1. E pefea a lagonaga o nisi tino e uiga ki te fai‵pati atu ki tino i te galuega talai? (Onoono foki ki te ata.)

 E PELĀ me ne tino o Ieova, e talai tatou ki tino me a‵lofa tatou ki ‵tou Tamana i te lagi kae e ma‵nako o fesoasoani ki ‵tou tuakoi ke iloa ne latou a ia. E fia‵fia malosi a tino talai e tokouke ki te galuega talai. Kae e faigata ki nisi tino ke maua te fiafia tenā. Kaia? Nisi tino ko latou loa ko mata ‵mā kae mafau‵fau i a latou e se ne faiakoga apo. Nisi tino e faigata ki a latou ke olo atu ki fale o tino e aunoa mo se ‵kamiga. Nisi tino e ma‵taku i tino ma kaitāua ki a latou. Nisi tino ne akoako ke mo a ma faka‵tupu a kinauga mo nisi tino. Faitalia te lasi o te lotou a‵lofa ki a Ieova, e faigata ki taina mo tuagane konei ke olo atu o talai a te tala ‵lei ki tino e se masani latou. Kae e iloa ‵lei ne latou me tāua ‵ki ke fai te galuega talai, kae e ‵kau atu faeloa latou ki ei. Ko oko eiloa i te fiafia o Ieova ki a latou!

2. Kafai e faigata ki a koe ke fiafia ki te galuega talai, kaia e se ‵tau ei mo koe o loto vāivāi?

² E mata, e faigata ki a koe i nisi taimi ke maua te fiafia i te galuega talai ona ko lagonaga konā? Kafai e penā loa, ke mo a ma loto vāivāi. A te sē lava o tou loto talitonu ki a koe eiloa e fakaasi mai ei me e loto maulalo koe kae e se manako ke aofia i kinauga mo nisi tino. Kae e seai se tino e manako ke fai ne ia nisi tino ke kaitāua, maise māfai e taumafai latou o fai a mea ‵lei ki nisi tino. E iloa ‵lei ne tou Tamana i te lagi a mea faiga‵ta e fepaki mo koe kae manako o fesoasoani atu ki a koe.  (Isa. 41:13) I te mataupu tenei, ka sau‵tala tatou ki manatu e lima ke fakafesagai atu ki lagonaga konā mo auala ke ati aka te fiafia ki te galuega talai.

KE FAKAMALOSI KOE NE TE MUNA A TE ATUA

3. Se a te mea ne fesoasoani atu ki te pelofeta ko Ielemia ke mafai o talai ki nisi tino?

³ I aso mua, ne maua ne tavini a te Atua a te malosi e auala i tena fekau māfai e isi se galuega ‵mafa e ‵tau o fakaoti ne latou. Mafaufau ki te pelofeta ko Ielemia. Ne manavase malosi a ia i te tukuatuga ne Ieova ki ei te galuega ke fano o talai. Ne fai atu a Ielemia: “E se iloa ne au o faipati, i a au koi foliki fua.” (Iele. 1:6) Ne a mea ne fesoasoani atu ki a ia ke maua te loto malosi ke talai atu? Ne maua ne ia te malosi mai pati a te Atua ki a ia. Ana muna: “E fai pelā me se afi e ‵ka kae e taofi aka i loto i oku ivi, kae ne fi‵ta au i te taofiga o te mea tenā.” (Iele. 20:​8, 9) Faitalia te faigata o te koga talai a Ielemia, kae ne maua ne ia te malosi ke fai te galuega e auala i te fekau ne fai atu ke talai ne ia.

4. Se a te mea e mafai o tupu māfai e fai‵tau tatou ki te Muna a te Atua kae mafaufau ‵loto ki ei? (Kolose 1:​9, 10)

⁴ E maua ne Kelisiano a te malosi e auala i te fekau i te Muna a te Atua. I tena tusi ki te fakapotopotoga i Kolose, ne fai atu te apositolo ko Paulo me kafai e tauloto malosi latou ki te iloaga tonu ka fakamalosi atu i ei ki ana taina ke ‘sa‵sale i te auala telā e talia ne Ieova’ i te taimi e ‘‵fua mai ei olotou galuega ‵lei.’ (Faitau te Kolose 1:​9, 10.) A te galuega ‵lei tenā e aofia i ei te talaiatuga o te tala ‵lei. Tela la, i te taimi e fai‵tau tatou ki te Muna a te Atua kae mafaufau ‵loto ki ei, ka gasolo aka o malosi te ‵tou fakatuanaki ki a Ieova kae ka lavea foki ne tino a te tāua ke folafola atu a te fekau e uiga ki te Malo.

