1. E pelā mo te mea e fakaasi mai i te 3 Ioane 3, 4, se a te mea e fai ne ia ke fia‵fia tatou?

E MATA, e mafai o fakaataata ne koe te fiafia o te apositolo ko Ioane, i te lagonaga ne ia me i a latou kolā ne fesoasoani a ia ki ei ke tauloto ki te munatonu ne tumau i te tavini fakamaoni atu ki a Ieova? Ne fe‵paki latou mo fakalavelave e uke, kae ne galue malosi a Ioane o fakamalosi aka te fakatuanaki o Kelisiano fakamaoni konei, kolā e fai pelā me ne ana tama‵liki faka-te-agaga. I se auala tai ‵pau, e fia‵fia eiloa tatou māfai ko ‵kilo atu ki ‵tou tamaliki ‵tonu io me ko ‵tou tamaliki faka-te-agaga ko tuku atu olotou ola ki a Ieova kae tumau i te tavini atu ki a ia.—Faitau te 3 Ioane 3, 4.

2. Se a te pogai ne tusi i ei ne Ioane a tusi e tolu?

² I te 98 T.A., kāti ne nofo atu a Ioane i Efeso io me se koga e pili ki ei. Kāti ne fanatu a ia o nofo i konā mai tua o tena fakasaolotoga mai te falepuipui i te motu ko Patamo. I te taimi tenā, ne fakaosofia a ia ne te agaga tapu o Ieova ke tusi ne ia a tusi e tolu. A te pogai o tusi konā, ko te fakamalosi atu o Kelisiano fakamaoni ke fakatumau te lotou fakatuanaki ki a Iesu kae ke tumau i te sa‵sale i te munatonu.

3. Ne a fesili ka tali aka ne tatou?

³ A Ioane ko te apositolo fakaoti telā ne ola, kae ne manavase a ia ki fakamalosiga ma‵sei a faiakoga ‵loi ki fakapotopotoga. * (1 Ioa. 2:18, 19, 26) Ne fai mai a aposetate konā me iloa ne latou te Atua, kae ne seki faka‵logo latou ki fakatonuga a Ieova. Ke na sau‵tala tatou ki pati fakatonutonu fakaosofia ne tuku mai ne Ioane. I te taimi e sau‵tala tatou ki ei, ka tali aka ne tatou a fesili e tolu: Se a te uiga ke sa‵sale i te munatonu? Ne a fakalavelave e fe‵paki  mo tatou? Kae e mafai pefea o fakatau fesoasoani tatou ke tumau i te munatonu?

4. E ‵tusa mo te 1 Ioane 2:3-6 mo te 2 Ioane 4, 6, ne a mea e aofia i te sa‵sale i te munatonu?

⁴ Ke sa‵sale i te munatonu, e ‵tau o iloa ne tatou te munatonu mai te Muna a te Atua, ko te Tusi Tapu. E se gata i ei, e ‵tau mo tatou o “faka‵logo ki ana fakatonuga,” ko tena uiga, e ‵tau mo tatou o tau‵tali i fakatonuga a Ieova. (Faitau te 1 Ioane 2:3-6; 2 Ioane 4, 6.) Ne tuku mai ne Iesu te fakaakoakoga ‵lei katoatoa o te fakalogo ki a Ieova. Tela la, tasi o auala tāua ke faka‵logo tatou ki a Ieova, ko te tau‵tali fakapili‵pili atu ki kalafaga o Iesu.—Ioa. 8:29; 1 Pe. 2:21.

