1. Se a te palataiso faka-te-agaga kae se a te mea e ‵tau o fakaiku aka ke fai ne tatou?

 E ISI se palataiso fakatusa i te lalolagi i aso nei telā e ‵fonu i tino kolā e fakalave‵lave faeloa i te faiga o mea ‵lei. E ‵fonu eiloa i te fia miliona o tino kolā e maua ne latou a te fiafia tonu. Ko oti ne fakaiku aka ne tino kolā ko ‵nofo nei i te palataiso fakatusa tenei ke mo a eiloa ma tiakina ne latou te koga tenei. E ma‵nako foki latou ke ‵kau atu a tino e tokouke ki te koga gali kae tu ‵kese tenei. Se a la te koga tenā? Ko te palataiso faka-te-agaga! a

2. Ne a mea e tu ‵kese i ei a te palataiso faka-te-agaga?

² Se mea fakaofoofogia me ne fakatoka ne Ieova se koga fakatusa telā e filemu kae tokagamalie a mea i ei, i te kogaloto o te lalolagi telā ne ‵fuli ne Satani ke fai mo koga e ‵fonu i te uiga takalialia, amioga ma‵sei kae fakamataku. (1 Ioa. 5:19; Faka. 12:12) E lavea ne te ‵tou Atua alofa a ikuga sē ‵lei e maua ne tino i te olaga tenei, kae e puipui eiloa ne ia ana tino ko te mea ke tumau tatou i te tavini atu ki a ia mo te fia‵fia. E fakamatala mai i tena Muna a te palataiso faka-te-agaga e pelā me se koga “faka‵lafi” mo se “fatoaga ne fakasiusiu faka‵lei.” (Isa. 4:6; 58:11) Mai te fakamanuiaga a Ieova, ka maua ne latou kolā e ‵nofo i te palataiso tenei te fiafia mo te tokagamalie i taimi faiga‵ta konei o aso fakaoti.—Isa. 54:14; 2 Timo. 3:1.

3. Se a te fakataunuga muamua o te valoaga i te Isaia mataupu e 65?

³ E auala i te pelofeta ko Isaia, ne fakamatala mai ne Ieova te vaegā olaga ka maua ne latou kolā ko ‵nofo i loto i te palataiso faka-te-agaga. E maua ne koe te fakamatalaga tenei i te Isaia mataupu e 65, kae ko te fakataunuga muamua o te valoaga tenā ne taunu i te 537 T.L.M. Tenā te taimi ne fakasaoloto ei a te kau  Iutaia kolā ko sala‵mo mai te ‵nofo fakapagota i Papelonia kae toe ‵foki atu ki te lotou fenua. Ne fakamanuia ne Ieova ana tino kae fesoasoani atu ke toe fakagaligali ne latou a te fakai o Ielusalema telā ne fakamasei, kae toe fakatu aka a tena faletapu mo fai te fakavae o te tapuakiga tonu i Isalaelu.—Isa. 51:11; Saka. 8:3.

4. I te auala fea e fakataunu i ei a te valoaga i te Isaia mataupu e 65 i aso nei?

⁴ A te lua o fakataunuga o te valoaga a Isaia ne kamata i te 1919 T.A. i te taimi ne fakasaoloto ei a tino tapuaki a Ieova i aso nei mai te ‵nofo fakapagota ki Papelonia te Sili. Tenā ne kamata ei o salalau malielie atu a te palataiso faka-te-agaga ki te lalolagi kātoa. Ne faka‵tu aka ne tino talai loto finafinau o te Malo a fakapotopotoga e uke kae fakaasi atu a uiga faka-Kelisiano. A tāgata mo fāfine kolā ne aofia muamua i amioga fakasaua mo amioga fakatauavaga sē ‵tau ko oti ne “‵pei ki uiga ‵fou kolā ne faite e ‵tusa mo te loto o te Atua.” (Efe. 4:24) E tonu, a te ukega o fakamanuiaga ne fakamatala mai ne Isaia, ka fakataunu tonu eiloa i te lalolagi fou i aso mai mua nei. Kae i aso nei, e uke a mea aoga e maua ne tatou i te palataiso fakatusa tenei. Ke na sau‵tala nei tatou ki te aoga o te palataiso faka-te-agaga tenei ki a tatou mo te pogai e se ‵tau o tiakina ne tatou.

