E FAKAFETAI eiloa tatou ona ko te folafolaga a Ieova ke sui a te olaga tenei ki se lalolagi fou kae amiotonu. (2 Pe. 3:13) E tiga loa e se iloa ne tatou te taimi ka fakataunu ei a te folafolaga tenei, kae e fakaasi mai i mea ‵tupu i te lalolagi me ko pili fua o taunu a te mea tenā.—Mata. 24:32-34, 36; Galu. 1:7.

1-2. Ne a mea e ‵tau o fai ne tatou kae koi faka‵tali tatou ki te lalolagi fou?

² Kae i te taimi nei, faitalia me pefea te leva o tatou i te munatonu, e ‵tau mo tatou katoa o fakamalosi aka te ‵tou fakatuanaki ki te folafolaga tenā. Kaia? Me i te fakatuanaki telā e malosi e mafai o vāivāi. E tonu, ne taku ne te apositolo ko Paulo a te sē lava o te fakatuanaki e pelā me ko “te agasala telā e faigofie o lave‵lave tatou i ei.” (Epe. 12:1) Ko te mea ke puipui te ‵tou fakatuanaki ke mo a ma vāivāi, e ‵tau o iloilo faeloa ne tatou a fakamaoniga me ko pili o oko mai a te lalolagi fou.—Epe. 11:1.

3. Ne a mea ka sau‵tala tatou ki ei i te mataupu tenei?

³ Ka sau‵tala tatou i te mataupu tenei ki auala e tolu e mafai o fakamalosi aka te ‵tou fakatuanaki ki te folafolaga a Ieova e uiga ki te lalolagi fou: (1) mai te mafaufau ‵loto ki te togiola, (2) mai te mafaufau faka‵lei ki te ‵mana o Ieova, kae ko te (3) mai te fakaaoga a taimi e uke ki polokalame faka-te-agaga. Ka oti ko sau‵tala ei tatou ki te auala e fakamalosi aka ei ne te fekau a Ieova ki a Sapakuka a te ‵tou fakatuanaki i aso nei. Muamua la, ke sau‵tala tatou ki nisi tulaga kolā e fe‵paki mo tatou  i te vaitaimi nei kae manakogina i ei ke malosi ‵tou fakatuanaki ki te folafolaga e uiga ki te lalolagi fou telā ka oko mai.

TULAGA KOLĀ E MANAKOGINA I EI KE MALOSI ‵TOU FAKATUANAKI

4. Ne a fakaikuga e manakogina i ei ke malosi te ‵tou fakatuanaki?

⁴ I aso takitasi, e manakogina ke malosi ‵tou fakatuanaki ke fai a fakaikuga. E pelā mo fakaikuga ki te filifiliga o ‵tou taugasoa, fakafiafiaga, akoakoga, tino ke avaga ki ei, te faiga o tama‵liki mo galuega ‵togi. Se mea ‵lei ke fesili ifo tatou: ‘E mata, e fakaasi atu i aku fakaikuga a toku talitonu me i te olaga tenei ka se tumau kae ko pili fua o sui ki te lalolagi fou a te Atua? Io me e fakavae aku fakaikuga ki mea e fai ne tino kolā e tali‵tonu me i te mate ko te fakaotiga o mea katoa?’ (Mata. 6:19, 20; Luka 12:16-21) Ka fai eiloa ne tatou a toe fakaikuga ‵lei māfai e malosi ‵tou fakatuanaki ki te pili mai o te lalolagi fou.

5-6. Kaia e manakogina ei ke malosi ‵tou fakatuanaki i taimi faiga‵ta? Fakamatala mai.

⁵ E fe‵paki foki tatou mo tulaga faiga‵ta kolā e manakogina i ei ke malosi ‵tou fakatuanaki. Kāti e fe‵paki tatou mo fakasauaga, se masaki tumau, io me ko nisi mea kolā e fai ei tatou ke loto vāi‵vai. Muamua la, kāti ka mafau‵fau tatou me mafai eiloa ne tatou o kufaki a ‵tou fakalavelave. Kae pelā mo te masani, e tumau sāle a fakalavelave penei i se taimi leva, tenā ko manakogina i ei ke malosi ‵tou fakatuanaki o kufaki kae tumau i te tavini atu ki a Ieova mo te fiafia.—Loma 12:12; 1 Pe. 1:6, 7.

