1-2. (a) E pefea te kilokiloga a Ieova ki agasala kolā e fai mo te iloa tonu? (e) Se a te mea e manako a Ieova ke fai ne tino kolā ne agasala?

 E SE ko amioga katoa e talia ne Ieova; e takalialia a ia ki te agasala. (Sala. 5:​4-6) E manako a ia ke āva tatou ki ana tulaga amio‵tonu, kolā ne fakatoka ne ia i tena Muna. E tonu, e se fakamoemoe a Ieova ke ‵lei katoatoa tatou me iloa ne ia i a tatou e se ‵lei katoatoa. (Sala. 130:​3, 4) Kae e se talia ne ia se ‘tāgata sē amioatua telā ko ‵fuli ne ia a te alofa tauanoa o te ‵tou Atua mo fai se fakamasakoga ke fai ne ia a amioga matafatu mo te sē āva.’ (Iuta 4) E tonu, e faipati te Tusi Tapu e uiga ki te “fakaseaiga o tino sē amioatua” konā i te taua a te Atua i a Amaketo.—2 Pe. 3:7; Faka. 16:16.

² Kae ko Ieova e se manako ke fakaseai atu se tino. E pelā mo mea ne sau‵tala tatou ki ei i mataupu mai mua, e fai mai te Tusi Tapu me i a ia e “manako ke sala‵mo a tino katoa.” (2 Pe. 3:9) E fakaakoako eiloa a toeaina Kelisiano ki a Ieova, mai te taumafai mo te kufaki ke fesoasoani ki tino kolā ne agasala ke ‵fuli olotou auala ke toe maua ne latou te taliaga a Ieova. Kae e se ko tino katoa kolā ne agasala ka sala‵mo. (Isa. 6:9) Koi tumau eiloa a nisi tino i te auala ‵se tenā faitalia a taumafaiga a toeaina ke takitaki latou ke sala‵mo. Se a te mea e ‵tau o fai i se vaegā tulaga penā?

 ‘TAPALE KEA‵TEA TE TAGATA MASEI TENĀ’

3. (a) Ne a pati a te Tusi Tapu e uiga ki te mea e ‵tau o fai ki se tino agasala sē salamō? (e) Kafai e se salamō se tino fai agasala, kaia e fai atu ei tatou me ne manako eiloa a ia ke tapale kea‵tea mai te fakapotopotoga?

³ Kafai e se salamō a te tino fai agasala, e ‵tau eiloa mo toeaina o tau‵tali ki te fakatonuga i te 1 Kolinito 5:13: “Tapale kea‵tea mai i a koutou a te tagata masei tenā.” E fakauiga i ei, me tenā eiloa te ikuga ne manako ki ei te tino ne agasala; ko tau eiloa ne ia a te mea telā ne ‵toki ne ia. a (Kala. 6:7) Kaia e fai atu ei tatou penā? Me ne ita fitifiti a ia ma talia a taumafaiga e uke a toeaina ke fesoasoani atu ki a ia ke salamō. (2 Tupu 17:​12-15) E fakaasi mai i ana faifaiga me e se manako a ia o fakalogo ki fakatonuga a Ieova.—Teu. 30:​19, 20.

4. Kaia e ‵tau ei o fai se faka‵pulaga me ko tapale kea‵tea se tino fai agasala sē salamō mai te fakapotopotoga?

⁴ Kafai ko tapale kea‵tea se tino fai agasala sē salamō mai te fakapotopotoga, e fai se faka‵pulaga ke fakailoa atu ki te fakapotopotoga me ko se fai nei a ia pelā me se Molimau a Ieova. b E se fai te faka‵pulaga ke fakamasiasi ei a te tino fai agasala, kae ko te mea ke tau‵tali a te fakapotopotoga ki te fakatonuga mai te Tusi Tapu ke ‘fakagata te ‵kau fakatasi’ mo te tino tenā, “ke mo a eiloa ma ‵kai fakatasi” mo ia. (1 Koli. 5:​9-11) E isi ne pogai ‵lei ne tuku mai ei ne Ieova te fakatonuga tenā. Ne tusi mai te apositolo ko Paulo: “Me i mu mea faka‵fete e faka‵fete ne ia te palugā falaoa kātoa.” (1 Koli. 5:6) A tino fai agasala sē sala‵mo e mafai o fakavāivai ne latou a tino kolā e taumafai ke ola e ‵tusa mo tulaga amio‵tonu o Ieova.—Faata. 13:20; 1 Koli. 15:33.