TE TULAGA O TINO I TE PALATAISO FAKA-TE-AGAGA

5. E pelā mo te folafolaga i te Isaia 65:​13, ne a mea ‵gali e maua ne tatou i loto i te palataiso faka-te-agaga?

⁵ Ma‵kona kae malosi ‵lei faka-te-agaga. E fakaasi mai i te valoaga a Isaia a te lasi o te ‵kese o te olaga o tino kolā e ‵nofo i te palataiso faka-te-agaga mo latou kolā e se ‵nofo i ei. (Faitau te Isaia 65:13.) E fakamalie faeloa ne Ieova a manakoga faka-te-agaga o ana tino tapuaki. E maua ne tatou a tena agaga tapu, tena Muna tusia, mo mea‵kai faka-te-agaga e lava ko te mea ke mafai ne tatou o “‵kai, . . . inu, . . . [kae] fia‵fia.” (Fakatusa ki te Fakaasiga 22:17.) E ‵kese mai i ei, a latou kolā e se ‵nofo i loto i te palataiso faka-te-agaga e “fia‵kai . . . , fiainu . . . , [kae] ka masiasi.” E se mafai o fakama‵lie aka a olotou manakoga faka-te-agaga.—Amo. 8:11.

6. E fakamatala mai pefea i te Ioelu 2:​21-24 a ‵tou fakatokaga faka-te-agaga, kae e aoga pefea ki a tatou?

⁶ I tena valoaga, ne fakaaoga ne Ioelu a mea tāua i te olaga e pelā mo saito, uaina, mo sinu olive ke fakaasi mai ei me tuku atu ne Ieova mo te kaimalie ki Ana tino a mea e manakogina ne latou, e aofia i ei a mea‵kai faka-te-agaga. (Ioe. 2:​21-24) E tuku mai ne ia e auala i te Tusi Tapu mo ‵tou tusi faka-te-Tusi Tapu, ‵tou fakatuatusi i te itaneti, penā foki a fakatasiga, tamā fono mo fono ‵lasi. E mafai o ‵kai tatou ki mea‵kai faka-te-agaga i aso katoa, kae ka fai i ei ke ma‵kona kae malosi ‵lei tatou i te feitu faka-te-agaga.

7. Ne a mea e fai ei ke maua ne tatou se “tulaga ‵lei i [‵tou] loto”? (Isaia 65:14)

⁷ Fiafia kae lotomalie. E mafai o “ka‵laga mo te fia‵fia” a tino o te Atua ona ko te lasi o te lotou loto fakafetai ki a Ieova. (Faitau te Isaia 65:14.) A muna‵tonu fakamalosi loto mo tautoga fakafiafia i te Muna a te Atua, pelā foki mo ‵tou fakamoemoega mautinoa telā e fakavae ki te taulaga togiola a Keliso, e fai ei ke maua ne tatou se “tulaga ‵lei i [‵tou] loto.” A te sau‵tala mo taina mo tuagane faka-te-agaga ki mea konei e fai ei ke fia‵fia tonu tatou!—Sala. 34:8; 133:​1-3.

8. Ne a toe uiga tāua e lua e maua i loto i te palataiso faka-te-agaga?

⁸ A te alofa mo te ‵kau fakatasi i te va o tino o Ieova ko uiga tāua e lua e maua i loto i te palataiso faka-te-agaga. A te “fusi ‵lei katoatoa” tenei e fesoasoani mai ke fakaataata ne tatou a te vaegā olaga i loto i te lalolagi fou, telā ka sili fakafia atu te lasi o te a‵lofa mo te  ‵kau fakatasi o tavini a Ieova i ei i lō aso nei. (Kolose 3:14) Ne fakamatala mai ne se tuagane Kelisiano a mea ne lavea ne ia e uiga ki tino o Ieova i te taimi muamua ne fetaui a ia mo latou: “Ne seki iloa ne au te auala ke maua te fiafia, penā foki loa i loto i toku kāiga. A te taimi muamua ne lavea ne au a tino e fakaasi atu a te alofa tonu ki nisi tino, ko te taimi ne fetaui au mo Molimau a Ieova.” So se tino e manako ke maua ne ia te fiafia tonu mo te lotomalie, e ‵tau o nofo i loto i te palataiso faka-te-agaga. Faitalia a mafaufauga o te lalolagi nei e uiga ki tavini a Ieova, kae e maua ne latou se igoa io me se ata ‵lei, i mua o Ieova mo tino katoa kolā e tapuaki ki a ia.—Isa. 65:15.

