1-2. Kaia e ‵kau atu ei tatou ki te Fakamanatuga i tausaga takitasi?

 I TAUSAGA toeitiiti ko kātoa te 2,000 ko ‵teka, ne tuku mai ne Iesu tena ola ke mafai ei o maua ne tatou a te ola se-gata-mai. I te po mai mua o mate a ia, ne fakatonu atu a Iesu ki ana soko ke masaua a te faifaiga alofa ne fai ne ia e auala i se fakamanatuga faigofie, telā e aofia i ei te falaoa mo te uaina.—1 Koli. 11:23-26.

² E faka‵logo tatou ki te fakatonuga a Iesu me e a‵lofa malosi tatou ki a ia. (Ioa. 14:15) I tausaga takitasi i te vaitau o te Fakamanatuga, e fakaasi atu ne tatou te loto fakafetai mō te mea ne fai ne ia mai te mafaufau ‵loto kae ‵talo e uiga ki te aoga o tena mate mō tino katoa. E fia‵fia foki tatou ke momea aka te uke o ‵tou mea e fai i te galuega talai, kae fakamalosi a tino e tokouke ke ‵kau fakatasi mo tatou i te fakatasiga fakapito tenei. Tela la, ke na fakaiku aka ke mo a ma talia ke taofi aka ne so se mea a te ‵kau atu o tatou ki te Fakamanatuga.

3. Ne a mea ka sau‵tala tatou ki ei i te mataupu tenei?

³ I te mataupu tenei, ka sau‵tala tatou ki auala e tolu ne fai ei ne tino o Ieova a taumafaiga aoga e uke ke fakamanatu te mate o Iesu: (1) mai te tau‵tali ki te auala ne fai ei ne Iesu a te Fakamanatuga, (2) mai te ‵kamiga o tino ki te Fakamanatuga, kae ko te (3) mai te ‵kau atu ki te Fakamanatuga faitalia tulaga faiga‵ta.

4. Ne a muna‵tonu e faka‵mafa mai faeloa i te Fakamanatuga i tausaga takitasi, kae kaia e se ‵tau ei o manatu mā‵mā tatou ki muna‵tonu konā? (Luka 22:19, 20)

⁴ I te Fakamanatuga i tausaga takitasi, e fakalogo‵logo tatou ki se lāuga faka-te-Tusi Tapu, telā e tali faka‵lei aka ei a fesili e uke. E tauloto tatou ki te pogai e ma‵nako ei a tino ki se togiola mo te auala e mafai ne se mate o se tagata e tokotasi o fakamagalo a agasala a tino e tokouke. E fakamasaua mai ki a tatou a mea kolā e fakaata mai ne te falaoa mo te uaina, mo tino kolā e ‵tau o fakaaoga ne latou a mea fakatusa konā. (Faitau te Luka 22:19, 20.) Kae e mafaufau ‵loto tatou ki fakamanuiaga ka maua ne tino kolā e fakamoe‵moe ke ola ki te se-gata-mai i te lalolagi. (Isa. 35:5, 6; 65:17, 21-23) E se ‵tau o manatu mā‵mā tatou ki muna‵tonu konei. E lau i te fia piliona o tino e se malamalama i muna‵tonu konei, kae e se iloa foki ne latou te tāua o te taulaga a Iesu. E se fakamanatu foki ne latou te mate o Iesu i te auala ne fakatoka ne ia ke fakamanatu ne ana soko. Kaia?

5. Mai tua o te ‵mateatuga o te tokoukega o apositolo, ne fakamanatu pefea ne tino te mate o Iesu?

⁵ Mai tua malie o te ‵mateatuga o te tokoukega o apositolo a Iesu, ne ulu lēmū atu a Kelisiano ‵se ki te fakapotopotoga. (Mata. 13:24-27, 37-39) Ne fai‵pati latou “ki mea sē ‵tonu ke ‵futi atu ei a soko ki a latou.” (Galu. 20:29, 30) Tasi o “mea sē tonu” telā ne akoako fakamuli atu ne Kelisiano ‵se, ko te manatu me ne seki tuku mai ne Iesu tena foitino “fakatasi mō taimi katoa ke amo ne ia a agasala a tino e tokouke,” pelā mo te mea e fakaasi mai i te Tusi Tapu, kae e ‵tau o ofo atu faeloa ne ia a tena taulaga. (Epe. 9:27, 28) E tali‵tonu a tino e tokouke i aso nei ki te akoakoga ‵se tenā. E maopoopo fakatasi faeloa latou i lotu—i nisi taimi i aso katoa—ke fakamanatu a te mea telā ne taku ne te Lotu Katolika ki “te Taulaga a Keliso i te Sataulo.” b Nisi lotu e se fakamanatu sāle ne latou te mate o Iesu, kae e se malamalama ‵lei te tokoukega o olotou tino i te uiga o te taulaga a Iesu. Kāti e ma‵natu aka a nisi tino penei, ‘E mata, e mafai eiloa o fakamagalo aku agasala e auala i te mate o Iesu?’ Kaia e fai atu ei ne latou a te fesili tenā? Me ko tali‵tonu a nisi o latou ki tino kolā e fai mai me e se mafai o fakamagalogina a agasala e auala i te mate o Iesu. Ne ‵saga atu pefea a soko ‵tonu o Iesu ki te mea tenā?

