E fakaasi mai i fakamaoniga me ne fai a Iesu mo Faitaulaga Sili i te taimi ne papatiso ei a ia i te 29 T.A. Se a te fakamaoniga tenā? I te taimi ne papatiso ei a Iesu, ne fakaasi mai ne ia tena loto fiafia o ofo atu tena ola i luga i te fatafaitaulaga fakatusa telā e fakasino ki te “loto” o te Atua. (Kala. 1:4; Epe. 10:5-10) Ona ko te fatafaitaulaga fakatusa tenā ko leva ne isi talu mai te papatisoga a Iesu, a te faletapu faka-te-agaga—telā e fakasino ki te fakatokaga o te tapuakiga ‵ma a Ieova telā e fakavae ki te taulaga togiola—kāti ne kamata foki o fakatu aka i te taimi tenā, me i te fatafaitaulaga se vaega tāua o te faletapu faka-te-agaga.—Mata. 3:16, 17; Epe. 5:4-6.

Ona ko te mea ko isi se faletapu faka-te-agaga, ne manakogina i ei se faitaulaga sili ke galue i ei. Ke fakataunu te manakoga tenā, ne fakaeke a Iesu “ki te agaga tapu mo te ‵mana.” (Galu. 10:37, 38; Male. 1:9-11) Kae e iloa pefea ne tatou me ne fakasopo a Iesu mo fai te Faitaulaga Sili mai mua o tena mate mo tena toetuga? E maua ne tatou se pogai fakamalie loto māfai e mafau‵fau ki te tala o Alona mo tino kolā ne sui ne latou a ia e pelā me ne faitaulaga sili mai lalo i te Tulafono a Mose.

E pelā mo te manakoga o te Tulafono, ko te faitaulaga sili fua e mafai o ulu ki te Potu Tafasili i te Tapu i te faleie tapu, kae fakamuli ifo ko te Potu Tafasili i te Tapu i te faletapu. Ne ‵vae a te potu tenei mai te Potu Tapu ne se ‵pui laugatu. I te Aso o te Faka‵māga ko mafai ei o ulu te faitaulaga sili ki te potu tenā. (Epe. 9:1-3, 6, 7) Ne faū a Alona mo tino ne sui ne latou a ia kae koi tuai o ulu “i loto i te ‵pui laugatu” tonu o te faleie tapu, kāti ne fakaeke foki a Iesu e pelā me ko te Faitaulaga Sili o te faletapu sili faka-te-agaga a Ieova kae koi tuai o mate a ia kae fakamuli ifo ulu atu ei “i loto i te ‵pui laugatu, telā ko tena foitino,” ki te ola i te lagi. (Epe. 10:20) Ona ko te pogai tenei, ne fakasino atu a Paulo me i a Iesu e vau “e pelā me se faitaulaga sili” ko ulu atu ei “i te faleie telā e sili kae ‵lei atu kae ne seki faite ki lima o tino,” kae fanatu “eiloa ki te lagi.”—Epe. 9:11, 24.

E seai se ‵kesega o te taimi ne fakamau‵tu ei te feagaiga fou mo te taimi ne fakagalue ei. Kaia? I te taimi ne fanaka ei a Iesu ki te lagi kae ofo atu tena ola ‵lei katoatoa mō tatou, ne fai ei ne ia te mea muamua telā ne manakogina ke fai ko te mea ke fakamau‵tu, io me fakapa‵tonu i ei te feagaiga fou. Konā foki loa a mea ne manakogina ke fai ko te mea ke mafai o fakagalue te feagaiga. Ne a mea ne aofia i te faiga o te mea tenā?

Muamua la, ne tu atu a Iesu i mua o Ieova; oti aka, ofo atu ei ne Iesu te tāua o tena taulaga ki a Ieova; fakamuli ifo, talia ei ne Ieova te tāua o te toto maligi o Iesu. Kafai ko oti ne fai a mea konei ko fatoa fakagalue ei te feagaiga fou.

E se fakaasi ‵tonu mai i te Tusi Tapu a te taimi tonu ne talia ei ne Ieova a te tāua o te taulaga a Iesu. E ‵tusa mo te mea tenā, e se mafai o fai atu ne tatou a te taimi tonu ne fakamau‵tu io me ne fakagalue i ei te feagaiga fou. Kae ui i ei, e iloa ne tatou me ne fanaka a Iesu ki te lagi i se sefulu aso mai mua o te Penitekoso. (Galu. 1:3) I se taimi e tasi i loto i te vaitaimi toetoe tenā, ne tuku atu ei ne ia te tāua o tena taulaga ki a Ieova, tenā talia ei ne ia. (Epe. 9:12) Ne lavea faka‵lei eiloa te ‵tonu o te mea tenei i te Penitekoso. (Galu. 2:1-4, 32, 33) Tenā ne iloa atu i ei me ko oti ne fakagalue aka te feagaiga fou.

Ke fakatoetoe aka, a te feagaiga fou ne fakamau‵tu kae fakagalue aka mai tua o te taliaga ne Ieova a te tāua o te toto maligi o Iesu. Tenā ne kamata ei o fakagalue te feagaiga kae ko Iesu ko te Faitaulaga Sili, kae ko te Sokoga foki i ei.—Epe. 7:25; 8:1-3, 6; 9:13-15.