Ne tusi atu te apositolo ko Paulo ki tena taina toeaina ko Timoteo: “E fakatonu atu au ki a koe i mua o te Atua mo Keliso Iesu mo agelu filifilia, ke tausi ki fakatonuga konei e aunoa mo te fapito mo te fakailoga tino.”—1 Timo. 5:21.

Muamua la, ke malamalama tatou me ko oi a agelu konei, ka sau‵tala tatou me ko oi a agelu kolā e se mafai o aofia i te potukau o agelu konei. E manino ‵lei me e se aofia latou konei i te toko 144,000. I te taimi ne tusi atu a Paulo ki a Timoteo, kae seki kamata o faka‵tu aka a Kelisiano fakaekegina ki te lagi. E seki fai foki a te kau apositolo mo nisi tino fakaekegina e pelā me ne tino faka-te-agaga, tela la, a “agelu filifilia” konei, e se mafai o fakasino atu ki a latou.—1 Koli. 15:​50-54; 1 Tesa. 4:​13-17; 1 Ioa. 3:2.

E se gata i ei, a “agelu filifilia” e se mafai o fakasino atu ki agelu kolā ne seki faka‵logo i te taimi o te Lolo. A agelu konā ne ‵tu i te feitu o Satani kae ne fai pelā me ne temoni, kolā ko fili o Iesu. (Kene. 6:2; Luka 8:​30, 31; 2 Pe. 2:4) I aso mai mua, ka ‵loka faka‵mau latou i te lua ‵poko mō se 1,000 tausaga kae oti aka, ko fakaseai atu latou fakatasi mo te Tiapolo.—Iuta 6; Faka. 20:​1-3, 10.

A “agelu filifilia” kolā ne taku mai ne Paulo, e mautinoa eiloa me ko agelu i te lagi kolā ne ‵lago atu ki te “Atua mo Keliso Iesu,” kolā ne ‵sae mai i te fuaiupu tenā.

A lau i te fia afe mo afe o agelu fakamaoni. (Epe. 12:​22, 23) E se ‵tau o mafau‵fau a tatou me tasi eiloa te galuega ne tuku atu ke fai ne latou i te taimi tenā. (Faka. 14:​17, 18) Ke masaua me ne fakatonu atu a Ieova ki se agelu fua e tokotasi ke fakaseai atu te toko 185,000 sotia Asulia. (2 Tupu 19:35) Kāti e isi ne agelu ne ‵tofi aka ke “unu kea‵tea ne latou mai [te Malo o Iesu] a mea katoa kolā e fakavāivāi ei a tino e pelā foki mo tino solitulafono.” (Mata. 13:​39-41) Nisi kāti ne “fakamaopoopo fakatasi mai ne latou ana tino filifilia” ki te lagi. (Mata. 24:31) Kae ne fakatonu atu ki nisi agelu ‘ke puipui tatou i ‵tou auala katoa.’—Sala. 91:11; Mata. 18:10; fakatusa ki te Mataio 4:11; Luka 22:43.

A “agelu filifilia” kolā ne taku mai i te 1 Timoteo 5:21 kāti ko agelu kolā ne ‵tofi ke fai ne latou a tiute fakapito kolā e isi ne olotou sokoga ki tino o te Atua. I te mataupu kātoa, ne fai atu ne Paulo a pati fakatonutonu ‵poto mō toeaina, kolā e āva ki ei a tino i te fakapotopotoga. E ‵tau mo toeaina o fai faka‵lei olotou tiute “e aunoa mo te fapito mo te fakailoga tino kae e se ‵tau o fai ne latou se fakaikuga e aunoa mo te mafau‵fau faka‵lei ki ei. Kae ne fai atu ne Paulo te pogai e tāua ei ke faka‵logo latou ki ana pati fakatonutonu. Ne fai atu a ia me e tavini atu a toeaina i “mua o te Atua mo Keliso, mo agelu filifilia.” Tela la, e manino ‵lei me i nisi agelu ne ‵tofi aka ke fesoasoani atu ki tiute fai i te fakapotopotoga, pelā mo te puipuiga o latou, takitakiga o te galuega talai, kae avatu ne latou se tala ki a Ieova e uiga mō mea konā.—Mata. 18:10; Faka. 14:6.