1. Ne a mea e mafai ne tatou o fai ke fiafia a Ieova?

 MAFAUFAU me tuku atu ne koe se meaalofa fakapito telā e gali kae aoga ki se tino e alofa koe ki ei. Ka fanoanoa eiloa koe māfai e tuku ne ia te meaalofa tenā ki se pokisi kae se fia mafaufau ki ei! I te suā feitu, ka fiafia eiloa koe māfai e fakaasi atu ne ia te loto fakafetai ki te meaalofa tenā mai te fakaaoga ne ia. Se a te manatu tāua i konei? Ko oti ne tuku mai ne Ieova tena Tama ke mate mō tatou. Ka fiafia a Ieova māfai e fakaasi atu ‵tou loto fakafetai ki te meaalofa tāua tenā, penā foki tena alofa telā ne fakamalosi atu ki a ia ke tuku mai te togiola!—Ioa. 3:16; Loma 5:​7, 8.

2. Ne a mea ka sau‵tala tatou ki ei i te mataupu tenei?

² I te gasologa o taimi, kāti ka kamata o manatu mā‵ma tatou ki te meaalofa ko te togiola. E pelā eiloa me ko ‵fao ne koe te meaalofa a te Atua ki se pokisi. E fia‵fia tatou ke maua, kae e se ma‵nako o mafau‵fau ki ei. Ke mo a e tupu te mea tenā, e ‵tau o mafau‵fau faeloa tatou ki mea katoa ne fai ne te Atua mo Keliso mō tatou. E mafai o fesoasoani mai te mataupu tenei ke fai ne tatou te mea tenā. Ka sau‵tala tatou ki auala e maua ei ne tatou a mea aoga mai te togiola i te taimi nei, penā foki mo aso mai mua. Ka onoono foki tatou ki te auala e mafai o fakaasi atu ‵tou loto fakafetai ki te alofa o Ieova, maise loa i te vaitaimi tenei o te Fakamanatuga.

TE AOGA O TE TOGIOLA KI A TATOU I TE TAIMI NEI

3. Se a te auala e tasi e aoga ei te togiola ki a tatou i te taimi nei?

³ Ko oti ne maua ne tatou a mea aoga mai te taulaga togiola a Keliso. E pelā me se fakaakoakoga, e auala i te togiola, e fakamagalo  ne Ieova ‵tou agasala. E se i o ia te tiute ke fakamagalo ne ia tatou. Kae e manako eiloa a ia o fai te mea tenā. Ne usu mai te faisalamo loto fakafetai, penei: “Me i a koe e Ieova, e ‵lei kae e toka o fakamagalo.”—Sala. 86:5; 103:​3, 10-13.

4. Ne fakatoka ne Ieova te togiola mo oi? (Luka 5:32; 1 Timoteo 1:15)

⁴ Nisi tino e mafau‵fau me e se ‵tau o maua ne latou te fakamagaloga a Ieova. A te ‵tonuga loa, e se ‵tau eiloa o fakamagalogina tatou katoa. Ne iloa ne te apositolo ko Paulo me ne “seki ‵tau o taku [a ia] ki se apositolo.” Kae ne toe fai mai ia: “Kae ona ko te alofa tauanoa o te Atua, ko fai ei au penei.” (1 Koli. 15:​9, 10) Kafai e sala‵mo tatou ki ‵tou agasala, e fakamagalo ne Ieova tatou. Kaia? E se ona ko te mea e ‵tau o fai penā, kae ona ko tena alofa ki a tatou. Kafai e fanoanoa koe ona ko te mafaufau i a koe e se aoga, masaua me ne fakatoka ne Ieova te togiola mō tino agasala kolā e sala‵mo, kae e se mō tino kolā e seai ne olotou agasala.—Faitau te Luka 5:32; 1 Timoteo 1:15.

5. E mata, e ‵tau eiloa o maua ne tatou a te fakamagaloga a Ieova? Fakamatala mai.

⁵ E se ‵tau o mafau‵fau tatou me e ‵tau o fakamagalo ne Ieova tatou ona ko te uke o tausaga ne tavini tatou ki a ia. E tonu, e se puli i a Ieova ‵tou taviniga fakamaoni. (Epe. 6:10) Ne tuku mai ne ia tena Tama e pelā me se meaalofa, kae e se pelā me se taui o ‵tou galuega ‵lei ne fai mō ia. Tela la, se mea ‵se ke mafau‵fau me ona ko te uke o mea ne fai ne tatou mō Ieova, ka fakamagalo ne ia tatou. Kafai e mafau‵fau tatou penā, ko tena uiga, e pelā me ko se manakogina ne tatou te togiola.—Fakatusa ki te Kalatia 2:21.