6. I te 1872, se a te mea ne kamata o malama‵lama i ei a tino a‵koga ki te Tusi Tapu?

⁶ I te fakaotiotiga o te 19 senitenali, ne kamata ne se potukau o tino a‵koga ki te Tusi Tapu, telā ne takitaki ne Charles Taze Russell se sukesukega māea ki te Tusi Tapu. Ne fia iloa ne latou te munatonu e uiga ki te tāua o te taulaga a Iesu mo te auala e ‵tau ei o fakamanatu a tena mate. I te 1872, ne malama‵lama latou me ne tuku mai eiloa ne Iesu se togiola mō tino katoa. Ne seki ‵funa ne latou olotou mea ne iloa ki a latou eiloa. Kae ne fakasalalau atu ne latou e auala i tusi, nusipepa mo mekesini. E seki leva kae ne kamata latou o fakaakoako ki Kelisiano i te senitenali muamua, mai te maopoopo i se taimi fua e tasi i te tausaga ke fai ne latou a te Fakamanatuga.

7. Ko aoga pefea ki a tatou a sukesukega ne fai ne Tino A‵koga ki te Tusi Tapu i aso mua?

⁷ Ko aoga ki a tatou i aso nei a sukesukega ne fai ne tāgata Kelisiano fakamaoni i te fia tausaga ko ‵teka. E pefea la? Ona ko te fakamanuiaga a Ieova, ko malamalama tatou i te uiga tonu o te taulaga a Iesu mo tena aoga mō tatou. (1 Ioa. 2:1, 2) Ko iloa foki ne tatou a  fakamoemoega e lua kolā e fakamatala mai i te Tusi Tapu ka maua ne tino kolā e fakafiafia ne latou te Atua—ko te ola telā e se toe mafai o tamate i te lagi telā ka maua fua ne nai tino, mo te ola se-gata-mai telā ka maua ne te fia miliona o tino i te lalolagi nei. E gasolo o ‵pili malosi atu tatou ki a Ieova māfai e lavea atu te lasi o tena alofa mō tatou penā foki mo te aoga o te taulaga a Iesu ki a tatou taki tokotasi. (1 Pe. 3:18; 1 Ioa. 4:9) Tela la, e pelā mo ‵tou taina fakamaoni i aso mua, e ‵kami ne tatou a nisi tino ke fakamanatu fakatasi ne tatou a te Fakamanatuga i te auala telā ne fakatoka ne Iesu.

8. Ne a mea ne fai ne tino o Ieova ke ‵kami mai a nisi tino ki te Fakamanatuga? (Onoono ki te ata.)

⁸ Ne masani o ‵kami ne tino o Ieova a tino e tokouke ki te Fakamanatuga i tausaga e uke. I te kamatamataga o te 1881, ne ‵kami a taina mo tuagane i Amelika ke maopoopo ki se fale o se taina i Allegheny, Pennsylvania, mō te fakatasiga fakapito tenā. Fakamuli ifo, ne fai eiloa ne fakapotopotoga takitasi a olotou Fakamanatuga. I a Mati 1940, ne fakailoa atu ki tino talai me e mafai o ‵kami ne latou so se tino fiafia i te lotou koga talai. I te 1960, ko te taimi muamua ne maua ei ne fakapotopotoga a pepa ‵kami kolā ne ‵lomi i te Peteli. Talu mai te taimi tenā, e lau i piliona a pepa ‵kami o te Fakamanatuga ne tufatufa atu. Kaia e ga‵lue malosi ei tatou o ‵kami mai a nisi tino?