9. Se a te tautoga e fakaasi mai te Isaia 65:​16, 17 e uiga ki logo‵maega o te olaga?

⁹ Tokagamalie. E fai mai te Isaia 65:14 me i tino kolā e fakaiku aka ke se ‵kau mai ki loto i te palataiso faka-te-agaga ka “‵tagi ona ko te logo‵mae i [olotou] loto kae ka ‵tagi fanoa‵noa . . . ona ko te loto mafatia.” Kae e a mea katoa kolā ne fakamāfua aka ne latou a logo‵maega mo te loto mafatia o tino o te Atua? Fakamuli loa, a mea katoa konā ‘ka fakapuli atu kae ka ‵funa aka mai i mata o te Atua.’ (Faitau te Isaia 65:​16, 17.) Ka ave kea‵tea ne Ieova a ‵tou fakalavelave katoa, kae fakamuli loa, ka se toe manatua ne tatou a ‵tou logo‵maega katoa.

10. Kaia e loto fakafetai koe ki te avanoaga ke ‵kau fakatasi mo ou taina mo tuagane Kelisiano? (Onoono foki ki te ata.)

¹⁰ Ke oko mai foki loa ki aso nei, kafai e ‵kau atu tatou ki fakatasiga Kelisiano, e maua eiloa ne tatou se lagonaga tokagamalie mai mea faka‵fita o te lalolagi masei tenei. Kafai e fakaasi atu ne tatou a te alofa, fiafia, filemu, atafai, mo te agamalu kolā ko fuataga o te agaga o te Atua, ko fesoasoani atu tatou ki ‵tou taina mo tuagane ke maua ne latou a lagonaga tokagamalie. (Kala. 5:​22, 23) Se fakamanuiaga eiloa ke aofia tatou i te fakapotopotoga a te Atua! Ka lavea eiloa ne latou kolā e tumau i loto i te palataiso faka-te-agaga a te fakataunuga katoatoa o te folafolaga a te Atua e uiga ki te “lagi fou mo se lalolagi fou.”

11. E ‵tusa mo te Isaia 65:​18, 19, e aoga pefea ki a tatou a te palataiso faka-te-agaga telā ne fakatu ne Ieova?

¹¹ Loto fakafetai kae fiafia. Ne toe fakamatala mai ne Isaia te pogai e ‵tau ei o “‵lifu kae fia‵fia” tatou i loto i te palataiso faka-te-agaga. A te palataiso fakatusa tenei ne fakatu ne Ieova. (Faitau te Isaia 65:​18, 19.) E setioa loa o fakaaoga ne ia tatou ke ‵taki kea‵tea a tino mai fakapotopotoga o te lalolagi nei, kolā e se akoako ne latou a te munatonu e uiga ki te Atua, kae fesoasoani ki a latou ke fai mo vaega o te palataiso gali tenei! E fia‵fia tatou ki fakamanuiaga  ko maua ne tatou ona ko te munatonu, kae ka fakamalosi eiloa tatou ke fakailoa atu ki nisi tino e uiga ki ei.—Iele. 31:12.

12. E pefea ou lagonaga ona ko folafolaga e fakamatala mai i te Isaia 65:​20-24, kae kaia?

¹² E loto fakafetai kae fia‵fia foki tatou ki te fakamoemoega ko maua ne tatou e pelā me ne tino ‵nofo tumau i te palataiso faka-te-agaga. Mafaufau aka la ki mea katoa ka lavea kae fai ne tatou i te lalolagi fou a te Atua! E folafola mai te Tusi Tapu: “Ka se toe ai se pepe . . . e ola fua mō ne nai aso, io me se toeaina telā e se mafai o ola i ana aso katoa.” Ka “faite ne [tatou] a fale kae ‵nofo i ei kae ‵toki . . . a togavine kae ‵kai ki olotou fuataga.” Ka “se sona ga‵lue ‵mafa [tatou] kae seai se mea e maua mai i ei” me ka “fakamanuia ne Ieova” a tatou. E tauto mai a ia me ka maua ne tatou se olaga filemu kae fakamalie loto telā e isi sena pogai tonu. “Koi tuai eiloa latou o ka‵laga mai,” kae ko iloa ne ia a manakoga o tino taki tokotasi kae “fakama‵lie ne [Ia] a manakoga o mea ola katoa.”—Isa. 65:​20-24; Sala. 145:16.