⁶ I te taimi e fepaki ei mo se tulaga faigata, e mafai o mafau‵fau tatou me ka se oko mai eiloa a te lalolagi fou a Ieova. E mata, e fakauiga i ei me ko vāivāi te ‵tou fakatuanaki? Ikai. Mafaufau ki se tala fakatusa. Kafai ne ‵to ‵lotu a vaiua mō se fia vaiaso, e mafai eiloa o mafau‵fau tatou me ka se toe laufie te vaiua, kae ne laufie eiloa. E penā foki māfai ne loto vāi‵vai malosi tatou, e mafai o mafau‵fau tatou me ka se oko mai eiloa a te lalolagi fou. Kafai e malosi ‵tou fakatuanaki, e iloa ne tatou me ka fakataunu eiloa a folafolaga katoa a te Atua. (Sala. 94:3, 14, 15; Epe. 6:17-19) Kafai e maua ne tatou te loto talitonu tenā, ka fai ei ke fakamuamua faeloa ne tatou te ‵tou tapuakiga ki a Ieova i ‵tou olaga.

7. Se a te kilokiloga e ‵tau o ‵kalo kea‵tea tatou mai i ei?

⁷ Mafaufau ki te suā auala telā e manakogina i ei ke malosi ‵tou fakatuanaki—ko te galuega talai. E faigata ke tali‵tonu a tino e talai tatou ki ei me e mafai eiloa o taunu a te “tala ‵lei” e uiga ki te lalolagi fou a te Atua telā ka oko mai. (Mata. 24:14; Eseki. 33:32) E se fia maua eiloa ne tatou te lotou kilokiloga tenā. Ko te mea ke mo a ma tupu te mea tenā, e ‵tau o tumau tatou i te fakamalosi aka te ‵tou fakatuanaki. Ke mafau‵fau tatou ki auala e tolu ke fai penā.

KE MAFAUFAU ‵LOTO KI TE TOGIOLA

8-9. Ka fakamalosi aka pefea te ‵tou fakatuanaki ona ko te mafau‵fau ki te togiola?

⁸ A te auala e tasi ke fakamalosi aka ‵tou fakatuanaki ko te mafaufau ‵loto ki te togiola. E fakamaoni mai i te togiola me ka taunu eiloa a folafolaga a te Atua. A te mafaufau faka‵lei ki pogai ne fakatoka ei te togiola mo mea ne aofia i ei, e fakamalosi aka ei te ‵tou fakatuanaki ke tali‵tonu me ka taunu eiloa a te folafolaga a te Atua e uiga ki te ola se-gata-mai i se lalolagi telā e tai ‵lei atu. Kaia e fai atu ei tatou penā?

⁹ Mafaufau la, ne a mea ne aofia i te togiola? Ne uga mai ne Ieova mai te lagi a tena Tama toekimua kae fagasele, ko te ‵toe tino pili ki a ia, ke fanau mai pelā me se tino ‵lei katoatoa. I tena nofoga i te lalolagi, ne kufaki a Iesu i  vaegā tulaga faiga‵ta kese‵kese. Oti aka, ne logo‵mae kae ne mate foki a ia i se mate fakalogo‵mae. Ko oko eiloa te lasi o te mea ne fai ne Ieova! Ailoga e mafai o talia ne te ‵tou Atua alofa ke logo‵mae kae mate tena Tama ko te mea fua ke maua ne tatou se olaga ‵lei kae toetoe. (Ioa. 3:16; 1 Pe. 1:18, 19) Ona ko te lasi o te mea ne fai ne ia, ka fakamautinoa eiloa ne Ieova me ka ola tatou ki te se-gata-mai i te lalolagi fou.

KE MAFAUFAU FAKA‵LEI KI TE ‵MANA O IEOVA

10. E ‵tusa mo te Efeso 3:20, ne a mea e mafai o fai ne Ieova?

¹⁰ A te lua o auala ke fakamalosi aka ‵tou fakatuanaki ko te mafaufau faka‵lei ki te ‵mana o Ieova. E maua ne ia te ‵mana ke fakataunu so se mea ne tauto mai a ia ke fai. A te folafolaga ki te ola se-gata-mai i se lalolagi fou, e mafai o foliga sē tonu ki tino. Kae e uke a folafolaga ne fai ne Ieova kolā e se mafai o fakataunu ne tāgata. A te ‵tonuga loa, a ia ko te Atua Malosi Katoatoa. (Iopu 42:2; Male. 10:27) Tela la, e mata, e ‵tau o ‵poi tatou māfai e tauto mai ke fai ne ia se mea fakaofoofogia?—Faitau te Efeso 3:20.

11. Taku mai se folafolaga fakaofoofogia e tasi ne fai ne te Atua. (Onoono ki te pokisi “ Nisi Folafolaga Fakaofoofogia Kolā ne Taunu.”)

