ‵ki. I te 2014/2015, a nisi fale fai tafaoga lasi ‵ki i fakai e 14 i te lalolagi kātoa ne fakaaoga mo fai a te fono ko te “Ke ‵Sala Muamua Faeloa te Malo o te Atua!” telā ne fai i aso e tolu. Ne fia‵fia malosi eiloa a tino kolā ne ‵kau atu ki ei.

¹⁵ E tokouke a tino ne fakaasi mai te lotou loto  fakafetai mo mea aoga tu ‵kese ne maua ne latou mai te fakapotopotoga a Ieova. E pelā me se fakaakoakoga, ne tusi mai se tauavaga kolā e tavini atu i se fenua i Asia e uiga ki te fakatokaga ko te JW Broadcasting: “E tavini atu māua i se tamā fakai foliki. Tela la, i nisi taimi e mafau‵fau māua me ko māua fua e fai te galuega, kae faigofie fua ke fakapuli i a māua te lasi o te galuega a Ieova. Kae i te taimi eiloa ne onoono ei māua ki polokalame kese‵kese i te JW Broadcasting, ne fakamasaua mai ei ki a māua me aofia māua i se fakapotopotoga o taina mo tuagane i te lalolagi kātoa. Ko oko eiloa i te fia‵fia a taina mo tuagane i te motou fakapotopotoga ki te JW Broadcasting. E lagona sāle ne māua olotou pati e fai me kafai ko oti ne onoono latou ki te polokalame o te masina, e gasolo aka faeloa o ‵pili atu latou ki tino o te Potukau Pule. Nei la, ko silia atu te lotou fia‵fia me aofia latou i te fakapotopotoga a te Atua.”

¹⁶ I te lalolagi kātoa ko tai kātoa nei te 2,500 Fale Tapuaki koi faite nei io me ko toe faka‵fou. Mai tua o te fakaaogaga o te lotou Fale Tapuaki fou, ne tusi mai a nisi tino mai te fakapotopotoga i Honduras: “E fia‵fia malosi eiloa matou ke aofia i te kāiga o Ieova i te lalolagi kātoa kae ke maua ne taina mo tuagane ‵gali i te lalolagi kātoa, kolā ne fesoasoani malosi ke fakataunu te motou fakamoemoega ke fakatu aka se Fale Tapuaki i te motou fakai.” E penā foki eiloa a lagonaga ne fakaasi mai ne tino e tokouke i te mauaga ne latou te Tusi Tapu mo nisi tusi kolā ne ‵lomi i te lotou ‵gana, ko mea aoga ne maua ne latou mai te fesoasoani atu ki koga ne pokotia i fakalavelave o te natula, io me mai te ‵kilo atu ki ikuga ‵gali ne maua mai i te talai atu i fakai ‵lasi mo te talai atu ki tino e tokouke i olotou fakai.

17. E fakamaoni aka pefea ne te auala e fakatele ei te fakapotopotoga i aso nei me ‵lago mai a Ieova ki te galuega?

¹⁷ E se malamalama a nisi tino me ne mafai pefea ne tatou o fai a galuega katoa konei mai meaalofa kolā ne tuku atu mo te lotomalie. Mai tua o tena āsiatuga ki se fale ‵lomi tusi a tatou, ne ofo malosi se pule o se kamupane me i galuega kolā e fai i konā e fai ne volenitia, mai te fesoasoani o meaalofa kolā e tuku mai mo te lotomalie, kae seai ne mea e fakatau atu ki tua io me ne salasalaga sene e fai. Ne fai mai a ia me ailoga e mafai o tupu se vaegā mea penei mo te mea e fai ne tatou. E lotoma‵lie tatou ki tena manatu! Kae e iloa ne tatou me e mafai fua o fai penā ona ko te ‵lago mai o Ieova ki te galuega.—Iopu 42:2.

18. (a) Ne a fakamanuiaga e maua ne tatou māfai e ‵lago atu tatou ki te Malo? (e) E mafai pefea o akoako ne tatou ‵tou tama‵liki mo tino ‵fou ke fai olotou tusaga?

¹⁸ E faka‵malu ne Ieova tatou mai te tukumaiga o te avanoaga ke ‵lago atu ki te ‵toe galuega sili telā ko fai nei i aso nei. E fakatalitonu mai a ia me ka maua ne tatou a fakamanuiaga māfai e tuku atu ‵tou mea ke ‵lago atu ki te Malo. (Mala. 3:10) Ne tauto mai a Ieova me ka manuia a te tino telā e tuku atu ana mea mo te kaimalie. (Faitau te Faataoto 11:24, 25.) A te tukuatuga o mea e fai foki ei tatou ke fia‵fia, me “e sili atu te fiafia o te tino telā e tuku atu ana mea i lō te maua ne ia.” (Galu. 20:35) E auala i ‵tou pati mo ‵tou fakaakoakoga, e maua ne tatou te tauliaga ke akoako ‵tou tama‵liki mo tino ‵fou ke loto fia‵fia latou o tuku atu olotou mea kae ke maua ne latou a fakamanuiaga e uke mai te faiga penā.

19. Ne fakamalosi aka pefea ne te mataupu tenei a koe?

¹⁹ A mea katoa e maua ne tatou ne aumai mai i a Ieova. A te tukuatuga o mea ki a ia se fakaasiga o te ‵tou alofa mō ia mo te ‵tou loto fakafetai ki mea katoa ne fai ne ia mō tatou. (1 Nofo. 29:17) I te faiga o meaalofa mō te faletapu, “ne fia‵fia a tino o fai olotou taulaga mo te lotomalie, me ne fai ne latou olotou taulaga o te lotomalie ki a Ieova mo te loto kātoa.” (1 Nofo. 29:9) Ke na fia‵fia kae lotoma‵lie eiloa tatou o tumau i te tukuatuga o mea ki a Ieova ko mea eiloa kolā ne maua ne tatou mai i a ia.