Kai faitau faka‵lei koe ki lōmiga o Te Faleleoleo Maluga i te tausaga nei? Onoono aka me e mafai o tali mai ne koe a fesili konei io me ikai:

Se a te fakaakoakoga ne tuku mai ne Ieova e uiga ki faifaiga e ‵tau o fai ki fāfine?

E fai faka‵lei ne ia latou e aunoa mo te fapito, e se fapito a ia ki tāgata i lō fāfine. E fakalogologo te Atua ki fāfine, kae saga tonu ki olotou lagonaga mo mea e manava‵se ki ei. Kae talitonu a ia me e mafai ne latou o fai tena galuega.—w24.01, itu. 15-16.

E mafai pefea o fakagalue ne tatou a te Efeso 5:​7, telā e fai mai: “Ke mo a ma ‵kau fakatasi mo latou”?

Ne fakailoa mai ne te apositolo ko Paulo ke fakaeteete tatou i te ‵kau fakatasi mo tino kolā ka fai ne latou ke faigata o ‵piki ‵mau tatou ki tulaga o te Atua. A vaegā taugasoa ma‵sei penā e fakasino ki tino kolā e uke ‵tou taimi e fakamāumāu fakatasi mo latou penā foki mo latou kolā i luga i te neti.—w24.03, itu. 22-23.

Ne a vaegā tala sē ‵tonu e ‵tau o fakaeteete tatou i ei?

E ‵tau o fakaeteete tatou i tala sē mautinoa mai ‵tou taugasoa, meli sē mautinoa mai tino kolā e se iloa ne tatou, mo aposetate kolā e fia‵fia fakaloiloi mai ki te ‵tou fekau.—w24.04, itu. 12.

Ne a mea e iloa mo mea e se iloa ne tatou e uiga ki te fakamasinoga a Ieova ki te tupu ko Solomona mo latou foki kolā ne ‵mate i Sotoma mo Komolo mo te Lolo?

E se iloa ne tatou me ka fakaseai atu ne Ieova a latou ki te se-gata-mai io me ikai. Kae e iloa ne tatou me e maua ne ia a fakamatalaga ‵tonu katoa ki te mea tenā kae e lasi foki tena alofa fakamagalo.—w24.05, itu. 3-4.

Se a te mea e fakamaoni mai ki a tatou e uiga ki te Atua telā ko te “Kaupapa? (Teu. 32:4)

E mafai o fai a Ieova e pelā me ko te ‵tou ‵lafiga. A ia e fakamaoni, kae tausi faeloa ki ana tautoga. Kae e ‵mautakitaki a ia, e se ma‵fuli eiloa ana uiga mo tena fuafuaga.—w24.06, itu. 26-28.

Ne a mea e mafai o fesosoani atu ke fakamasani koe ki se fakapotopotoga fou?

Fakalagolago ki a Ieova, telā ka fesoasoani atu e pelā mo tena fesoasoani ki ana tavini i aso ko ‵teka. Ke mo a ma fakatusa‵tusa ne koe tau fakapotopotoga mua ki tau fakapotopotoga fou. Ke aofia malosi i polokalame a tau fakapotopotoga fou, kae taumafai malosi o ‵sala a taugasoa ‵fou.—w24.07, itu. 26-28.

Ne a akoakoga e maua mai i tala fakatusa e tolu i te Mataio mataupu 25?

E faka‵mafa mai i te tala fakatusa o mamoe mo kouti a te tāua o te tumau i te fakamaoni. A te tala fakatusa ki tamafine ‵poto mo tamafine va‵lea e faka‵mafa mai i ei a te tāua ke toka kae matapula‵pula. Kae ko te tala fakatusa ki taleni e fakaasi mai ei a te tāua o te ga‵lue malosi mo te fakamaoni.—w24.09, itu. 20-24.

E pefea te maluga o te fakaosoga o te faletapu o Solomona?

I te 2 Nofoaiga Tupu 3:​4, e fai mai nisi lōmiga mua me e “120 kupita,”, ko tena uiga a te fakaosoga e ‵tusa mo te 53 mita (175 ft) te maluga. Kae fai mai nisi fakamatalaga me e “20 kupita,” telā se iva mita (30 ft) te loa. E foliga mai me e fetaui ‵lei a te manatu i te lua mo te lauefa o ‵pui o te faletapu.—w24.10, itu. 31.

Se a te uiga ke ‘tokotasi te avaga’ a se tavini fesoasoani? (1 Timo. 3:12)

E fakauiga eiloa me e ‵tau fua o tokotasi te fafine e avaga a ia ki ei kae e se ‵tau o aofia i faifaiga fakatauavaga sē ‵tau mo se suā fafine. E se gata i ei, e se ‵tau o isi ne ana lagoanga fiafai ki nisi fāfine.—w24.11, itu. 19.

Kaia e fai atu tatou me ne seki fakasino atu a pati i te Ioane 6:53 ki te fakatokaga o te ‵Kaiga a te Aliki i te Afiafi?

E faipati a te Ioane 6:53 ki te tāua ke kai ki ‵kano o Iesu kae inu ki tena toto. Ne fai atu ne Iesu a pati konei i te 32 T.A., i Kalilaia, ki tino Iutaia kolā koi manakogina ke fakatuanai ki a ia. Kae ko te ‵Kaiga a te Aliki i te Afiafi ne kamata i te tausaga mai tua ifo i Ielusalema. Ne faipati eiloa a Iesu i konā ki a latou kolā ka pule fakatasi mo ia i te lagi.—w24.12, itu. 10-11.