5. E maua pefea ne tatou a mea aoga e uke mai ‵tou fai‵tauga mo ‵tou sukesukega ki te Tusi Tapu?

⁵ Ke maua a mea aoga mai te Muna a te Atua, ‵kalo kea‵tea mai te fai fakava‵vave o tau faitauga, sukesukega, mo te mafaufau ‵loto. Fai malielie. Kafai ko faitau koe ki se fuaiupu telā e se maina faka‵lei koe i ei, ke mo a ma fakaseke ne koe. Kae ke fakaaoga te Watch Tower Publications Index io me ko te Research Guide for Jehovah’s Witnesses ke ‵sala te fakamatalaga o te fuaiupu tenā. Kafai e fai malielie au sukesukega, ka fakamalosi aka i ei ne koe te lasi o tou loto talitonu ki te ‵tonu o te Muna a te Atua. (1 Tesa. 5:21) Ko te lasi o tou loto talitonu, ko te lasi foki o tou fiafia o fakailoa atu au mea ne tauloto ki nisi tino.

 KE FAKATOKA FAKA‵LEI MŌ TE GALUEGA TALAI

6. Kaia e ‵tau o fakatoka faka‵lei tatou mō te galuega talai?

⁶ Kafai e fakatoka faka‵lei koe mō te galuega talai, ka fai ei ke se polepole malosi koe ma faipati atu ki tino. Ne fesoasoani atu a Iesu ki ana soko ke fakatoka latou a koi tuai o uga atu latou ke fai te galuega talai. (Luka 10:​1-11) Ne fakagalue ne latou a mea ne akoako atu ne Iesu, kae ne fai i ei ke fia‵fia malosi latou ona ko galuega e uke ne fai ne latou.—Luka 10:17.

7. E mafai pefea o fakatoka tatou mō te galuega talai? (Onoono foki ki te ata.)

⁷ E fakatoka pefea tatou mō te galuega talai? E manakogina ke mafau‵fau faka‵lei tatou ki te auala ke fakamatala atu te munatonu i se auala magoi kae i ‵tou pati eiloa. E gali foki māfai e mafaufau muamua koe ki tali masani e lua io me tolu a tino i tau koga talai mo auala ke tali atu ei ki tulaga kese‵kese konā. Kae kafai ko fetaui tatou mo tino ke faipati atu i se auala filemu kae mata katakata.

8. I auala fea e fai ei a Kelisiano e pelā me ne mea ne faite ki kele i te tala fakatusa a Paulo?

⁸ Ne fakaasi mai ne te apositolo ko Paulo a te tiute o tatou i te faiga o te galuega talai, i ana pati: “Ko maua ne matou a te koloa tāua tenei i loto i mea ne faite ki kele.” (2 Koli. 4:7) Se a te koloa tāua tenei? Ko te galuega faka‵sao ola telā ko te talaiatuga o te fekau o te Malo. (2 Koli. 4:1) Ne a mea ne faite ki kele? E fakasino ki tavini a te Atua kolā e fakaoko atu ne latou te tala ‵lei ki nisi tino. I aso o Paulo, ne fakaaoga ne tino fai pisinisi a tiā kele mō aveave a koloa tāua e pelā mo meakai, uaina, mo tupe. I se auala tai ‵pau, ko oti ne tuku mai ne Ieova ki a tatou se fekau tāua telā ko te tala ‵lei. E auala i te fesoasoani o Ieova, ka mafai o maua ne tatou te malosi e manakogina ke tumau i te talai atu mo te fakamaoni.

‵TALO KE MAUA TE LOTO MALOSI

9. E mafai pefea o manumalo tatou i te mataku ki tino io me ko te mataku ma kaitāua mai a tino ki a tatou? (Onoono foki ki te ata.)

⁹ I nisi taimi e mafai o ma‵taku tatou i tino io me ma‵taku ma kaitāua mai a tino ki a tatou. E manumalo pefea tatou i te tulaga faigata tenā? Mafaufau ki te ‵talo a te kau apositolo i te taimi ne fakatonu atu ki a latou ke taofi te lotou talai atu. I lō te ma‵taku, ne ‵talo latou ki a Ieova ke fesoasoani atu “ke fai‵pati  atu faeloa ne [latou tena] muna mo te loto ‵toa.” Ne tali fakavave ne Ieova te lotou ‵talo. (Galu. 4:​18, 29, 31) Kafai e pole‵pole tatou ma olo o talai ona ko te mataku ki tino, e ‵tau foki o ‵talo tatou ke fesoasoani mai a Ieova. Fakamolemole atu ki a Ieova ke fakatakavale ne tou alofa ki tino a tou mataku ki tino.