5. Ne a mea e ‵tau o tali‵tonu tatou ki ei?

⁵ Ke tumau i te sa‵sale i te munatonu, e ‵tau mo tatou o loto tali‵tonu me i a Ieova ko te Atua o te munatonu, me i mea katoa e fai mai ne ia i tena Muna, ko te Tusi Tapu, e ‵tonu eiloa. Kae e ‵tau foki o tali‵tonu tatou me i a Iesu ko te Mesia telā ne folafola mai. E tokouke a tino i aso nei e fakalotolotolua me i a Iesu ko oti ne fakaekegina ke fai mo Tupu i te Malo o te Atua. Ne fakailoa mai a Ioane me e “tokouke a tino faitogafiti,” kolā e mafai o takitaki ‵se ne latou a tino kolā e se toka ‵lei o ‵pulu te munatonu e uiga ki a Ieova mo Iesu. (2 Ioa. 7-11) Ne tusi mai a Ioane: “Ko oi te tino loi, e se ko ia telā e fakafiti ne ia i a Iesu ko te Keliso?” (1 Ioa. 2:22) A te auala fua e tasi e mafai o ‵kalo kea‵tea tatou mai te fakaloiloi ne nisi tino, ko te sukesuke ki te Muna a te Atua. Kafai e fai tatou penā, ka iloa ‵lei ne tatou a Ieova mo Iesu. (Ioa. 17:3) I te faiga tenā, ka mafai ei o tali‵tonu tatou me ko maua ne tatou te munatonu.

6. Se a te fakalavelave e tasi e fe‵paki mo talavou Kelisiano?

⁶ E ‵tau mo Kelisiano katoa o fakaeteete ke mo a ma takitaki ‵se ne poto o tāgata. (1 Ioa. 2:26) Kae maise i ei ko talavou Kelisiano, e ‵tau o fakaeteete i te malei tenei. Ne fai mai a Alexia, * se tuagane Falani telā ko 25 ana tausaga, penei: “I te akoga, ne tauloto au e uiga ki te evolusione mo nisi manatu o tino, kae ne fai ne manatu konei ke fakalotolotolua au e uiga ki te munatonu. Nisi taimi, ne ‵gali ‵ki ki au a akoakoga konā. Kae ne mafaufau au me se mea ‵se ke fakaseaoga ne au a akoakoga a te Tusi Tapu kae talitonu ki mea katoa e akoako mai ne toku faiakoga.” Ne sukesuke a Alexia ki te tusi ko  te Life—How Did It Get Here? By Evolution or by Creation? I ne nāi vaiaso, ne seki toe fakalotolotolua a ia. Muna Alexia: “Ne fakamaoni aka ne au ki a au loa me i te munatonu e maua i te Tusi Tapu. Kae ne iloa aka ne au me i te ola e ‵tusa mo tulafono i ei, ka maua i ei ne au te fiafia mo te filemu.”

7. Se a te fakamalosiga e ‵tau o ‵teke ne tatou, kae kaia?

⁷ E ‵tau mo Kelisiano katoa, tama‵liki mo tino ma‵tua o ‵teke atu a te fakamalosiga ke ola i se olaga magalua. Ne faka‵mafa mai ne Ioane me e se mafai ne tatou o sa‵sale i te munatonu kae ola foki i se olaga magalua. (1 Ioa. 1:6) Kafai e ma‵nako tatou ke maua te taliaga a te Atua i te taimi nei mo aso mai mua, e ‵tau o amio tatou e pelā loa māfai ko ‵nofo atu tatou i mua o tino e tokouke. E tonu, e seai se mea e mafai o ‵funa ne tatou, me i mea katoa e tuku faka‵sau eiloa ki mata o Ieova.—Epe. 4:13.

8. Se a te mea e ‵tau o ‵teke ne tatou?

⁸ E ‵tau o ‵teke ne tatou a te kilokiloga a te lalolagi ki te agasala. Ne tusi mai te apositolo ko Ioane: “Kafai e fai atu tatou, ‘E seai ne omotou agasala,’ ko takitaki ‵se ne tatou a tatou eiloa.” (1 Ioa. 1:8) I aso o Ioane, ne fai atu a aposetate me e mafai loa ne se tino o tautali atu i te auala ki te agasala kae fai foki mo taugasoa o te Atua. I aso nei, e ola tasi tatou mo tino kolā e maua ne latou se kilokiloga tai ‵pau. E tokouke a tino e fai mai i a latou e tali‵tonu ki te Atua, kae e se ‵lago latou ki te kilokiloga a Ieova ki te agasala, maise loa māfai e aofia i ei a amioga fakatauavaga. A te mea telā e kilo ki ei a Ieova me se agasala, e taku ne latou e pelā me se filifiliga totino eiloa a te tino, io me e ‵lei loa māfai e fai ne se tino a mea kolā e manako a ia o fai.

