1. Se a te mea e mafai o tupu ki nisi tino kolā ne fai ne latou a agasala matagā?

 I TE mataupu mai mua, ne lavea ne tatou a te auala ne fakatoka ne te apositolo ko Paulo a te fakalavelave ki se tino fai agasala i te fakapotopotoga i Kolinito. Ne seki salamō te tino fai agasala tenā kae ne ‵tau o tapale kea‵tea mai te fakapotopotoga. Kae pelā mo te ‵tou tusi siki fakavae, e fai mai me e mafai eiloa o sala‵mo a nisi tino kolā ne fai ne latou a agasala matagā. E mafai o takitaki atu latou ke sala‵mo. (Loma 2:4) E mafai pefea o fesoasoani atu a toeaina ki a latou ke sala‵mo?

2-3. Ne a ‵tou mea e ‵tau o fai māfai ko iloa atu me ne fai ne se taina talitonu se agasala matagā, kae kaia?

² A koi tuai o fesoasoani atu a toeaina, e ‵tau o iloa muamua ne latou a te fakalavelave. Tela la, se a te mea e ‵tau o fai māfai ko iloa ne tatou me ne fai ne se taina talitonu se agasala matagā—se agasala telā e mafai o iku atu ki tena tapale kea‵tea mai te fakapotopotoga? E ‵tau o fakamalosi atu tatou ki te tino fai agasala ke fano o ‵sala fesoasoani ki toeaina.—Isa. 1:18; Galu. 20:28; 1 Pe. 5:2.

³ Kae pefea la māfai e se fia faipati atu te tino fai agasala ki toeaina? Tenā ko olo ei tatou ki toeaina ko te mea ke maua ne te tino tenā a te fesoasoani e manakogina ne ia. A te mea tenā se faifaiga alofa, me e se ma‵nako tatou ke galo atu te ‵tou taina io me ko te ‵tou tuagane. Kafai e tumau eiloa te tino fai agasala i ana amioga, ka fakamasei fua ne ia tena fesokotakiga mo Ieova. Ka mafai foki o fakamasei ne ia te ata o te fakapotopotoga.  Tela la, faitalia te faigata, e olo atu eiloa tatou o fakailoa ki toeaina, ona ko te ‵tou a‵lofa ki a Ieova mo te ‵tou taina io me ko te ‵tou tuagane.—Sala. 27:14.

TE FESOASOANI O TOEAINA KI TINO KOLĀ NE FAI NE LATOU SE AGASALA MATAGĀ

4. Se a te fakamoemoega o toeaina māfai ko fai‵pati fakatasi mo te tino fai agasala matagā?

⁴ Kafai e fai ne se tino i te fakapotopotoga se agasala matagā, e fili ne te potukau o toeaina a taina ata‵mai e tokotolu mai i a latou eiloa ke aofia i te komiti. a A tāgata konei e ‵tau o loto malamalama kae loto maulalo. E tiga loa e taumafai latou o fesoasoani ki te tino fai mea ‵se ke salamō, kae e iloa ne latou me e se mafai o faimālō ne latou se tino ke ‵fuli. (Teu. 30:19) E iloa ne toeaina me e se ko tino fai agasala katoa ka sala‵mo e pelā mo te tupu ko Tavita. (2 Samu. 12:13) E mafai o fakaiku ne nisi tino fai agasala ke se faka‵logo ki pati fakatonutonu mai i a Ieova. (Kene. 4:​6-8) Kae ko te fakamoemoega eiloa o toeaina, ko te takitaki mai o te tino fai agasala ke mafai o salamō. Ne a fakatakitakiga e fakaaoga ne latou māfai ko fai‵pati fakatasi mo te tino fai agasala?

5. Ne a fakatakitakiga e ‵tau o masaua ne toeaina māfai ko fai‵pati fakatasi mo te tino fai agasala? (2 Timoteo 2:​24-26) (Onoono foki ki te ata.)

⁵ E ‵kilo atu a toeaina ki te tino fai agasala me se mamoe tāua telā ko galo. (Luka 15:​4, 6) Tela la, kafai ko fai‵pati fakatasi mo te tino tenā, e se kaitāua latou i olotou pati, faifaiga, mo tāga; e se ‵kilo atu foki ki te faipa‵tiga tenā e pelā me se fono masani fua telā e ‵tau o fai. Kae ka fakaasi atu ne latou a uiga kolā e fakaasi mai i te 2 Timoteo 2:​24-26. (Faitau.) E tumau a toeaina i te agamalu, uiga filemu, mo te atafai i te taimi e taumafai latou ke fesoasoani ki te tino fai agasala ke ‵fuli.

