I tena tusi ki Kelisiano i Tesalonia, ne fai atu te apositolo ko Paulo, penei: “Kafai e se fakalogo se tino ki omotou muna e auala i te tusi tenei, fakamailoga aka la te tino tenā.” (2 Tesa. 3:14) I aso mua, kāti e fai ne toeaina se lāuga ki te fakapotopotoga ke fakaeteete māfai e isi se tino i te fakapotopotoga e tumau i te ‵teke atu ki fakatakitakiga mai te Muna a te Atua faitalia a taumafaiga e uke ke fakatonutonu a ia. Mai tua o te lāuga tenā, ko se ‵tau ei mo tino talai taki tokotasi o ‵kau fakatasi mo te tino tenā ne fakamailoga.

Kae ko manakogina ke fai se fakamafuliga ki ei. Ko malamalama nei tatou me i pati fakatonutonu a Paulo konā, e fakasino atu ki se fakaikuga e ‵tau o fai ne Kelisiano taki tokotasi i vaegā tulaga penā. Tela la, ko se manakogina ke fai ne toeaina se lāuga ke fakaeteete i te tino tenā. Kaia ko fakamafuli ei a te fakamatalaga tenā? Mafaufau ki te mea ne faipati a Paulo ki ei i te tukumaiga ne ia o pati fakatonutonu konei.

Ne iloa ne Paulo me i nisi tino i te fakapotopotoga tenā, e “ola i se olaga sonafai.” Ne seki fia faka‵logo latou ki pati fakatonutonu mai te Muna a te Atua. I tena malaga muamua e tasi, ne fai atu ne ia te fakatonuga tenei: “Kafai e isi se tino e se fia galue, e se ‵tau foki a ia o kai.” Kae e isi loa ne tino e ita ma ga‵lue ke tausi atu ki a latou eiloa, e tiga eiloa e mafai ne latou o fai penā. E se gata i ei, ne sona ‵kau atu latou ki mea a nisi tino kolā e seai se lotou fekau i ei. Tela la, ne ‵tau o pefea a faifaiga a Kelisiano ki vaegā tino kolā e ola i se olaga sonafai?—2 Tesa. 3:​6, 10-12.

“Fakamailoga aka la te tino tenā,” ko pati a Paulo. E fakauiga a te pati Eleni tenei ki te fakaeteete malosi i te tino tenei. Ne tuku atu ne Paulo a pati fakatonutonu konei ki te fakapotopotoga kātoa, kae e se ki toeaina fua. (2 Tesa. 1:1; 3:6) Tela la, kafai e lavea ne Kelisiano taki tokotasi se taina Kelisiano e se fia fakalogo ki fakatakitakiga mai te Muna a te Atua, e ‵tau o fakaiku aka ne ia ke “sa toe ‵kau atu ki” te tino fakalogogata tenā.

E mata, e fakauiga i ei me ‵tau o ‵kilo atu tatou ki te tino tenā e pelā me se tino ne tapale kea‵tea mai te fakapotopotoga? Ikai, me ne toe fai mai a Paulo: “Tumau i te fakamalosi atu ki ei e pelā me se taina.” Tela la, koi mafai eiloa ne Kelisiano taki tokotasi o ‵kau fakatasi mo te tino telā ne fakamailogagina i taimi o fakatasiga mo te galuega talai, kae e mafai o filifili aka ne latou ke se ‵kau fakatasi mo ia i taimi o fakafiafiaga. Kaia? “Ko te mea ke mā a ia,” ko pati a Paulo. Mai te fai penā, ka mafai o fai ei ke mā a te Kelisiano fakalogogata tenā i ana amioga, ko ‵fuli ei a ia.—2 Tesa. 3:​14, 15.

E fakagalue aka pefea ne Kelisiano i aso nei a pati fakatonutonu konei? Muamua la, e ‵tau o fakamautinoa aka ne tatou me i te amioga ne fai ne te taina tenā se amioga “sonafai,” pelā mo pati a Paulo. Ne seki faipati a ia ki a latou kolā e ‵kese a fakaikuga e fai ne latou ona ko te kese‵kese o ‵tou loto lagona mo mea e fia‵fia ki ei. Ne seki fakauiga foki a ia ki a latou kolā e fakalogo‵mae ne latou a ‵tou lagonaga. Kae ne faipati a Paulo ki tino kolā e filifili ne latou mo te iloa tonu ke sē faka‵logo ki pati fakatonutonu ma‵nino ne tuku mai ne te Atua.

I aso nei, kafai e lavea ne tatou se taina Kelisiano e fakaasi mai ne ia te uiga sē fakalogo tenā, a ka fai eiloa ne tatou a ‵tou fakaikuga totino ke se ‵kau fakatasi mo ia i faigāmea io me ko fakafiafiaga. Ona ko te mea tenei se fakaikuga totino eiloa, e se ‵tau o sau‵tala ki ei mo nisi tino i tafa o ‵tou kāiga kolā e ‵nofo tatou. Kae koi mafai eiloa o ‵kau fakatasi tatou mo te tino tenā i ‵tou fakatasiga mo te galuega talai. Kafai ko ‵fuli ana amioga mo faifaiga, ko mafai ei o toe ‵kau fakatasi tatou mo ia.