Ne fanau au i St. Paul, Minnesota, U.S.A., i te 1954 ki se kāiga telā e se mau‵mea malosi, kae ko matou e ‵lotu Katolika. Au ko te tamaliki i te tokolua kae e tokolima katoa matou. I te taimi koi foliki ei au ne akoga au i se akoga Katolika kae ne fesoasoani sāle au ki te faifeau i taimi e fai ei a lotu. Kae e se uke aku mea e iloa e uiga ki te Tusi Tapu. E tiga loa e talitonu au me isi se Atua telā ne faite ne ia a mea katoa, kae ne galo eiloa toku talitonu ki te lotu.

I toku tausaga muamua i te William Mitchell College of Law, ne āsi mai a Molimau a Ieova ki toku fale. I te taimi tenā au e ‵ta aku gatu, kae ne fai‵pati mai te tauavaga konā mo te atafai me ka toe āsi mai lāua. I te lā ‵fokimaiga, e lua aku fesili ne fai ki a lāua: “Kaia e manuia ei a tino ma‵sei i lō tino ‵lei i te lalolagi nei?” mo te “E maua pefea te fiafia?” Ne talia ne au te tusi ko te The Truth That Leads to Eternal Life mo te New World Translation of the Holy Scriptures, telā e lanu launiu tena ‵kava. Ne talia foki ne au ke fai saku akoga faka-te-Tusi Tapu. Ne malamalama au i mea e uke. Ne fiafia malosi au ki te manatu me i te Malo o te Atua ko te malo  telā ka pule mai ki tino i te lalolagi nei. Ne lavea ne au me seai se aoga o pulega a tino ki luga i a latou eiloa kae ne fai fua i ei ke ‵fonu te lalolagi i logo‵maega, te fai mea sē ‵tonu, mo fakalavelave.

Ne fai taku tukuatuga ki a Ieova i te kamataga o te 1982 kae ne papatiso au fakamuli ifo i te tausaga eiloa tenā i te Fono Lasi ko te “Kingdom Truth” telā ne fai i te St. Paul Civic Center. I te vaiaso mai tua ne toe foki mai au ki te civic center ke suke toku pepa loia. I a Oketopa, ne iloa aka ne au me ne pāsi taku sukega kae ko mafai au o fai pelā me se loia.

I te Fono Lasi ko te “Kingdom Truth,” ne fetaui au mo Mike Richardson, se tino mai te Peteli i Brooklyn, kae ne fai mai ne ia me ko oti ne fakatu aka te ofisa o mea tau tulafono i te laumua. Ne masaua ne au a pati a te eunuka Aitiope kolā ne tusi i te Galuega 8:36 kae ne fesili ifo au ki a au eiloa, ‘E isi se pogai e se fesili ei au ke galue au i te Ofisa i Mea Tau Tulafono?’ Tenā ne avatu ei taku fakamolemole ke galue au i te Peteli.

Ne seki fia‵fia oku mātua me ko fai au mo fai se Molimau a Ieova. Ne fesili mai toku tamana me se a te aoga o taku galuega i te Watchtower ki taku loia. Ne fakamatala ne au me ka galue fakavolenitia au. Ne fai atu au me ka maua ne au se $75 i te masina, telā ko te alauenisi e maua ne tino katoa i te Peteli.

I te otiga o nisi galuega i te fale fono kolā ne ‵tau o saga muamua au ki ei, ne kamata taku taviniga i te Peteli i Brooklyn, New York, i te 1984. Ne ‵tofi aka au ke galue i te Ofisa i Mea Tau Tulafono. Ne aoga eiloa taku galuega ne fai i te fale fono ki mea ka ‵tupu fakamuli.