¹¹ Mafaufau ki nisi folafolaga fakaofoofogia a Ieova ne fai ki ana tino i aso mua. Ne fai atu a ia ki a Apelaamo mo Sala me ka fanau mai se lā tamaliki tagata i te taimi ko ma‵tua ei lāua. (Kene. 17:15-17) Ne fai atu foki a ia ki a Apelaamo me ka tuku atu ki tino mai tena gafa a te fenua ko Kanana. I te fia o tausaga ne ‵nofo fakapagota ei a tino Isalaelu i Aikupito, kāti ne foliga atu ki a latou me ka se taunu te folafolaga tenā. Kae ne taunu eiloa. Fakamuli ifo, ne fakailoa atu ne Ieova me ka fanau mai ne Elisapeta, telā ko matua, se tamaliki. Ne fai atu foki a ia ki te tamafine ko Malia, me ka fanau mai ne ia a tena Tama tagata, se folafolaga ko leva ne fai mai ne Ieova i te fatoaga o Etena—se suā valoaga telā ko oti ne fakataunu!—Kene. 3:15)

12. Se a te mea e fakamaoni mai i te Iosua 23:14 mo te Isaia 55:10, 11 e uiga ki te ‵mana o Ieova?

¹² A te mafaufau faka‵lei ki folafolaga a Ieova kolā ko oti ne fakataunu ka fai ei ke malamalama tatou i te lasi o tena ‵mana, kae ke gasolo o malosi te ‵tou fakatuanaki ki tena folafolaga e uiga ki te lalolagi fou. (Faitau te Iosua 23:14; Isaia 55:10, 11.) E fai i ei ke toka faka‵lei tatou o fesoasoani atu ki nisi tino ke malamalama me i te lalolagi fou e sē se moemiti fua. Ne fai mai a Ieova e uiga ki te lagi fou mo te lalolagi fou: “Pati konei e fakamaoni kae ‵tonu.”—Faka. 21:1, 5.

KE AOFIA MALOSI KOE I POLOKALAME FAKA-TE-AGAGA

13. E fakamalosi aka pefea ne fakatasiga a te fakapotopotoga a ‵tou fakatuanaki? Fakamatala mai.

¹³ Te tolu o auala e mafai o fakamalosi aka ‵tou fakatuanaki ko te fakaaoga a taimi e uke ki polokalame faka-te-agaga. E pelā me se fakaakoakoga, mafaufau ki mea aoga e maua ne tatou mai fakatasiga a te fakapotopotoga. A Anna, telā ne galue i vaega kese‵kese o te taviniga tumau i se fia sefulu tausaga ne fai mai: “A fakatasiga e fai ei ke malosi toku fakatuanaki. Faitalia foki loa me e se apo te failauga io me seai se mea fou e fai mai ne ia, kae isi faeloa se mea e lagona ne au telā e momea aka i ei toku mainaga i te munatonu i te Tusi Tapu, kae e fai i ei ke malosi toku fakatuanaki.” b E mautinoa me loto fakafetai foki tatou ki tali mai taina mo tuagane kolā e fakamalosi aka ei ‵tou fakatuanaki.—Loma 1:11, 12; 10:17.

14. E fakamalosi aka pefea ne te galuega talai a ‵tou fakatuanaki?

 ¹⁴ A te ‵tou ‵kau atu ki te galuega talai e fakamalosi foki i ei te ‵tou fakatuanaki. (Epe. 10:23) Ne fai mai a Barbara, telā ne tavini atu ki a Ieova i se 70 tupu tausaga, penei: “Ne lavea ne au me i te galuega talai e fai i ei ke malosi toku fakatuanaki. Ko te uke o taimi e faipati au ki tino e uiga ki folafolaga ‵gali a Ieova, ko te gasolo aka foki o malosi toku fakatuanaki.”

15. E fakamalosi aka pefea ‵tou fakatuanaki ne sukesukega totino? (Onoono foki ki te ata.)

¹⁵ Ke mafaufau ki te suā polokalame faka-te-agaga telā e fakamalosi ne ia ‵tou fakatuanaki: sukesukega totino. Ne iloa ne Susan a te aoga ke fakapolokalame faka‵lei a taimi e fai ei ana sukesukega. Ana muna: “I Aso Sa, e sukesuke au ki te mataupu o te Faleleoleo Maluga mō te vaiaso fou. I Aso Gafua mo Aso Lua, e fakatoka au mō te fakatasiga i loto i te vaiaso. I nisi aso aka, e sukesuke au ki se mataupu telā e fia sukesuke au ki ei.” Mai te tumau i tena polokalame tenā, e ati aka faeloa i ei ne Susan te malosi o tena fakatuanaki. Ne lavea ne Irene, telā ne tavini atu i ‵tou laumua i se fia sefulu tausaga, me ne gasolo o malosi tena fakatuanaki ona ko ana sukesukega ki valoaga i te Tusi Tapu. Ana muna: “E ofo eiloa au me fakataunu ne Ieova a mea liki‵liki i ana valoaga.” c