9. I te auala fea e aoga ei ki talavou a te ‵piki ‵mau ki akoakoga kolā e fakavae mai te Tusi Tapu?

⁹ E mafai eiloa o fakamalosigina a talavou Kelisiano ke talia ne latou a kilokiloga a olotou vasega io me ko tino e ga‵lue tasi latou e uiga ki amioga fakatauavaga sē ‵tau. Tenā te mea ne tupu ki a Aleksandar. Ana muna: “Ne taumafai a nisi tama‵liki fāfine i te akoga o fakamalosi au  ke ‵moe mo latou. Ne fai mai latou me ona ko te mea e seai saku famau fafine, ko tena uiga kāti e isi saku famau tagata.” Kafai e fakafesagai atu koe mo tofotofoga tai ‵pau, masaua me kafai e ‵piki ‵mau koe ki akoakoga kolā e fakavae ki te Tusi Tapu, ko puipui ne koe a koe eiloa, tou ola ‵lei, ou lagonaga, mo tou fesokotakiga mo Ieova. Kae i taimi takitasi e ‵teke ne koe se tofotofoga, ka faigofie eiloa o fai ne koe a te mea tonu. Masaua foki me i te kilokiloga ‵se tenei a te lalolagi e uiga ki amioga fakatauavaga ne māfua mai i a Satani. Tela la, kafai e se manako koe o gutugutulua, ko ‘fakatakavale ne koe te tino masei.’—1 Ioa. 2:14.

10. E fesoasoani mai pefea te 1 Ioane 1:9 ke tavini atu tatou ki a Ieova mo se loto lagona ‵ma?

¹⁰ E iloa ne tatou me e maua ne Ieova te aiā ke fakailoa mai ne ia me se a te agasala. Kae e fai ne tatou te ‵toe mea e mafai o fai ke mo a ma agasala tatou. Kae kafai ko agasala tatou, e fakaasi ‵tonu atu ne tatou a ‵tou mea ‵se ki a Ieova i ‵talo. (Faitau te 1 Ioane 1:9.) Kae kafai e fai ne tatou se agasala matagā, e ‵sala atu tatou ki te fesoasoani o toeaina kolā ne ‵tofi aka ne Ieova ke tausi mai ki a tatou. (Iako. 5:14-16) Kae e se ‵tau o mafau‵fau faeloa tatou ki mea ‵se ne fai i taimi mua. Kaia? Me ne fakatoka eiloa ne te ‵tou Tamana alofa a te taulaga togiola a tena Tama ko te mea ke mafai o fakamagalo i ei a ‵tou agasala. Kafai e fai mai a Ieova me ka fakamagalo ne ia a agasala a latou kolā ko oti ne sala‵mo tonu, e ‵tonu eiloa ana pati konā. Tela la, e seai se mea e taofi ne ia tatou mai te tavini atu ki a Ieova mo se loto lagona ‵ma.—1 Ioa. 2:1, 2, 12; 3:19, 20.

11. E mafai pefea ne tatou o puipui ‵tou mafaufau mai akoakoga kolā e mafai o fakamasei ei ‵tou fakatuanaki?

¹¹ E ‵tau o ‵teke ne tatou a akoakoga a aposetate. Talu mai te fakatuga o te fakapotopotoga Kelisiano, ne fakaaoga eiloa ne te Tiapolo a tino faitogafiti e tokouke ke ‵toki ne latou a manatu fakalotolotolua ki mafaufau o tavini fakamaoni a te Atua. Ona ko te mea tenā, e ‵tau o iloa ne tatou te auala ke iloilo faka‵lei a mea  ‵tonu mai i mea ‵loi. * E mafai o fakaaoga ne ‵tou fili te Itaneti io me ko fakatuatusi fai fesokotakiga ke taumafai o fakavāivāi ‵tou tali‵tonu ki a Ieova mo te ‵tou a‵lofa ki ‵tou taina. Ke masaua te tino telā e māfua mai i a ia a vaegā loi penā, kae ke ‵teke atu a loi konā!—1 Ioa. 4:1, 6; Faka. 12:9.