I a Novema 1983 ne ‵togi ei te Stanley Theater i Jersey City, New Jersey. Ne fakamolemole a taina ke maua mai se taliaga ke faka‵lei aka a mea tau iti mo paipa vai o te fale tenā. I te lotou fono ne fai mo tino pulepule o te fakai, ne fakamatala atu ne taina me fakamoemoe latou ke fakaaoga te Stanley Theater mo fai se koga e fai ei a fonotaga a Molimau a Ieova. Ne sae aka ei se fakalavelave. E ‵tusa mo te tulafono o te fakai, e ‵tau fua o faka‵tu a fale tapuaki i kogā koga e ‵nofo i ei a tino. Kae ko te Stanley Theater ne tu i te koga faipisinisi o te fakai, tenā ne seki maua ei ne latou se taliaga ke faka‵lei a mea i ei. Ne toe fai te tagi a ‵tou taina, kae ne seki talia foki.

I toku vaiaso muamua i te Peteli, ne fai te tagi a te fakapotopotoga ki te fono tulafono o te fakai e uiga ki te fakalavelave tenā. Ne masani ‵lei au mo vaegā tagi penei i te lua tausaga ne galue ei au i te fono tulafono o te fakai i St. Paul, Minnesota. Ne fakasae aka ne se  tokotasi o ‵tou loia me ne fakaaoga sāle te Stanley Theater mō fai a fakafiafiaga kese‵kese, pelā mo tamunei ke oko ki te tātāga o pese. Kaia la e fakatapu ei ma fai se polokalame fakalotu i ei? Ne onoono te fono tulafono o te fakai ki ei kae fakaiku aka ne te fono me ko oti ne fakaseaoga ne Jersey City a ‵tou saolotoga i mea fakalotu. Ne fakatonu atu ei te fono ke tuku mai te taliaga ki a tatou, kae ne kamata o lavea ne au i ei te auala e fakamanuia ne Ieova tena fakapotopotoga e auala i te fakaaogaga o mea tau te tulafono ke fai ei ke gasolo ki mua tena galuega. Ne fiafia malosi au ke aofia i ei.

Ne fai ne taina se galuega lasi ki te fakafouga o te fale tenā, kae ne fai te pukega a pepa a te vasega 79 o Kiliata i te Jersey City Assembly Hall i a Setema 8, 1985, i se fia masina mai tua o tena fakafouga. Se tauliaga gali eiloa ki a au ke mafai o fesoasoani ki te tīmu o te tulafono i te faiga ke gasolo ki mua te galuega o te Malo, kae ko te fiafia ne maua ne au mai i ei e sili fakafia atu i te galuega ne fai ne au pelā me se loia kae koi tuai o vau au ki te Peteli. Kae e se iloa ne au me ka fakaaoga malosi au ne Ieova ki nisi galuega penei fakamuli.

I te 1980 tupu, e se ti masani o talia ne tokita mo fakaimasaki a te manakoga o se Molimau matua ke fai se togafiti ki a ia e aunoa mo te fakaaogaga o te toto. Ne faigata te mea tenei ki fāfine fai‵tama me mafau‵fau a famasino me e seai se saolotoga o fāfine ke se talia ne latou te fakaaogaga o te toto. E fai mai te fakamasakoga a famasino me kafai e se fakaaoga te toto, e mafai o mate te mātua ko tupu aka ei te tamaliki e aunoa mo sena mātua.

I a Tesema 29, 1988, ne ‵tafe te sua o te tuagane ko Denise Nicoleau i te otiga ne fanau i tena tamaliki tagata. Ne fanaifo tena toto ki lalo i te 5.0, kae ne fakamolemole atu tena tokita ke talia ne tou fafine ke fagai a ia ki te toto. Ne seki talia ne te tuagane ko Nicoleau te mea tenā. I te suā aso ne taumafai te fakaimasaki o fai ki te fono ke tuku mai te saolotoga ki tino ga‵lue i te fakaimasaki ke fai te mea telā e mafaufau latou me se mea e ‵tau o fai, ko te fakaaogaga o te toto. Ne talia ne te famasino ke fagai te tuagane ko Nicoleau ki te toto e aunoa mo te fai‵pati io me fakailoa atu ki tou fafine io me ko tena avaga e uiga ki te mea tenā.

