A Mary mo tena avaga ko John, a e ‵nofo i se kogā koga o te lalolagi telā e mafai o folafola atu a te tala ‵lei ki tino Filipaina e tokouke kolā ne olo atu o ga‵lue i te fenua tenā. I te taimi o te masaki ‵pisi ko te COVID-19, ne kamata ne Mary a akoga faka-te-Tusi Tapu mo tino i te fenua e nofo a ia i ei kae penā foki mo nisi fenua i te lalolagi. Ne fai pefea ne ia te mea tenā?

E fesili atu sāle a Mary ki ana tino a‵koga, “E isi ne tino e iloa ne koutou e fia suke‵suke ki te Tusi Tapu?” Kafai e fai mai latou ao, ko fai atu ei a ia ke fetaui mo latou. A te fesili faigofie tenei e masani o maua mai ei a ikuga ‵gali. Kaia? Me i tino kolā e fia‵fia ki olotou mea ne tauloto mai te Muna a te Atua e ma‵nako o fakailoa atu a mea konā ki olotou kāiga mo taugasoa kolā e a‵lofa latou ki ei. Ne a mea ne iku mai i te faiatuga o te fesili tenei?

Ne fakatoka ne Jasmin, te tino akoga a Mary, ke fesokotaki atu tou fafine ki nisi tino a‵koga ‵fou e tokofa. E tokotasi mai i a latou ko Kristine telā ne fiafia malosi ki tena akoga kae fakamolemole atu ki a Mary ke fai fakalua tena akoga i te vaiaso. I te taimi ne fesili atu a Mary me isi se tino e iloa ne ia e fia sukesuke ki te Tusi Tapu, ne tali atu a Kristine, “Ao, ke fakatoka ne au ke fesokotaki koe ki a latou.” Mai tua o nai vaiaso ne mafai o fesokotaki atu a Mary ki taugasoa e tokofa o Kristine kolā e fia suke‵suke ki te Tusi Tapu. Fakamuli ifo, ne fesokotaki atu foki a Kristine ki ana nisi taugasoa ke mafai o fesokotaki mo Mary, kae ne fai foki penā a nisi taugasoa o Kristine.

Ne manako foki a Kristine ke suke‵suke ana kāiga i Filipaina ki te Tusi Tapu. Tenā ne faipati atu a ia ki tena tama fafine ko Andrea. Muamua la, ne mafaufau ifo a Andrea, penei, ‘A te Molimau se potukau fakalotu ‵se, e se tali‵tonu ki a Iesu, kae fakaaoga fua ne latou te Feagaiga Mua.’ Kae mai tua fua o tena akoga muamua ne iloa ne ia me e se ‵tonu a mea ne talitonu a ia ki ei e uiga ki Molimau. I taimi e fai ei ana akoga, e fai atu sāle a ia, “Kafai e faipati ki ei te Tusi Tapu, tena uiga e tonu te mea tenā!”

Fakamuli ifo, ne fesoasoani atu a Andrea ke fesokotaki a Mary ki ana taugasoa e tokolua mo se tino e ga‵lue tasi mo ia kolā ne kamata foki olotou akoga faka-te-Tusi Tapu. Kae e se iloa ne Mary me i te fakamātua o Andrea telā e ‵kivi ne fakalogologo mai sāle i taimi o ana akoga. I te aso e tasi, ne fai atu a Angela ki a Andrea ke fai‵pati lāua mo Mary kae ne fakamolemole atu ke fai sena akoga faka-te-Tusi Tapu. Ne fiafia malosi a Angela ki ana mea ne tauloto. I loto fua i se masina, ne tauloto ne ia a tusi fai‵tau e uke kae manako o fai tena akoga fakafa taimi i te vaiaso! Mai  te fesoasoani o Andrea, ne kamata o kau faeloa a Angela ki fakatasiga e auala i te neti.

I te iloaga ne Mary me ne sagasaga atu te avaga a Kristine i ana tafa i te taimi ne fai ei te akoga a Kristine, ne fesili atu a Mary ke kau mai tou tagata. Ne fai atu a Joshua, “Au e fakalogologo fua, kae ke mo a ma fai mai ne koe ne fesili ki a au, kafai e fai mai sau fesili au loa ko fano kea‵tea.” Mai tua fua o se lima minute ne fai ei te akoga, ne uke atu ana fesili ne fai i lō a Kristine kae manako ke toe faka‵soko te lotou sauta‵laga ki te Tusi Tapu.

A te fesili faigofie a Mary tenā ne iku atu ki te faiga o akoga faka-te-Tusi Tapu e uke. Ne fai ne ia a fakatokaga ke fai ne nisi Molimau a akoga a nisi tino. E ‵tusa mo te 28 a akoga faka-te-Tusi Tapu e fai ne Mary i nisi fenua aka e fa.

A Jasmin, tena tino akoga muamua telā ne sae mai i te mataupu tenei, ne papatiso i a Apelila 2021. Ne papatiso a Kristine i a Me 2022 kae ko oti ne foki ki Filipaina ke ‵nofo fakatasi mo tena kāiga. A nisi tino a‵koga e tokolua kolā ne fesoasoani a Kristine ke fesokotaki a Mary ki ei ko oti foki ne papatiso. Ne papatiso a Angela i nai masina ki tua ifo kae ko paenia tumau nei. A Joshua te avaga a Kristine, mo te lā tama fafine ko Andrea, mo ana nisi tino a‵koga ko ga‵solo eiloa ki mua i te feitu faka-te-agaga.

I te senitenali muamua, ne vave salalau atu a te tala ‵lei ki kāiga mo taugasoa. (Ioa. 1:​41, 42a; Galu. 10:​24, 27, 48; 16:​25-33) Kaia e se fesili atu ei koe ki au akoga faka-te-Tusi Tapu mo nisi tino fia‵fia, “E isi ne tino e iloa ne koe e fia suke‵suke ki te Tusi Tapu?” Ko oi e iloa ne ia te uke o akoga e mafai o kamata ona fua ko te fesili faigofie tenei telā e mafai fua o fesili atu ne so se tino?