12. Kaia e ‵tau ei o ‵poko te ‵tou loto fakafetai ki muna‵tonu ne tauloto ne tatou?

¹² Ke ‵teke atu a osomaiga a Satani, e ‵tau o ‵poko ‵tou loto tali‵tonu ki a Iesu mo tena tulaga tāua i te fuafuaga a te Atua. E ‵tau foki o tali‵tonu tatou ki te auala fua e tasi e fakaaoga ne Ieova i aso nei. (Mata. 24:45-47) E mafai o ‵poko te ‵tou loto tali‵tonu, mai te sukesuke faeloa ki te Muna a te Atua. Ko fai ei ‵tou fakatuanaki e pelā me se lakau telā e ‵galo ana aka i lalo i te laukele. Ne fakasae aka ne Paulo se manatu tai ‵pau i tena tusiatuga ki te fakapotopotoga i Kolose. Ana muna: “Ona ko te mea ko oti ne talia ne koutou a te Aliki ko Keliso Iesu, tumau la i te sa‵sale fakatasi mo ia, mai te ‵mau otou aka kae ati aka i luga i a ia mo te tumau i te fakatuanaki.” (Kolose 2:6, 7) Kafai e ga‵lue malosi tatou o fakamalosi aka ‵tou fakatuanaki, ka se mafai eiloa ne Satani mo tino e ‵lago atu ki a ia o taofi aka tatou mai te sa‵sale i te munatonu.—2 Ioa. 8, 9.

13. Se a te mea e ‵tau o fakamoe‵moe tatou ki ei, kae kaia?

¹³ E ‵tau o fakamoe‵moe tatou ke takalia‵lia mai te lalolagi. (1 Ioa. 3:13) E fakamasaua mai a Ioane me “i te lalolagi kātoa ko nofo mai lalo i te pule a te tino masei.” (1 Ioa. 5:19) Ona ko te pili mai o te gataga o te olaga tenei, ko na gasolo loa o ‵vela a te kaitaua o Satani. (Faka. 12:12) E fakaaoga ne ia a auala fai lēmū e uke ke taua mai, pelā mo te poa ko amioga fakatauavaga sē ‵tau io me ko loi mai aposetate. Ka oso ‵tonu mai foki a ia e auala i fakasauaga. E iloa ne Satani me ko toetoe fua tena taimi koi ‵toe ke taumafai o taofi tatou mai te talai atu io me fakamasei ‵tou fakatuanaki. Tenā te mea e se ‵poi ei tatou i te fakataputapuga o ‵tou galuega i nisi fenua. E ui i ei, e kufaki loa a ‵tou taina mo tuagane i fenua konā. E fakamaoni mai ne latou me faitalia me ne a mea e fai mai ne te tino masei tenei ki a tatou, e mafai eiloa o manumalo tatou!

14. Se a te auala e tasi e mafai o fesoasoani atu tatou ki ‵tou taina mo tuagane ke tumau i te munatonu?

¹⁴ Ke fesoasoani atu ki ‵tou taina mo tuagane ke tumau i te munatonu, e ‵tau mo tatou o fakaasi atu te alofa atafai. (1 Ioa. 3:10, 11, 16-18) E ‵tau o fakatau a‵lofa tatou te suā tino ki te suā tino, e se i taimi fua e ‵lei ei a mea katoa, kae i taimi foki e ‵sae aka ei a fakalavelave. E pelā mo te mea tenei, e mata, e iloa ne koe se tino ko galo atu tena tino pele i te mate kae manakogina ke fakamafanafana io me fesoasoani atu i nisi auala? Io me ne logo koe me ne ‵galo atu a kope e uke o taina tali‵tonu mai se fakalavelave o te natula, kae manakogina se fesoasoani ke toe faite aka olotou Fale Tapuaki io me ko fale? E fakaasi atu ne tatou te ‵poko o te ‵tou a‵lofa mo te atafai ki ‵tou taina mo tuagane, e auala i ‵tou mea e fai ki a latou kae e se mai i ‵tou pati fua e fai atu.

