E MATA, kai fepaki aka loa koe mo se fakalavelave kae mafaufau me seai eiloa se tino e mafai o fesoasoani atu? Ko ola nei tatou “i taimi faiga‵ta” kolā e mafai o fai ei ke loto vāi‵vai tatou kae sē fia‵fia me seai se tino ke faipati ki ei. (2 Timo. 3:1) Kae e se ‵tau o fakafesagai atu tatou ki fakalavelave o te olaga tenei i a tatou eiloa. E fakaasi mai i te Tusi Tapu a te tāua ke isi ne taugasoa ‵tonu “i taimi o te puapuaga.”—Faata. 17:17.

Ne maua ne te apositolo ko Paulo a mea aoga mai te va fakataugasoa o ia mo latou kolā ne faima‵laga tasi mo ia. (Ko. 4:​7-11) I te ‵peiga a Paulo ki te falepuipui i Loma, ne fai ne ana taugasoa a galuega kolā ko se mafai o fai ne ia. E pelā me se fakaakoakoga, ne avatu ne Epafeloti ki a Paulo a mea ne aumai ne taina mo tuagane i Filipi. (Fili. 4:18) Ne fakaoko atu ne Tukasi a tusi a Paulo ki fakapotopotoga kese‵kese. (Ko. 4:7) Mai te fesoasoani o ana taugasoa, ne tumau loa a Paulo i te talai atu faitalia me ne ‵loka a ia i se fale io me i te falepuipui. E mafai pefea o fai koe mo fai se taugasoa tonu i aso nei?

E fakaasi mai i fakaakoakoga i aso nei a te tāua o te fai pelā me se taugasoa tonu. Mafaufau ki se tuagane telā ne fai pelā me se taugasoa o Elisabet, se paenia tumau i Sepania. I te taimi ne iloa aka me ko maua tena mātua ne te kenisa, ne lafo atu ne te tuagane a fekau fakamalosi loto e uke mai te Tusi Tapu ki a Elisabet. A “fekau konei,” ko pati a Elisabet, “ne fakamalosi mai ke mafai o fakafesagai atu ki fakalavelave o aso takitasi me iloa ne au me isi se tino e mafaufau mai ki a au.”—Faata. 18:24.

E mafai o fakamalosi aka ‵tou va fakataugasoa mo taina tali‵tonu mai te ‵lago atu ki a latou i polokalame a te fakapotopotoga. E pelā me se fakaakoakoga, e mata, e mafai o avatu ne koe se taina io me se tuagane matua ki te fakatasiga io me ko te galuega talai? Kafai e mafai, ka fakatau fakamalosi aka eiloa ne koutou a koutou eiloa. (Loma 1:12) Kae ko nisi Kelisiano e se mafai o tiakina ne latou a olotou fale. E mafai pefea o fai tatou pelā me ne taugasoa ‵tonu ki a latou?

Nisi taina tali‵tonu e ma‵saki kae ko nisi e taofi aka ne olotou fakanofonofoga ke se ‵kau atu ki fakatasiga i Fale Tapuaki. Mafaufau ki te tala o David, telā ne maua ne te masaki ko te lymphoma. Ne fai ana chemotherapy i se ono masina. I te taimi tenā, ne ‵kau faeloa a David mo tena avaga ko Lidia ki fakatasiga e auala i te neti.

Ne a fesoasoani ne maua ne lāua mai lā taugasoa i te fakapotopotoga? Mai tua o fakatasiga takitasi, ne taumafai a nisi tino i te Fale Tapuaki o fai‵pati  ki a David mo Lidia e auala i te neti. E se gata i ei, kafai e fai a tali a David mo Lidia, ka oti ko lafo atu ei ne taina a fekau fakamālō ki a lāua. Ne a mea ne iku mai ei? Ne seki maua ne David mo Lidia a lagonaga me ‵mao lāua mai te fakapotopotoga.