6. Kaia ne galue malosi ei a Paulo i te galuega a Ieova?

⁶ Ne iloa ne Paulo me seki ‵tau o maua ne ia te taliaga a te Atua. Tela la, kaia ne galue malosi a ia i te galuega a Ieova? Ne fai a ia penā e se ko te mea ke fakamaoni atu me e ‵tau eiloa o maua ne ia te taliaga a te Atua, kae ke fakaasi atu tena loto fakafetai ki te alofa tauanoa o Ieova. (Efe. 3:7) E pelā mo Paulo, e tumau eiloa tatou i te tavini atu mo te loto finafinau ki a Ieova, e se ko te mea fua ke maua tena fakamagaloga, kae ke fakaasi atu eiloa te loto fakafetai ki a ia.

7. Se a te suā auala e aoga ei ki a tatou te togiola i te taimi nei? (Loma 5:1; Iakopo 2:23)

⁷ A te suā auala e aoga ki a tatou te togiola i te taimi nei, me e mafai o maua ne tatou se fesokotakiga totino kae ‵pili mo Ieova. a E pelā mo te mea ne fakasae mai i te mataupu mai mua, ne seki maua ne tatou se fesokotakiga mo te Atua i te taimi ne fa‵nau ei tatou. Kae ona ko te togiola, ko mafai o maua ne tatou a te “filemu o te Atua” kae fakapili‵pili atu ki a ia.—Faitau te Loma 5:1; Iakopo 2:23.

8. Kaia e ‵tau ei mo tatou o loto fakafetai ki a Ieova mō te tauliaga ke ‵talo?

⁸ Tasi o auala e mafai o ‵pili ‵tou fesokotakiga mo Ieova—ko te ‵talo atu ki a ia. E se lagona fua ne Ieova a ‵talo a ana tino i mua o tino e tokouke māfai ko maopoopo fakatasi, kae penā foki a ‵talo a tatou taki tokotasi. E fai ne ‵talo ke maua ne tatou se loto tokagamalie mo te filemu o te mafaufau, kae uke atu foki nisi mea aoga e maua ne tatou mai ei. E mafai o fakamalosi ei ‵tou va fakataugasoa mo te Atua. (Sala. 65:2; Iako. 4:8; 1 Ioa. 5:14) I te nofoga i te lalolagi, ne ‵talo faeloa a Iesu, me ne iloa ne ia me i a Ieova e fakalogologo ki a ia, kae fai ne ‵talo ke malosi ‵ki tena fesokotakiga mo tena Tamana. (Luka 5:16) Ko oko eiloa i te ‵tou  loto fakafetai, me e auala i te taulaga a Iesu, ko mafai o fai tatou mo taugasoa o Ieova kae fai‵pati atu foki ki a Ia i ‵talo!

TE AOGA O TE TOGIOLA KI A TATOU I ASO MAI MUA

9. Ka aoga pefea a te togiola ki tino tapuaki fakamaoni i aso mai mua?

⁹ Ka aoga pefea ki tino tapuaki fakamaoni a Ieova a te togiola i aso mai mua? Ka maua ne latou a te ola se-gata-mai. E tokouke a tino e mafau‵fau me e se mafai o ola ki te se-gata-mai, me koi ‵mate eiloa a tino e tokouke. Kae tenā eiloa te fuafuaga a Ieova i te kamataga, ko tino ke ola ki te se-gata-mai. Moi ne seki agasala a Atamu, ailoga e mafaufau se tino me e se tonu te mea tenā. Kae tiga eiloa e faigata i te taimi nei ke fakaataata i ‵tou mafaufau me mafai o ola a tino ki te se-gata-mai, kae e tali‵tonu tatou me e mafai eiloa, me ko oti ne ‵togi ne Ieova se ‵togi maluga ‵ki, telā ko te ola o tena Tama pele, ke mafai o maua ne tatou te fakamoemoega tenā.—Loma 8:32.