6. Ka fakatoka pefea ne toeaina olotou loto a koi tuai o fai‵pati fakatasi mo te tino fai agasala? (Loma 2:4)

⁶ E fakatoka ne toeaina olotou loto. E taumafai latou o fakaakoako ki a Ieova i olotou faifaiga katoa e fai ki te tino fai agasala, kae masaua a pati a Paulo: “Te Atua e taumafai o takitaki koe ke salamō ona ko tena atafai.” (Faitau te Loma 2:4.) E ‵tau o masaua ne toeaina me i a latou ne tausi mamoe kolā e ‵nofo mai lalo i te takitakiga a Keliso. (Isa. 11:​3, 4; Mata. 18:​18-20) A koi tuai o fai‵pati fakatasi mo te tino fai agasala, e ‵tau o ‵talo kae mafau‵fau a toeaina ki te lotou fakamoemoega: ke takitaki te tino fai agasala ke salamō. Ka fai olotou sukesukega ki te Tusi Tapu mo ‵tou tusi kae ‵talo ke maua te poto.  Ka mafau‵fau foki latou ki mea e ‵tau o iloa ne latou e uiga ki te olaga o te tino tenā, kolā ne fai ei ke mafaufau a ia o fai te agasala tenā.—Faata. 20:5.

7-8. E fakaakoako atu pefea a toeaina ki te kufaki o Ieova māfai ko fai‵pati fakatasi mo te tino fai agasala?

⁷ E fakaakoako a toeaina ki te kufaki o Ieova. E masaua ne latou a faifaiga a Ieova ki tino fai agasala i aso mua. E pelā mo te taimi ne fakasako‵sako atu a Ieova mo te kufaki ki a Kaino, kae fai atu ki ei a ikuga o te agasala mo fakamanuiaga ka maua ne ia māfai e fakalogo a ia. (Kene. 4:​6, 7) Ne polopoloki ne Ieova a Tavita e auala i te pelofeta ko Natano, kae ne fakaaoga ne ia se tala fakatusa telā ne otia i ei te loto o te tupu. (2 Samu. 12:​1-7) Kae ne “uga atu faeloa” ne Ieova ana pelofeta “i taimi katoa” ki te fenua sē faka‵logo ko Isalaelu. (Iele. 7:​24, 25) Ne seki faka‵tali a ia ke sala‵mo ana tino ko fesoasoani atu ei a ia. Kae ne gasue muamua a ia o fakamalosi latou ke sala‵mo.

⁸ E tau‵tali a toeaina ki te fakaakoakoga a Ieova māfai ko fesoasoani atu ki tino ne aofia i se agasala matagā. E pelā mo te mea e fai mai i te 2 Timoteo 4:​2, e fakasako‵sako atu latou mo te “kufaki katoatoa” māfai ko fakatonutonu aka se taina talitonu fai agasala. Tela la, e ‵tau mo se toeaina o tumau i te uiga filemu kae kufaki ko te mea ke fesoasoani atu ki te tino fai agasala ke fai ne ia te mea tonu. Kafai e kaitaua io me e se lava te kufaki o se toeaina, e mafai o se fia fakalogo te tino tenā ki pati fakatonutonu io me se fia salamō eiloa.

9-10. E mafai pefea o fesoasoani atu a toeaina ki se tino fai agasala ke iloa ne ia te pogai ne fai ei ne ia te agasala tenā?

⁹ E taumafai a toeaina ke iloa ne latou a pogai ne iku atu ei ki te fai ne te tino a te agasala tenā. E pelā me se fakaakoakoga, e mata, te tino ne gasolo o vāivāi faka-te-agaga ona ko te sē fakatāua ne ia ana sukesukega totino io me ko te galuega talai? E mata, ko se ‵talo sāle a ia ki a Ieova? E mata, ne takitaki a ia ne ana manakoga sē ‵lei? E mata, e se ‵lei ana fakaikuga ne fai ki ana taugasoa mo fakafiafiaga? Ne mafai pefea o pokotia tena loto ona ko ana fakaikuga konā? E mata, e iloa ne ia te auala ne pokotia ei tena Tamana ko Ieova i ana fakaikuga mo ana faifaiga ne fai fakamuli nei?

¹⁰ Mai te faiga o fesili aoga penā e aunoa mo te fialogo ki nisi mea, e fai ei ne toeaina mo te atafai ke fakaasi mai ne te tino fai agasala a mea i tena loto kae fesoasoani atu ke iloa ne ia te pogai ne iku atu ei a ia ki te faiga o te agasala tenā. (Faata. 20:5) E se gata i ei, e mafai o fakaaoga ne latou a tala fakatusa ke fesoasoani ki te tino ke malamalama kae ke lavea ne ia te masei o tena mea ne fai, e pelā mo te mea ne fai ne Natano ki a Tavita. Kāti e mafai o fanoanoa te tino tenā i tena mea ne fai. E mafai foki eiloa o salamō tonu a ia.

