1. Se a te mea faigata e ‵tau o fai ne tatou katoa?

 I ASO katoa, e ‵tau eiloa o fai ne tatou a fakaikuga. Nisi fakaikuga e faigofie, e pelā mo au mea‵kai ke kai i te taeao io me ko te taimi fea e moe ei koe. Nisi fakaikuga e faigata ‵ki. E mafai o pokotia i ei ‵tou ola ‵lei, ‵tou fia‵fia, ‵tou tino pele, io me ko te ‵tou tapuakiga. E ma‵nako tatou ke aoga a ‵tou fakaikuga ki a tatou mo ‵tou kāiga. Kae ko te ‵toe mea tāua, e fakamoe‵moe tatou ke fiafia a Ieova ki ‵tou fakaikuga.—Loma 12:​1, 2.

2. Ne a auala ka fesoasoani atu ke fai ne koe a fakaikuga ‵poto?

² Kāti ka manako koe o fai se fakaikuga poto māfai ko (1) maua ne koe a fakamatalaga ‵tonu, te (2) mafaufau ki te kilokiloga a Ieova e uiga ki tau fakaikuga, kae ko te (3) iloilo faka‵lei a mea e mafai o fai ne koe. Ka sau‵tala tatou i te mataupu tenei ki auala e tolu konā, kae ka fesoasoani mai foki ke lavea ne tatou te auala e mafai o akoako ne tatou te malosi o ‵tou mafaufau.—Faata. 2:11.

‵SALA KI FAKAMATALAGA ‵TONU

3. Fakamatala mai te pogai e tāua ei ke ‵sala koe ki fakamatalaga ‵tonu a koi tuai o fai sau fakaikuga.

³ A te auala muamua ke mafai o fai se fakaikuga ‵lei, ko te ‵sala ke maua a fakamatalaga ‵tonu. Kaia e tāua ei te mea tenei? Mafaufau la māfai e fano se tino ki te tokita ona ko ia e masaki. E mata, ka fakaiku aka ne te tokita ke na talavai fua e aunoa mo te iloilo faka‵lei tena masaki io me fai atu a fesili ki ei? Ikai. Ka fai foki ne koe a fakaikuga tai ‵lei atu māfai ko maua ne koe a fakamatalaga ‵tonu kolā e aoga ki tou tulaga. E fai pefea ne koe te mea tenā?

4. E ‵tusa mo te Faataoto 18:​13, e maua pefea ne koe a fakamatalaga ‵tonu? (Onoono foki ki te ata.)

 ⁴ E mafai eiloa o maua ne koe a fakamatalaga ‵tonu e auala i te faiga o fesili. Mafaufau la me ‵kami koe ki se patī. E mata, e ‵tau o kau koe ki ei? Kafai e se masani ‵lei koe mo te tino i a ia te patī io me e se iloa ne koe a fakatokaga ki ei, ka manakogina ke fesili atu koe ki ei, penei: “Tefea te koga ka fai ei te patī kae mafea foki? E tokofia a tino ka ‵kau atu ki ei? Ko oi ka takitaki ne ia te patī tenā? Ko oi ka ‵kau atu ki ei? Ne a mea ka fai i te patī tenā? E mata, ka isi ne meainu ma‵losi e fakaaoga i ei?” Ka fesoasoani atu a tali ki fesili konā ke fai ne koe se fakaikuga poto.—Faitau te Faataoto 18:13.

5. Ne a mea e ‵tau o fai ne koe māfai ko maua ne koe a fakamatalaga ‵tonu?

⁵ E se gata i ei, kafai ko maua ne koe a fakamatalaga ‵tonu, mafaufau faka‵lei ki te ata kātoa. E pelā me se fakaakoakoga, e a māfai e iloa ne koe me i tino kolā ka ‵kau ki te patī e se fakatāua ne latou a fakatakitakiga i te Tusi Tapu io me ka isi ne meainu ma‵losi ka fakaaoga kae seai se tino ka fakasoa faka‵lei ne ia? E mata, ka mafai eiloa o se ‵lei te patī tenā? (1 Pe. 4:3) I te suā feitu, e a māfai a te patī tenā e fai i te aso e fai ei te fakatasiga i tau fakapotopotoga io me ko te galuega talai? Kafai ko lavea ne koe te ata kātoa, ka faigofie eiloa ke fai ne koe se fakaikuga ‵lei. Kae e isi aka se suā auala e ‵tau o fai ne koe. Ko iloa nei ne koe a te  ata kātoa o te tulaga tenā; kae e pefea a lagonaga o Ieova e uiga ki ei?—Faata. 2:6.