9-10. Ko oi e aoga ki a latou a ‵tou taumafaiga ke ‵kami mai a tino ki te Fakamanatuga? (Ioane 3:16)

⁹ A te pogai e tasi e ‵kami ne tatou a tino ke fakamanatu fakatasi ne tatou a te Fakamanatuga, me e ma‵nako tatou ke tauloto ne tino kolā e ‵kau mai mō te taimi muamua a te munatonu e uiga ki mea ne fai ne Ieova mo  Iesu mō tatou. (Faitau te Ioane 3:16.) E fakamoe‵moe tatou me i mea kolā e lavea kae lagona ne latou i te Fakamanatuga, ka fakamalosi atu ei ke tauloto latou ki mea e uke atu kae ke fai mo tavini a Ieova. Kae e maua foki ne nisi tino a mea aoga mai ei.

¹⁰ E ‵kami foki ne tatou a latou kolā ko se tavini nei ki a Ieova. E fai tatou penā ke fakamasaua atu ki a latou me koi alofa eiloa te Atua ki a latou. E tokouke e ‵saga mai ki te ‵tou ‵kamiga, kae fia‵fia tatou ke lavea atu latou. A te lotou ‵kau atu ki te Fakamanatuga, e fakamasaua atu ei a te lasi o te fiafia ne maua ne latou i te taimi ne tavini atu ei latou ki a Ieova i aso mua. Mafaufau ki te fakaakoakoga a Monica. c I te taimi o te masaki ‵pisi ko te COVID-19, ne toe fai ei a ia mo fai se tino talai. Mai tua o tena kauatuga ki te Fakamanatuga i te 2021, ne fai mai a ia: “Ne ‵kese ‵ki a te Fakamanatuga tenei ki a au. Tenei eiloa te taimi muamua mai tua o tausaga e 20, ko mafai ne au o talai ki tino kae ‵kami mai latou ki te Fakamanatuga. Ne tuku katoatoa atu toku loto ki ei me ne loto fakafetai au ki mea ne fai ne Ieova mo Iesu mō au.” (Sala. 103:1-4) Faitalia me talia io me e se talia ne tino a ‵tou ‵kamiga, e fai eiloa ne tatou te ‵toe mea e mafai ke ‵kami mai a tino ki te Fakamanatuga, me e iloa ne tatou me e fiafia a Ieova ki taumafaiga e fai ne tatou.

11. I auala fea ne fakamanuia ne Ieova ‵tou taumafaiga ke ‵kami mai a tino ki te Fakamanatuga? (Hakai 2:7)

¹¹ Ne fakamanuia eiloa ne Ieova a ‵tou taumafaiga ke ‵kami a tino ki te Fakamanatuga. I te 2021, faitalia fakataputapuga ona ko te masaki ‵pisi ko te COVID-19, e nofo ki se 21,367,603 tino ne ‵kau mai ki te Fakamanatuga. Toeitiiti ko ‵kava fakalua mo te āfa taimi ne ia te aofaki o Molimau a Ieova i te lalolagi kātoa! E tonu, e tiga loa e fiafia a Ieova ki te aofaki o tino, kae sili atu te tāua ki a ia a tino taki tokotasi kolā ne ‵kau mai. (Luka 15:7; 1 Timo. 2:3, 4) E tali‵tonu tatou me e fakaaoga ne Ieova te galuega ki te ‵kamiga o tino ke mafai o maua i ei a tino loto ‵lei.—Faitau te Hakai 2:7.

12. Ne a tulaga kolā e fai ei ke faigata o fai ne tatou a te Fakamanatuga? (Onoono ki te ata.)

¹² Ne ‵valo mai a Iesu me i aso fakaoti, ka fe‵paki tatou mo vaegā mea faiga‵ta kese‵kese—‵tekemaiga i kāiga, fakasauaga, taua, famai mo nisi mea e uke atu. (Mata. 10:36; Male. 13:9; Luka 21:10, 11) I nisi taimi, e fai ne fakalavelave konei ke faigata o fakamanatu ne tatou te mate o Iesu. Ne a mea ne fai ne ‵tou taina mo tuagane ke manumalo i tulaga faiga‵ta konā, kae ne fesoasoani atu pefea a Ieova ki a latou?