11. Ne saga atu pefea a Iesu ki tino fai agasala?

¹¹ E taumafai a toeaina ke fakaakoako ki a Iesu. Ne fai ne Iesu telā ne toe fakatu aka a te fesili tenei ki a Saulo mai Taso: “Saulo, Saulo, kaia e fakasaua ei ne koe au?” Ne fesoasoani atu a Iesu ke iloa ne ia a te ‵se o tena mea e fai. (Galu. 9:​3-6) Kae pelā mo “te fafine ko Iesepela,” ne fai atu a Iesu: “Ko oti ne tuku atu ne au te avanoaga ki a ia ke salamō.”—Faka. 2:​20, 21.

12-13. E tuku atu pefea ne toeaina te avanoaga ki se tino fai agasala ke salamō? (Onoono foki ki te ata.)

¹² I te fakaakoako atu ki a Iesu, e se fakaiku fakavave ne toeaina me ka se salamō eiloa te tino fai agasala. Nisi tino e mafai o sala‵mo i te taimi muamua e fai‵pati ei mo toeaina, kae ko nisi tino kāti fakamuli loa. Tela la, kāti e uke a taimi ka manakogina ke toe fai‵pati fakatasi a toeaina mo te tino fai agasala. Kāti mai tua o te fai‵patiga muamua, ka mafai o mafaufau faka‵lei te Kelisiano ne agasala ki  mea ne fai‵pati latou ki ei. E mafai o loto maulalo a ia kae ‵talo atu ki a Ieova. (Sala. 32:5; 38:18) Tela la, i se faipa‵tiga fakamuli ifo, ko mafai loa o ‵kese a faifaiga a te tino agasala i te taimi tenā i lō te taimi muamua ne fai‵pati latou.

¹³ Ko te mea ke fesoasoani atu ki te tino fai agasala ke salamō, e fakaasi atu ne toeaina te loto malamalama mo te atafai. E fakamoe‵moe kae ‵talo latou ke fakamanuia ne Ieova olotou taumafaiga, kae ke mafai o ala te mafaufau o te Kelisiano sē fakalogo kae fakaasi te salamō.—2 Timo. 2:​25, 26.

14. Ko oi e ‵tau o maua ne ia a tavaega māfai ko salamō se tino fai agasala, kae kaia?

¹⁴ Kafai ko salamō te tino fai agasala, e fia‵fia eiloa tatou! (Luka 15:​7, 10) Kae ko oi e ‵tau o maua ne ia a tavaega? Ko toeaina? Ke masaua a pati ne tusi mai ne Paulo e uiga ki tino fai agasala: “E se taumate e mafai ne te Atua o tuku atu ki a latou a te loto salamō.” (2 Timo. 2:25) Tela la, e sē se tino ne fesoasoani ki se Kelisiano ke ‵fuli tena kilokiloga mo ana faifaiga kae ko Ieova eiloa. Ne fakamatala mai ne Paulo a mea ‵lei kolā e mafai o ‵tupu māfai ko salamō se tino. Ka gasolo o lasi atu te iloaga tonu o te tino tenā i te munatonu, ka maua ne ia te fesoasoani ke mafai o mafaufau faka‵lei, kae e mafai o kalo kea‵tea a ia mai malei a Satani.—2 Timo. 2:26.

15. E tumau pefea a toeaina i te fesoasoani atu ki se tino fai agasala telā ko salamō?

¹⁵ Kafai ko salamō te tino fai agasala, ka fakatoka ne te komiti ke āsi atu faeloa a tausi mamoe ko te mea ke maua ne ia te fesoasoani e manakogina ke ‵teke atu a malei a Satani kae ke toe faka‵tonu ana auala. (Epe. 12:​12, 13) E se ‵tau o fakaasi ne toeaina ki se tino a mea ne ‵tupu ki te tino fai agasala. Kae se a te mea e ‵tau o fakailoa atu ki te fakapotopotoga?

“POLOPOLOKI I MUA O TINO KATOA”

16. E ‵tusa mo te 1 Timoteo 5:​20, ko oi ne fakauiga a Paulo ki ei i ana pati “i mua o tino katoa”?

¹⁶ Faitau te 1 Timoteo 5:20. Ne tusi atu ne Paulo a pati konā ki tena taina toeaina ko Timoteo ke iloa ne ia a mea e ‵tau o fai ki “tino  kolā e fai faeloa ne latou te agasala.” Se a te mea ne fakauiga a ia ki ei? Ne seki fakauiga a ia me i “tino katoa” e fakasino atu ki te fakapotopotoga kātoa. Kae ne fakauiga a ia ki nai tino kolā e iloa ne latou te agasala tenā. Kāti ko tino kolā ne lavea ne latou te faiga o te agasala, io me ko tino kolā ne fakaasi ne te tino fai agasala ki ei a tena agasala. Ka fai‵pati atu a toeaina ki a latou me ko oti ne fakatoka te fakalavelave kae ko oti foki ne polopoloki te tino fai agasala.