5. E ‵tau o pefea ‵tou kilokiloga ki te tino telā ne tapale kea‵tea mai te fakapotopotoga, kae kaia?

⁵ Tela la, e pefea ‵tou kilokiloga ki se taina talitonu telā ne tapale kea‵tea mai te fakapotopotoga? E tiga eiloa e se ‵kau fakatasi tatou mo ia, e se ‵tau o ‵kilo atu tatou ki a ia e pelā me se mamoe ko se aoga, kae e pelā me se mamoe ne galo. A te mamoe telā ne tapeapea kea‵tea mai te lafu e mafai eiloa o toe foki mai. Masaua me i te mamoe telā ko galo ko oti ne tukugina atu ki a Ieova. E fakafanoanoa fua me ko se ola nei a ia e ‵tusa mo tena tukuatuga, kae ko fai i ei ke tu atu a ia i se tulaga fakamataku. (Eseki. 18:31) E ui i ei, e isi faeloa se fakamoemoega ke toe foki mai a ia, me e toka faeloa a Ieova o fakamagalo a ia. E fesoasoani atu pefea a toeaina ki se tino agasala telā ko oti ne tapale kea‵tea mai te fakapotopotoga?

TE AUALA E FESOASOANI ATU A TOEAINA KI A LATOU KOLA NE TAPALE KEA‵TEA

6. Ne a mea ka fai ne toeaina ke fesoasoani atu ki se tino telā ne tapale kea‵tea mai te fakapotopotoga?

⁶ E mata, ko tuku tiaki katoatoa atu a te tino telā ne tapale kea‵tea mai te fakapotopotoga—ko tiakina fua penā ke ‵sala mai ne ia tena auala ki a Ieova? Ikai! Kafai ko fakailoa atu ki te tino fai agasala i a ia ka tapale kea‵tea mai te fakapotopotoga, ka fakamatala atu ne te komiti o toeaina a mea kolā e ‵tau o fai ne ia ke toe foki mai ki te fakapotopotoga. Kae ka uke atu a mea e fai ne toeaina. I te ukega o taimi, ka fakailoa ne latou ki te tino fai agasala me ka toe sau‵tala latou mo ia mai tua o se fia masina ke onoono aka me ko mafuli a tena loto io me ikai. Kafai e fiafia te tino fai agasala ke toe fai‵pati mo latou, ka fakamalosi atu a toeaina i se auala alofa ke salamō a ia kae toe foki mai. Kafai foki loa e seki mafuli tena loto i te taimi tenā, ka taumafai faeloa a toeaina o fesokotaki mo ia i aso mai mua.

7. E fakaasi atu pefea ne toeaina a te alofa atafai o Ieova ki se tino ne tapale kea‵tea mai te fakapotopotoga? (Ielemia 3:12)

 ⁷ E fakaakoako eiloa a toeaina ki a Ieova mai te fakaasi atu a te alofa atafai ki se tino telā ne tapale kea‵tea mai te fakapotopotoga. E pelā mo Ieova, ne seki faka‵tali a ia ki ana tino sē faka‵logo i Isalaelu mua ke sala‵mo ko fesoasoani atu ei a ia. I lō te fai penā, ne gasue muamua a ia o fesoasoani atu ki a latou a koi tuai foki loa o fakaasi mai ne latou ne fakailoga o te loto sala‵mo. E pelā mo te mea ne sau‵tala ki ei i te mataupu i te lua, ne fakaasi atu ne Ieova a tena alofa atafai mai te fai atu ki te pelofeta ko Hosea ke fakamagalo tena avaga, telā koi fai eiloa ana agasala. (Ho. 3:1; Mala. 3:7) Mai te fakaakoako ki a Ieova, e ma‵nako tonu eiloa a toeaina Kelisiano ko te tino fai agasala ke toe foki mai, kae e se fai ne latou ke faigata te foki mai o te tino tenā.—Faitau te Ielemia 3:12.