MAFAUFAU KI TE KILOKILOGA A IEOVA

6. E ‵tusa mo te Iakopo 1:​5, kaia e ‵tau ei o ‵talo atu tatou mō te fesoasoani o Ieova?

⁶ ‵Talo ki a Ieova ke fesoasoani atu ke malamalama koe i ana mafaufauga. E tauto mai a Ieova me ka tuku mai ne ia te poto ke iloa ne tatou o filifili te auala telā e fakafiafia atu ki a ia. E tuku mai ne ia te vaegā poto tenā “mo te kaimalie ki tino katoa e aunoa mo te mafaufau ki olotou mea ‵se ne fai.”—Faitau te Iakopo 1:5.

7. E mafai pefea o iloa ne koe a mafaufauga o Ieova? Fakamatala mai.

⁷ Kafai e ‵talo atu koe mō te takitakiga a Ieova, saga tonu atu ki tena tali. Ke fai se fakatusaga: Kafai koe ne malaga ki se fenua kae galo, e mafai o fesili atu koe ki se tino o te fenua tenā mō se fesoasoani. Kae e mata, ka sasale koe kea‵tea a koi tuai o fai atu sena tali? Ailoga loa. Ka fakalogologo faka‵lei koe ke fakaasi mai ne ia tou auala. I se auala tai ‵pau, kafai ko oti ne ‵talo koe ki a Ieova ke maua te poto, taumafai ke lavea ne koe tena tali mai te ‵sala atu ki tulafono mo fakatakitakiga i te Tusi Tapu kolā e fetaui ‵lei mo tou tulaga. E pelā me se fakaakoakoga, kafai e fai tau fakaikuga me e mata e kau koe ki te patī telā ne taku atu muamua, kāti ka mafaufau muamua koe ki pati i te Tusi Tapu e uiga ki patī sē ‵lei, taugasoa ma‵sei, mo te tāua ke fakamuamua a manakoga o te Malo i lō ou manakoga totino.—Mata. 6:33; Loma 13:13; 1 Koli. 15:33.

8. Ne a au mea e mafai o fai ma manako koe ki se fesoasoani ke maua a fakamatalaga e manakogina ne koe? (Onoono foki ki te ata.)

 ⁸ Kae i nisi taimi, kāti e manako koe ki se fesoasoani ke ‵sala ki fakamatalaga e manakogina ne koe. E mafai o maua ne koe ne manatu fesoasoani mai se taina io me se tuagane atamai. Kae ka maua foki ne koe a mea aoga māfai e fai au sukesukega totino. E uke ‵ki a fakamatalaga aoga mai ‵tou mea faigaluega mō fai a sukesukega, e pelā mo te Research Guide for Jehovah’s Witnesses mo te Scriptures for Christian Living. Masaua me i tou fakamoemoega, ko te faiga o se fakaikuga telā ka fakafiafia atu ki a Ieova.

9. E mafai pefea o mautinoa i a tatou me ka fiafia a Ieova ki ‵tou fakaikuga? (Efeso 5:17)

⁹ E mafai pefea o mautinoa i a tatou me ka fiafia a Ieova ki ‵tou fakaikuga? Muamua la, e ‵tau o iloa ‵lei ne tatou a ia. “Te iloaga o te Atua Tafasili i te Tapu ko te malamalama,” ko pati a te Tusi Tapu. (Faata. 9:10) Ao, a te malamalama tonu e maua māfai e iloa ‵lei ne tatou a uiga o Ieova, tena fuafuaga, mo mea e fiafia io me takalialia a ia ki ei. Fesili ifo ki a koe, ‘E ‵tusa mo aku mea e iloa e uiga ki a Ieova, se a te fakaikuga e mafai ne au o fai ke fakafiafia atu ki a ia?’—Faitau te Efeso 5:17.