17. Kafai ko ‵logo te fakapotopotoga i se agasala matagā ne fai io me kāti ka mafai o ‵logo fakamuli i ei, se a te faka‵pulaga e ‵tau o fai, kae kaia?

¹⁷ I nisi taimi, kāti ne ‵logo te tokoukega o tino i te fakapotopotoga i te agasala tenā io me kāti e mafai o ‵logo fakamuli i ei. I tulaga penā, ka mafai o fakasino a “tino katoa” ki te fakapotopotoga kātoa. Tela la, e ‵tau o faka‵pula ne se toeaina ki te fakapotopotoga me ko oti ne polopoloki ‵mafa a te taina io me ko te tuagane tenā. Kaia? Ne tali mai a Paulo: “Ke fai mo akoakoga ki nisi tino” ke mo a ma fai foki ne latou te agasala tenā.

18. Ne a mea ka fai ne toeaina ki se tamaliki papatiso telā ne fai ne ia se agasala matagā? (Onoono foki ki te ata.)

¹⁸ Kae pefea a tama‵liki kolā ko oti ne papatiso—ko tama‵liki mai lalo o te 18 tausaga—kae ne fai ne latou se agasala matagā? Ka fakatoka ne te potukau o toeaina ne toeaina e tokolua ke fai‵pati mo te tamaliki mo ana mātua Kelisiano. b Ka fia iloa ne toeaina a taumafaiga ko oti ne fai ne ana mātua ke fesoasoani ki te lā tamaliki ko te mea ke salamō. Kafai e fakalogo  te tamaliki kae ko isi ne ‵fuliga e lavea i a ia, e mafai o fakaiku ne toeaina e tokolua ke mo a ma fakatu se komiti kae ke tuku loa ki mātua ke fesoasoani ki te lā tamaliki. E iloa ne toeaina me i o mātua loa te tiute mai te Atua ke polopoloki faka‵lei olotou tama‵liki. (Teu. 6:​6, 7; Faata. 6:20; 22:6; Efe. 6:​2-4) Kae ka āsi faeloa a toeaina ki mātua ke fakamautinoa me maua ne te tamaliki a te fesoasoani e manakogina ne ia. Kae pefea la māfai e se fia fakalogo se tamaliki papatiso kae ita ma ‵fuli? Kafai e penā loa, ka fai‵pati tasi a te komiti o toeaina mo ia mo ana mātua Kelisiano.

“E LASI ‵KI TE ALOFA ATAFAI MO TE ALOFA FAKAMAGALO O IEOVA”

19. I te auala fea e fakaakoako ei a toeaina ki a Ieova māfai ko fai‵pati mo se tino fai agasala?

¹⁹ E maua ne toeaina kolā e aofia i te komiti a te tiute i mua o Ieova ke tausi te fakapotopotoga ke ‵ma. (1 Koli. 5:7) E ma‵nako foki latou o fakamalosi atu te tino fai agasala ke salamō. I te taimi e fai latou penā, e fakamoe‵moe faeloa latou ke mafai o ‵fuli te tino fai agasala. Kaia? Me fia fakaakoako latou ki a Ieova, telā “e lasi ‵ki tena alofa atafai mo tena alofa fakamagalo.” (Iako. 5:11) Mafaufau ki te auala ne fakaasi mai ne te apositolo ko Ioane telā ko matua ‵ki a te uiga tenā. Ne tusi mai a ia: “Aku tama‵liki fo‵liki, ko tusi atu ne au a mea konei ki a koutou ko te mea ke se fai ne koutou se agasala. Kae kafai e fai ne se tino se agasala, e isi se ‵tou tino fesoasoani telā e ‵nofo mo te Tamana, ko Iesu Keliso, te tino amiotonu.”—1 Ioa. 2:1.

20. Se a te mea ka sau‵tala tatou ki ei i te ‵toe mataupu o te fakasologa o mataupu konei?

²⁰ Se mea fakafanoanoa, me e isi ne taimi e ita fitifiti se Kelisiano ma salamō. Kafai e penā loa, e ‵tau o tapale kea‵tea a ia mo te fakapotopotoga. Ne a fakatokaga e fai ne toeaina i tulaga faiga‵ta penei? Ka sau‵tala tatou ki te mea tenā i te ‵toe mataupu o te fakasologa o mataupu konei.