I te Aso Lima, Tesema 30, ne fagai ne tino i te fakaimasaki a te tuagane ko Nicoleau ki te toto faitalia me e se talia ne tena avaga mo nisi tino o tena kāiga, kolā ne ‵nofo atu i ana tafa, a te mea tenā. I te afiafi tenā, ne ave o ‵loka a nisi tino o te kāiga mo se tokotasi io me se tokolua toeaina, me ne fakatamilo ne latou te moega o te tuagane ko Nicoleau ke ‵pono te auala o te tino telā ka fanatu o fagai tou fafine ki te toto. I te taeao o te Aso Ono, Tesema 31, ne fakasalalau  te tala tenā i mea fakasalalau o New York City mo Long Island.

I te taeao o te Aso Gafua, ne sau‵tala māua mo se famasino o te fono maluga ko Milton Mollen. Ne fai ne au ki ei a mea ne ‵tupu, kae fakamatala faka‵lei atu me ne saina ne te suā famasino te taliaga ke fakaaoga te toto e aunoa mo se faipa‵tiga ne fai ki ei. Ne fai mai te famasino ko Mollen ke fanatu au ki tena ofisa i te fakaafiafi tenā ke sau‵tala ki tulafono kolā e fetaui ‵lei mo te fakalavelave tenei. Ne olo tasi māua mo toku ovasia ko Philip Brumley, ki te ofisa o te famasino ko Mollen i te fakaafiafi tenā. Ne ‵kami mai foki ne te famasino a te loia o te fakaimasaki ke fai‵pati tasi matou. Ne tai vela‵vela loa te motou sau‵talaga. I se taimi e tasi, ne tusi ne te Taina ko Brumley ne pati ki tena tusi ke fai mai ki a au ke “tataofi malie.” Kafai e toe mafaufau ki ei, se fakamasauaga tāua ‵ki eiloa tenā me ne kaitaua malosi au ki te loia o te fakaimasaki kae taumafai o fakamaoni aka i a ia e se tonu.

Mai tua o se itula e tasi, ne fai mai te famasino ko Mollen me tenā te mataupu muamua ka fai i te suā aso. Koi tuai o tiaki ne māua tena ofisa, ne fai mai te famasino ko Mollen me i te loia o te fakaimasaki ka “amo ne ia se amoga ‵mafa ma taeao.” Ko tena uiga ka se faigofie o fai ne te loia ne fakamaoniga ke ‵pulu aka te lotou mea ne fai. Ne oko ifo te lagonaga ki a au me ko fakamaoni mai ne Ieova me e mafai eiloa o manumalo matou. Se mea fakaofoofogia eiloa ke kilo atu ki te auala e fakaaoga ei ne Ieova tatou ke fakataunu tena loto.

Ne ga‵lue matou ke oko ki te po ke fakatoka omotou fakamatalaga mō te aso taeao. A te fale fai fono e pili mai fua ki te Peteli i Brooklyn, tela la, te tokoukega o matou mai te Ofisa i Mea Tau te Tulafono ne sa‵sale fua ki ei. I te otiga ne fakalogo‵logo a famasino e tokofa ki omotou fakamatalaga, ne fakaiku ei ne latou me ne seki ‵tau eiloa o avatu te taliaga ke fakaaoga te toto. Ne manumalo te tuagane ko Nicoleau kae ne fai mai te fono me i te faifaiga masani ke tuku atu ne se famasino te taliaga ke fai se mea e aunoa mo te fai‵pati fakatasi mo te tino masaki, ko fakaseaoga ne latou i ei te saolotoga o te tino mai lalo i te tulafono fakavae o te fenua.

Fakamuli ifo, ne fai ‵tonu mai te fono maluga o New York me ne isi eiloa se saolotoga o te tuagane ko Nicoleau ke fai tena masaki e aunoa mo te fakaaogaga o te toto. Tenā te fono muamua  mai fono e fa, e uiga ki mea tau toto, ne aofia au i ei, kae ne fai ne te fono maluga ne fakaikuga ki ei. (Onoono ki te pokisi “ Ko Manumaloga i Fono Ma‵luga.”) Ne ga‵lue fakatasi foki au mo nisi loia i te Peteli ki tagi kese‵kese e pelā mo te tausiga o se tamaliki, te ‵talaga o se avaga, mea tau manafa mo fale.