10. Kaia e tāua atu ei a fakatakitakiga i te Tusi Tapu i lō ‵tou kāiga io me ko tuu mo aganuu?

¹⁰ Ko te mea ke fakafiafia a Ieova, i nisi taimi e ‵tau o fai ne tatou se mea telā ka fakafanoanoa atu ki tino kolā e ‵pili mai ki a tatou. E pelā me se fakaakoakoga, nisi mātua mau‵mea kāti e ma‵nako ke avaga te lā tamaliki fafine ki se tagata maumea—io me se tino telā e mafai o ‵togi ne ia te lā tama ki se aofaki tupe lasi ‵ki—faitalia foki loa me e se malosi tou tagata i te feitu faka-te-agaga. E tonu, e ma‵nako lāua ke ‵lei te olaga o te lā tama i te feitu faka-te-foitino, kae ko oi ka fesoasoani atu ki a ia ke gasolo ki mua i te feitu faka-te-agaga? Se a te kilokiloga a Ieova ki ei? E maua ne tatou a te tali i te Mataio 6:33. E fakamalosi mai i konā ki Kelisiano ke tumau i te “‵sala muamua ki te Malo.” E tiga loa e āva tatou ki ‵tou mātua mo tino i te ‵tou fenua, a te ‵toe mea tāua ki a tatou, ko te faiga ke fiafia a Ieova.

ILOILO FAKA‵LEI AU MEA E MAFAI O FAI

11. Se a te uiga e fakaasi mai i te Filipi 1:​9, 10 ka fesoasoani atu ke lavea ne koe a ikuga o mea kolā e mafai ne koe o fai?

¹¹ Kafai ko oti ne iloilo faka‵lei ne koe a fakatakitakiga i te Tusi Tapu kolā e fakavae ki ei tau fakaikuga, e manakogina ke onoono faka‵lei koe ki au mea e mafai o fai. (Faitau te Filipi 1:​9, 10) Ka fesoasoani atu a te uiga ko te malamalama ke lavea ne koe a ikuga o mea takitasi e mafai o fai ne koe. Nisi taimi, e faigofie fua ke fai se fakaikuga. Kae e se ko fakaikuga katoa e faigofie ke fai. Ka fesoasoani atu a te malamalama ke fai ne koe a fakaikuga ‵poto ke oko foki loa ki tulaga kolā e faigata ke fai ne fakaikuga ki ei.

12-13. E fesoasoani atu pefea a te malamalama ke fai ne koe se fakaikuga poto e uiga ki galuega ‵togi?

¹² Mafaufau ki te tulaga tenei. E salasala koe ki se galuega ‵togi ke tausi atu ki tou kāiga. E lua a galuega e avanoa mai. E onoono koe ki fakamatalaga katoa, te vaegā galuega tenā, taimi ga‵lue, taimi ke faimalaga atu ki ei, mo nisi mea aka. A galuega katoa konā e ‵lei i te kilokiloga a te Tusi Tapu. Kāti e gali ki a koe te galuega e tasi ona ko vaegā galuega e fai i ei, io me ko te lasi o te ‵togi i ei. Kae e uke aka foki a nisi mea e ‵tau o iloilo faka‵lei ne koe a koi tuai o fai sau fakaikuga.

¹³ E pelā me se fakaakoakoga, e mata, e fe‵paki a taimi ga‵lue i galuega konā mo taimi o fakatasiga i tau fakapotopotoga? E mata, ka fai ne galuega ‵togi konei ke se lava tou taimi ke tausi atu ki tou kāiga i te feitu faka-te-agaga mo mea tau lagonaga? A te mafaufau ki fesili  konei ka fesoasoani atu ke fakamuamua ne koe “a mea kolā e sili atu i te tāua”—tau tapuakiga mo manakoga o tou kāiga—i lō manakoga faka-te-foitino. Tenā ko mafai ei o fai ne koe se fakaikuga telā ka fakamanuia ne Ieova.