13. Ne fakamanuia pefea ne Ieova a te loto malosi mo te fakaikuga a Artem ke fai te Fakamanatuga i te falepuipui?

¹³ I te falepuipui. A ‵tou taina kolā e ‵pei i falepuipui ona ko te lotou fakatuanaki e fai ne latou ‵toe mea e mafai ke fakamanatu te mate o Iesu. Mafaufau ki te tala o Artem. I te vaitau o te Fakamanatuga i te 2020, ne ‵pei a ia ki se potu e 17-sikuea-mita (183-s-ft) te lasi telā e ofi fua i ei a pagota e tokolima. Faitalia me ne ‵pei a ia i te falepuipui, ne mafai o maua ne ia a mea fakatusa ke fakaaoga i te Fakamanatuga, kae ne fakatoka ke fai ne ia te lāuga o te Fakamanatuga ki a ia eiloa. Kae ko nisi pagota i te potu ne ‵pusi kae pati ma‵sei faeloa. Ne a ana mea ne fai? Ne fakamolemole atu a ia ki a latou ke taofi malie te lotou ‵pusi mo te pati ma‵sei mō se itula fua e tasi. Ne poi a Artem me ne talia ne latou ke sē ‵pusi io me pati ma‵sei i te taimi o te Fakamanatuga. Ne fai mai a Artem, “Ne fiafia au ke faipati atu ki a latou e uiga ki te Fakamanatuga.” E tiga loa ne fai mai latou  me e se fia fakalogo‵logo ki te lāuga, kae i te laveaga kae lagona ne latou a te faiga ne Artem a te Fakamanatuga, ne fai atu ne latou a fesili e uke e uiga ki ei.

14. Ne a taumafaiga ne fai ke fai te Fakamanatuga faitalia te masaki ‵pisi ko te COVID-19?

¹⁴ I te masaki ‵pisi ko te COVID-19. I te pokoga o te masaki ‵pisi tenei, ne seki mafai ne tino o Ieova o ‵kau fakatasi o fai te Fakamanatuga. Kae ne seki taofi aka ne te mea tenā latou mai te faiga o te Fakamanatuga. d Ne fai ne nisi fakapotopotoga a te Fakamanatuga e auala i te itaneti. Kae e a te fia miliona o tino kolā e seai ne olotou itaneti? I nisi fenua, ne fai a fakatokaga ke fakasalalau a te lāuga i televise io me ko te letio. E se gata i ei, ne puke ne ofisa lagolago a te lāuga i ‵gana e silia mo te 500, ke mafai o fakamanatu ne tino i fakai ‵mao a te Fakamanatuga. Kae ne fai a fakatokaga ne taina fakamaoni ke avatu a lāuga konā ki tino kolā e ma‵nako ki ei.

15. Ne a au mea ne tauloto mai te fakaakoakoga a Sue, telā se akoga faka-te-Tusi Tapu?

¹⁵ ‵Tekemaiga i kāiga. Ki nisi tino, a te ‵toe  mea faigata e taofi aka ei latou ke se ‵kau ki te Fakamanatuga, ko ‵tekemaiga i kāiga. Mafaufau ki te fakaakoakoga a Sue, telā se akoga faka-te-Tusi Tapu. I te 2021, i te aso mai mua o te Fakamanatuga, ne fai atu a Sue ki tena faiakoga me ka se mafai o kau atu a ia ki te Fakamanatuga, ona ko ‵tekemaiga i te fale. Ne faitau atu ne tena faiakoga a te Luka 22:44. Oti aka, fakamatala atu ei ne ia ki tou fafine me kafai e fe‵paki tatou mo tulaga faiga‵ta, e ‵tau o tau‵tali tatou ki te fakaakoakoga a Iesu mai te ‵talo atu ki a Ieova kae tali‵tonu katoatoa ki a Ia. I te aso mai tua, ne fakatoka ne Sue te falaoa mo te uaina, kae onoono ki te polokalame fakapito ko te Tapuakiga i Taeao i te jw.org. I te afiafi tenā, ne nofo tokotasi a ia i tena potu, kae fakalogologo ki te Fakamanatuga i tena telefoni. Mai tua ifo, ne tusi atu a Sue ki tena faiakoga: “Ne lasi ‵ki tau fakamalosiga ki a au i te aso anafi. Ne fai ne au a mea katoa e mafai o fai ke kau atu ki te Fakamanatuga, kae ne fesoasoani mai eiloa a Ieova. E se mafai o fakamatala ne au a te lasi o toku fiafia mo te loto fakafetai!” E mata, e mafaufau koe me e mafai o fesoasoani atu a Ieova māfai e fepaki koe mo se tulaga tai ‵pau penā?

16. Kaia e tali‵tonu ei tatou me ka fakamanuia ne Ieova a ‵tou taumafaiga ke ‵kau atu ki te Fakamanatuga? (Loma 8:31, 32)

¹⁶ E fakatāua malosi ne Ieova ‵tou taumafaiga ke fakamanatu te mate o Iesu. E tali‵tonu tatou me ka fakamanuia ne ia tatou māfai e fakaasi atu te loto fakafetai ki mea ne fai ne ia mō tatou. (Faitau te Loma 8:31, 32.) Tela la, ke na fakaiku aka ke ‵kau tatou ki te Fakamanatuga i te tausaga tenei, kae fai a mea e mafai o fai ke aofia malosi tatou i galuega faka-te-agaga i te vaitau o te Fakamanatuga.