E mata, e mafai o aofia ne tatou a latou kolā ko se mafai o oloolo i te ‵tou galuega talai? Ke fai ne tamā fakama‵fuliga ke fakaasi atu i ei me e se mafai o puli i a tatou a tino penei. (Faata. 3:27) Kaia e se fai ei se fakatokaga ke ‵kau fakatasi mo latou o tusi a tusi io me talai i telefoni? E mafai o fakalogo‵logo mai latou e auala i te neti ki fakatasiga mō te galuega talai. Ne loto fakafetai eiloa a David mo Lidia ki te fakatokaga tenei. Ne fai mai a David, “A te ‵kau atu ki te mā potukau talai ke sau‵tala ki se mataupu toetoe kae ‵talo fakatasi mo latou, se fakamalosiga lasi ‵ki eiloa.” E se gata i ei, e mata, e mafai o fai se fakatokaga i taimi kese‵kese ke fai te akoga faka-te-Tusi Tapu a tau tino akoga i te fale o se tino talai telā ko se mafai o fano o talai, e ‵tusa mo ana fakanofonofoga?

Kafai e ga‵lue fakatasi tatou mo ‵tou taina mo tuagane kolā ko se mafai o oloolo ka lavea ne tatou olotou uiga ‵lei, kae ka fai ei ke fia fakapili‵pili atu tatou ki a latou. E pelā me se mea e tasi, kafai e ga‵lue fakatasi koe mo vaegā tino talai penā i te galuega talai kae lavea ne koe a te lotou atamai i te fakaaogaga o te Tusi Tapu ke oko atu te fekau ki te loto o se tino, ka fai ei ke fia fakapilipili malosi koe ki a latou. Kafai e fesoasoani atu koe ki taina tali‵tonu ke aofia i polokalame faka-te-agaga, ka mafai eiloa o uke atu ou taugasoa.—2 Koli. 6:13.

Ne maua ne Paulo a fakamafanafanaga i te taimi ne ga‵lue fakatasi a ia mo tena taugasoa ko Tito. (2 Koli. 7:​5-7) E fakamasaua mai ne te tala tenei me e mafai o fakamafanafana ne tatou se tino, e se mai te fakaasi atu fua o te atafai tonu ki a ia kae mai te ‵kau fakatasi mo ia kae fai a mea e mafai ke ‵lago atu ki a latou.—1 Ioa. 3:18.

Ne tuku mai ne ‵tou taina mo tuagane i Lusia se fakaakoakoga ‵lei o te fakatau fesoasoani te suā tino ki te suā tino. Mafaufau ki te tala o Sergey mo tena avaga ko Tatyana. I te otiga ne suke te lā fale ne pulisimani, ne puke lāua ke fakafesilisili ne latou. Ne ‵tala muamua a Tatyana kae fakafoki atu ki te fale. Ne fai mai a Sergey: “I te taimi eiloa ne oko a [Tatyana] ki te fale, kae ne tu atu se tuagane loto toa ki tena mataloa. Ne o‵mai foki a nisi taina mo tuagane e tokouke o fesoasoani ke toe fakatoka faka‵lei te mā fale.”

Ne toe fai mai a Sergey: “Ne gali faeloa ki a au a pati i te Faataoto 17:​17, telā e fai mai: ‘A te taugasoa tonu e fakaasi atu ne ia te alofa i taimi katoa kae fai pelā me se taina ne fanau mai mō taimi o te puapuaga.’ Ne fakamaoni ne au te ‵tonu o pati konā i te vaitaimi tenei o fakasauaga kae ko se mafai eiloa ne au o fakafesagai tokotasi atu ki ei. Ne tuku mai ne Ieova ki oku tafa a taugasoa kolā e se ma‵taku.” a

I te taimi e fakafesagai atu tatou ki tulaga tai faiga‵ta atu, e ma‵nako tatou ki taugasoa kolā e mafai o fakalago‵lago ki ei. Ka manakogina malosi ne tatou a latou i te taimi o te fakalavelave lasi. Tela la, ke na taumafai malosi tatou ke fai pelā me se taugasoa tonu i te taimi nei!—1 Pe. 4:​7, 8.