10. E fesoasoani mai pefea a Ieova ki a tatou ke fakataunu ‵tou tiute e pelā me ko ana Molimau? (Isaia 43:​10-12)

¹⁰ Ko oti ne ‵tofi ne Ieova tatou ke fai mo ana Molimau, kae tauto mai me ka fesoasoani mai a ia ke maua ne tatou te loto malosi. (Faitau te Isaia 43:​10-12.) Ke mafaufau ki auala e fa e fai ei ne ia te mea tenā. Muamua la, e fakatasi mai a Iesu ki a tatou māfai e talai atu te tala ‵lei. (Mata. 28:​18-20) Te lua, ko oti ne ‵tofi ne Ieova a agelu ke fesoasoani mai ki a tatou. (Faka. 14:6) Te tolu, e tuku mai ne Ieova tena agaga tapu e pelā me se fesoasoani ke mafai o masaua ne tatou a ‵tou mea ne tauloto. (Ioa. 14:​25, 26) Te fa, ne fakatoka ne Ieova a taina mo tuagane ke ga‵lue tasi tatou. Mai te fesoasoani o Ieova mo te ‵lago mai o te kau taina, ko maua ne tatou a mea katoa kolā ka fai ei ke tumau tatou i te manuia.

KE TOKA O FAI A FAKAMAFULIGA, KAE KE MAUA SE KILOKILOGA TONU

11. Kafai e fano koe i te galuega talai, e maua pefea ne koe a tino e tokouke? (Onoono foki ki te ata.)

¹¹ E mata, e loto vāivāi koe māfai e se tokouke a tino e maua atu i olotou fale? Kaia e se fesili ifo ei koe penei: ‘Tefea te koga e ‵nofo ei a tino i taku koga talai i te taimi nei?’ (Galu. 16:13) ‘E ga‵lue io me ‵galo ki sitoa o ‵togi olotou mea?’ Kafai e penā loa, e mata, e mafai o maua a nisi tino māfai e talai atu i auala? Ne fai mai se taina e igoa ki a Joshua, “Ne maua ne au a avanoaga ke talai atu i koga e uke ei a sitoa mo koga e tokouke ei a tino.” Ne maua foki ne lāua mo tena avaga ko Bridget a tino e tokouke i olotou fale māfai e talai atu i fakaafiafi e pelā foki mo afiafi o Aso Sa.—Efe. 5:​15, 16.

12. E mafai pefea o iloa ne tatou a mea e tali‵tonu io me manavase ki ei a tino?

¹² Kafai e se fiafia se tino ki tau fekau, taumafai ke iloa ne koe a mea e tali‵tonu io me ko mea e manava‵se latou ki ei. E fakaaoga sāle ne Joshua mo Bridget a te fesili i te tamā pepa i lā pati fakatomua. E pelā mo te tamā pepa ko te Se a Tau Kilokiloga ki te Tusi Tapu? e fai atu  lāua: “Nisi tino e ‵kilo atu ki te Tusi Tapu me se tusi mai te Atua, kae e se penā a nisi tino. Se a tau faka‵tau?” E masani o iku atu te mea tenei ki se sau‵talaga.

13. Kaia e mafai o ‵kilo tatou ki ‵tou galuega talai me e manuia faitalia me e se fia ‵saga mai a tino ki ei? (Faataoto 27:11)

¹³ A te manuia o te ‵tou galuega talai e se faka‵na ki ikuga e maua ne tatou mai i ei. Kaia? Me ko oti ne fai ne tatou a te mea telā e ma‵nako a Ieova mo tena Tama ke fai ne tatou—ko oti ne tuku atu ne tatou se molimau. (Galu. 10:42) Kafai foki loa e seai se tino ke fai‵pati ki ei io me e se fia‵fia a tino ki ‵tou fekau, e mafai eiloa o fia‵fia tatou me iloa ne tatou me ko fakafiafia ne tatou te ‵tou Tamana i te lagi.—Faitau te Faataoto 27:11.