8. E fesoasoani mai pefea te tala fakatusa a Iesu ki te tamaliki ne galo ke malamalama faka‵lei tatou i te alofa atafai mo te alofa fakamagalo o Ieova? (Luka 15:7)

⁸ Mafaufau ki te tala fakatusa a Iesu ki te tamaliki ne galo, telā ne sau‵tala tatou ki ei i te mataupu i te lua. I te laveaga eiloa ne te tamana a tena tama ko toe foki mai, “tele atu ei, ‵sai ki a ia kae sogi atu ki ei.” (Luka 15:20) Ne seki faka‵tali te tamana ke fakatoese atu tena tama i a ia ko ‵se. I lō te fai penā, ne tele muamua a ia ki tena tama, e pelā loa mo te mea e fai ne so se tamana alofa. E taumafai eiloa a toeaina o fakaasi atu te uiga tena ki a latou kolā ko tapea‵pea. E ma‵nako latou ko mamoe konei ne ‵galo ke “toe ‵foki mai” katoa. (Luka 15:​22-24, 32) Kafai ko toe foki mai te tino ne agasala, ka fia‵fia eiloa a kau o te lagi penā foki a te lalolagi!—Faitau te Luka 15:7.

9. Se a te fakamalosiga alofa mai i a Ieova ke na fai ne tino fai agasala?

⁹ Mai mea kolā ne sau‵tala tatou ki ei, e manino ‵lei me e se talia ne Ieova a tino fai agasala kolā e se sala‵mo. Kae e se fulitua a ia ki a latou. E manako a ia ke toe ‵foki mai latou. E fakaasi mai ne Ieova ana lagonaga ki tino agasala sala‵mo i ana pati i te Hosea 14:4: “Ka faka‵lei ne au te lotou sē fakamaoni. Ka alofa au ki a latou me lotomalie eiloa au ke fai penā, me i toku kaitaua ko ‵fuli kea‵tea mai a ia.” Ko gali aka loa te fakamalosiga tenei ki toeaina ke matapula‵pula ki so se fakailoga o te salamō e lavea ne latou. Kae se fakamalosiga gali foki ki tino kolā ne tiaki ne latou a Ieova ke na ‵foki mai e aunoa mo te fakatalave.

10-11. Ka taumafai pefea a toeaina o fesoasoani atu ki a latou kolā ko leva ‵ki ne tapale kea‵tea mai te fakapotopotoga?

¹⁰ Kae pefea latou kolā ne tapale kea‵tea mai te fakapotopotoga, kāti i se fia tausaga ko ‵teka? Kāti ko se fai ne tino konā a te agasala telā ne fai ei ke tapale kea‵tea latou. Kāti ko se masaua foki ne latou a te pogai ne tapale kea‵tea ei latou. Faitalia te leva, ka taumafai eiloa a toeaina o ‵sala kae āsi atu ki tino konei. I vaegā asiga penā, ka ofo atu foki a toeaina ke ‵talo fakatasi mo latou kae fakamalosi ke toe ‵foki mai ki te fakapotopotoga. E tonu, kafai te tino tenā ko leva ne seki toe kau mai ki te fakapotopotoga, e mautinoa me ko vāivāi ‵ki a ia i te feitu faka-te-agaga. Tela la, kafai e fai mai i a ia ko manako o toe foki mai ki te fakapotopotoga, e mafai ne toeaina o fai se fakatokaga ke fai tena akoga faka-te-Tusi Tapu, faitalia foki loa me e seki foki mai a ia. Ko toeaina eiloa e ‵tau o fai ne latou a fakatokaga ke fai a akoga faka-te-Tusi Tapu a tino konei.