I te taimi muamua ne fetaui ei au mo taku avaga, ko Dawn, a ia se fafine ne ‵tala tena avaga kae e puti aka ne ia a tama‵liki e tokotolu. E galue a ia ke tausi te olaga kae paenia foki. Ne faigata ‵ki tena olaga, kae ne fiafia au ki tena fakaikuga ke tumau i te tavini ki a Ieova. I te 1992, ne ‵kau atu matou ki te Fono Lasi ko te “Tino Kolā e Fakamaina Atu te Mainaga” i te fakai ko New York, kae ne fai atu au me fia fakamasani au ki a ia. Ne avaga maua i te tausaga mai tua. A te mauaga o se avaga telā e fakamuamua faeloa ne ia a Ieova kae fiafia, se fakamanuiaga eiloa mai i a Ieova. Ne fai faeloa ne Dawn a mea ‵lei ki a au i aso katoa o te mā olaga, telā se taui gali eiloa ki a au.—Faata. 31:12.

I te taimi ne avaga māua, a tama‵liki ko ‵nofo olotou tausaga ki te 11, 13, mo te 16. Ne manako au o fai pelā me se tamana ‵lei ki a latou, tenā ne faitau kae fakagaIue faka‵lei ne au a mea katoa ne maua ne au i ‵tou tusi e uiga ki te faiga pelā me se tamana fai ki tama‵liki konei. E isi ne mea faiga‵ta i te gasologa o tausaga, kae e fiafia au me ko talia eiloa ne tama‵liki a au e pelā me se taugasoa fakatuagagina kae se tamana alofa. Ne talia faeloa ne māua a taugasoa o mā tama‵liki ke ‵mai ki te fale kae ne ‵fonu te fale i talavou ma‵losi konei.

I te 2013, ne ga‵sue māua mo Dawn ki Wisconsin ke fesoasoani o tausi ki mātua o māua kolā ko ma‵tua. Kae ne poi au, me seki gata atu i konā taku taviniga i te Peteli. Ne maua ne au te ‵kamiga ke tumau i te fesoasoani atu e pelā me se volenitia ki te fakapotopotoga i mea tau te tulafono.

I a Setema 2018, ne iloa ne au me ko ‵soko loa au i te ‵male sāle. Ne āsi au ne se tokita kae e se iloa ne ia me māfua pefea te fakalavelave tenā. Fakamuli ifo, ne fai mai te suā tokita ke fano au ki se tokita o te faiai. I a Ianuali 2019, ne fai mai te tokita o te faiai me kāti a toku masaki e sē se masaki masani, kae ka pokotia i ei a toku foitino kātoa.

E tolu aso mai tua, i te taimi ne tafao ei au i te tafaoga e fiafia au ki ei, ne makui toku lima fakaatamai. Ne tafao au i te tafaoga tenā i toku olaga kātoa, kae ne apo malosi au i ei. Tenā ne iloa ei ne au me ko se mafai o taofi ne au te auala e gasuesue ei au. Ne poi au i te vave o toku masaki, ne faigata ki a au ke faipati, ke gasuesue, kae folo foki se mea.

E fiafia au me ne mafai o fakaaoga toku poto e pelā me se loia ke fesoasoani ki te fakapotopotoga a Ieova ke fai ke gasolo ki mua a manakoga o te Malo. Kae fiafia foki au me uke a mataupu ne tusi ne au mō tokita, loia mo famasino ke fai‵tau ki ei, kae ke fai foki a lāuga i koga e uke o te lalolagi e uiga ki te saolotoga o tino o Ieova ke filifili a togafiti fakatokita kolā e se fakaaoga i ei a te toto. E fia fai atu ne au a pati a Luka i te Luka 17:10: ‘Au se pologa e seai se aoga. A mea kolā ko oti ne fai ne au ko mea eiloa ne ‵tau o fai ne au.’