14. Kaia e fia‵fia tatou māfai e maua ne te suā tino talai se tino fiafia i te galuega talai?

¹⁴ E mafai foki o fia‵fia tatou māfai e maua ne te suā tino talai se tino fiafia i te koga talai. Ne faka‵pau ne Te Faleleoleo Maluga a te ‵tou galuega ki te ‵salaga o se tamaliki telā e galo. E tokouke a tino e ‵sala ki a ia, kae e ‵sala ki ei i koga kese‵kese. Kafai ko maua te tamaliki, e fia‵fia a tino katoa, kae e se ko te tino fua ne maua ne ia te tamaliki. E penā foki te galuega ko te faiga o soko, e ga‵lue tatou e pelā me se tiimu. E manakogina ke olo a tino katoa i te fakapotopotoga o talai i te koga talai kātoa, kae kafai ko kau mai se tino fou ki fakatasiga ka fia‵fia a tino katoa i te fakapotopotoga.

SAGA TONU KI TOU ALOFA KI A IEOVA MO OU TUAKOI

15. A te fakagaluegaga o te Mataio 22:​37-39 ka fesoasoani mai pefea ke momea aka te fia‵fia o tatou ki te galuega talai? (Onoono foki ki te ata i te ‵kava.)

¹⁵ E mafai o fia‵fia malosi tatou o ‵kau ki te galuega talai māfai e ‵saga tonu atu ki ‵tou a‵lofa ki a Ieova mo ‵tou tuakoi. (Faitau te Mataio 22:​37-39.) Mafaufau la ki te fiafia o Ieova māfai e lavea ne ia tatou e talai atu e pelā foki mo te fia‵fia o tino māfai ko kamata o suke‵suke ki te Tusi Tapu! Mafaufau foki ki te fakaolataga telā ka maua ne tino kolā e ‵saga tonu mai ki ‵tou fekau.—Ioa. 6:40; 1 Timo. 4:16.

16. E mafai pefea o maua ne tatou te fiafia i ‵tou galuega talai māfai ko se mafai tatou o oloolo? Taku mai ne fakaakoakoga.

¹⁶ E mata, e se mafai koe o fano ki se koga  ona ko se pogai? Kafai e penā loa, saga ki mea e mafai ne koe o fai ke fakaasi atu tou alofa ki a Ieova mo ou tuakoi. I te taimi o te famai ‵pisi ko te COVID-19, ne seki mafai ne Samuel mo Dania o olo atu ki se koga. I te taimi faigata tenā, ne talai atu faeloa lāua i telefoni, tusi a tusi, kae fai a akoga faka-te-Tusi Tapu e auala i te Zoom. Ne talai atu a Samuel ki tino ne fetaui mo ia i te fakaimasaki e fai ei ana talavaiga ki tena masaki ko te kenisa. Ana muna: “A tulaga faiga‵ta e mafai o fakavāivāi mai ki a tatou i te feitu faka-te-foitino, feitu faka-te-agaga ke oko eiloa ki ‵tou mafaufau. E manakogina ke maua ne tatou te fiafia i ‵tou taviniga ki a Ieova.” I te taimi ne ‵tupu a mea konei, kae ne siga a Dania kae ne takato i tena moega i masina e tolu. Tenā ne manakogina ei ne ia se nofoga fakatekateka mō se ono masina. Ne fai mai tou fafine: “Ne taumafai au o fai so se mea e mafai e ‵tusa mo oku fakanofonofoga. Ne talai au ki se nesi telā ne āsi mai ki a au, e pelā foki mo tino kolā ne ‵mai o tuku mai a mea ki te fale. E ‵gali foki a sautalaga a aku i telefoni mo se sui o te fakaimasaki.” Ne seki mafai o uke a mea e fai ne Samuel mo Dania ona ko lā fakanofonofoga, kae ne fai ne lāua te ‵toe mea e mafai kae ne fia‵fia lāua i ei.

17. I te auala fea ka aoga malosi ei ki a koe a manatu i te mataupu tenei?

¹⁷ E gali māfai e fakagalue tasi a manatu ne ‵sae mai i te mataupu tenei. A manatu takitasi konā e ‵pau loa mo mea kolā e manakogina ke fai ki ei se kuuka. Kafai e katoatoa a mea katoa konā, kae fai ei ke gali te kuuka tenā. Kafai foki e fakagalue ne tatou a manatu katoa konei, ka fai ei ke toka tatou o ‵teke atu a lagonaga sē ‵lei kae ke fia‵fia malosi ki te galuega talai.