“KA TAUNU EILOA”

16. Kaia e aoga ei ki a tatou i aso nei a pati a Ieova ki a Sapakuka? (Epelu 10:36, 37)

¹⁶ Ko leva ne faka‵tali a nisi tavini a Ieova ki te gataga o te olaga tenei. Mai te kilokiloga a te tagata, e foliga mai me ko tuai te fakataunuga o te folafolaga a te Atua tenā. E iloa ne Ieova te mea tenā kae ne fakamautinoa atu a ia ki te pelofeta ko Sapakuka: “E seki oko ki te taimi tonu o te fakaasiga, kae ko fakava‵vave atu nei ki tena gataga, kae ka se loi eiloa.  Kae kafai foki e tuai, ke nofo fakatalitali eiloa ki ei! Me ka taunu eiloa. Ka se tuai eiloa!” (Sapa. 2:3) E mata, ne fai atu ne te Atua a pati konā mō te ‵lei fua o Sapakuka? Io me aoga foki Ana pati ki a tatou i aso nei? Ne fakamalosi atu ki te apositolo ko Paulo ke fakasino a pati konā ki Kelisiano, kolā e ‵nofo fakatalitali ki te lalolagi fou. (Faitau te Epelu 10:36, 37.) E tonu, e mautinoa i a tatou me kafai foki loa e foliga tuai te ‵tou faka‵saoga, kae “ka taunu eiloa. Ka se tuai eiloa!”

17. I te auala fea ne fakagalue ei ne se tuagane a pati fakatonutonu a Ieova ki a Sapakuka?

¹⁷ E tokouke a tavini a Ieova ne faka‵logo ki pati fakatonutonu a Ieova “ke nofo fakatalitali”—ke oko foki loa ki se fia sefulu tausaga. E pelā mo Louise, ne kamata o tavini ki a Ieova i te 1939. Ne fai mai tou fafine: “I te taimi tenā, ne mafaufau au me ka oko mai a Amaketo kae koi akoga au i akoga lasaga lua. Kae ne seki tupu te mea tenā. I tausaga fakamuli ifo, ne aoga eiloa ki a au a te faitau ki tala o tino i te Tusi Tapu e pelā mo te tala o Noa, Apelaamo, Iosefa, mo nisi tino kolā ne ‵nofo fakatalitali mō se taimi leva ‵ki ke fakataunu ne Ieova ana folafolaga. A te tumau i te nofo fakatalitali ne fesoasoani mai ki a au mo nisi tino ke ‵saga tonu atu mo te mautinoa ki te pili mai o te lalolagi fou.” E lotoma‵lie eiloa a nisi tino, kolā ko leva ne tavini ki a Ieova, ki te mea tenā!

18. E fakamalosi aka pefea ne mea ne faite a te ‵tou fakatuanaki ki te lalolagi fou telā ka oko mai?

¹⁸ E tonu, e seki oko mai nei a te lalolagi fou. Kae mafaufau la ki nai mea kolā ko maua ne tatou—ko fetū, lakau, manu, mo tino. E seai se tino e fakalotolotolua ki te ‵tonu o mea konei, faitalia me isi se taimi ne seki ai ei ne mea penei. Ko maua nei ne tatou a mea konā me ne faite ne Ieova. (Kene. 1:1, 26, 27) Ko oti ne fai te fuafuaga a te ‵tou Atua ke isi se lalolagi fou. Ka fakataunu ne ia te fuafuaga tena. I te lalolagi fou, ka ola a tino ki te se-gata-mai i tulaga ‵lei katoatoa. I te taimi tonu o te Atua, ka fai eiloa te lalolagi fou pelā me se mea tonu e pelā eiloa mo te iunivesi i aso nei.—Isa. 65:17; Faka. 21:3, 4.

19. E mafai pefea o fakamalosi ne koe tou fakatuanaki?

¹⁹ I te taimi nei, ke na fakaaoga eiloa so se avanoaga e maua ne koe ke fakamalosi aka ei tou fakatuanaki. Fai ke momea aka te lasi o tou loto fakafetai ki te togiola. Mafaufau faka‵lei ki te ‵mana o Ieova. Ke aofia malosi koe i polokalame faka-te-agaga. Mai te fai penā, ka mafai eiloa o aofia koe i “tino kolā ne maua ne latou a folafolaga e auala i te fakatuanaki mo te kufaki.”—Epe. 6:11, 12; Loma 5:5.