15. E pelā mo pati i te 1 Ioane 4:7, 8, ne a mea e manakogina ke fai ne tatou?

¹⁵ E fakaakoako tatou ki te ‵tou Tamana alofa māfai e fakaasi atu ne tatou te alofa te suā tino ki te suā tino. (Faitau te 1 Ioane 4:7, 8.) A te auala e tasi e fakaasi atu ne tatou te alofa ko te fakatau fakamagalo te suā tino ki te suā tino. E pelā me se fakaakoakoga, kāti ne fakalogo‵mae tatou ne se tino, kae oti aka ko fakatoese mai a ia. E fakaasi atu ne tatou te alofa mai te fakamagalo a ia kae fakapuli atu tena mea ‵se. (Kolose 3:13) Ne fepaki te taina ko Aldo mo te tofotofoga tenei i te taimi ne lagona ne ia se taina telā ne āva malosi a ia ki ei e fai ne ia a pati sē ‵lei ki tino mai tena fenua. Muna Aldo, “Ne ‵talo faeloa au ki a Ieova ke fesoasoani mai  ke mo a e isi ne oku lagonaga se ‵lei ki te taina tenei.” Kae ne fai ne Aldo se mea tai ‵kese. Ne fakaiku aka ke fakamolemole atu a ia ki te taina ke ga‵lue tasi mo ia i te galuega talai. I te lā galuega, ne fakamatala atu ne Aldo a tena fanoanoa ki pati a te taina tenā ne fai. “I te lagonaga ne te taina oku lagonaga e uiga ki ana pati fakalogo‵mae konā,” muna Aldo, “ne fakatoese mai a ia. Mai te auala ne faipati mai ei a ia, ne mafai o iloa ne au te lasi o tena salamō ona ko ana pati ne fai. Ne fai māua mo taugasoa ‵lei kae ne fakapuli atu ne māua te fakalavelave tenā.”

16-17. Ne a mea e ‵tau o fakaiku aka ke fai ne tatou?

¹⁶ Ne ‵poko te alofa mo te manavase o te apositolo ko Ioane mō te ‵lei o ana taina i te feitu faka-te-agaga, kae ne fakaasi faka‵lei mai te lagonaga tenā i pati fakatonutonu ne tuku mai ne ia e auala i ana tusi fakaosofia e tolu. Ko oko loa i te fakamalosi loto ke iloa atu me i tāgata mo fāfine kolā ka pule fakatasi mo Iesu i te lagi, e a‵lofa kae atafai foki pelā loa mo Ioane!—1 Ioa. 2:27.

¹⁷ Ke na faka‵goto ki ‵tou loto a pati fakatonutonu konei ne sau‵tala tatou ki ei. Ke na fakaiku aka ke sa‵sale tatou i te munatonu, mai te faka‵logo ki a Ieova i feitu katoa o ‵tou olaga. Suke‵suke ki tena Muna, kae tali‵tonu ki ei. Ati aka te fakatuanaki malosi ki a Iesu. ‵Teke atu a poto o tāgata mo akoakoga a aposetate. ‵Teke atu a te fakamalosiga ke ola i se olaga magalua kae ke agasala. Ola e ‵tusa mo tulaga ma‵luga o Ieova i mea tau amioga. Kae ke na fesoasoani atu tatou ki ‵tou taina ke tumau i te ma‵losi, mai te fakamagalo atu a latou kolā e fakalogo‵mae mai kae fesoasoani atu ki a latou kolā e manakogina ne latou se fesoasoani. I te faiga tenā, ka tumau eiloa tatou i te sa‵sale i te munatonu faitalia a mea faiga‵ta e fe‵paki mo tatou.