10. Ne a mea e olioli ki ei a tino fakaekegina mo nisi mamoe?

¹⁰ E tiga eiloa a te ola se-gata-mai se fakamanuiaga e maua ne tatou i aso mai mua, kae e manako a Ieova ke mafau‵fau tatou ki ei i te taimi nei. E olioli te kau fakaekegina ki te ola i te lagi māfai ko pule mai latou ki te lalolagi nei fakatasi mo Keliso. (Faka. 20:6) E olioli a nisi mamoe ke ola i te lalolagi palataiso telā ka saoloto mai te logo‵mae mo te fanoanoa. (Faka. 21:​3, 4) E mata, a koe se tokotasi o nisi mamoe telā e fakamoemoe ke ola ki te se-gata-mai i te lalolagi nei? A te taui tenei e se fai pelā me e malalo ifo i te taui ke ola i te lagi! Kae ko te fakamoemoega eiloa telā ne fakatoka ne Ieova mō tino katoa. Ko te ola ki te se-gata-mai mo te fia‵fia i te lalolagi nei.

11-12. Ne a nisi fakamanuiaga e mafai o olioli tatou ki ei i te Palataiso? (Onoono foki ki ata.)

¹¹ Fakaataata aka la ne koe te vaegā olaga i te lalolagi Palataiso. Ka se manavase koe e uiga ki masaki mo te mate. (Isa. 25:8; 33:24) Ka fakamalie katoatoa ne Ieova a manakoga ‵tau o  koe. Ne a mea e manako koe o fai? E mata, e manako koe o tauloto ki mea e uke atu e uiga ki manu, ke iloa o tātā a pese mo te ‵lomi ata? Seai se fakalotolotolua me ka manakogina a tino ‵lomi ata, tino faite fale, mo tino fai fatoaga. E mautinoa eiloa me ka manakogina foki ke fai ne tino a galuega e pelā mo te fakatokaga o mea‵kai, faite a mea faigaluega, kae ‵toki a lakau kae tausi atu ki ei. (Isa. 35:1; 65:21) Kafai ko ola koe ki te se-gata-mai, ka maua eiloa ne koe te taimi ke fai a mea e uke ‵ki eiloa.

¹² Se mea fakafiafia foki ke fakafetaui atu ki tino kolā ka toe faka‵tu mai ki te ola! (Galu. 24:15) Mafaufau foki la ki te fiafia ka maua ne koe ke tauloto ki mea e uke e uiga ki a Ieova, mai te sukesuke ki ana mea e uke ne faite. (Sala. 104:24; Isa. 11:9) Kae sili atu i mea katoa, ka se toe fai ne koe se mea ‵se, tela la, ka tapuaki atu eiloa koe ki a Ieova mo te fiafia! E mata, ka fakaseaoga ne koe a fakamanuiaga konei i aso mai mua ona fua “ko fakafiafiaga o te agasala kolā e se tumau”? (Epe. 11:25) Ikai! A fakamanuiaga konei e sili fakafia atu i so se mea e mafai ne tatou o maua i te lalolagi i te taimi nei. Masaua, a te lalolagi Palataiso e sē se fakamoemoega telā ka olioli faeloa tatou ki ei. Ka fai eiloa pelā me ko te koga ka ola i ei tatou i aso takitasi. Moi se alofa a Ieova o tuku mai te meaalofa telā ko tena Tama, penei e se maua ne tatou a fakamanuiaga konei!

FAKAASI TOU LOTO FAKAFETAI KI TE ALOFA O IEOVA

13. E fakaasi atu pefea ne tatou te loto fakafetai ki te alofa o Ieova? (2 Kolinito 6:1)

¹³ E fakaasi atu pefea ne tatou te loto fakafetai ki a Ieova mō te tukumaiga o te togiola? Mai te fakamuamua ne tatou a tena galuega i ‵tou olaga. (Mata. 6:33) E se gata i ei, ne mate a Iesu “ko te mea ko tino kolā e ola ke se toe ola mō latou eiloa, kae mō ia telā ne mate mō latou kae toe fakatu aka.” (2 Koli. 5:15) E mautinoa eiloa me e se ma‵nako tatou o fakaseaoga te alofa tauanoa tenei o Ieova.—Faitau te 2 Kolinito 6:1.