13. E fakamatala mai pefea i te Isaia 65:25 a ‵fuliga kolā ka fai ne tino i olotou olaga māfai ko kamata o tavini atu ki a Ieova?

¹³ Filemu kae saogalemu. Fakatasi mo te fesoasoani o te agaga o te Atua, ne fai ne tino kolā ne uiga fakasaua, kaitāua, kae sē fakamaoni a ‵fuliga ‵lasi i olotou olaga. (Faitau te Isaia 65:25.) Ne ga‵lue malosi latou o tapale kea‵tea a olotou uiga ma‵sei. (Loma 12:2; Efe. 4:​22-24) E tonu, koi sē ‵lei katoatoa eiloa a tino o te Atua, tela la, ka fai faeloa ne tatou a mea ‵se. Kae ko oti ne fakamaopoopo mai ne Ieova a “vaegā tino katoa” ko te mea ke fusi fakatasi ne ia latou i te alofa mo te filemu. (Tito 2:11) Ko te Atua malosi katoatoa fua e mafai ne ia o fai te vavega tenei!

14. Ne fetaui ‵tonu pefea a pati i te Isaia 65:25 ki te olaga o se taina e tokotasi?

¹⁴ E mata, e mafai eiloa o ‵fuli a uiga o tino? Mafaufau ki te tala tenei. Ne ‵pei fakafia se tamataene ki te falepuipui i te taimi ko 20 ana tausaga, ona ko ana amioga fakasaua kae ma‵sei. Ne ‵loka a ia me ne kaisoa motoka, mea i fale o tino mo nisi amioga matagā. Ne taua faeloa a ia mo tino. I te taimi muamua ne lagona ne ia te munatonu mai te Tusi Tapu kae kamata o kau atu ki fakatasiga a Molimau a Ieova, ne talitonu tou tagata me isi se pogai tonu o te olaga telā ko te tapuaki atu ki a Ieova i te palataiso faka-te-agaga. I tena otiga ne papatiso pelā me se Molimau, ne mafaufau sāle a ia ki te auala ne fetaui ‵lei ei a pati i te Isaia 65:25 ki a ia. Ne ‵fuli a ia mai se leona, se tino amio fakasaua, ki se tino uiga filemu e pelā me se tamā mamoe.

15. Kaia e ma‵nako tatou o ‵kami a nisi tino ke ‵kau mai ki te palataiso faka-te-agaga, kae e fai pefea ne tatou?

¹⁵ E kamata a pati i te Isaia 65:13 ki te folafolaga tenei: “Konei a pati a te Aliki Sili ko Ieova ne fai mai.” Ne fakaoti te fuaiupu 25 ki pati konei: “ko muna a Ieova.” So se pati e fai ne ia e taunu faeloa. (Isa. 55:​10, 11) Ko isi nei se palataiso faka-te-agaga. Ko oti ne fakamaopoopo mai ne Ieova se kautaina telā e tu ‵kese. Ka mafai o maua ne tatou i ana tino a te filemu tonu mo se puipuiga mai te lalolagi amio fakasaua. (Sala. 72:7) Ona ko pogai konei, e ma‵nako ei tatou o fesoasoani ki tino e tokouke ke ‵kau mai ki te ‵tou kautaina faka-Kelisiano. E mafai o fai ne tatou a te mea tenei, mai te ‵saga tonu atu ki te galuega ko te faiga o soko.—Mata. 28:​19, 20.