14. Ka fesoasoani mai pefea a te malamalama mo te fakaasiatuga o te alofa ke ‵kalo kea‵tea tatou mai te fai ke ‵siga a nisi tino?

¹⁴ A te malamalama e fakamalosi foki i ei tatou ke mafau‵fau ki te auala e pokotia ei a nisi tino i ‵tou fakaikuga, kae “ke mo a ma faka‵siga ne [tatou] a nisi tino.” (Fili. 1:​10, fml) E tāua ‵ki te mea tenei māfai ko fai ‵tou fakaikuga totino i feitu ki mea tau gatu mo teuga. E pelā me se fakaakoakoga, kāti e isi ne vaegā gatu io me ko teuga e fia‵fia tatou ki ei. Kae e a māfai e se fia‵fia a nisi tino i loto io me i tua o te fakapotopotoga ki ei? Ka fesoasoani mai a te malamalama ke āva tatou ki olotou lagonaga. Ka fakamalosi aka tatou ne te alofa ke ‵sala atu ki mea kolā e ‵lei ei te “suā tino” kae ke agamalu. (1 Koli. 10:​23, 24, 32; 1 Timo. 2:​9, 10) Mai te  fai penā, ko fai ne tatou se fakaikuga telā e fakaasi atu i ei te ‵tou a‵lofa mo te āva ki nisi tino.

15. Se a te palani e manakogina ke fai koi tuai o fai se fakaikuga tāua?

¹⁵ Kafai e fai ne koe se fakaikuga tāua, mafaufau ki mea e aofia i ei. Ne akoako mai a Iesu ke ‘galue ne tatou te ‵togi.’ (Luka 14:28) Tela la, ke mafaufau faka‵lei ki te aofaki o taimi, kope, mo taumafaiga e manakogina, ko te mea ke fai ne koe se fakaikuga telā e ‵lei. I nisi taimi, e mafai o fai‵pati koe mo te otou kāiga ki mea e mafai ne latou o fai ke ‵lago atu ki te fakaikuga tenā. Kaia e tāua ei te vaegā palani tenei? Me e mafai o lavea atu i ei a nisi fakama‵fuliga kolā e manakogina ke fai io me se manatu tai ‵kese telā e mafai o aoga. Kae kafai e aofia ne koe tou kāiga kae fakalogologo ki olotou manatu, ka toka eiloa latou o ga‵lue fakatasi mo koe ke fakataunu te fakaikuga tenā.—Faata. 15:22.

FAI SE FAKAIKUGA TELĀ KA IKU ATU KI TE MANUIA

16. Ne a auala ka fesoasoani atu ki a koe ke fai se fakaikuga telā ka iku ki te manuia? (Onoono foki ki te pokisi “ Te Auala ke Fai a Fakaikuga ‵Poto.”)

¹⁶ Kafai e tautali koe i auala kolā ne faka‵mafa atu mai luga, ko toka eiloa koe o fai se fakaikuga poto. Ko oti ne maua ne koe a fakamatalaga kae iloilo a fakatakitakiga kolā ka fesoasoani atu ke fai ne koe se fakaikuga telā e fakafiafia atu ki a Ieova. Nei la, ko mafai o ‵talo atu koe ki a Ieova ke fakamanuia ne ia tau fakaikuga.

17. Se a te kī ki te faiga o fakaikuga ‵lei?

¹⁷ Kafai foki loa ko uke a fakaikuga ne fai ne koe i aso mua kae ne iku atu ki te manuia, masaua me i te kī ki te faiga o fakaikuga ‵lei e se fakalagolago ki tou poto io me ko tou iloa, kae ki te poto mai i a Ieova. Ko ia fua tokotasi e mafai o tuku mai ne ia te iloaga tonu, te malamalama, mo te atamai ke fai a faka‵tauga ‵lei—ko mea kolā e fakavae ki ei te poto. (Faata. 2:​1-5) E mafai ne Ieova o fesoasoani atu ke fai ne koe a fakaikuga kolā e fakafiafia atu ki a ia.—Sala. 23:​2, 3.