14. E fakaasi atu pefea ne tatou a te fakatuanaki ki fakatonuga a Ieova?

¹⁴ E loto fakafetai foki tatou ki te alofa o Ieova mai te fakaasi atu te fakatuanaki ki ana fakatonuga. Pefea la? Kafai e fai ‵tou fakaikuga e uiga ki akoakoga ma‵luga io me ko galuega ‵togi, e ‵tau o mafau‵fau tatou ki te mea e manako a Ieova ke fai ne tatou. (1 Koli. 10:31; 2 Koli. 5:7) Kafai e fakaasi atu ne tatou te fakatuanaki, ka tupu eiloa se mea gali—ka gasolo aka eiloa o malosi te ‵tou fakatuanaki mo te ‵tou va fakataugasoa mo Ieova. Kae ka mautinoa faka‵lei eiloa a ‵tou fakamoemoega ke ola ki te se-gata-mai.—Loma 5:​3-5; Iako. 2:​21, 22.

15. E fakaasi atu pefea ‵tou loto fakafetai i te vataimi o te Fakamanatuga?

¹⁵ E isi aka foki se isi auala e mafai o fakaasi atu ‵tou loto fakafetai ki te alofa o Ieova. Mai te fakaaoga te vaitaimi o te Fakamanatuga ke fakaasi atu ki a Ieova te ‵tou loto fakafetai mō  te togiola. E se gata fua i te palani ke kau ki te Fakamanatuga, e mafai o ‵kami ne tatou a nisi tino ke ‵kau mai. (1 Timo. 2:4) Fakamatala ki au tino ‵kami a mea ka fai i te Fakamanatuga. E gali ma fakaasi atu ne koe ki a latou a vitio i te jw.org ko te Kaia ne Mate ei a Iesu? mo te Ke Masaua te Mate o Iesu. E ‵tau o mautinoa i toeaina ke ‵kami a tino kolā ko ‵mate faka-te-agaga. Mafaufau ki te fia‵fia e maua ne te kau o te lagi mo te lalolagi māfai ko gasue‵sue a mamoe kolā ne ‵galo ke toe ‵foki mai ki te lafu! (Luka 15:​4-7) I te Fakamanatuga, fai pelā me se fakamoemoega ke fakatalofa atu ki tino ‵fou io me ko latou kolā ko leva seki toe ‵kau mai. E ma‵nako tatou ke mo a latou e ‵mā!—Loma 12:13.

16. Kaia e ‵tau ei o mafau‵fau tatou ke fakalauefa aka ‵tou galuega talai i te vaitaimi o te Fakamanatuga?

¹⁶ E mata, e mafai o momea aka te uke o au mea e fai i te taviniga a Ieova i te vaitaimi o te Fakamanatuga? A te fai penā se fakaasiga o te loto fakafetai ki mea katoa ne fai ne te Atua mo Keliso mō tatou. Ko te uke o mea e fai ne tatou i te taviniga a Ieova, ko te lavea ‵lei foki ne tatou tena fesoasoani, kae fai ei ke gasolo o malosi te ‵tou loto tali‵tonu ki a ia. (1 Koli. 3:9) E se gata i ei, ke fai tau faitauga ki tusi fai‵tau o te Fakamanatuga kolā e fakaasi mai i te Ke Suke‵suke ki te Tusi Tapu i Aso Katoa io me i te tiāti o te tusi mō fakatasiga. E mafai foki o filifili ne koe a fuaiupu konā i te Tusi Tapu ke fai ki ei au sukesukega totino.

17. Se a te mea e fakafiafia atu ki a Ieova? (Onoono foki ki te pokisi “ Auala ke Fakaasi Atu te Loto Fakafetai ki te Alofa o Ieova.”)

¹⁷ E tonu, e mafai o se uke au mea e fai i te galuega a Ieova ona ko ou fakanofonofoga. Kae masaua, a Ieova e se fakatusa‵tusa ne ia au mea e fai mo nisi tino; a ia e kilo ki tou loto. E fiafia a ia ke lavea ne ia te lasi o tou loto fakafetai mō tena meaalofa tāua ko te togiola.—1 Samu. 16:7; Male. 12:​41-44.

18. Kaia e loto fakafetai ei tatou ki a Ieova te Atua mo Iesu Keliso?

¹⁸ Ona ko te togiola ko mafai o fakamagalo ‵tou agasala, maua se va fakataugasoa mo Ieova, mo te fakamoemoega ke ola ki te se-gata-mai. Ke na fakaasi atu faeloa ‵tou loto fakafetai mō te alofa o Ieova, kae ka fai ei ke tuku mai ne ia a fakamanuiaga konei ki a tatou. (1 Ioa. 4:19) Ke na fakaasi atu foki ne tatou te loto fakafetai ki a Iesu, telā ne tuku mai ne ia tena ola ke mate mō tatou, ona ko te lasi o tena alofa ki a tatou!—Ioa. 15:13.