¹¹ Ke fakaakoako ki te alofa atafai o Ieova, e ‵sala eiloa a toeaina ki tino e tokouke kolā ko oti ne tiaki ne latou a Ieova ke fesoasoani atu ke iloa ne latou me koi matala eiloa te mataloa ke toe ‵foki mai latou. Kafai e fakaasi mai ne se tino agasala te salamō kae tiaki ana  amioga ma‵sei mo faifaiga sē ‵lei, ka mafai eiloa o toe fakafoki fakavave mai a ia ki te fakapotopotoga.—2 Koli. 2:​6-8.

12. (a) Ne a tulaga e manakogina ke matapula‵pula ki ei a toeaina? (e) Kaia e se ‵tau ei o mafau‵fau tatou me e se mafai o toe fakamagalo ne Ieova a nisi vaegā tino fai agasala? (Onoono foki ki te fakamatalaga mai lalo.)

¹² I nisi taimi, e ‵tau mo toeaina o matapula‵pula a koi tuai o toe fakafoki mai ne latou se tino. E pelā me se fakaakoakoga, kafai te tino tenā ne maneanea ne ia se tamaliki, io me ne fai ne ia a uiga fakaaposetate, io me ne taumafai o fakatogafiti ne ia ke ‵tala tena avaga, e ‵tau eiloa o fakamautinoa aka ne toeaina me ko salamō tonu a ia. (Mala. 2:14; 2 Timo. 3:6) E ‵tau mo latou o puipui a te lafu. Kae e ‵tau  foki o masaua ne tatou me ka toe talia mai eiloa ne Ieova so se tino agasala telā e fakaasi mai ne ia te salamō tonu kae sē toe fai ana amioga ma‵sei. Tela la, e tiga eiloa e ma‵nako a toeaina o fakamautinoa aka me ko salamō tonu a te tino tenā, e se ‵tau o mafau‵fau latou me e se mafai o toe fakamagalo ne Ieova a vaegā tino penā. c—1 Pe. 2:10.

MEA E MAFAI O FAI NE TE FAKAPOTOPOTOGA

13. E ‵kese pefea a ‵tou faifaiga ki se tino ne polopoloki ‵mafa ne toeaina mo te tino ne tapale kea‵tea mai te fakapotopotoga?

¹³ E pelā mo te mea ne fakamatala mai i te mataupu mai mua, nisi taimi e isi se faka‵pulaga e fai me ko oti ne polopoloki ‵mafa se tino. I tulaga penā, koi mafai eiloa o ‵kau fakatasi tatou mo te tino tenā, me iloa ne tatou me ko oti ne salamō a ia kae tiakina ana faifaiga se ‵lei. (1 Timo. 5:20) Koi fai eiloa a ia mo vaega o te fakapotopotoga kae manakogina ne ia a fakamalosiga mai te ‵kau fakatasi mo taina tali‵tonu. (Epe. 10:​24, 25) Kae e tai ‵kese tena fakanofonofoga mo se tino telā ne tapale kea‵tea mai te fakapotopotoga. E “fakagata te [‵tou] ‵kau fakatasi” mo te tino tenā, kae “ke mo a eiloa ma ‵kai fakatasi mo se vaegā tino penā.”—1 Koli. 5:11.

14. E mafai pefea o fakaaoga ne Kelisiano olotou loto lagona kolā ne akoako ki te Tusi Tapu i olotou faifaiga ki tino kolā ne tapale kea‵tea mai te fakapotopotoga? (Onoono foki ki te ata.)