FESOASOANI KI TINO KE FIA ‵KAU MAI KI TE PALATAISO FAKA-TE-AGAGA

16. E fai pefea ne tatou ke fia ‵kau mai a tino ki te palataiso faka-te-agaga?

¹⁶ E maua ne tatou taki tokotasi se tiute tāua ke fesoasoani ki tino ke fia ‵kau mai ki te palataiso faka-te-agaga. E mafai o fakataunu ne tatou a te tiute tenā mai te fakaakoako ki a  Ieova. E se faimālō ne ia a tino ke ‵kau mai ki tena fakapotopotoga. I lō te fai penā, e “aumai” ne ia mo te atafai a tino ki a ia. (Ioa. 6:44; Iele. 31:3) Ko tino loto ‵lei fua kolā e tauloto ki uiga a‵lofa o Ieova mo ana faifaiga ‵gali e fia fakapili‵pili atu ki a ia. Tela la, e fai pefea ne tatou ke fia ‵kau mai a tino ki te palataiso faka-te-agaga e auala i ‵tou uiga ‵gali mo faifaiga ‵lei?

17. E fai pefea ne tatou ke fia ‵kau mai a tino ki te palataiso faka-te-agaga?

¹⁷ Tasi o auala e mafai o fai ne tatou ke fia ‵kau mai a tino ki te palataiso faka-te-agaga, ko te fakaasi atu o te alofa mo te atafai ki ‵tou taina tapuaki. Kafai e ‵kau mai a tino ‵fou ki ‵tou fakatasiga, e ma‵nako tatou ke ‵pau te lotou kilokiloga mo tino sē tali‵tonu kolā ne ‵kau atu ki fakatasiga i Kolinito i aso mua. Ne fai atu latou: “A te Atua e nofo eiloa i a koutou.” (1 Koli. 14:​24, 25; Saka. 8:23) Tela la, ke na tumau eiloa tatou i te faka‵logo ki te polopolokiga ke “tausi te filemu i te va o te suā tino ki te suā tino.”—1 Tesa. 5:13.

18. Ne a mea e mafai o fai ei ke fia ‵kau mai a tino ki te ‵tou fakapotopotoga?

¹⁸ E ‵tau mo tatou o taumafai faeloa ke maua ne tatou te kilokiloga a Ieova ki ‵tou taina mo tuagane Kelisiano. E fai tatou penā māfai e ‵saga atu fua ki olotou uiga ‵lei kae e se ko olotou vāivāiga, kolā ko pili o ‵galo atu. E mafai o faka‵lei aka so se fakalavelave i te va o tatou mo latou i te agaga o te alofa mai te tumau i te “fakatau atafai te suā tino ki te suā tino, ke fakatau a‵lofa atafai, [kae] ke fakatau fakamagalo atu a te suā tino ki te suā tino.” (Efe. 4:32) Tenā ko fia ‵kau mai ei ki te palataiso faka-te-agaga a tino kolā e ma‵nako ke fakaasi atu ki a latou a faifaiga penā. b

 TUMAU I TE PALATAISO FAKA-TE-AGAGA

19. (a) E pelā mo te pokisi “ Ne Tiaki ne Latou Kae ne Toe Foki ‵Mai,” ne a pati a nisi tino i te ‵toe ‵fokimaiga ki te palataiso faka-te-agaga? (e) Se a te mea e ‵tau o fakaiku aka ne tatou ke fai? (Onoono foki ki te ata.)

¹⁹ E loto fakafetai eiloa tatou ona ko te ‵tou palataiso faka-te-agaga! Ko gali atu nei a te palataiso tenā, kae ko tokouke atu foki a tino kolā e ‵viki atu ki a Ieova i aso nei i lō aso mua. Ke na fakatumau ne tatou te ‵tou loto fakafetai ki te palataiso telā ne fakatu aka ne Ieova mō tatou. So se tino e manako ke maua ne ia te malosi fou, te lotomalie, te tokagamalie mo te saogalemu, e ‵tau o ulu mai ki loto i te palataiso faka-te-agaga kae ke mo a ma tiakina ne ia! Kae fakaeteete, me e taumafai eiloa a Satani o fai te ‵toe mea e mafai ke ‵futi kea‵tea ne ia tatou mai ei. (1 Pe. 5:8; Faka. 12:9) E se ‵tau o talia ne tatou a ia ke manumalo. Ke na ga‵lue malosi nei tatou o puipui a te gali, te ‵ma, mo te filemu o te palataiso faka-te-agaga tenei.