¹⁴ Mai mea ne sau‵tala tatou ki ei, e mata, e fakauiga i ei me ko se ‵saga katoatoa atu eiloa tatou ki se tino telā ne tapale kea‵tea mai te fakapotopotoga? Ikai. E tonu la me e se ‵kau fakatasi tatou mo ia. Kae e mafai ne Kelisiano o fakaaoga olotou loto lagona kolā ne akoako ki te Tusi Tapu ke fakaiku aka me e ‵kami mai ne ia se tino ne tapale kea‵tea mai te fakapotopotoga—kāti se kāiga io me se taugasoa pili o ia, ke kau mai ki fakatasiga a te fakapotopotoga io me ikai. E a māfai e kau atu a ia? I taimi mua, e se mafai ne tatou o fakatalofa atu ki te tino tenā. Kae tenei foki te taimi e manakogina  ke fakaaoga ne Kelisiano taki tokotasi a olotou loto lagona kolā ne akoako ki te Tusi Tapu ke iloa ne ia te mea e ‵tau o fai. Nisi tino e mafai eiloa o fakatalofa atu ki te tino tenā io me tali fiafia a ia i te fakatasiga. Kae e se ‵tau o fai ne tatou ne sau‵talaga ‵loa io me fakamāumāu ‵tou taimi e uke mo te tino tenā.

15. Ne a vaegā tino fai agasala kolā e faipati ki ei te 2 Ioane 9-11? (Onoono foki ki te pokisi “ E ‵Mata, e ‵Pau te Agasala ne Fakamatala Mai ne Ioane mo Paulo?”)

¹⁵ Kāti ka mafau‵fau aka a nisi tino penei, ‘E mata, e se fai mai te Tusi Tapu me i te Kelisiano telā e fakatalofa atu ki te tino tenā, ko ‵kau fakatasi mo ia i ana galuega ma‵sei?’ (Faitau te 2 Ioane 9-11.) A te manatu i te tusi faitau kātoa tenei e fakasino atu ki aposetate mo nisi tino kolā koi tumau i te fakamalosi ne latou a amioga ma‵sei. (Faka. 2:20) Tela la, kafai koi fakamalosi aka ne se tino a akoakoga faka-aposetate io me ko nisi amioga ma‵sei, e se ‵tau mo toeaina o āsi atu ki a ia. E tonu, koi fakamoe‵moe eiloa tatou ke mafai o toe ‵fuli mai te tino tenā kae salamō. Kae e se ‵tau eiloa mo tatou o fakatalofa atu ki se vaegā tino penā io me ‵kami a ia ke kau mai ki fakatasiga.

FAKAAKOAKO KI TE ALOFA ATAFAI MO TE ALOFA FAKAMAGALO O IEOVA

16-17. (a) Se a te mea e manako a Ieova ke fai ne tino fai agasala? (Esekielu 18:32) (e) E fakaasi atu pefea ne toeaina me e ga‵lue fakatasi latou mo Ieova māfai ko fesoasoani atu ki tino fai agasala?

¹⁶ Ne a mea ne tauloto ne tatou mai te fakasologa o mataupu e lima konei? E se manako a Ieova ke fakaseai atu se tino! (Faitau te Esekielu 18:32.) E manako a ia ke toe maua ne tino agasala se va ‵lei mo ia. (2 Koli. 5:20) Tenā te pogai ne fakamalosi atu faeloa a Ieova ki tena fenua sē faka‵logo—pelā foki mo tino taki tokotasi sē faka‵logo—ke sala‵mo kae toe ‵foki atu ki a ia. Se tauliaga eiloa ke ga‵lue fakatasi a toeaina mo Ieova i te taimi e taumafai latou o takitaki a tino fai agasala ke sala‵mo.—Loma 2:4; 1 Koli. 3:9.

¹⁷ Mafaufau ki te lasi o te fiafia i te lagi māfai ko sala‵mo a tino agasala! Tenā eiloa te fiafia e maua ne te ‵tou Tamana i te lagi, ko Ieova, i so se taimi e toe foki mai ki te fakapotopotoga se mamoe e tasi o ana mamoe telā ne galo. Ka gasolo aka eiloa o ‵poko te ‵tou a‵lofa ki a Ieova māfai e mafaufau ‵loto tatou ki tena alofa atafai, alofa fakamagalo, mo tena alofa tauanoa.—Luka 1:78.